Read Bafia KÒLÒSYƐŊ 3 Bible Online

KÒLÒSYƐŊ 3 - Bafia bible

KÒLÒSYƐŊ 3

¹I ɓì mɛ ghèmɓɛn min nɗaŋ ri Kiris, kaakaana ɓìɓan ɓi aɗyoo, jàŋ inɛ Kiris à rì ǹkɔ̀kɔriyɛn ɓi weèlem à Bɛ̀ll.

²Foŋina ǹɗem rì ɓìɓan ɓi aɗyoo, kɛ̀ ɓi fèfeg ɓi ɓi ziinɛ.

³Ɓisuulɛ, ɓì rì ɓìloŋ, cɛɓ kin ki ri kì nyamɛn nɗaŋ ɗi Kiris ɓi Bɛ̀ll.

⁴Yɛ̀ɛ Kiris ànɛ à rì cɛɓ kin, à ɓiì rèsɛɛ, fɔlɔɔ nnɛ, mìni girig ɓì ɓiì rèsɛɛ nɗaŋ ri nyi ɓi rìkem ɓi ɗùm.

⁵Wolina ɓìɓan ɓi ɓi zi ɓìcèm ɓi ɓì rì rì ɓyɔ ɓi mìniìɓɔmiɗ, ɓyɛɛ ri lɛ, cɛɓ ki tisɔ̀mɔ̀g, cɛɓ ki tifin, ɗì rìfalɛ̀n ɗi ɓi ɓìɓan ɓi ɓeɓtɛn, rì kìsee ki ikum, kɛɛ ri fɛlɛ yɛ̀ɛ rìɓɔgsì ɗi ɓinùn.

⁶Ɓìɓan ɓiǹ ɓyɛɛ ti ɓi kilàg lɛ Bɛ̀ll a wog bim, ri ɓumɓɛ ɓɛ ɓeni nyi kì kìi mɛwog[2].

⁷Cɛɓ ki ɓì ghɛghɛ̀ɓkà abɛ̀y kɛɛ ri lɔɔ, di ɓì kaka ɓi ɓìɓe ɓiǹ ɓi ɗùm.

⁸Nni à tumɛ̀n ɓigomìnɛ, mìni girig, càrina ɓìɓan ɓiǹ ɓìcèm lɛ rì bim, rì kìnyɛn, rì kìɓeɓtàg ki nɗem, rì tìfena, rì ɓìtòkì ɓi kɛ̀ ǹtoòrìɗ ɓi ɓi ti ɓi kpagìì ɓi myɔm min.

⁹Pwàà à ghɛ̀ɛ̀sɛɛ tì ɓi ki ɓaà ɓi nyìinyìm wìn, ɓisuulɛ ɓì mɛ rini lɛ rì fìɗyàɓ fin fi riɓa fi ɓi mɛ̀mùù rì ɓìɓan ɓi miì.

¹⁰Ɓì teɗ nyɔɔnyɔn à rìɓa, ànɛ à rì rìɓa ɗi ŋwaànɛ à ti ncenɗɛn, à ɓa cààmɛ̀n kìcèm à suùsùgtì nyɔn ɓi kìpisɛn ki roànɛ à kìghà nyi, lɛ di a konag lɔŋ nyi kì yiì kɔɔ̀kɔɔ̀ à rìyi.

¹¹Foo ǹlànag wu yiìdi ɓi nyìinyìm ànɛ lɛ, rì muu Gìrɛg, rì muu Ɓɛ̀yudɛ̀n, nsoò lɛ rì ŋwaànɛ à rì ǹkɛ̀rɛn, rì roànɛ à yin nkɛ̀rɛn, ǹkèn a mum, rì muu Sit, nsoò lɛ rì ǹkpàn rì ŋwaànɛ à yin ǹkpàn, lɔŋ Kiris yɛɛ ri com kìcèm ɓi ɓum ɓɛ̀cèm.

¹²Nni yɛ̀ɛ Bɛ̀ll à ɓɔ̀ngà mìni, à tɛɛ̀zì mìni, à ki keesi mini, ɓì ghɛ̀ɛ̀sɛɛ lɛ ɓì waatɛ̀n nɗem wu nyìinyìg, rì wu geesɛ̀n, rì wu sɛɛ̀dɛn ɓi zi, rì wu tɛ̀tɛ̀rɛ̀ɛ̀, rì rìnìɗ ɗi nɗem.

¹³Ɓì ghɛ̀ɛ̀sɛɛ kì ceecenɛ̀n mìni rì mìni, i ki kpaŋi lɛ ŋwaàdɛŋ à rì rì kìɓan ki ki kɛŋi nyi rì geni, ɓaana rì rìcenɛ̀n ɓi nyìinyìm wìn; fɛlɛ yɛ̀ɛ Kan à cenɛ̀ngà mìni, mìni girig ɓaana ɗì ricenɛ̀n ɓi nyìinyìm wìn.

¹⁴Wɔ̀lɛ ɓi ɓìɓan ɓiǹ ɓìcèm, ɓaana rì ǹkɔ̀nɛ̀n. Ǹkɔ̀nɛ̀n à rì com ki ki ti ki raɗkì ɓum syeesyee à rìràɗ.

¹⁵Fyòoog à Kiris ànɛ Bɛ̀ll à reŋìghà mìniìcèm miì lɛ, ɓi ɓa ɓìkàɓ ɓi ɓi nyoo bog, a lami mɛ̀rem min. Ɓì ghɛ̀ɛ̀sɛɛ kì yiì rìfa ɗi ɓìtògsɛ̀n.

¹⁶Jɛ̀ɛ̀ ì Kiris yɛ̀ɛ kɔri mìni ɓi mɛ̀rem rì ɓìɓan ɓi syeesyee ɓìcèm ɓi ì rì rì ɓyɔ; ki ghɛɛ̀sɛɛ lɛ, ɓi nyìinyìm wìn, ɓɛ̀ro ɓɛdɛŋ ɓɛ reèrèsàg ɓɛ̀ro ɓɛmbog, ɓì reèrèɓɓɛ̀n mìni rì mìni rì ɗyomzɛ̀n lɛɛ̀gwey; ɓì kɛkɛ̀ɛ̀gh Bɛ̀ll tyem ti ɓi ɓɛ̀sam, rì mɛ̀ɓàlì rì ɓìgheesì ɓi Ǹghay à resii, kìina kìɓan kiǹ rì nɗem win wucèm.

¹⁷Com kìcèm ki ɓì rì lɛ ɓì kpaa, nsoò lɛ ɓì kì, kìina kɔ ɓi ɗii ɗi Kan Yeesus, ɓì fafà Bɛ̀ll à Seŋi wìs ɓìtògsɛ̀n rì ɗii ɗìì.

¹⁸Mìni ɓɛ̀yiɓ ɓaana rì mɛ̀wog ɓi ɓɛg ànɛ a ɓɛ̀yii ɓin, yɛ̀ɛ kɛɛ̀ kɔ̀ɔkɔnɛ̀n ɓi mis mɛ Kan.

¹⁹Mìni ɓɛ̀baŋì, keesiina ɓɛ̀yiɓ ɓin, kɛ̀ ɓi biibimɓɛ̀n rì ɓɔ.

²⁰Mìni ɓɔn, kìina ɓɛ̀yalì ɓin mɛwog ɓi ɓìɓan ɓìcèm, ɓisuulɛ kìɓan kiǹ ki ri lɛ syeesyee ɓi mis mɛ Kan.

²¹Mìni ɓɛ̀seŋi ɓɔn, kɛ̀ ɓi ǹyɛɛnyɛɛ̀dɛ̀n ɓɔn ɓin, di mùm mɛ ri ɓɔ ɓiì sɛ̀nsɛni.

²²Mìni ɓɛ̀kìì-ɓìsay, kìina ɓɛ̀masà ɓin ɓɛ ɓi mɛ̀mùù mɛ̀wog ɓi ɓìɓan ɓìcèm, kɛ̀ ɓi kì lɔŋ ɓɔ mɛ̀wog cààmɛ̀n ki ɓɛɛ̀ seesee mini kɔ rì kɔ, yɛ̀ɛ ɓɛɛ̀ kali lɛ, ɓum ɓɛɛ̀ɓɛ ɓi kɔ̀nkɔn lɛ ɓi puɓsi ǹɗem, kìɓan kifog kìina ɓɔ mɛ̀wog rì nɗem wu sɛɛghi sɛɛghi ɓisuu bɔgsɛ̀n ìnɛ ɓì rì rì yɔ̀ ɓi san ànɛ yɛ̀ɛ Kan.

²³Nsoò cɛ kɛɛ̀ki ɓyaà kìkì, kìina ɓìɓan ɓìcèm rì nɗem win wucèm lɔŋ yɛ̀ɛ ɓi kìki ɓyɔ ɓisuu Kan, àa ɓisuu ɓum,

²⁴ɓì ki yi lɛ, ɓyom ɓi syeesyee ɓi ɓi ri ɓì nyamɛn, ɓì ɓiì teri ɓyɔ yɛ̀ɛ Kan ɓisuu mɛlèɓ min. Kiris ànɛ à rì Kan innɛ ɓi kìki kisay.

²⁵Lɛ ŋwaànɛ a kìki ɓiɓan ɓi ɓeɓtɛn à ɓiì terì mɛ̀lèɓ mɛ mɛ ghɛɛ̀sɛɛ rì kìɓeɓtàg kii ki rikì, lɛ Bɛ̀ll à yin ɓiì làlanii ɓum.