Read Bafia FÌLÌPYƐŊ 1 Bible Online

FÌLÌPYƐŊ 1 - Bafia bible

FÌLÌPYƐŊ 1

¹Ɓìsi ɓɛ̀kìì-ɓìsay ɓɛ Yeesus Kiris lɛ rì Pol, rì Timote, tì kàni ɓum ɓɛ Bɛ̀ll ɓɛ̀ ɓi Yeesus Kiris ɓɛ̀cèm ɓɛ ɓi bàn ì Filiɓ, rì ɓɛ̀kɛ̀ɛ̀sì ɓaa rì ɓɛ̀dyaakìrɛ̀.

²Bɛ̀ll à Seŋi wìs rì Kan Yeesus Kiris ɓɛɛ fa mìni lɛ rì geesɛ̀n, rì fyòoog.

³Cààmɛ̀n kìcèm ki ǹ-yitii mìni, ǹti falàg Bɛ̀ll wɛ̀m ɓìtògsɛ̀n.

⁴Ɓi bɔ̀ŋzɛ̀n yìcèm yi nkìki ɓisu win ɓɛsɛ̀ɛ̀ ɓɛ̀cèm, ǹti m̀ɓɔ̀ŋzàg rì kìnyàà,

⁵ɓisuu gàɓ ìnɛ ɓì mɛ teɗ ɓi rìsààtì ɗi Syeesyee à Ɓɔlɛ, à tumɛ̀n ŋwos a ǹtonto, à kpaŋ ɓigomìnɛ.

⁶Ǹ-yii syeesyee à rìyi lɛ roànɛ à tumɛ̀ngà syeesyee à kìsay anɛ̀n ɓi mìni, à rì ɓiì kɛ̀ɛ ri kɔ asu à kpaŋ yɛ̀ɛ à ri wɔmɓɛn kɔ ɓi ŋwos a Yeesus Kiris.

⁷Ki wooghrɛɛ gì lɛ mɓa rì mekuu mɛ mɛyitì mɛ fɔlɔɔ ɓi san wìn, ɓisuulɛ ɓì rì mɛ̀ ɓi nɗem, rì tì lɛ, nsoò cààmɛ̀n ki ǹɗì ɓi naà-zày, nsoò cààmɛ̀n ki ǹɗì ɓidan nkàakamɛ̀n ǹki sìisiìràg Syeesyee à Ɓɔlɛ, mìniìcèm ɓì ti ɓì tekì gàɓ ɓi geesɛ̀n ìnɛ Bɛ̀ll à kìghà mɛ̀.

⁸Lɛ Bɛ̀ll à rì mɛ̀ wusìnɛ̀ɗ lɛ, ǹkeesii mìni ɓɛ̀sɛ̀ɛ̀ ɓɛ̀cèm rì syeesyee à ǹkɔ̀nɛ̀n à Yeesus Kiris.

⁹Com ki mɛ̀ɛ ntɔtɔg Bɛ̀ll ɓi bɔ̀ŋzɛ̀n yɛm̀ ki ri lɛ, ǹkɔ̀nɛ̀n wìn a kɛn asu à tɔɔtɔ̀ɔ̀, ɓi rìyi ɗi ɓiɓan, rì ɓi syeesyee à rìwog,

¹⁰fɔlɔɔ nnɛ ɓi ɓiì yiì rìghasì ɗi ɓiɓan ɓi ɓi ri rì gɛɓsɛ̀n, ɓì ki ɓa mɛrem lɛ sɛɛghi sɛɛghi, kɛ̀ɛ̀ kìɓan ki ɓɛ ri lɛ ɓɛ ɓɛy mìni miì ŋwos a Kiris;

¹¹ɓì ki ɓa ɓɛronɛn rì mɛ̀kìkìì mɛ saaɗ mɛ mɛ ti mɛ ghɛnàg a lɔ̀ŋkis lɛ Yeesus Kiris ɓisuu rikem, ɗì rìɓɔgsì ɗi Bɛ̀ll.

¹²Ɓɔɔsoŋ̀, ki kɔni mɛ̀ lɛ di ɓyàa yii lɛ, kìɓan ki ki nkìi mɛ̀, ki nghɛɓsii kɔm̀ lɛ Syeesyee à Ɓɔlɛ a kɛɛ̀di beèbɛ̀y.

¹³Lɛ ɓɛ̀sujàà ɓɛ̀cèm ɓɛ ɓi gari ì rìfòm, rì jàŋ yimbog yìcèm ɓɛ yii lɛ tɛntɛ̀ɛ̀n lɛ ǹɗì ɓi naà-zày lɛ ǹɗì nkìì-kìsay a Kiris.

¹⁴Ntyweeyi wu mɛ yùti ɓɛgeni ɓɛ̀m lɛɛ̀gwey ɓi Kan, lɛ naà-zày ìnɛ ǹkɛ̀ngà; fɔɔnnɛ ɓɛ ti rì kìghɛɛsii ki ki cee lɛ ɓɛɛ ghaàghàgsì jɛ̀ɛ̀ ì Bɛ̀ll kɛ̀ɛ̀ ìris.

¹⁵Ki ri lɔŋ saaɗ lɛ ɓɛ̀ro ɓɛdɛŋ ɓɛɛ̀ làalam̀ɓɛ̀n Kiris rì ǹɗem wu yàaka ki ɓa yɛ̀ɛ ɓɛ ri ɓi ǹlog rì mɛ̀, wɔ̀lɛ ɓɛ̀ro ɓɛmbog ɓɛ làalamɓɛ̀n nyi rì ǹɗem wu sɛɛghi sɛɛghi.

¹⁶Ɓɛ̀roɓɛ̀n ɓɛɛ̀ kìki kisay rì ǹkɔ̀nɛ̀n lɛ ɓɛ yii lɛ Bɛ̀ll à rɛsìghà mɛ̀ lɛ nkaàkàmɛ̀n rì Syeesyee à Ɓɔlɛ.

¹⁷Ɓɛ̀ro ɓɛm̀bog ɓɛ yin ɓiì làalam̀ɓɛ̀n Kiris rì ǹɗem wu sɛɛghi sɛɛghi, ɓɛɛ̀ kìki kisay kiǹ rì ǹɗem wulɛ ɓɛ ri ɓi nlog, ɓɛ fekì lɛ, ɓɛɛ̀ foofoŋdì mɛ̀ ǹtɔɓ ɓi naà-zày ìnɛ ǹɗì miì.

¹⁸Ki kii ɓi mɛ com. Nsoò mɛ̀yitì maa maa ɓeɓtɛɛ, nsoò maa rɔɔtɛɛ, kìɓan ki ki ri miì ki ri lɛ, ɓɛɛ̀ làalam̀ɓɛ̀n Kiris; mɛ̀ nki wowog kirɔɔ fɔlɔɔ, ǹɗì ɓiì ki kɛ̀nkɛni asu ǹwowòg kìrɔɔ,

¹⁹ɓisuulɛ ǹ-yii lɛ, kìɓan kiǹ ki ɓiì lɔ̀ɔ̀ghrɛɛ ɓi bee inɛ lɛ mɛ̀ ǹghɛɓ lɛ bɔ̀ŋzɛ̀n yin, rì ǹghɛɓsɛn wu Ǹghay à Yeesus Kiris à ti à yùlàg rì wɔ.

²⁰Lèg ànɛ ǹɗì rì coo zày, ǹki ɓa ri dyàɓɛn, màa wog ɓi ntoòrìɗ ri com kidɛŋ. Ɓi cààmɛ̀n ki, lɔŋ yɛ̀ɛ ɓi ɓyààmɛ̀n ɓimbog, rì ǹtyweeyi wu wu ri mɛ̀ ɓiì ronì ɓi nɗem, Kiris à ɓiì kemì ɓi nyoo yɛ̀m, màa soo rì cem, màa soo wìì.

²¹Ɓisuulɛ Kiris à rì cɛɓ kɛ̀m, fɔɔnnɛ rìwu ɗi ri mɛ̀ rì kɔ̀misɔ̀n.

²²Wɔ̀lɛ i rìɓaɓà ɗi cem ɓi mɛ̀mùù ɗi ri lɛ ɗi ɓa rì gɛɓsɛ̀n lɛ nki kìsay, com ki ǹɗì lɛ mɓɔ̀n ki yag mɛ̀.

²³Ǹɗì mɛ̀rem mɛɓɛɛ̀; ǹɗem wu lɛ di màa kɛ̀ɛ, ti kɔkɔri ɗì Kiris, kìɓan kiǹ ki ki rɔɔtɛn ki cee.

²⁴Wɔ̀lɛ ki pɔɔ̀zii mìni kì ɓaà rì gɛɓsɛ̀n lɛ mɛ̀ nka ghɛghɛɓ.

²⁵Nɗem wɛ̀m wùcèm wu gherɛɛ kìɓan kiǹ lɛ ǹ-yii lɛ ǹɗì ɓiì ka ghɛghɛɓi ǹki kɔ̀ri mìniìcèm jàŋbog lɛ ɓi tɔɔ̀, ɓì ki nyààrɛn ɓi rìgherɛ̀n ɓi ɗùm.

²⁶Rìsugtìì ɗi mɓiì sugtii yi a lɔ̀ŋkin, ɗi ri mìni ɓiì faà coo nyɔɔnyɔn à kìɓan anɛ ɓi rì lɛ ɓì sànsàm miì ɓi Kiris ɓi ɗùm, lɛ mɛ̀.

²⁷Kìɓan kifog, ghɛɓina rìkuu ɗi cɛɓ ɗi ɗi ghɛɛ̀sɛɛ rì Syeesyee a Ɓɔlɛ à Kiris ɓi lèg ànɛ lɛ nsoò màa yùu mìni kì ghɛɛ̀, nsoò lɛ màa rì mìni fìràɓ, ǹghɛ̀ɛ̀sɛɛ kì woògh lɛ ɓum ɓɛɛ̀ kpaakpaa lɛ: Ɓì rì lɔŋ ɓɛsììrɛn, ɓì ɓa ɓɛ̀fèg ɓɛ̀fog, ɓi ki ɗùùɗuu nɗem wùfog ɓisuu ǹtyweeyi wu wu ri ɓi Syeesyee à Ɓɔlɛ.

²⁸Kɛ̀ ɓi càrɛn lɛ ɓɛ̀bènàbena ɓɛɛ niŋzi mìni nyoo nsoò lɛsàg; kìɓan kiǹ ki ri kìrèmzɛnà ki lɛ, ɓɛ ri ɓi rìɗyaŋ; wɔ̀lɛ ɓi san wìn, ki ɓa kìrèmzɛnà ki cɛɓ.

²⁹Kìɓan kiǹ ki riì yɛ̀ɛ Bɛ̀ll, ɓisuulɛ àa mààgh ànɛ lɛ ɓi gherɛn Kiris nnɛ Bɛ̀ll à faghà mìni nyi rì nyi, ànɛ lɛ ɓi wog girig mɛ̀tɔɓ ɓisu wii, à rì girig miì.

³⁰Kɛɛ̀ki ɓi ɗùùɗuu zàà ìnɛ ɓì ghɛngà mɛ̀ di nɗùùɗùù, ìnɛ ɓì ki yii lɛ ǹkaka ǹɗùùɗùù à kpaŋ ɓigomìnɛ.