Read Bafia 2 TÈSÀLÒNÌSYƐŊ 2 Bible Online

2 TÈSÀLÒNÌSYƐŊ 2 - Bafia bible

2 TÈSÀLÒNÌSYƐŊ 2

¹Ɓɔɔsoŋ̀! ɓi kìɓan ki ki seesee rìsugtìì ɗi Kan Yeesus Kiris, rì rìtaŋzɛ̀n ɗi tì ri taŋzɛn nyi a nyoo, tì tɔɔgh mìni lɛ,

²kɛ̀ ɓi càrɛn lɛ mum a fyaŋzi mìni kì nyɛ̀ŋi ɓi syeesyee à ǹɗɛli anɛ ɓì rì miì, nsoò lɛ a syaŋdi mìni bwaɓ ɗi rìkuu ɗi ɗyomzɛ̀n ɗidɛŋ ɗi ǹghay wudɛŋ wu ri lɛ wu fa nyi, nsoò rì jɛ̀ɛ̀ ìdɛŋ, nsoò rì kaàtà ànɛ ɓɛ ri lɛ ɓɛ pwaà mìni lɛ ɓìsi yɛɛ kani, ki pisɛ̀n fɛlɛ yɛ̀ɛ ŋwos a Kan à mɛ kpaŋ.

³Ŋwaàdɛŋ kɛ̀ɛ yègsi mini, nsoò ɓi-ghèy wu la, ɓisuulɛ ŋwos anɛ̀n à yin lɛ à kpaŋ di ɓum ɓɛ ka resi ɓi lɛ ɓɛ naŋi rìgherɛ̀n, Kìɓeɓtàg ki mum ki ki ghɛɛ̀sɛɛ kì ɗyaŋì, ki resɛ̀n.

⁴Ki ri ɗùù ri com kìcèm ki ɓɛɛ̀ ɓɔɔɓɔgsì ɓɛ rerèŋì lɛ bɛ̀ll, ki ràm ki kɛ̀n kì kɔ̀rii ɓi naà-Bɛ̀ll ìnɛ ì ki rì lɛ ì Bɛ̀ll, ki rɛsɛ̀n kɔmiɗ lɛ kɔ yɛɛ ri Bɛ̀ll.

⁵Ɓì yitii ɓi lɛ ǹkalìghà mìni kìɓan kiǹ cààmɛ̀n ki m̀ɓaghà di ǹkaka a lɔ̀ŋkin?

⁶Wɔ̀lɛ, ɓì yii lɔŋ com ki ki ka ghegheegh nyi lɛ kɛ̀ɛ ka resɛn ɓigomìnɛ; lɔŋ ɓi cààmɛ̀n kii ìnnɛ kìɓetàg ki mum kìn ki ɓiì rèsɛɛ.

⁷Lɛ ìtèɗ wu kiɓe wu a rìnyam wu ti ɓiì kìkii kisay; kɛɛ̀ tɔtɔg lɔŋ lɛ roànɛ à ka ghegheegh mɔ a ɗim̀ ɓɛ̀ kɛɛ̀ ghɛɛ̀di nyi.

⁸Ajɛ̀m ìnɛn innɛ Kìɓeɓtàg ki mum ki ɓiì rèsɛɛ yi, Kan à wey kɔ rì cɔ̀ŋzɛn ki ki kpaŋiì nyi ɓi ŋwɔm, à tììsì kɔ rì kìtɛɛtɛn ki ɓi rìsugtìì ɗii.

⁹Rìyùy ɗi Kiɓeɓtàg ki mum ɗi kìlɛɛ gɛ rì ìtèɗ wu Satàn; à kìi gɛ lɛ, rì ɓɛ̀koŋnyoo ɓɛ ɓiɓan, rì dàm yi ɓiɓan yi ɓɛpwàà;

¹⁰à kìi gɛ kìsay ri kìɓe mɛkuu mɛ̀cèm lɛ a ɓɔŋ̀ ɓumɓɛ ɓɛ ghɛɛ̀sɛɛ kì ɗyaŋì ɓisuulɛ ɓɛ ghaɓkà ɓi ǹkɔ̀nɛ̀n ànɛ ɓi saaɗ ànɛ à ɓaghà lɛ à ghɛɓsì ɓɔ.

¹¹Kìɓan kiǹ kɛɛ̀ki Bɛ̀ll à romiì ìtèɗ wu wɛɛ naàzi ɓɔ bee, lɛ ɓɛɛ gherɛn ɓìɓan ɓi ɓɛpwàà,

¹²di fɔɔnnɛ Bɛ̀ll a yɔm̀ ɓum ɓɛ̀cèm ɓɛ ɓɛ gherɛ̀ngà ɓi saaɗ, ɓɛ kìnyàà kaa ki ɓaghà lɛ rìkì ɗi kiɓe.

¹³Ɓi san ànɛ a lɔ̀ŋkis, ɓɔɔseŋi ɓis ɓɛ Kan a keesag lɛɛ̀gwey, tì ghɛ̀ɛ̀sɛɛ kì fafaa Bɛ̀ll ɓìtògsɛ̀n cààmɛ̀n kìcèm ɓisuu kiɓan kin, ɓisuulɛ Bɛ̀ll à ɓɔ̀ngà mìni à tumɛ̀n a rìtumɛ̀n lɛ ɓi ɓa ɓɛ̀kòrɛn ɓi rìkì ɗi Kìtɛntɛ̀ɛ̀n ki Nghay kɛɛ̀ kìki lɛ ɓi ɓa ɓɛ̀tɛnɛn, rì ɓi rìgherɛ̀n ɗi ɓì gherɛɛ saaɗ.

¹⁴Kìɓan ki Bɛ̀ll à reŋìghà tì mìni miì, rì Syeesyee à Ɓɔlɛ ànɛ tì ghagsìghà mìni ki ri lɛ, ɓi ɓa rì gàɓ ɓi rìkem ɗi Kan wìs Yeesus Kiris.

¹⁵Fɔɔnnɛ sììrɛɛna lɔŋ ɓɔɔsoŋ̀, ɓì ɓèŋ ɓìɓan ɓi tì rèsàkà mìni, rì ŋwɔm nsoò lɛ ɓi kaàtà ànɛ tìi nkàniì mìni.

¹⁶Kan wìs Yeesus Kiris nyimiɗ, rì Bɛ̀ll à Seŋi wìs anɛ à keesìghà ɓìsi, à fa ɓìsi fɔɔy ànɛ ɓi nɗem ànɛ à rì fìɗyàɓ fikɔ̀ɔ̀, rì dyàɓɛn i syeesyee,

¹⁷ɓɛɛ fɔɔ̀si mìni mɛ̀rem, ɓɛ fa mìni ìtèɗ wu kìyɛn ɓiɓan ɓi syeesyee, ɓi mɛ̀kìkì min mɛcèm, rì ɓi ɓìtòkì ɓin ɓìcèm.