Read Bafia EFÈZYƐŊ 4 Bible Online

EFÈZYƐŊ 4 - Bafia bible

EFÈZYƐŊ 4

¹Fɔɔnnɛ mɛ̀ ànɛ ǹɗì kìmbùŋ lɛ ǹsàsay Kan, ǹkpaa mìni lɛ, ghɛɓina rìkuu ɗi cɛɓ ɗi ɗi ghɛɛ̀sɛɛ rì ǹɗeèghreŋi wu wu kpagà a lɔ̀ŋkin,

²sɛɛ̀diinà mìniìɓɔmiɗ ɓi zi, ɓì kɔ̀rì lɛ fyòoog, ɓì ɓa rì kìnìri ki nɗem, ɓì cenɛ̀n lɛ ɓi ghɛɓ rì ɓɛ̀geni ɓin lɔŋ yɛ̀ɛ ɓɛ ri, ɓɔ girig ɓɛ ki fɔlɔɔ ɓi san wìn, rìkì ɗiǹ ɗìcèm ɗi ɓa ɓi nkɔ̀nɛ̀n ɓi ɗùm;

³ɓì tèètèèsì nyoo lɛ ɓi ɓeŋ rìɓa ɗi kibyɔg kìfog ɗi ɓi mɛ̀ghay rì fyòoog ànɛ à ràri mìni ɓɛ̀sɛ̀ɛ̀ ɓɛ̀cèm.

⁴Nyoo ì rì lɔŋ bog, Nghay lɔŋ bog, fɔɔnnɛ ɓì rì girig ɓɛ̀ reŋiyɛn lɛ ɓi ɓa rì dyàɓɛn bog, yɛ̀ɛ ri dyàɓɛn inɛ ɓi nɗeèghreŋi win.

⁵Kan à rì lɔŋ bog, rìgherɛ̀n ɗifog, bàɓtis bog,

⁶Bɛ̀ll bog, nnyɛɛ ri Seŋi ɓum ɓɛ̀cèm, à làmii ɓɛ̀sɛ̀ɛ̀ ɓɛ̀cèm, à kìkì kìsay ɓi ɓum ɓɛ̀cèm, à ki ɓa ɓi ɓɔɔ̀cèm.

⁷Wɔ̀lɛ mum ǹcèm ànɛ ɓi ɓìsi à tekà bimiɗ à rìfa ɓi lèg ànɛ Kiris à faghà nyi.

⁸Fɔlɔɔ nnɛ ki ri kì kaliyɛn lɛ: Yɛ̀ɛ à ɓɔkà ɓi jàŋ yi yi teŋmaagh, à kɛ̀ngà rì ɓìmbùŋ, à fa ɓum ɓyom.

⁹Rìkpaa ɗi lɛ à ɓɔkà ɗi resii cɛ? Ɗi resii lɛ à sɛngà ɓi kìrimi ki zi.

¹⁰Roànɛ à sɛngày, nnyɛɛ ri girig roànɛ à ɓɔkà aɗyoo ɗi ɗi teŋmɛɛ kɛ̀ɛ̀ vèg, lɛ di a ron ɓi ɓyom ɓìcèm.

¹¹Nnyɛɛ faghà ɓɛ̀ro ɓɛdɛŋ lɛ ɓɛɛ ɓa ɓɛ̀kɛ̀nì-fìtom, ɓɛ̀ro ɓɛmbog ɓɛ̀kpaŋzì-ɓìɓan, ɓɛmbog ɓɛ̀kalì-Syeesyee à Ɓɔlɛ, ɓɛmbog ɓɛ̀pàstɛɛ̀rì nsoò lɛ ɓɛ̀rèsàg.

¹²À kìghà fɔlɔɔ lɛ di ɓɛ̀gherɛ̀n ɓɛɛ tɔɔ̀ ɓɛ kpaŋ ɓi nɗɛli wu ɓɛ ri lɛ ɓɛ ki kìsay ɓi rìtoŋ ɗi nyoo ì Kiris.

¹³À kɛ̀n kì kpaŋì ɓi jàŋ inɛ rìgherɛ̀n ɗis, rì rìyi ɗi tì yii Man à Bɛ̀ll, ɓyɛɛ ɓa com kìfog di tì mɛ sììrɛn ɓum, tì ghɛ̀ɛ̀sɛ̀n ɗì kɔɔ̀kɔɔ̀ à ǹɗɛli a Kiris.

¹⁴Fɔlɔɔ nnɛ tyàa ɓa ti ɓi ɓɔɓti ɓɛ ɓɛ ri kɛ̀ɛ̀ goo, ɓɛ ɓɛ ri lɛ rì rìkuu ɗi dɔgtɛ̀n ɗiǹ miì ɓɛ nɔɔ̀tì, ɓum ɓɛ yeèghyègsì ɓɔ lɛ rì momzɛ̀n maa, rì mɛ̀ghèy mɛ ɓɛ ti ɓɛ syogì ɓum miì ɓi rìnàn.

¹⁵Wɔ̀lɛ, i ti kakali saaɗ rì ǹɗem wu nkɔ̀nɛ̀n, tì ɓiì tɔɔtɔɔ ɓɛɓɛg ɓɛ̀cèm ɓi Kiris ànɛ à rì nto.

¹⁶Lɛ nyi nnɛ nyoo bimiɗ ì ti ì kìlàg lɛ, ì tɔɔ, ì ki toŋɗɛn yɔ̀miɗ ɓi nkɔ̀nɛ̀n ɓi ɗùm lèg ànɛ à ghɛ̀ɛ̀sɛɛ rì ɓìkàɓ ɓi miì ɓìcèm; nyoo ìnɛ̀n ì rì ǹwògakɛn lɛ syeesyee ì ki ɓa nɗàrakɛn lɛ kpeg kpeg rì gòga yìcèm yi ì rì rì yɔ̀.

¹⁷Kìɓan ki mɛ̀ ǹkalii, ǹki sììrɛn ɓi ɗii ɗi Kan kɛɛ̀ki lɛ: Kɛ̀ ɓi ghɛɓti yɛ̀ɛ ɓum ɓɛ zɛy ɓɛ ɓɛ yin ɓɛgherɛ̀n, ɓɔ yɛɛ ti ɓɛ nɔɔ̀tàg ɓɔɔ momzɛ̀n ɓaa ɓɛ kɛ̀ɛ̀ ìsu.

¹⁸Ɗyomzɛ̀n ɗyaa ɗi ri ɗì sigtɛn birìm, fɔɔnnɛ ɓɛ yin ri gàɓ ɓi cɛɓ ki Bɛ̀ll lɛ kɛ̀ɛ̀ rìyi wàà, rì rìɓa ɗi mɛ̀rem maa mɛ ri mɛ̀ tèrɛn.

¹⁹Ɓɛ yiìdi ri ǹtoòrìɗ, fɔɔnnɛ ɓɛ mɛ ɗiŋi ɓi kìɓùùsì, ɓɛ kɛǹ ɓiì kìkii ɓiɓan ɓi tifin, kɛ̀ɛ̀ tìmin, ɓɛ ɓutɛ̀n tì zày ì ìkum miì.

²⁰Ɓi san ànɛ a lɔ̀ŋkin, àa fɔlɔɔ nnɛ mìnii yilàkà Kiris;

²¹di ɓì ki wokà di ɓɛɛ̀ kpaakpaa kiɓan kii, ki ki ɓa lɛ nyi nnɛ ɓɛ resìghà mìni, lɔŋ yɛ̀ɛ saaɗ ànɛ ɓi Yeesus à rì.

²²Ɓì ghɛ̀ɛ̀sɛɛ kì rinii fiɗyàɓ fin fi riɓa fi ɓi cɛɓ ki ɓì ghɛghɛ̀ɓkà abɛ̀y, ɓìɓan ɓi ǹɗem wu mum wu ti wu kɔngì ɓi rìɓa ɗi yɛ̀ɛ ɗiǹ, ɓi ri rì ǹ-yègsɛ̀n, ɓi ki ɓa ɓiɓan ɓi ɓi ri lɛ ɓi yogsì mum.

²³Ɓì ghɛ̀ɛ̀sɛɛ kì ɓaà ɓɛ̀nyɔɔnyɔn ɓɛ ɓum lɛ kɔɔ̀kɔɔ̀ ɓi mɛ̀rem min, rì ɓi mɛ̀yitì min.

²⁴Ɓì waatɛ̀n nyɔɔnyɔn à rìɓa ànɛ à rì ǹkìyɛn ɓi kìpisɛn ki Bɛ̀ll, rìɓa ɗìn ɗi resɛ̀n ɓi cɛɓ ki nkpaà rì ki tɛnɛn, ki ki fuu yì ɓi saaɗ.

²⁵Kìɓan kiǹ kɛɛ̀ki càrina pwàà, mum ǹcèm ànɛ ɓi mìni a kalag geni kìɓan yɛ̀ɛ ki ri, ɓisuulɛ, ɓìsiìcèm tì rì ɓìkàɓ ɓi ɓi nyoo bogtɛ̀n.

²⁶I ɓì woogh bim, ɓì konàg lɛ kɛ̀ ɓi kì kiɓe; ŋwos kɛ̀ɛ màg ɓilɛy di bim yiǹ ì kaka.

²⁷Kɛ̀ ɓi nɛm Satàn ikɔ̀ɔ̀.

²⁸Ŋwaànɛ àa nti à fyaasàg ɓyom, à lèg ɓi wii, kìɓan kifog, a teki ntɔɓ lɛ a say rì ɓyàg ɓii yɛ̀ɛ ki ghɛɛ̀sɛɛ, fɔɔnnɛ a ɓa rì com ki à rì lɛ à ghɛɓsì soghàsogha ri kɔ̀.

²⁹Ŋwɔm win wu ghɛɛ̀sɛɛ ɓi ki kpaà kìɓan ki ɓeɓtɛn, wɔ̀lɛ i ki kpaŋi lɛ ɓi toòghrɛn, jɛ̀ɛ̀ yìn i ghɛ̀ɛ̀sɛɛ kì ɓaa jɛ̀ɛ̀ ìnɛ ì rì lɛ ì fa ìtèɗ ɓi rìgherɛ̀n ì ki ɓa ri ǹghɛɓsɛn ɓisuu ɓɛroɓɛ ɓɛ woogh yɔ̀.

³⁰Kɛ̀ ɓi kì lɛ Kìtɛntɛ̀ɛ̀n ki Nghay ki Bɛ̀ll à rèmzàkà mìni rì kɔ ɓisuu ŋwos anɛ gòri yìì ì ri ɓa, kɛ̀ɛ wog bim.

³¹À tumɛɛ lɛ kìmìighmigtɛ̀n, kìnyɛn, bim, kìyoòyòò, mɛ̀wɔ̀wɔrì, rì rìgɛn mɛ̀kuu mɛ̀cèm, ɓi ghɛɛ̀sɛɛ kì lèegh ɓi nyìinyìm wìn.

³²Ɓaana rì nɗem wu geesɛ̀n ɓi nyìinyìm wìn, ɓì yi rìghɛn ɗi ɓɛro ɓɛmbog nyìighnyìg. Ɓaana rì rìcenɛ̀n ɓi nyìinyìm wiǹ, fɛlɛ yɛ̀ɛ Bɛ̀ll à cenɛ̀ngà mìni ɓi Kiris.