Read Bafia EFÈZYƐŊ 5 Bible Online

EFÈZYƐŊ 5 - Bafia bible

EFÈZYƐŊ 5

¹Yɛ̀ɛ ɓì rì ɓɔn ɓɛ Bɛ̀ll ɓɛ nɗem, tèèsiina nyoo lɛ ɓi nɔɔ̀ti kìfèèghrɛnà kii.

²Ɓì kɛ̀ɛ̀kɛ̀ɛ̀ ɓi nkɔ̀nɛ̀n fɛlɛ yɛ̀ɛ Kiris à rèsìghà ɓìsi, à fa cɛɓ kii ɓisu wis, fɛlɛ yɛ̀ɛ com ki ŋwaà à faa, nsoò lɛ kìtuwe ki ɓɛ funɛɛ ɓi rìɓɔgsì ɗi Bɛ̀ll; ɓyom ɓìn ɓi ɓa rì syeesyee à kìnùbe.

³Tìsɔ̀mɔ̀g, rì ɓìɓan ɓi tifin mɛkuu mɛ̀cèm, rì zày ì ìkum, ɓì ghɛ̀ɛ̀sɛɛ ɓi lɛ ɓi ɓuŋɗɛ̀n nsoò m̀ɓùŋɗɛn ɓi nyìinyìm wìn, lɛ fɔlɔɔ yɛɛ ghɛɛ̀sɛɛ rì ɓum ɓɛ Bɛ̀ll.

⁴Ki ghɛɛ̀sɛɛ ɓi lɛ ɓi kpaakpaa ɓìɓan ɓi ǹtoòrìɗ, rì ɓìdìmìdimi ɓi ɓiɓan, rì ɓìɓan ɓi ɓiyèg. Ki ghɛɛ̀sɛɛ lɔŋ lɛ ɓi fafa Bɛ̀ll ɓìtògsɛ̀n.

⁵Konaaghna kì yiì lɛ mum ǹcèm ànɛ à rì ǹkìì-tìsɔ̀mɔ̀g, nsoò lɛ ǹkìì ɓìɓan ɓi tifin, nsoò lɛ ànɛ à rì rì zày ì ìkum, yɛɛ lɔɔ lɛ mɓɔgsì ɓìnùn, à yin ɗi gàɓ ɓi kìlɔ̀ŋ ki Kiris, rì ki Bɛ̀ll.

⁶Mum kɛ̀ɛ yègsi mini rì ɓìtòkì ɓi kɛ̀ɛ̀-su lɛ ɓisuu ɓiɓan ɓiǹ innɛ bim i Bɛ̀ll ì rì ɓiì sɛni ɓi ɓɔn ɓɛ ɓɛ ri rì ǹtoòtèɗ.

⁷Kɛ̀ ɓi ɓutɛn ri ɓɔ ɓi kìɓan kidɛŋ nsoò kìfog.

⁸Ɓisuulɛ ɓì ɓaghà ɓumɓɛ ɓi birìm abɛ̀y, nni ɓigomìnɛ, ɓì ti kìtɛɛtɛn ɓi Kan ɓi ɗùm. Nni ghɛɓina min yɛ̀ɛ ɓɔn ɓɛ ɓi kìtɛɛtɛn.

⁹Kìtɛɛtɛn kìn kɛɛ ti ki falàg ɓum ìtèɗ wulɛ ɓɛɛ rɔɔtɛn nɗem ɓɛ ɓa ɓumɓɛ nkpaà, ɓɛ ki ɓa ɓumɓɛ ɓɛɛ̀ kpaakpaa saaɗ.

¹⁰Yiina rìghasì ɗi ɓiɓan ɓi ɓyɛɛ̀ rɔɔghi Kan.

¹¹Kɛ̀ ɓi ɓasɛn ri ɓumɓɛ ɓɛɛ̀ kìki ɓiɓan ɓi birìm, ɓi ɓi ghɛɓsii ɓi com. Lɔŋ ɓì ghɛ̀ɛ̀sɛɛ kì kpàkii ɓyɔ ɓi kìtɛɛtɛn;

¹²ɓisuulɛ ɓìɓan ɓi ɓumɓɛ̀n ɓɛɛ̀ kìki a rìnyam ɓi kilɛɛ ǹtoòrìɗ, nsoò ɓi rìkpaakpàà.

¹³Wɔ̀lɛ i ɓɛ mɛ kpàki ɓiɓan ɓiǹ ɓìcèm, ɓi konag kì ghɛnɛɛ lɛ tɛntɛ̀ɛ̀n, lɛ com kìcèm ki ki mɛ kpagi dan, ki ti ɓi kìtɛɛtɛ̀n.

¹⁴Kìɓan kiǹ kɛɛ̀ki ki ri kì kaliyɛn lɛ: Wɔ̀ ŋwaànɛ u lalày, ghèmɓɛn ɓi fìlo pɛ̀sɛn yì aɗyoo ɓi nyìinyìm à ɓìloŋ, di Kiris a lom̀ wɔ̀ kìtɛɛtɛn.

¹⁵Ɓì konag kì fiɓii righɛghɛ̀ɓ ɗin lɛ syeesyee; kɛ̀ ɓi ghɛghɛɓ yɛ̀ɛ ɓìyèg, ghɛɓina lɔŋ yɛ̀ɛ ɓumɓɛ ɓɛ ri rì ɗyomzɛ̀n.

¹⁶Kɛ̀ ɓi yogsi cààmɛ̀n ki ɓì rì rì kɔ zɛy rì zɛy, lɛ mɛ̀ru mɛ tì rì mɛ miì mɛ rɔɔtɛɛ ɓì.

¹⁷Kìɓan kiǹ kɛɛ̀ki ɓì ghɛ̀ɛ̀sɛɛ ɓi ki ɓaà ɓìdùŋdùŋ ɓi ɓum, ɓì ghɛ̀ɛ̀sɛɛ lɛ ɓi yi cɛ kɛɛ̀ki Kan a kɔ̀nkɔ̀n.

¹⁸Kɛ̀ ɓi ŋwagi mɛrɔ̀g lɛ fɔlɔɔ a ti à syògìì cɛɓ ki ɓùùɓuu; kìɓan kifog, ɓaana ɓɛ̀ronɛn ri Kìtɛntɛ̀ɛ̀n ki Nghay.

¹⁹Ɓì kuùkùrɛ̀n rì ɓɛ̀sam, rì mɛ̀ɓàlì, rì tyem ti Bɛ̀ll; ghàɓina mɛ̀ɓàlì lɛ ɓi ɓɔgsi Kan, rì mɛ̀rem min mɛcèm.

²⁰Ɓi ɓìɓan ɓìcèm, faana Bɛ̀ll à Seŋi wìs ɓìtògsɛ̀n cààmɛ̀n kìcèm ɓi ɗii ɗi Kan wìs Yeesus Kiris.

²¹Ɓaana rì mɛ̀wog ɓi nyìinyìm wìn ɓisuu rinìŋ ɗi ɓì ti ɓì nìgì Kiris.

²²Mìni ɓɛ̀yiɓ, kìina ɓɛ̀yii ɓin mɛwog yɛ̀ɛ ɓì ti ɓì kìlàg Kan.

²³Ɓisuulɛ, baŋì ì làmii giɓ wiì fɛlɛ yɛ̀ɛ Kiris à làmii kìseŋi kìì; nyimiɗ yɛɛ ti ǹghɛɓsì à kìseŋi ki ki ri nyoo yìì.

²⁴Lɔŋ yɛ̀ɛ kìseŋi ki ti ki kilàg Kiris mɛ̀wog, fɔlɔɔ nnɛ ɓɛ̀yiɓ ɓɛ ghɛɛ̀sɛɛ girig kì woògh ɓɛ̀yii ɓaa ɓi ɓìɓan ɓìcèm.

²⁵Mìni ɓɛ̀baŋì, keesiina ɓɛ̀yiɓ ɓin fɛlɛ yɛ̀ɛ Kiris à keesìghà Kìseŋi kii à fa cɛɓ kii lɛ kɔ.

²⁶À kìghà fɔlɔɔ lɛ di Kìseŋi kii kɛɛ ɓa kìtɛnɛn; lɛ à tɛɛ̀zìghà kɔ lɛ rì mɛ̀nig rì jɛ̀ɛ̀;

²⁷à kɔ̀ngà lɛ Kìseŋi kìn kɛɛ kpaŋ ɓi mis mii ɗi rìkem, kɛ̀ɛ̀ tìfin, nsoò fìrun, nsoò kìɓeɓtàg ki kiɓan kidɛŋ. Wɔ̀lɛ ki kɔngà nyi lɛ Kìseŋi kìn kɛɛ ɓa kìtɛnɛn kɛ̀ɛ̀ kìɓan ki ɓɛ fen miì.

²⁸Fɔɔnnɛ ɓɛ̀baŋì ɓɛ ghɛɛ̀sɛɛ kì keesii ɓɛ̀yiɓ ɓaa yɛ̀ɛ ɓɔmiɗ, lɛ ŋwaànɛ à keesii giɓ wiì, à keesii nyimìɗ.

²⁹Ɓisuulɛ mum à ka ɓeèzɛ̀ngà ɓi nyoo yìì i nyimìɗ; lɔŋ à ti à mɛnàg yɔ̀, à ki ɓèŋɓeŋ yɔ̀ lɛ syeesyee fɛlɛ yɛ̀ɛ Kiris à ti à ɓègì Kìseŋi kii.

³⁰Lɛ ɓì rì ɓìkàɓ ɓi ɓi nyoo yìì.

³¹Kìɓan kiǹ kɛɛ̀ki baŋì ì ɓiì càriì lɛ rì seŋi rì jɛɛ, ì ràrɛ̀n ɗì giɓ wiì, kìɓɛ̀ɛ̀ ki ɓum kìn ki ghay mum bog.

³²Kìɓan kiǹ ki ri gɛn à kìɓan ànɛ à rimi; mɛ̀ ǹkpaa fɔlɔɔ ɓi san ànɛ yɛ̀ɛ Kiris rì kìseŋi kìì.

³³Kaa soo rì la, mum ǹcèm ànɛ ɓi mìni a keesi giɓ wiì yɛ̀ɛ nyimìɗ, giɓ bimiɗ à kì yii mɛ̀wog.