Read Bafia GÀLAT 1 Bible Online

GÀLAT 1 - Bafia bible

GÀLAT 1

¹Mɛ̀ Pol ànɛ ǹɗì ǹkɛ̀nì-fìtom a Yeesus Kiris, àa lɛ rìkɔ̀n ɗi ɓum, nsoò lɛ rìkì ɗi bimiɗ à mum, ǹɗì lɔŋ fɔlɔɔ lɛ Yeesus Kiris, rì Bɛ̀ll Seŋi ànɛ à ghèmzìghà nyi a ɓìloŋ, mɛ̀ yɛɛ kaniì kaàtà ànɛ,

²ǹɗaŋ ɗi ɓɔɔseŋi ɓis ɓɛ̀cèm ɓɛ tì rì fɛ rì ɓɔ, ɓisuu Ɓiseŋi ɓi ɓɛgherɛ̀n ɓi a Galasi.

³Bɛ̀ll à Seŋi wìs ɓɛɛ̀ Kan Yeesus Kiris ɓɛɛ fa mìni geesɛ̀n rì fyòoog.

⁴Yeesus à faghà cɛɓ kii ɓisuu ɓiɓe ɓis lɛ di a pwaŋ̀ ɓìsi ɓi kìɓeɓtàg ki zi ki tì rì ki miì gɛɛ̀nɛ, lɔŋ yɛ̀ɛ rìkɔ̀n ɗi Bɛ̀ll ànɛ à rì Seŋi wìs ɗi ri.

⁵Nyi yɛɛ ghɛɛ̀sɛɛ rì rìkem cààmɛ̀n kìcèm. Ààmɛ̀n.

⁶Ǹkuuraagh lɛ ɓì ghàsi kì lɔ̀ghii jɛ̀m rì roànɛ à reŋìghà mìni ɓi geesɛ̀n ì Kiris, ɓì nɔ̀ɔ̀tì Syeesyee à Ɓɔlɛ àdɛŋ.

⁷Ɓi saaɗ Syeesyee à Ɓɔlɛ àdɛŋ à yiìdi wɔɔ, kìɓan kifog ɓum ɓɛdɛŋ ɓɛɛ̀ ɓùuɓuùsì mìni, ɓɛ kaakàà lɛ ɓɛɛ ruùsi Syeesyee à Ɓɔlɛ à Kiris.

⁸I ŋwaàdɛŋ, nsoò ɓìsiì ɓɔmiɗ, nsoò ŋwaà-fìtom adɛŋ ànɛ aɗyoo yaa yùu mìni kì kalii Syeesyee à Ɓɔlɛ àdɛŋ, ànɛ à yin Ɓɔlɛ ànɛ tì kalìghà mìni, ŋwaànɛ̀n miì, à ghɛ̀ɛ̀sɛɛ kì terì ǹcɛ̀m.

⁹Tì mɛ kpaa mini kìɓan kiǹ abɛ̀y, nni m̀ɓììtii mìni kɔ kìkpaà ɓigomìnɛ lɛ: I ŋwaàdɛŋ à kalii mìni Syeesyee à Ɓɔlɛ àdɛŋ ànɛ à yin com kìfog rì ànɛ ɓì ghàɓkà, ŋwaànɛ̀n miì a teɗ ǹcɛ̀m.

¹⁰Nni ɓigomìnɛ, mɛ̀sɛɛ̀ghsɛɛgh mɛ ɓum mɛɛ̀mɛ ǹkaakàà giǹ mɛ Bɛ̀ll? Rìkɔ̀n ɗyɛm̀ ɗi ri nya lɛ ɓum ɓɛɛ wog kìrɔɔ rì mɛ̀? Èe èe, i màa kaka ǹkaakàà lɛ ɓum, ɓɛɛ wog kìrɔɔ rì mɛ̀ di ǹ-yin nkìì-kìsay a Kiris.

¹¹Ɓɛ̀geni ɓɛ̀m ǹkalii mìni lɛ, Syeesyee à Ɓɔlɛ ànɛ maà ghaàghàgsì à yin kiɓan ki mum à zɛy yɛɛ syaagh,

¹²lɛ mɛ̀ɛmiɗ mɛ̀ ǹwokà ɓi Ɓɔlɛ ànɛ̀n rì ŋwaàdɛŋ, mum kɛ̀ɛ ki rèsi mɛ nyi, lɔŋ Yeesus Kiris yɛɛ kighà lɛ n-yi Ɓɔlɛ ànɛ̀n.

¹³Ɓì yii cɛɓ ki ǹghɛghɛ̀ɓkà abɛ̀y di ǹkaka ɓi rìgherɛ̀n ɗi Ɓɛ̀yudɛ̀n? Lɔŋ yɛ̀ɛ ǹ-yeeyèèsìghà Kìseŋi ki ɓɛgherɛ̀n Bɛ̀ll rì rìgɛn, rì yɛ̀ɛ ǹkaakààghà lɛ ntiìsi kɔ.

¹⁴Ɓì yii yɛ̀ɛ m̀ɓaghà di ǹti ǹsììrɛn ɓi rìgherɛ̀n ɗi Ɓɛ̀yudɛ̀n ǹcee ɓɛ̀gbààgbaà ɓɛm lɛɛ̀gwey rì ɓum lɛɛ̀gwey ɓɛ ɓi kìlɔ̀ŋ kɛm̀; ǹfalɛ̀ngà lɛɛ̀gwey ɓi ɓisyɔ̀ɔ̀ ɓi ɓɛseŋi ɓis.

¹⁵Wɔ̀lɛ yɛ̀ɛ roànɛ à rɔ̀tɛ̀ngà mɛ̀ di ǹkaka ɓi ɗùm ɗi m̀màà wɛ̀m, à ki reŋi mɛ lɛ geesɛ̀n yìì,

¹⁶ki kongà nyi lɛ a resi mɛ̀ Man wiì, lɛ nkakali kìɓan ki Man ànɛ̀n a ɓumɓɛ ɓɛ yin Ɓɛ̀yudɛ̀n, mɛ̀ ǹtɔgtìghà ɓi mum ɗyomzɛ̀n;

¹⁷kɛ̀ɛ ǹki ɓɔg a Yorisalɛm a ɓɛ̀roɓɛ ɓɛ lokà kì ɓaa ɓɛ̀kɛ̀nì-fìtom ɓii ri mɛ̀, kìɓan kifog, ǹkɛ̀ngà ɓi kìlɔ̀ŋ ki lɛ Araɓii fɔɔnnɛ ǹki sugtìghày tì a Damas.

¹⁸Yɛ̀ɛ bèg yi ghaghìghà yiraa, nnɛ m̀ɓɔkà a Yorisalɛm lɛ ti yisɛ̀n ɗì Pyɛɛri; ǹkɔ̀rìghà a lɔ̀ŋkii mɛru ǹtɛ̀ɗ ɗì mɛtaǹ,

¹⁹wɔ̀lɛ ǹghɛngà ɓi nkɛ̀nì-fìtom a Yeesus àdɛŋ, lɔŋ Zyag ànɛ à rì geni Kan nnɛ ǹghɛngà.

²⁰Ǹkalii mìni lɛ, kìɓan ki ǹkàni mìni kìn ki ri saaɗ, Bɛ̀ll à yii fɔ̀lɔ̀ɔ̀.

²¹Ajɛ̀m ìnɛn, ǹkɛ̀ngà ɓi bàn yidɛŋ yi a Sirii, rì yi a Silisii.

²²Foo a ɓaghà di Ɓìseŋi ɓi ɓɛgherɛ̀n Kiris ɓi a Zyude ɓi ka yi ɓi mɛ.

²³Wɔ̀lɛ ɓi ɓaghà di ɓyaa wog yɛ̀ɛ ɓum ɓɛ kpaakpààghà lɛ: Ŋwaànɛ àa nɗùùzii-ɗùùzì ɓìsi wɛ̀y fɛ ɓi bèg yi yi nghaghii, nnyɛɛ ti ɓum ɓiì kakalii Ɓɔlɛ gɛɛ̀nɛ lɛ ɓɛɛ tyweeyi Kiris, kɔlɛ ǹtyweeyi wiǹ wɛɛ̀wu à ɗùùɗùùghà lɛ a pisi ɓum wɔ ɓi mɛ̀rem.

²⁴Fɔɔnnɛ ɓumɓɛ̀n ɓɛ keèkèmzìghà Bɛ̀ll ɓisuu kiɓan kɛm̀.