Read Bafia TÈSÀLÒNÌSYƐŊ 1 Bible Online

TÈSÀLÒNÌSYƐŊ 1 - Bafia bible

TÈSÀLÒNÌSYƐŊ 1

¹Mɛ̀ Pol, ɓɛɛ Silas rì Timote, tì kàni ɓumɓɛ ɓi Kìseŋi ki a Tesalonika ki ki ri ɓi Bɛ̀ll Seŋi rì ɓi Yeesus Kiris Kan. Geesɛ̀n, rì fyòoog ɓyɛɛ ɓa ɓìfayɛn a lɔ̀ŋkin.

²Ɓisiì fafa lɔŋ Bɛ̀ll ɓìtògsɛ̀n cààmɛ̀n kìcèm ɓisu wiǹ mìniìcèm, tì ki ɓùŋɓuŋ mini ɓi bɔ̀ŋzɛ̀n yis.

³Ɓi mis mɛ Bɛ̀ll à Seŋi wìs tì ti tì yitàg ɓyààmɛ̀n ɓìcèm mɛ̀kìkìì min mɛ ɓi rìgherɛ̀n, rì kìsay ki ǹkɔ̀nɛ̀n wiǹ a kìkì, rì rìsììrɛ̀n ɗin ɓi dyàɓɛn inɛ tì rì rì yɔ̀ ɓì Kan wìs Yeesus Kiris.

⁴Ɓɔɔsoŋ̀, tì yii lɛ Bɛ̀ll à keesìghà mìni, à ki ɓɔ̀n mini.

⁵Ɓisuulɛ tì ghagsìghà ɓi mini Syeesyee à Ɓɔlɛ ànɛ tì ɓaghày rì nyi rì jɛ̀ɛ̀ ì ŋwɔm yɔ̀ ri yɔ̀, tì ghagsìghà girig nyi ɓi dàm yi tì kìkìghà rì ìteɗ wu Kitɛntɛ̀ɛ̀n ki Nghay, tì ki konag kiyiì saaɗ bimiɗ ànɛ ɓi Ɓɔlɛ ànɛ̀n. Ɓi saaɗ, ɓì yii cɛɓ ki tì ghɛɓkà ɓi nyìinyìm wìn; fɔlɔɔ a ɓaghà ɓi kìrɔɔ kin.

⁶Ɓì nɔ̀ɔ̀tìghà lɛ rì mɛ̀kòò mis, rì mɛ̀kòò mɛ Kan, ɓì ki tulɛn rì mɛ̀tɔɓ lɛɛ̀gwey yɛ̀ɛ bì ghàɓkà Syeesyee à Ɓɔlɛ rì kìnyàà ki Kìtɛntɛ̀ɛ̀n ki Nghay kɛɛ̀ falàg.

⁷Fɔɔnnɛ ɓì ti kìfèèghrɛnà ɓisuu ɓɛgherɛ̀n ɓɛ̀cèm ɓɛ a Masedwan, rì ɓɛ a Akayi.

⁸Lɛ jɛ̀ɛ̀ ì Kan ì mɛ pɛ̀sɛn yi a lɔ̀ŋkin, ì kpaŋ à Masedwan rì a Akayi, nni àa lɔŋ foo nyi rì nyi, gom ì rìgherɛ̀n ɗin ɗi ɓì gherɛɛ Bɛ̀ll, ì mɛ sàà jàŋ bimiɗ à kpaŋ ɓi lèg ànɛ tì yin gi lɛ tì kpaakpàà.

⁹Ɓum ɓɛɛ̀ kpaakpaa righàɓ ɗi ɓì ghàɓkà ɓìsi yɛ̀ɛ tì kpagà a lɔ̀ŋkin rì yɛ̀ɛ ɓì càɗkàkày ɓìnùn, ɓì lɔ̀ɔ̀ghrɛ̀n yɛ̀ɛ Bɛ̀ll lɛ ɓi ɓɔgsi nyi, lɛ nnyɛɛ ri kɔɔ̀kɔɔ̀ à Bɛ̀ll ànɛ a rì cem,

¹⁰ɓì ɓoŋɓòŋ lɛ Man wiì Yeesus, ànɛ à ghèmzìghày a ɓìloŋ, a sɛǹ yì aɗyoo, di a kweɗ ɓìsi ɓi rìbaŋì ɗi Bɛ̀ll ɗi ɗi riì.