Read Bafia GÀLAT 3 Bible Online

GÀLAT 3 - Bafia bible

GÀLAT 3

¹Mìni, ɓumɓɛ a Galasi, lannɛ ɓì yèghii fɛlɛ? Ghɛn yɛɛ yogsii mìni mɛ̀rem, mìni ɓɛ ɓɛ resìghà Yeesus Kiris ànɛ ɓɛ kpangà ɓi Kɔrɔs.

²Ɓàghina mɛ̀ ǹtɔɔ̀tɔɔgh wu; Bɛ̀ll à faghà mìni Nghay wìì ɓisuulɛ ɓì ɓègà ɓìdɔ̀gsɛna gìn ɓisuulɛ ɓì kìghà lɛ, ɓì wog, ɓì ki gherɛn Syeesyee à Ɓɔlɛ?

³Ɓì rì kɔm̀ ɓiyèg? Ɓì tumɛ̀ngày rì Nghay à Bɛ̀ll, lannɛ ɓi kɔ̀nkɔn lɛ ɓi kɛǹ kì wɔmɓɛɛ ri ɓɛ̀fèg ɓɛ ɓum?

⁴Gɛ ɓìɓan anɛ ɓì mɛ ghɛn anɛ à wii yɛɛlɔɔ zɛy? Di ɓi ki rì lɛ ɓi wu zɛy. Roànɛ à ti à falàg mìni Nghay à Bɛ̀ll,

⁵à ki kìki dàm ɓi nyìinyìm wìn, à ti à kìlàg nya fɔlɔɔ lɛ yɛ̀ɛ ɓi nɔ̀ɔnɔɔ̀tì ɓìdɔ̀gsɛna gìn ɓisuulɛ ɓì ti ɓì wokì, ɓì ki gherɛn Syeesyee à Ɓɔlɛ?

⁶Abiraham à gherɛ̀ngà Bɛ̀ll, fɔlɔɔ nnɛ Bɛ̀ll à ghɛngà nyi lɛ à rì saaɗ à mum.

⁷Nni yiina lɛ: mum bimiɗ ànɛ à foŋi ǹtyweeyi ɓi Bɛ̀ll à rì dòò yì Abiraham.

⁸Kaàtà à Bɛ̀ll à yitìghà abɛ̀y lɛ, Bɛ̀ll à kìi gɛ lɛ ɓumɓɛ ɓɛ yin Ɓɛ̀yudɛ̀n ɓɛɛ ɓa lɛ saaɗ ɓi mis mii lɛ rìgherɛ̀n, nni à lokà kì kpaà Abiraham Syeesyee à Ɓɔlɛ ànɛ lɛ: Ɓìlɔ̀ŋ ɓìcèm ɓi teri gɛ ɓɛ̀mààgh ɓisu wɔ̀ɔ̀.

⁹Ɓisu wìn nnɛ ɓumɓɛ ɓɛ gherɛɛ Bɛ̀ll ɓɛ ri ɓɛ̀màŋɛn nɗaŋ ɗi Abiraham ànɛ à ɓaghà ǹgherɛ̀n.

¹⁰Lɛ ɓum ɓɛ̀cèm ɓɛ ɓɛ saghii ǹto rì rìɓèŋ ɗi ɓidɔ̀gsɛna, ɓɛ ti ɓi ncɛ̀m ɓi ɗùm ɓisuulɛ ki ri kì kànɛn lɛ: Ŋwaànɛ à ɓèŋi ɓi ɓiɓan ɓìcèm ɓi ɓi ri ɓì kànɛn ɓi kaàtà à ɓìdɔ̀gsɛna, kɛ̀ɛ kì yɛ̀ɛ ɓyɛɛ̀ kpaakpàà, à ghɛ̀ɛ̀sɛɛ kì terì ǹcɛ̀m.

¹¹Rì tì lɛ, mum à ghɛ̀ɛ̀sɛɛ ɓi ki ɓaà lɛ saaɗ ɓi mis mɛ Bɛ̀ll lɛ rìɓèŋ ɗi à ɓèŋi ɓìdɔ̀gsɛna. Kìɓan kiǹ ki ri lɔŋ fɔlɔɔ ɓisuulɛ saaɗ à mum à ɓiì ghɛɓì lɛ rìgherɛ̀n.

¹²Bee ì ɓìdɔ̀gsɛna ì ghasɛɛ rì bee ì rìgherɛ̀n, lɛ, mɛ̀kànì mɛɛ̀ rèsag lɛ: Ŋwaànɛ à ɓèŋi ɓìdɔ̀gsɛna, à ɓiì ghɛɓì lɛ ɓyɔ.

¹³Kiris à kwèɗkà ɓìsi ɓi ncɛ̀m à ɓìdɔ̀gsɛna, lɛ à ghalà mum à ǹcɛ̀m ɓisu wis, - lɛ ki ri kì kànɛn lɛ: Mum ǹcèm ànɛ ɓɛ surii ɓi mɓàg à ti ǹcɛ̀mɛn.

¹⁴Ki kilɛ̀ngà fɔlɔɔ lɛ di ɓɛ̀mààgh ɓɛ Bɛ̀ll à kàkà Abiraham ɓɛɛ kom̀ ɓumɓɛ ɓɛ yin Ɓɛ̀yudɛ̀n lɛ Yeesus Kiris, rì tì lɛ, di ɓìsii teɗ Ǹghay ànɛ Bɛ̀ll à kàkà lɛ rìgherɛ̀n.

¹⁵Ɓɔɔsoŋ̀, nteɗ mìni dàɗkì rì ɓìɓan ɓi ɓyɛɛ̀ kìikilɛ̀n ɓi rìghɛghɛ̀ɓ ɗi ɓum; i mum à reɓsaagh ɓìɓan ɓii syeesyee à rìreɓsàg di à ka wu ɓi, ŋwaàdɛŋ à yin lɛ à ɓa rì com ki pisiyɛn, nsoò ki fɔŋdiyɛn ɓi ɓìɓan ɓiǹ.

¹⁶Wɔ̀lɛ Abiraham innɛ ɓɛ faghà mɛ̀kàg lɛ rì nyi rì boo yìì i mum, ki yin ki kaliyɛn lɛ, rì boo ì ɓum ìdɛŋ, yɛ̀ɛ ɓɛɛ̀ kali lɛ boo yi ɓum yi ɓaghà lɛɛ̀gwey. Rìkpaa ɗi lɛ, rì boo yɔ̀ɔ̀ i mum ɗi seesee lɔŋ boo ì mum bogtɛ̀n, yɛ̀ɛ ri lɛ Kiris.

¹⁷Com ki nkɔ̀nkɔn lɛ nkpaà ki ri lɛ, bimiɗ à rìwòŋzì ɗi ɓiɓan anɛ Bɛ̀ll à ɓaghà di à mɛ pègsɛ̀n à yin lɛ ɓìdɔ̀gsɛna ɓi yogsì lɛ ɓyɔɓi ɓi kpaŋiì fɛ ajɛ̀m ì bèg ɓɛ̀hɔnɗɛ̀ɗ ɓɛnin rì bèg rìtin ɗì ǹtɛ̀ɗ; i ki kilɛɛ fɔlɔɔ, di ǹkàg wu Bɛ̀ll wu ri kɛ̀ɛ̀ ìsu.

¹⁸I ɓaa tekì mɛ̀wus mɛ Bɛ̀ll lɛ rìɓèŋ ɗi ɓidɔ̀gsɛna, di mɛ yin lɛ mum à teɗtì lɛ ǹkàg wu Bɛ̀ll; kɔlɛ Bɛ̀ll à kìghà Abiraham geesɛ̀n ɓi nkàg wu à faghà nyi.

¹⁹Nni ɓìdɔ̀gsɛna ɓi ghɛɓsii min cɛ? Ɓi foŋɗɛ̀ngà lɛ ɓyɛɛ reresi mɛ̀nànì mɛ ɓum à kpaŋ yɛ̀ɛ dòò yì Abiraham ìnɛ ǹkàg wiǹ wu seesèèghà ì kpaŋi gɛ; ɓum ɓɛ titom ɓɔ yɛɛ ghagsìghà ɓìdɔ̀gsɛna ɓiǹ, di bimiɗ à mum à rì ɓi nyìinyìm ànɛ lɛ, rì kìlɔ̀ŋ rì ɓɔ.

²⁰Mum à gagsì à rì rì gɛɓsɛ̀n di ɓum ɓɛ ri lɛɛ̀gwey, wɔ̀lɛ Bɛ̀ll à rì lɔŋ cɛ̀ncii.

²¹Fɔlɔɔ a rèsii nya lɛ ɓìdɔ̀gsɛna ɓi wɛɛsɛɛ ɓi ri mɛ̀kàg mɛ Bɛ̀ll? Àg! Ki yin fɔlɔɔ; i kìdɔ̀gsɛna kidɛŋ ki ki ri lɛ ki fa cɛɓ kɛɛ ɓa wɔɔ, di rìɓa ɗi mum a ɓa lɛ saaɗ ɓi mis mɛ Bɛ̀ll ɗi ri lɛ ɗi ghɛnɛ̀n a tààkaà ɓi ɓìdɔ̀gsɛna.

²²Kìɓan kifog kaàtà à Bɛ̀ll a rèsag lɛ, ɓyom ɓìcèm ɓi ri ɓi rìkpàn ɗi kiɓe, lɛ di ǹkàg wu Bɛ̀ll à faghà wɛɛ ron ɓi san ànɛ a ɓɛ̀gherɛ̀n lɛ rìgherɛ̀n ɗi ɓɛ gherɛɛ Yeesus Kiris.

²³Di rìgherɛ̀n ɗi ka yin, ɓìsii ɓaghà ɓi naà-zày ì ɓìdɔ̀gsɛna, tì ɓoŋɓòŋ lɛ rìgherɛ̀n ɗi ncèm ɗyɛɛ resɛ̀n.

²⁴Fɔlɔɔ nnɛ ɓìdɔ̀gsɛna ɓi ɓaghà ɓìsi fɛlɛ yɛ̀ɛ ǹɗèsàg wìs anɛ a kɛ̀ɛkɛɛ̀sì ɓìsi à kpaŋ ɓi rìyù ɗi Kiris, lɛ di ti ɓa ɓɛ̀tɛnɛn ɓi mis mɛ Bɛ̀ll lɛ rìgherɛ̀n.

²⁵Nni yɛ̀ɛ cààmɛ̀n ki righerɛ̀n ki mɛ kpaŋ, ɓì yiìdi ɓi rìlàmì ɗi ǹɗèsàg ànɛn,

²⁶ɓisuulɛ mìniìcèm ɓì rì ɓɔn ɓɛ Bɛ̀ll ɓi rìgherɛ̀n ɗi ɓì gherɛɛ Yeesus Kiris.

²⁷Mìniìcèm ɓɛ ɓɛ ɓaɓtìghà ɓi Kiris, ɓì waatɛ̀ngà Kiris.

²⁸Fɔɔnnɛ gasɛ̀n ì yiìdi ɓi nyìinyìm ànɛ lɛ rì Ɓɛ̀yudɛ̀n rì ɓìlɔ̀ŋ ɓidɛŋ, yɛ̀ kɛɛ̀ ɓa ti ɓi nyìinyìm ànɛ lɛ rì ǹkpàn rì ŋwaànɛ à yin ǹkpàn, nsoò ɓi nyìinyìm ànɛ lɛ rì baŋì rì giɓ ɓisuulɛ mìniìcèm ɓì ti com kìfog ɓi Yeesus Kiris.

²⁹Nni mìni ɓɛ ɓì rì ɓum ɓɛ Kiris, yiina min lɛ, ɓì rì boo ì mum yì Abiraham, ìnɛ ì rì rì gàɓ ɓi ɓyom ɓi Bɛ̀ll à kàkà.