Read Bafia TÈSÀLÒNÌSYƐŊ 3 Bible Online

TÈSÀLÒNÌSYƐŊ 3 - Bafia bible

TÈSÀLÒNÌSYƐŊ 3

¹Yɛ̀ɛ tìi n-yiidi lɛ tì cenɛ̀n lɛ ti ɓoŋɓoŋ tì, nni tìi nghɛɛ kìrɔɔ lɛ, ti rɔɓ a Atɛn ɓìsi cɛ̀ncis.

²Fɔɔnnɛ tìi nɗomiì mìni geni wìs Timote, ànɛ à rì ǹkìì-kìsay a Bɛ̀ll ɓi rìghagsì ɗi Syeesyee à Ɓɔlɛ à Kiris lɛ a fa mìni ìtèɗ, à ki fegsi mìni ɓi rìgherɛ̀n ɗin;

³lɛ di mum kɛ̀ɛ càrɛn lɛ mɛ̀fèèghrɛn mɛ mɛ ri ɓigomìnɛ mɛɛ ɓigti nyi, ɓisuulɛ mìniìɓɔmiɗ ɓì yii lɛ mɛ̀fèèghrɛn mɛǹ mɛ ɓaghà mɛ̀pègsɛn ɓisu wis.

⁴Yɛ̀ɛ tì ɓaghà a lɔ̀ŋkin, tì lokà mìni ki rèsii lɛ tì rì ɓiì tanɛɛ rì mɛ̀fèèghrɛn, fɔɔnnɛ ki ki kìlɛ̀ngà fɔlɔɔ yɛ̀ɛ ɓì yii.

⁵Fɔlɔɔ nnɛ yɛ̀ɛ m̀ɓatìghà ɓi lɛ m̀ɓoŋɓòŋ tì nni ǹɗomgày Timote lɛ a yu kìwoògh lannɛ rìgherɛ̀n ɗin ɗyɛɛ̀ kɛ̀ɛ̀kɛ̀ɛ̀, lɛ ǹɗirìsìghà lɛ kɛ̀ kɛ̀ɛ ɓa lɛ ǹfèèghrɛ̀n-ɓum à fèèghrɛ̀ngà mìni lɛ kìsay kis kɛɛ wu zɛy.

⁶Wɔ̀lɛ ɓigomìnɛ nnɛ Timote à sughiì rìkɛ̀ɛ̀ ɗi àa nɗìì a lɔ̀ŋkin; à sughiì ɓìsi rì ɓɛ̀ɓɔlɛ ɓɛsyeesyee ɓɛ ɓɛ komi lɛ rì rìgherɛ̀n ɗin, rì ǹkɔ̀nɛ̀n ànɛ ɓì rì rì nyi. À kpaa ɓìsi yɛ̀ɛ mìniì ka yiiyitàg lɔŋ ɓisi rì nkɔ̀nɛ̀n cààmɛ̀n kìcèm, ɓì ki ɓa ri zày ìnɛ lɛ ɓi ghɛǹ ɓìsi, yɛ̀ɛ ɓìsi girig tì rì rì zày ìnɛ lɛ ti ghɛnɛn.

⁷Ɓɔɔsoŋ̀, fɔɔnnɛ ɓìi nfaa ɓìsi ìtèɗ ɓi nyoo rì rìgherɛ̀n ɗin, ɓi nyìinyìm à mɛ̀tɔɓ rì mɛ̀fèèghrɛn mɛcèm mɛ tì rì rì mɔ.

⁸Nni ɓigomìnɛ ki ri yɛ̀ɛ tì teetii tì cɛɓ yɛ̀ɛ tì woogh lɛ ɓì kaka lɔŋ ɓɛsììrɛn ɓi Kan.

⁹Tì rì lɛ tì tògsàg Bɛ̀ll wìs ɓisu win à kpaŋ fe, ɓi kìnyàà kìcèm ki tì rì rì kɔ ɓi mis mɛ Bɛ̀ll ɓisuu righerɛ̀n ɗin!

¹⁰Ti ɓɔ̀ɔɓɔ̀ŋzì yɛ̀ɛ ìru yɛ̀ɛ ŋwos, tì ki sììrɛn ɓi bɔ̀ŋzɛ̀n lɛ a ki lɛ ti ghɛnag tì a mɛ̀su, à ki roozi ɓìɓan ɓi ɓi kaarɛɛ ɓi rìgherɛ̀n ɗin?

¹¹Bɛ̀ll à Seŋi wìs nyimiɗ, rì Kan wìs Yeesus, ɓɛɛ ɓaà ɓìsi bee ìnɛ tì rì lɛ tì kpaŋ miì a lɔ̀ŋkin.

¹²Kan a tegsi ǹkɔ̀nɛ̀n ànɛ ɓì rì rì nyi, lɛ a roǹ à sòsòɓ ɓi nyìinyìm wìn, à kòm ɓum ɓɛ̀cèm, à ki ɓa fɛlɛ yɛ̀ɛ ǹkɔ̀nɛ̀n ànɛ ɓisii ri rì nyi ɓi san wìn.

¹³A ki lɛ mɛ̀rem min mɛɛ siìrɛn, mɛ ɓa mɛ̀ tɛnɛn, kɛ̀ɛ̀ kìɓan ki ɓɛ rì lɛ ɓɛ fen miì ɓi mis mɛ Bɛ̀ll à Seŋi wìs, ŋwosi risugtìì ɗi Kan wìs Yeesus ǹɗaŋ rì ɓum ɓii ɓɛ̀cèm, ɓɛ ɓɛ ri ɓɛ̀tɛnɛn.