Read Bafia TÈSÀLÒNÌSYƐŊ 2 Bible Online

TÈSÀLÒNÌSYƐŊ 2 - Bafia bible

TÈSÀLÒNÌSYƐŊ 2

¹Ɓɔɔsoŋ̀, mìniìɓɔmiɗ ɓì yii lɛ, rìyù ɗi tì yùghà a lɔ̀ŋkin ɗi wughà ɓi zɛy.

²Di tì ka kpaŋ ɓi a lɔ̀ŋkin, tì ghɛngà mɛ̀tɔɓ, ɓum ɓɛ ki yeesi ɓisi a Filiɓ lɔŋ yɛ̀ɛ ɓì yii, wɔ̀lɛ Bɛ̀ll à faghà ɓìsi ìtèɗ wulɛ ti ghagsi mìni Syeesyee à Ɓɔlɛ wìì nsoò yɛ̀ɛ ki ɓaghà bimiɗ à wɛ̀y.

³Ɓìɓan ɓi Bɛ̀ll ɓi tì kakàlìghà ɓum ɓi rooghày ɓi ǹɗuŋ ɓi rìnàn ǹsoò lɛ ɓi ɓìɓan ɓi tifin, fɔɔnnɛ ɓi ki yin ɗi ǹ-yègsɛ̀n.

⁴Wɔ̀lɛ Bɛ̀ll à timgà rìɓa ɗis à ki fa ɓisi kìsay ki Syeesyee à Ɓɔlɛ. Fɔlɔɔ nnɛ tì yin ɓiì kpaakpaa ɓiɓan ɓi Bɛ̀ll lɛ ti puɓsi ɓum mɛ̀rem, kìɓan kìfog, ti kpaakpaa ɓi ɓyɛɛ̀ kɔ̀ngi Bɛ̀ll ànɛ à ti à ghɛngì yɛ̀ɛ mɛ̀rem mɛ ɓum, mɛ ri ɓi ɗùm.

⁵Ɓì yii lɛ tì ka ɓaghà ɓi ri jɛ̀ɛ̀ ì fìɗyɛɓi, nsoò rìyitì ɗi lɛ ti fɔǹ mɔ̀ɔ̀ni ŋwos adɛŋ, Bɛ̀ll à rì ɓìsi wusìnɛ̀ɗ.

⁶Tì kaaghà ɓi lɛ ɓum ɓɛɛ kemzi ɓisi, nsoò a lɔ̀ŋkin, nsoò a ɓum ɓɛm̀bog, kɔlɛ tì ɓaghà lɛ tì làmì mìni ɓi-tèɗ ɓi ɗii ɗi lɛ ɓɛ̀kɛ̀nì-fìtom ɓɛ Kiris.

⁷Wɔ̀lɛ tì ghɛɓkà ɓi nyìinyìm wìn rì nɗem wu tɛ̀tɛ̀rɛ̀ɛ̀ lɔŋ yɛ̀ɛ jɛɛ ɓɔn à ti à ɓègì ɓɔn ɓii.

⁸Ɓi rìkeesì ɗi tì keesìghà mìni, àa Syeesyee à Ɓɔlɛ à Bɛ̀ll nyi rì nyi innɛ tì ɓaghà lɛ tì kɔ̀n lɛ ti fa mìni, ti ɓaghà lɛ ti fa mìni lɔŋ lɛ rì ɓyɛɓ ɓis miì, lɛ ɓì ɓaghà di ɓì ti ɓum ɓis ɓɛ nɗem lɛ kɔɔ̀kɔɔ̀.

⁹Ɓɔɔsoŋ̀ ɓì rì lɛ ɓì yitì kìsay ki tì kìghà, rì ǹtɔɓ wu tì wokà; tì ghagsìghà mìni Syeesyee à Ɓɔlɛ à Bɛ̀ll tì ki sasay lɛ rì ìru rì ŋwos lɛ ǹtɛ̀g wis wɛ̀ kɛɛ̀ siŋ wààdɛŋ ɓi nyòò.

¹⁰Ɓì rì ɓɛ̀wusìnɛ̀ɗ ɓis, nsoò Bɛ̀ll à rì girig wusìnɛ̀ɗ lɛ cɛɓ ki tì ghɛɓkà rì mìni ɓɛ ɓì rì ɓɛ̀gherɛ̀n ki ɓaghà kìtɛnɛn, kɔ tì lɛ saaɗ, kɛ̀ɛ̀ kìɓan kifenɛn miì.

¹¹Ɓì yii girig lɛ tì ghɛɓkà rì mum ǹcèm ànɛ ɓi mìni fɛlɛ yɛ̀ɛ seŋi à rì lɛ à ghɛɓ rì ɓɔn ɓii.

¹²Tì kìghà lɛ tì reɓ mìni, tì fɔɔsì mìni mɛ̀rem, tì ki ɓɔ̀ɔɓɔ̀ŋzì mìni lɛ ɓi ghɛɓ lɔŋ yɛ̀ɛ kɛɛ̀ kɔ̀ngi Bɛ̀ll ànɛ a regi mini lɛ ɓi ɓa rì gàɓ ɓi kìlɔ̀ŋ kii, rì ɓi rìkem ɗii.

¹³Kìɓan kiǹ kɛɛ̀ki tì fafa Bɛ̀ll ɓìtògsɛ̀n cààmɛ̀n kìcèm lɛ, yɛ̀ɛ bì ghàɓkà jɛ̀ɛ̀ yìì ìnɛ tì wogsìghà mìni, ɓì ghàɓkà ɓi yɔ̀ yɛ̀ɛ jɛ̀ɛ̀ ì mum; ɓì ghàɓkà lɔŋ yɔ̀ yɛ̀ɛ ì rì a tààkaà, lɛ ì rì jɛ̀ɛ̀ ì Bɛ̀ll ìnɛ yɛ̀ɛ kìki kisay ɓi mìni ɓɛ ɓì rì ɓɛ̀gherɛ̀n.

¹⁴Ɓɔɔsoŋ̀, ɓì mɛ pisɛn Ɓiseŋi ɓi Bɛ̀ll ɓi ɓi ri a Zyude ɓi Yeesus Kiris, ɓisuulɛ ɓumɓɛ ɓi kìlɔ̀ŋ kin ɓɛ yeesìghà mìni lɔŋ yɛ̀ɛ ɓɛroɓɛ a Zyude ɓɛ yeesìghà ɓɛ̀gherɛ̀n ɓɛ wɔ̀ɔ̀.

¹⁵Ɓɛ̀yudɛ̀n ɓɛǹ ɓɛɛ wolà Kan Yeesus, ɓɛ ki cuusi ɓɛ̀kpaŋzì-ɓìɓan, ɓɛɛ yeeyèèsìghà ɓìsi; ɓɛ ti ɓɛ ɓeɓkì Bɛ̀ll, ɓɛ ki ɓèèzag ɓum ɓɛ̀cèm.

¹⁶Ɓɛ ti ɓɛ rekì ɓìsi lɛ tyɛ̀ ki ghagsi jɛ̀ɛ̀ ì Bɛ̀ll a ɓumɓɛ ɓɛ yin Ɓɛ̀yudɛ̀n lɛ ɓɛɛ ɓa rì cɛɓ. Rìkì ɗiǹ ɗyɛɛ̀ɗi ɓɛɛ̀ kɛ̀nkɛn beèbɛ̀y ɓɛ teètègsì kìɓe kaa cààmɛ̀n kìcèm rì ɗyɔ̀; wɔ̀lɛ rìbaŋì ɗi Bɛ̀ll ɗi mɛ syɔn ɓɔ kìkòmi.

¹⁷Ɓi san wìs, yɛ̀ɛ tì ghasɛ̀ngà rì mìni tyɛ̀ ki ghɛnɛn ti a mɛ̀su ɓi maa cààmɛ̀n, fɔlɔɔ kɛ̀ɛ ki rèsi lɛ tì ti tyɛ̀ ki fègti mini, ɓɔɔsoŋ̀, tìi nɗì rì coo zày ìnɛ lɛ ti ghɛnɛn tì rì mìni, fɔɔnnɛ tìi ǹtèèsii nyoo lɛɛ̀gwey lɛ kìɓan kiǹ kɛɛ kilɛn.

¹⁸Tì kɔ̀ngà lɔŋ lɛ di tyàa yùu foo, a lɔ̀ŋkin mɛ̀ɛmiɗ Pol ǹfèèghrɛɛ gɛ̀n yɛ̀ɛ yiɓɛɛ̀, wɔ̀lɛ Satàn a règ ɓìsi rìyù.

¹⁹Ghɛn yɛɛrì min ɓiì ɓaà dyàɓɛn yìs, rì kìnyàà kis nsoò lɛ tàm wìs a rìkem ɓi mis mɛ Kan wìs Yeesus, ŋwosi risugtìì ɗii? Àa lɔŋ mìni yɛɛ rì ɓa wa?

²⁰Ɛ̀ɛ̀, mìni yɛɛ ri rìkem ɗis, rì kìnyàà kis.