Read Bafia FÌLÌPYƐŊ 2 Bible Online

FÌLÌPYƐŊ 2 - Bafia bible

FÌLÌPYƐŊ 2

¹I ǹtyweeyi wu yɛ̀ɛ Kiris wu ki rì lɛ wu fɔɔsì mum ǹɗem, i rìfalɛ̀n ɗi itèɗ ɓi ǹkɔ̀nɛ̀n ɗi ki rì wɔɔ, i rìràrɛ̀n ɗi rì Nghay ɗi ri wɔɔ, i ǹɗem wu nyìighnyìg wu geesɛ̀n wu ri lɛ wu ɓa wɔɔ,

²kìina lɛ kìnyàà kɛɛ ron mɛ̀ nɗem, di ɓì ɓaa jɛ̀ɛ̀ bog. Ɓaana rì rìkuu ɗi ǹkɔ̀nɛ̀n ɗìfog, ɓì ɓa ǹɗem wufog, ɓì ki ɓa ti ɓɛfèg ɓɛ̀fog.

³Kɛ̀ ɓi kì kiɓan kidɛŋ rì ǹɗem wu kalɛn nsoò lɛ ɓisuu rikem ɗi kɛ̀ɛ̀-su. Wɔ̀lɛ sɛɛ̀dɛɛna mìniìɓɔmiɗ ɓi zi, ɓì teɗ ɓum ɓɛmbog fɛlɛ yɛ̀ɛ ɓɛ ceeghii mìni.

⁴Mum ǹcèm ànɛ ɓi mìni kɛ̀ɛ yiti lɔŋ lɛ kìrɔɔ kii ki nyimiɗ, à ghɛ̀ɛ̀sɛɛ girig kì yitii kirɔɔ ki ɓɛro ɓɛm̀bog.

⁵Ɓi nyìinyìm wìn, ɓaana rì mɛ̀yitì mɛ Yeesus Kiris à ɓaghà rì mɔ.

⁶Nyi ànɛ à ɓaghà yɛ̀ɛ Bɛ̀ll, à ghɛngà ɓi lɛ rìɓa ɗi lɛ, rì nyi rì Bɛ̀ll ɓɛɛ ɓa ǹɗɛli wufog, ɗi ri com ki à ghɛ̀ɛ̀sɛɛ kì sɔrii ɓi-tèɗ;

⁷wɔ̀lɛ à kòrìghà rìɓa ɗii ɗiǹ ɗìcèm à teɗ rìɓa ɗi ǹkìì-kìsay; à lɔ̀ɔ̀ghrɛ̀n ɓi kìpisɛn ki ɓum; à rèsɛ̀ngà yɛ̀ɛ zɛy rì zɛy à mum,

⁸à sɛɛ̀dɛ̀n nyimiɗ ɓi zi à ki ɓa ri mɛ̀wog à kpaŋ a rìwu; rìwu ɗincèm lɛ ɗi ɓi kɔrɔs aɗyòò.

⁹Kìɓan kiǹ kɛɛ̀ ki Bɛ̀ll à ɓɔgsìghà nyi ɓi-kɔ̀ɔ̀ wu wu teŋmɛɛ wu cee mɛ̀kɔ̀ɔ̀ mɛ̀cèm à ki fa nyi ɗii ɗi ɗi laŋi mii mɛ̀cèm

¹⁰lɛ di ɓyom ɓìcèm ɓi ɓi ɓyɛɛ̀ ghɛghɛɓ aɗyoo, rì ɓi ɓyɛɛ̀ ghɛghɛɓ ɓi ziinɛ, rì ɓi ɓyɛɛ̀ ghɛghɛɓ ɓi zi ɓiɗùm, ɓyɛɛ ɓag mɛ̀ɗu ɓi zi, ɓi ɓɔgsì ɗii ɗi Yeesus,

¹¹ɓɛ̀sɛ̀ɛ̀ ɓɛ̀cèm ɓɛ ki làmɓɛ̀n ɓi myɔm maa lɛ Yeesus Kiris à rì Kan ɓi rìkem ɗi Bɛ̀ll Seŋì.

¹²Fɔlɔɔ nnɛ, mìni ɓum ɓɛm ɓɛ nɗem ɓɛ ɓyàa kìkì mɛ̀ mɛ̀wog, mɛ̀wog min mɛ̀ kɛɛ̀ sugtɛn lɔŋ lɛ cààmɛ̀n ki ǹɗì mìni jàŋbog, wɔ̀lɛ mɛ ghɛɛ̀sɛɛ kì ghɛnɛɛ ti à cee fɔlɔɔ, cààmɛ̀n ki ǹɗì mìni ki fìràɓ. Salina ɓisuu gòri yìn, rì coo bɔgsɛ̀n lɛɛ̀gwey.

¹³Ɓisuulɛ Bɛ̀ll nnyɛɛ kìki kisay ɓi mìni, à fafà mìni lɛ rì ǹɗem, rì ìtèɗ wu kìyen ɓiɓan ɓi ɓi ghɛɛ̀sɛɛ rì syeesyee wìì a ɗyomzɛ̀n.

¹⁴Com kìcèm ki ɓì rì lɛ ɓì kì, kìina kɔ kɛ̀ɛ̀ tìrùrùmì nsoò lɛ tìkàna

¹⁵di fɔɔnnɛ ɓì ɓa kɛ̀ɛ̀ bɛ̀lɛn, ɓì ki ɓa ɓɛtɛnɛn, ɓì ɓa ɓɔn ɓɛ Bɛ̀ll ɓɛ ɓɛ ri kɛ̀ɛ̀ kìɓeɓtàg ki kiɓan kidɛŋ ɓi nyìinyìm à gbàà ì ɓum ìnɛ ì rì ɓìɗyoŋi ì ki ɓa ti ɓɛ̀ɓèèɓeè; ɓì ghɛ̀ɛ̀sɛɛ kìlònlomi ɓi nyìinyìm wàà fɛlɛ yɛ̀ɛ tyɔɛy,

¹⁶ɓì rèrèsì ɓɔ ɓɔlɛ à cɛɓ; kìɓan kiǹ ki ri mɛ̀ ɓiì ɓaà kìɓan ki nkeŋkem miì ɓi ŋwos a Kiris, ki ki rèsi lɛ ǹkpuùkpùtɛ̀ngà ɓi, kɛ̀ɛ nki ɗiɗig mɛtɔɓ zɛy.

¹⁷Wɔ̀lɛ nsoò bwaɓ yɛm̀ yaa ki kpaŋì ɓi sìg à com ki ɓɛ funɛɛ Bɛ̀ll, lɛ yɛɛ ɓɔɓtɛn ɓi rìfa ɗi rìgherɛ̀n ɗin ɗyɛɛ̀ ɓɔɔɓɔgsì Bɛ̀ll rì ɗyɔ, fɔlɔɔ a fa lɔŋ mɛ kìnyàà, ǹki nyààrɛn ǹɗaŋ ri mìni ɓɛ̀sɛ̀ɛ̀ ɓɛ̀cèm.

¹⁸Mìni girig, nyààrɛɛna, ɓì ki nyààrɛn ǹɗaŋ ri mɛ̀.

¹⁹Ǹɗì rì dyàɓɛn ɓi Kan Yeesus, lɛ cààmɛ̀n lɛsàg ǹɗì ɓiì romìì Timote a lɔ̀ŋkin, lɛ di ɓɛ̀ɓɔlɛ ɓin ɓɛ ǹɗì ɓiì terì ɓɛɛ foŋdi mɛ̀ ìtèɗ ɓi nɗem;

²⁰ɓisuulɛ ǹ-yin ɗi ŋwaàdɛŋ ànɛ tì rì mɛ̀yitì mɛ̀fog rì nyi, ànɛ à rì lɛ à ghɛ̀ghɛ̀rì lòo ǹɗem aɗyòò ɗì rìɓa ɗin.

²¹Lɛ ɓum ɓɛ̀cèm ɓɛɛ̀ kaakaa lɔŋ kirɔɔ kaa ki ɓɔmiɗ, ɓɛ̀ kɛɛ̀ kaa ki Yeesus Kiris.

²²Ɓì yii lɛ Timote à mɛ fa ɓirèmzɛnà ɓi ɓi resii lɛ à rì mum à ǹtyweeyi; ɓì yi girig lèg ànɛ à falɛ̀ngà ɓi kìsay ki Syeesyee à Ɓɔlɛ ǹɗaŋ ri mɛ̀ lɔŋ yɛ̀ɛ man ànɛ à rì seŋi a mɛ̀kòò.

²³Nyi nnɛ nfèfeg lɛ nɗom̀ yì mìni, di m̀manɛɛ kì yiì rìsyɔn ɗi kiɓan kɛm̀ lɛ syeesyee.

²⁴Fɔɔnnɛ ǹɗì rì ǹtyweeyi ri Kan lɛ cààmɛ̀n lesàg mɛ̀ɛmiɗ. Nkpaŋ lɔŋ foo.

²⁵Mɛ̀ɛ nghɛɛ kìrɔɔ lɛ mpɛɛziì mìni kì romìì Epafirodit à geni wɛ̀m ànɛ ti kiki kisay ri nyi, tì ɗùùɗùù ǹɗaŋ ri nyi; rì nyi innɛ ɓìi nɗomiì mɛ̀ nghɛɓsɛn ɓisuu ɓyom ɓi ɓi nkaakààrɛ̀n mɛ̀.

²⁶Àa ǹɗì rì coo zày ìnɛ lɛ di àa ghɛɛ̀daagh mìni ɓɛ̀sɛ̀ɛ̀ ɓɛ̀cèm, wɔ̀lɛ kìɓan ki ki ǹ-yeesii nyi lɛɛ̀gweey, ki ǹɗì kiɓan ki ɓɔlɛ à fìroɓ fii anɛ ɓìi nteri foo.

²⁷Ki ri lɔŋ fɔlɔɔ lɛ, àa nɗoɓi yɛ̀ɛ mɛ̀nɔ̀ɓɔ̀, à ɓosɛ̀n rìwu, kìɓan kifog Bɛ̀ll àa nwoogh nyi nyìighnyìg, nni àa nyi cɛ̀ncii innɛ Bɛ̀ll àa nwoogh nyìighnyìg, àa nwoogh girig mɛ̀ nyìighnyìg, lɛ kɛ̀ɛ mɓa lɛ, mɛ̀ ɓi ǹɗemi-kɛŋɛn abɛ̀y, wudɛŋ, wu yu tì kì ɓɔɓtɛɛ ɓi wiǹ.

²⁸Fɔɔnnɛ ǹfyaŋzii yì mìni kì romìì nyi mɛ̀ree rì mɛ̀ree lɛ, ɓi woòg kìrɔɔ yɛ̀ɛ ɓì rì nyi ɓiì ghɛɛdii, ǹɗemi-kɛŋɛn wu ǹɗì rì wɔ, wu ghaɓɓɛ̀n.

²⁹Ɓì ghɛ̀ɛ̀sɛɛ min lɛ ɓì ghàɓ nyi rì kɔɔ̀kɔɔ̀ à kìnyàà ànɛ ɓi Kan ɓi ɗùm, ɓì ki nyaasag rikuu ɗi ɓum ɗi yɛ̀ɛ nyi.

³⁰Ɓisuulɛ, àa m̀mɛɛ̀ wu lɛ kìsay ki Kiris, àa mmɛ̀ɛ ɗimzi cɛɓ kii, lɛ a yu mɛ̀ rì ǹghɛɓsɛn wu ɓìi n-yin lɛ ɓì yù rì wɔ mìniìɓɔmiɗ.