Read Bafia GÀLAT 4 Bible Online

GÀLAT 4 - Bafia bible

GÀLAT 4

¹Fèg wɛ̀m à rì lɛ, cààmɛ̀n kìcèm ki ŋwaànɛ à rɔ̀ɓi rì mɛ̀wus a kaka ŋwɔɓti, nsoò yɛ̀ɛ mɛ̀wus mɛǹ mɛ wooghrɛɛ rì nyi, à ceerɛɛ ɓi ɓi com ɓɛɛ̀ ǹkpàn.

²Wɔ̀lɛ cààmɛ̀n ki à kaka ŋwɔɓti, à kaka ɓi rìlàmì ɗi ɓumɓɛ ɓɛɛ̀ tɔɔtɔɔ̀sì nyi, ɓɛ ki kɛ̀ɛkɛɛ̀sì ɓìɓan ɓii, à kɛ̀n kì kpaŋì ɓi zìŋɛn inɛ seŋi à faghà lɛ yɛ̀ɛnɛ à ri teri gɛ mɛ̀wus mɛǹ miì.

³Cààmɛ̀n ki tì ɓaghà di tì kaka ɓɔɓti tì ɓaghà girig ɓɛ̀kpàn ɓɛ ɓi ɓɔɔ ɓyom ɓɛ zɛy ɓɛ ɓi ziinɛ.

⁴Nni yɛ̀ɛ cààmɛ̀n ki Bɛ̀ll nyimiɗ a fèkà ki ghɛɛ̀sɛ̀ngà, nni à romgày Man wiì, à yalɛ̀n ɓi ɗùm ɗi giɓ, à ghɛɓ ɓi rìlàmì ɗi ɓidɔ̀gsɛna ɓi Ɓɛ̀yudɛ̀n,

⁵lɛ di a kweɗ ɓumɓɛ ɓɛ ɓaghà ɓi rìlàmì ɗi ɓidɔ̀gsɛna, fɔlɔɔ nnɛ ɓìsii ghay min ɓɔn ɓɛ Bɛ̀ll.

⁶Com ki ki resii lɛ ɓì ti ɓɔn ɓɛ Bɛ̀ll ki ri lɛ: Bɛ̀ll à romgày Ǹghay à Man wiì ɓi mɛ̀rem mis, Ǹghay ànɛ̀n yɛɛ̀ làalamɓɛ̀n jɛ̀ɛ̀ aɗyoo lɛ: Aba, yɛɛlɔɔ lɛ Tààta.

⁷Fɔɔnnɛ ù yiìdi ǹkpàn, ù ti lɔŋ man à Bɛ̀ll; nni yɛ̀ɛ ù ti man wiì, ù rì girig rì gàɓ ɓi ɓyom ɓii lɛ geesɛ̀n yìì.

⁸Ɓi mɛ̀ru mɛ abɛ̀y, ɓì yighà ɓi Bɛ̀ll; ɓìi mɓɔgsàg ɓinùn ɓi ɓi yin kɔm̀ Bɛ̀ll.

⁹Nni ɓigomìnɛ ɓì mɛ yi Bɛ̀ll, ǹɗì lɛ ǹkpaa gì lɛ Bɛ̀ll à mɛ yi mini, nni lannɛ ɓì rì lɛ ɓì sugtì rì jɛ̀m ɓi ɓɔɔ ɓyom ɓɛ zɛy rì zɛy ɓɛ ɓɛ ri kɛ̀ɛ̀ ìtèɗ, ɓì ki kɔ̀nkɔn lɛ di ɓyàa ɓatii ɓɛ̀kpàn ɓɛ ɓyom ɓìn?

¹⁰Ɓì ti ɓì ɓɔgsàg lɛ rì gòn yidɛŋ, rì ɓɛ̀ŋwii ɓɛdɛŋ, rì ɓyààmɛ̀n ɓidɛŋ rì bèg yidɛŋ.

¹¹Mɛ̀ ǹɗì rì mɛ̀riighrikì lɛ kìsay ki ǹwughà ǹtɔɓ ǹkì a lɔ̀ŋkin, kɛ̀ kɛɛ ɓa lɛ ki wu zɛ̀y.

¹²Ɓaana yɛ̀ɛ mɛ̀, lɛ mɛ̀ girig ǹɗì yɛ̀ɛ mìni, m̀ɓɔ̀ŋzaagh mìni, ɓɔɔsoŋ̀!

¹³Ɓì kìi ɓi mɛ kìɓan ki ɓeɓtɛn nsoò kifog, ɓì yii lɛ ǹghagsighà mìni Syeesyee à Ɓɔlɛ ɓi gɛ̀n i ǹtonto yɛ̀ɛ ǹɗoròɓkà.

¹⁴Fìroɓ fi m̀ɓaghà rì fyɔ ɓi nyoo fi ɓaghà ɓìtèetèɗ ɓi mɛfèèghrɛn ɓisu win, nsoò fɔlɔɔ, ɓì sɛɛtìghà ɓi mɛ, rìɓa ɗyɛ̀m ɗyɛ̀ kɛɛ̀ kì mini tìmin, wɔ̀lɛ ɓì ghàɓkà mɛ̀ fɛlɛ yɛ̀ɛ ŋwaà-fìtom a Bɛ̀ll, nsoò lɛ yɛ̀ɛ Yeesus Kiris nyimiɗ.

¹⁵Nni kìnyàà ki ɓì ɓaghà rì kɔ kɛm̀be min? Ǹɗì lɛ ǹkpaa ɓi kìɓan ki ki seesee mìni lɛ: I ɓì ɓaghà rì bee, di ɓì cɔ̀kàkà mis min lɛ ɓi fa mɛ̀,

¹⁶Nni ǹghali bènàbena wiǹ ɓigomìnɛ lɛ nkpaakpaa mini saaɗ wa?

¹⁷Rìɗiŋmɛ̀n ɗi ɓum ɓɛɛ̀ ɗiighɗiŋmɛ̀n mìni ɗìn ɗi rɔɔtɛɛ ɓi; lɛ ɓɛɛ̀ kɔ̀nkɔn lɛ ɓɛɛ ghasi mìni rì mɛ̀; di ɓi rarɛn ɗì ɓɔ.

¹⁸Ki ri syeesyee à kìɓan lɛ mum a siirɛn ɓi rìkìkì ɗi kirɔɔ cààmɛ̀n kìcèm àa lɔŋ lɛ cààmɛ̀n ki ǹɗì ɓi nyìinyìm wìn kɛɛ̀ki ɓì sììrɛ̀n.

¹⁹Mìni ɓɔn ɓɛm, ǹtumɛɛ tì rìwog ɗi rikɛŋ yɛ̀ɛ ɗi giɓ a woki ɓi rìyay ɓisu wìn, à kpaŋ yɛ̀ɛ Kiris à ɓiì ghɛɛ̀ ìkɔ̀ɔ̀ ɓi mɛ̀rem mìn.

²⁰Kɛɛ̀ kɔ̀nkɔn mɛ lɛ di màa ɓaa ɓi nyìinyìm wìn ɓigomìnɛ, n-yi yɛ̀ɛ ǹɗì lɛ ǹtòòghrɛ̀n ɗì mìni dɛŋ ɓisuulɛ kiɓan kin ki ri mɛ̀ kì yeesiyɛn.

²¹Mìni ɓɛ ɓi kɔ̀nkɔn lɛ ɓi ghɛɓ yɛ̀ɛ ɓìdɔ̀gsɛna ɓyɛɛ̀ kpaakpàà, ɓì ti kɛ̀ ɓi wog nya rìrèsì ɗi ɓidɔ̀gsɛna?

²²Lɛ ki ri kìkànɛn lɛ: Abiraham à ɓaghà ɓɔn ɓɛ ɓɛbaŋì ɓɛɓɛɛ̀. À yay bog rì ǹkpàn wiì à giɓ, bog rì gil ànɛ à ɓaghà ɓi ǹkpàn.

²³Nni man à ǹkpàn a giɓ anɛ̀n, à yalɛ̀ngà fɛlɛ yɛ̀ɛ ɓɔn ɓɛ ti ɓɛ yalàg, wɔ̀lɛ ɓi ɓɛg ànɛ yɛ̀ɛ man à giɓ anɛ à ɓaghà ɓi ǹkpàn nyii yalɛɛ, rìyalɛ̀n ɗi ɗi ɓaghày ɓi nkàg wu Bɛ̀ll.

²⁴Kìɓan kiǹ ki ri kìfèèghrɛnà; ɓɛ̀yiɓ ɓɛ kiɓɛ̀ɛ̀ ɓɛǹ ɓɛ resii bee yi kiɓɛɛ̀ yi Bɛ̀ll à rengà rì ɓum. Bee bog ìnɛ ɓi bee yi kiɓɛ̀ɛ̀ ì rì bee inɛ ì renɛ̀ngà ɓi dòn ì Sinayi yɛ̀ɛ ri lɛ Agaar.

²⁵Agaar yɛɛ ri dòn ì Sinayi ɓi kìlɔ̀ŋ ki Araɓii, à rì fɛlɛ yɛ̀ɛ Yorisalɛm ànɛ ɓigomìnɛ ɓisuulɛ à rì ɓi rìkpàn rì ɓɔn ɓii.

²⁶Wɔ̀lɛ Yorisalɛm ànɛ aɗyoo, nyii yin nkpaǹ, nnyɛɛ ki rì jɛɛ wìs.

²⁷Lɛ ki ri kìkànɛn lɛ: Wɔ̀ nɔ̀nɔg à giɓ anɛ à yin ɓiì yayali, nyàànyaa! Syagti ǹkeèghkeegh wu kinyàà, wàànɛ ù ka wokà ɓi rikɛŋ ɗi riyày, rɔŋɗɔŋ kìkpakpag ɓisuulɛ giɓ anɛ yii à nagà à ɓiì ɓaà rì ɓɔn à cee roànɛ yii à keesii.

²⁸Ɓi mìni, ɓɔɔsoŋ̀, ɓì rì lɔŋ yɛ̀ɛ Isag lɛ ɓì yalɛ̀ngà yɛ̀ɛ ǹkàg wu Bɛ̀ll wu ɓaghà.

²⁹Nni lɔŋ yɛ̀ɛ man ànɛ à yalɛ̀ngà yɛ̀ɛ ɓɔn ɓɛ ti ɓɛ yalàg à tɔtɔ̀ɓkà roànɛ à yalɛ̀ngà rì ìtèɗ wu Nghay à Bɛ̀ll ɓi cààmɛ̀n kiǹ nnɛ ki kaka ki kɛnkɛ̀n fɔlɔɔ à kpaŋ gɛɛ̀nɛ.

³⁰Wɔ̀lɛ kaàtà à Bɛ̀ll a kalag lɛ cɛ? Nàɓa lɛ rì ǹkpàn a giɓ rì man wiì ɓisuulɛ man à ǹkpàn a giɓ àa kàɓɓɛn ɓi mɛwus mɛ seŋi ɓɛɛ̀ man à giɓ anɛ à yin ǹkpàn.

³¹Ɓɔɔsoŋ̀, fɔlɔɔ nnɛ tì yin ɓɔn ɓɛ ǹkpàn, tì rì ɓɔn ɓɛ giɓ anɛ à yin ǹkpàn.