Read Bafia GÀLAT 2 Bible Online

GÀLAT 2 - Bafia bible

GÀLAT 2

¹Ajɛ̀m ì bèg ǹtɛ̀ɗ rì yinin, m̀ɓɔgtìghà a Yorisalɛm ɓɛɛ̀ Ɓarinaɓas, ǹteɗ girig Tit lɛ ti kɛǹ rì nyi.

²Ǹkɛ̀ngà rìkɛ̀ɛ̀ ɗiǹ lɛ Bɛ̀ll yɛɛ resìghà mɛ̀ lɛ nkɛǹ. Nni ǹɗèsìghà ɓɔ Syeesyee à Ɓɔlɛ ànɛ mɛ̀ ǹkakàlìghà ɓumɓɛ ɓɛ yin Ɓɛ̀yudɛ̀n; ǹɗèsìghà ɓɔlɛ ànɛ̀n a dwìɗ a ɓumɓɛ ɓɛ ɓiisɛɛ kì ɓaà gìn yi ɓum ɓi nɗaŋ waa, lɛ ǹkɔ̀ngà ɓi lɛ kìsay kɛm̀ ki m̀ɓaghà di m̀mɛ kì, rì ki nkìkì ɓyɛɛ wu zɛy.

³Wɔ̀lɛ Tit ànɛ tì ɓaghà rì nyi, ànɛ à ki rì muu Gìrɛg à ɓaghà ɓi ǹtiniyɛn lɛ a kɛrɛ̀n.

⁴Ki ɓaghà lɛ ki kilɛ̀n fɔlɔɔ lɛ, ɓɛ̀geni ɓis ɓɛdɛŋ ɓɛ ɓɛ ɓaghà tyoo tiɓɛɛ̀, ɓɛɛ ɗiŋìghà ɓi nɗaŋ wis lɛ ɗyɔ̀ɔ̀ŋ, ɓɛ yuiy lɛ ɓɛɛ ghɛǹ rìɓa ɗi tì rì ɓɛ̀kan ɓi Yeesus Kiris ɓi ɗùm ɓɛ ki ɓa ri rìkɔ̀n ɗi lɛ ɓɛɛ ghaàsi ɓìsi ɓɛ̀kpàn.

⁵Ɓìsii nɛmgà ɓi ɓɔ bee, tyɛ̀ ki ki wog rikpaa ɗyaa nsoò lɛsàg, lɛ tì kɔ̀nkɔ̀ngà lɛ saaɗ à Syeesyee à Ɓɔlɛ a rɔɓ lɔŋ zìŋ ɓi-kɔ̀ɔ̀ ɓi nyìinyìm wìn.

⁶Ɓi san ànɛ a ɓumɓɛ ɓɛ ɓaghà yɛ̀ɛ ɓɛ̀kɛ̀ɛ̀sì ɓaa, mɛ̀ ǹtɔɔgh ɓi com rì rìɓa ɗyaa ɗiǹ , lɛ Bɛ̀ll à ti kɛ̀ɛ fiɓi riɓa ɗi mum, fɔɔnnɛ ɓɛ̀kɛ̀ɛ̀sì ɓɛǹ ɓɛ ɓaghà ɓi ri com ki ɓɛ sagtì ɓi ɓìɓan ɓi ǹɗèsìghà ɓɔ.

⁷Wɔ̀lɛ yɛ̀ɛ ɓɛ ghɛngà lɛ Bɛ̀ll à faghà mɛ̀ Syeesyee à Ɓɔlɛ lɛ nghagsi a ɓumɓɛ ɓɛ yin Ɓɛ̀yudɛ̀n lɔŋ yɛ̀ɛ à faghà Pyɛɛri lɛ a ghagsi a Ɓɛ̀yudɛ̀n,

⁸lɛ roànɛ à kìghà lɛ Pyɛɛri a ɓa ǹkɛ̀nì-fìtom a Yeesus ɓisuu Ɓɛ̀yudɛ̀n, nnyɛɛ kighà mɛ̀ lɛ mɓa girig fɔlɔɔ ɓisuu ɓumɓɛ ɓɛ yin Ɓɛ̀yudɛ̀n.

⁹Fɔɔnnɛ ɓɛ gherɛ̀ngà lɛ Bɛ̀ll à kìghà mɛ̀ geesɛ̀n; ɓɛ̀-Zyag, rì Sefas rì Zyaŋ ɓɛ ɓɛ ɓaghà fɛlɛ yɛ̀ɛ ɓɛ̀ǹtɔn ɓaa, ɓɛ tukàkà ɓìsi ɓyàg lɛ rì mɛ̀ rì Ɓarinaɓas, lɛ ɓɛɛ resi lɛ, tì rì ɓɛ̀ɓùtɛn ɗi ɓɔ; fɔɔnnɛ ɓìsii ghɛɛ̀sɛ̀ngà kì kɛ̀ɛ a ɓumɓɛ ɓɛ yin Ɓɛ̀yudɛ̀n, ɓɔɔ kɛǹ a Ɓɛ̀yudɛ̀n.

¹⁰Kìɓan kifog ki ɓɛ tɔkà ɓìsi ki ɓaghà lɛ, ɓìsii yitàg lɛ ti ghɛɓsi ɓɛ̀gherɛ̀n ɓɛ ɓɛ ɓaghà ɓɛ̀soghàsogha a Yorisalɛm; kìɓan kiǹ kɛɛ̀ki ǹsììrɛ̀ngà ɓi rìkì.

¹¹Wɔ̀lɛ yɛ̀ɛ Pyɛɛri à kpagà a Aŋtyos, nni ǹfaghà nyi rìnàn ɓi mis mɛ ɓum ɓisuulɛ à sɛ̀rìghà.

¹²Lɛ yɛ̀ɛ à kpagà wɔɔ, àa nti à ɗilàg ǹɗaŋ ri ɓumɓɛ ɓɛ yin Ɓɛ̀yudɛ̀n, wɔ̀lɛ yɛ̀ɛ ɓumɓɛ Zyag à romgày ɓɛ kpagà ɓi bàn ìnɛn, Pyɛɛri à sɔ̀ŋì ìkòò ɓi rìkì ɗiǹ, à porɛ̀n kɛ̀ɛ ɗi ti nɗaŋ ri ɓɔ, lɛ à rirìsìghà Ɓɛ̀yudɛ̀n.

¹³Nni ɓɛ̀gherɛ̀n ɓɛmbog ɓɛ ɓɛ ɓaghà Ɓɛ̀yudɛ̀n ɓɛ nɔɔ̀tìghà ìkòò wu Pyɛɛri wiǹ, à kpaŋ yɛ̀ɛ ɓɛ syogà girig Ɓarinaɓas, ɓi mɛ̀ghèy mɛ ɓɛ kikìghà mɛǹ.

¹⁴Nni yɛ̀ɛ ǹghɛngà lɛ ɓɛ yin ɓiì kɛ̀ɛ̀kɛɛ yɛ̀ɛ ki ghɛɛ̀sɛɛ ɓi saaɗ ànɛ à rì ɓi Syeesyee à Ɓɔlɛ, nni ǹkpaaghà rì Pyɛɛri ɓi mis mɛ ɓum ɓɛ̀cèm lɛ: I wàànɛ ù rì muu Ɓɛ̀yudɛ̀n u ghɛghɛɓ yɛ̀ɛ ɓumɓɛ ɓɛ yin Ɓɛ̀yudɛ̀n, kɔ̀ɔ ghɛɓ cɛɓ ki Ɓɛ̀yudɛ̀n, lannɛ u kɔ̀nkɔn lɛ u kaŋ ɓumɓɛ ɓɛ yin Ɓɛ̀yudɛ̀n lɛ ɓɛɛ ghɛɓ yɛ̀ɛ Ɓɛ̀yudɛ̀n?

¹⁵Ɓìsii ri ɓìyalì ɓi Ɓɛ̀yudɛ̀n, tì yin ɓɛ̀kìì-kìɓe ɓɛ ɓɛ pɛsɛɛyì ɓi ɓìlɔ̀ŋ ɓidɛŋ.

¹⁶Nni wɔ̀lɛ tì yii lɛ mum à yin lɛ à ɓa lɛ saaɗ ɓi mis mɛ Bɛ̀ll lɛ yɛ̀ɛ a nɔ̀ɔnɔɔ̀tì ɓìdɔ̀gsɛna ɓi Ɓɛ̀yudɛ̀n, lɔŋ ŋwaànɛ à gherɛɛ Yeesus Kiris nnyɛɛ ri lɛ saaɗ ɓi mis mɛ Bɛ̀ll, fɔɔnnɛ ɓìsi girig tì gherɛ̀ngà Yeesus Kiris lɛ di ti ghɛnɛn ɓi mis mɛ Bɛ̀ll lɛ tì rì lɛ saaɗ lɛ rìgherɛ̀n ɗi tì gherɛɛ Kiris, àa ɓisuulɛ ti nɔ̀ɔnɔɔ̀tì ɓìdɔ̀gsɛna; lɛ rìɓèŋ ɗi ɓidɔ̀gsɛna ɗi yin lɛ ɗi ki lɛ mum a ɓa lɛ saaɗ ɓi mis mɛ Bɛ̀ll.

¹⁷Wɔ̀lɛ, i ki kpaŋi lɛ cààmɛ̀n ki ti kaakaa lɛ ti ɓa lɛ saaɗ ɓi mis mɛ Bɛ̀ll lɛ rìgherɛ̀n ɗi tì gherɛɛ Kiris, ki ghɛnɛɛ lɛ ɓìsi girig tì rì ɓɛ̀kìì-kìɓe, fɔlɔɔ a rèsì nya lɛ Kiris a sasay ɓisuu kiɓe? Àg! Ki yin fɔlɔɔ.

¹⁸I ǹtumɛɛ tì rìtoŋ ɗi ɓyom ɓi ǹwààghà, di ǹɗèsii lɛ ǹɗì ŋwaànɛ à yin ɓiì nɔ̀ɔnɔɔ̀tì ɓìdɔ̀gsɛna.

¹⁹Ɓi san ànɛ a ɓìdɔ̀gsɛna, mɛ̀ ǹtighà kìloŋ lɛ ɓìdɔ̀gsɛna, lɛ di nghɛɓ ɓisuu Bɛ̀ll.

²⁰Ǹwughà ɓi Kɔrɔs ǹɗaŋ ɗi Kiris, fɔɔnnɛ àa mɛ̀ yɛɛ̀ ghɛghɛɓti, lɔŋ Kiris yɛɛ̀ ghɛghɛɓ ɓi mɛ̀; cɛɓ ki nghɛghɛɓ gɛɛ̀nɛ yɛ̀ɛ mum, nghɛghɛɓ kɔ ɓi rìgherɛ̀n ɗi ǹgherɛɛ Man à Bɛ̀ll ànɛ à keesìghà mɛ̀, à ki fa cɛɓ kii ɓisu wɛ̀m.

²¹Mɛ̀ ǹ-yin lɛ m̀ɓèn geesɛ̀n ìnɛ Bɛ̀ll à kìghà mɛ̀; lɛ i kaa rì lɛ mum à rì lɛ à ɓa lɛ saaɗ ɓi mis mɛ Bɛ̀ll di à nɔ̀ɔ̀tii ɓìdɔ̀gsɛna ɓi Moyis, di rìwu ɗi Kiris ɗi yin min ɗi gɛɓsɛ̀n nsoò lɛsàg.