Read Bafia KÒLÒSYƐŊ 2 Bible Online

KÒLÒSYƐŊ 2 - Bafia bible

KÒLÒSYƐŊ 2

¹Lɛ mɛ̀ɛ nkɔ̀nkɔn lɛ di ɓyàa yii coo wɛ̀y wu mɛ̀ɛ nɗùùɗuu ɓisu win, rì ɓisuu ɓumɓɛ a Lawodise, rì ɓum ɓɛ̀cèm ɓɛ ɓɛ yii ɓi mɛ ɓi-su.

²Nɗùùɗuu fɔlɔɔ ɓisuulɛ mɛ̀rem maa mɛɛ ɓa mɛ̀ronɛn ɗi ìtèɗ, rì tì lɛ ɓɛɛ ɓa ɓɛ̀ràrɛn ɓi nkɔ̀nɛ̀n, ɓɛ ki ɓa ti ɓɛronɛn ɗi kɔɔ̀kɔɔ̀ à ɗyomzɛ̀n, fɔɔnnɛ ɓɛ ri ɓiì yii fèg à Bɛ̀ll ànɛ à rì a rìnyam, yɛɛ lɔɔ lɛ Kiris.

³Ɓi Kiris ànɛ̀n nnɛ ìkum wu ɗyomzɛ̀n wùcèm rì wu riyi ɗi ɓiɓan wu ri wù nyamɛn.

⁴Ǹkpaa kìɓan kiǹ ɓisuulɛ mum kɛ̀ɛ ɓɔ̀ŋ mini rì ɓìsyeesyee ɓi ɓitòkì.

⁵Lɛ nsoò màa rì mìni fìràɓ ɓi rìɓa ɗi ɓi mɛ̀mùù, ǹɗem wɛ̀m wu ri lɔŋ foo ri mìni, ǹwowog kirɔɔ yɛ̀ɛ nseesee syeesyee à rìwòŋzàg ɗi ɓiɓan ɓi nyìinyìm wìn, rì yɛ̀ɛ rìgherɛ̀n ɗin ɗi ɓi Kiris, ɗi ri lɛ kpeg-kpeg.

⁶Fɔlɔɔ nnɛ yɛ̀ɛ ɓì tekà Yeesus Kiris lɛ Kan wìn, ghɛɓina min cɛɓ ki ɓumɓɛ ɓɛ ri ɓɛ̀ ràrɛn ɗi nyi.

⁷Ɓaana ɓɛ̀ɓaghɛn gàŋ ɓi nyi, ɓì toŋ cɛɓ kin ɓi nyi, ɓì sììrɛ̀n ɓi rìgherɛ̀n lɔŋ yɛ̀ɛ ɓɛ resìghà mìni, ɓì ki fafa Bɛ̀ll ɓìtògsɛ̀n lɛɛ̀gwey.

⁸Ɓì konàg lɛ ŋwaàdɛŋ kɛ̀ɛ wɔɔsi mini ɓi fìram fi ɗyomzɛ̀n rì ǹ-yègsɛ̀n à zɛy, ɓyɛɛ ri ɓìtoŋɛn ɓi ɓìsyɔ̀ɔ̀ ɓi ɓum, rì mɛ̀tèɗ mɛ mɛghay mɛ ɓi ziinɛ, ɓyɛ̀ kɛɛ̀ ɓa ɓitoŋɛn ɓi Kiris.

⁹Ɓisuulɛ rìɓa ɗìcèm ɗi Bɛ̀ll à rì ɗi yughà kì kɔ̀rii ɓi nyoo ì Kiris lɛ kɔɔ̀kɔɔ̀.

¹⁰Fɔɔnnɛ ɓì mɛ teɗ ɓyom ɓìcèm kɔɔ̀kɔɔ̀ à rìteɗ ɓi Kiris ànɛ à rì rìfòm ɗi ɓɛ̀làmì ɓɛ̀cèm rì mɛ̀tèɗ mɛ mɛghay mɛ̀cèm.

¹¹Ɓi nyi, ɓì kɛ̀rɛ̀ngà rìkuu ɗi kɛ̀rɛ̀n ɗi ɗi yin ɗi ɓum ɓɛɛ kɛri rì ɓyàg ɓyaa, kìɓan kifog, ɓì kɛ̀rɛ̀ngà kɛ̀rɛ̀n à Kiris ànɛ à rì lɛ mum a leg ɓi rìkpàn ɗi nyoo ì kìɓe.

¹²Ɓɛ ɓomgà mìni ǹɗaŋ ri nyi yɛ̀ɛ ɓì ɓàɓtɛ̀ngà, ɓì mɛ ghèmɓɛn girig ɓi nyi, ǹɗaŋ ɗi nyi lɛ rìgherɛ̀n ɗi ɓì gherɛɛ ìtèɗ wu Bɛ̀ll ànɛ à ghèmzìghày nyi a ɓìloŋ.

¹³Mìni ɓɛ ɓì ɓaghà ɓìloŋ abɛ̀y lɛ ɓìɓe ɓin, ɗì rìɓa ɗi ɓì ɓaghà kɛ̀ɛ̀ kìkɛ̀rɛɛ, Bɛ̀ll à mɛ fati mini cɛɓ ǹɗaŋ ɗi Kiris, yɛ̀ɛ à cenɛ̀ngà ɓisi ɓìɓe ɓis ɓìcèm.

¹⁴À pisighà sɔmìnà à m̀ɓeɓɛn ànɛ à ɓaghà ɓisi ɓi nyoo innɛ ɓìɓan ɓi miì ɓi nɔɔ̀nɔ̀ɔ̀tìghà ɓìsi; à pisìghà ɓìsi nyi yɛ̀ɛ à kpangà nyi ɓi kɔrɔs.

¹⁵À dùŋzìghà ɓɛ̀làmì rì mɛ̀tèɗ mɛ mɛghay, à ghanì ɓɔ ɓi mis mɛ ɓum ɓɛ̀cèm yɛ̀ɛ à yagsàkà ɓɔ ɓi kɔrɔs aɗyòò.

¹⁶Nni fɔɔnnɛ mum kɛ̀ɛ yɔ̀mdi mini ɓi ɓìɗilàg ɓi ɓì rì lɛ ɓì ɗi, rì com ki ɓì rì lɛ ɓì nɔ, nsoò ɓi kìɓan ki ticàɓ tidɛŋ nsoò lɛ ǹtaasi wu ŋwii, nsoò lɛ saɓàt.

¹⁷Ɓyom ɓìn ɓìcèm ɓi ri lɔŋ cììziŋ ki ɓiɓan ɓi ɓi riì, wɔ̀lɛ kɔɔ̀kɔɔ̀ à kìɓan a rì lɔŋ ɓi Kiris.

¹⁸Kɛ̀ ɓi càrɛn lɛ mɛ̀lèɓ mɛ ɓi mɛ̀ree mɛ ɓi ghɛghɛŋì ŋwaàdɛŋ a ɓatɛn mìni mɔ yɛ̀ɛ ki kɔni nyi, rì ìghèy lɛ à rì ǹsɛɛ̀dɛn nyimiɗ ɓi zi, rì tì lɛ, a ɓɔɔɓɔgsì ɓum ɓɛ titom; rìkuu ɗi mum ɗìn ɗi ti ɗi ɓiisàg kì kuughraagh ɓiɓan ɓi ɗi ghɛɛ fɛlɛ yɛ̀ɛ ɓìdɛ̀ndɛm̀; ɗi ki ɓalag ɗi ronɛn ɗi ɓìdaŋà ɓi kɛ̀ɛ̀-su, ɓi ɓɔɔ mɛyitì ɓii ɓɛ à rì rì ɓɔ, ɓi rìɓa ɗii ɗi lɛ mum.

¹⁹Rìkuu ɗi mum ɗìn ɗi yin ɗi ràrɛn ri ǹto wu wu ɓanɓani nyoo bimiɗ, wu ki kì lɛ nyoo ìnɛ̀n yɛ̀ɛ rarag lɛ syeesyee ɓi jàŋ yi ì rì miì ǹwògakɛn ì ki tɔɔtɔɔ kitɔɔ ki Bɛ̀ll a fafa yɔ̀.

²⁰I ɓì wughà ǹɗaŋ ri Kiris ɓi ɓɛg ànɛ a mɛ̀tèɗ mɛ mɛghay mɛ ɓi ziinɛ, ɓisuucɛ nnɛ ɓɛ kaŋkàŋ tì mìni rì ɓìɓan ɓiǹ yɛ̀ɛ ɓɛɛ̀ kali lɛ ɓì kaka ɓì ghɛghɛ̀ɓ ɓi ɓìsyɔ̀ɔ̀ ɓi ɓi ziinɛ?

²¹Kɔ̀ɔ teɗ, kɔ̀ɔ ɓoɓti, kɔ̀ɔ kòm!

²²Ɓìcèlì ɓiǹ ɓìcèm ɓi koŋkomi ɓyom ɓi ɓi ti ɓi ɗyogì di ɓɛ kii kìsay miì gɛ̀mbog; ɓìɓan ɓiǹ ɓi ri lɔŋ ɓidɔ̀gsɛna rì mɛ̀rèsàg mɛ ɓum ɓɛɛ foŋi.

²³Ki ri saaɗ lɛ ɓìcèlì ɓiǹ, ɓi rìseèsèèrɛ̀n ɗi ɓi mis, ɓi ri lɛ ɓɛ sɛg lɛ, ɗì rìɓɔgsàg ɗi Bɛ̀ll ɗi miì ɗi ɗi ri kìɓan ki ɓum ɓɛɛ ɓekii, ɗì rìsɛɛ̀dɛ̀n ɗi ɓi zi, rì kìɓan ki lɛ, mum a ki nyoo yìì rìgɛn; kìɓan kifog gɛ ɓìɓan anɛ̀n à ghɛɓsii ɓi bimiɗ à com, à rì lɔŋ ɓisuu kinyàà ki mɛmùù.