Read Bafia TIMOTE 1 Bible Online

TIMOTE 1 - Bafia bible

TIMOTE 1

¹Mɛ̀ Pol, ǹkɛ̀nì-fìtom a Yeesus Kiris lɛ rìkɔ̀n ɗi Bɛ̀ll ànɛ à rì ǹghɛɓsì wìs, rì Yeesus Kiris ànɛ à rì dyàɓɛn yis.

²Ǹkàni Timote, à kɔɔ̀kɔɔ̀ wɛ̀m à man ɓi rìgherɛ̀n, Bɛ̀ll Seŋi rì Kan wìs Yeesus Kiris ɓɛɛ fa wɔ̀ lɛ, rì geesɛ̀n, rì rìcenɛ̀n, rì fyòoog.

³Fɛlɛ yɛ̀ɛ ǹtɔkà wɔ̀ di ǹti lɛ nkɛǹ a Masedwan, ki ghɛɛ̀sɛɛ lɔŋ lɛ, u kɔkɔri a Efɛɛzɛ lɛ u siìtɛn ɓum ɓɛdɛŋ lɛ ɓɛ̀ kɛɛ̀ rèresi dɔgtɛ̀n yidɛŋ,

⁴ɓɛ̀ kɛɛ̀ ki mɛ̀ɛ̀tɛn ɓi mɛ̀kànkàn rì rìɓààɓààsì ɗi boo ɗi kɛ̀ɛ̀ sugtag, ɓìɓan ɓiǹ ɓyɛɛ̀ titini ɓum lɛ ɓɛɛ nyoonyòlɛ̀n, ɓyɛ̀ kɛɛ̀ ki ghɛɓsi lɛ fèg à Bɛ̀ll ànɛ lɛ a ghɛɓsi ɓum lɛ rìgherɛ̀n a kɛn asu.

⁵Rìsyɔn ɗi ɓi kìɓan ki ǹtɔɔgh wɔ̀ kiǹ ɗi ri lɛ, ǹkɔ̀nɛ̀n ànɛ à rìì ɓi nɗem wu wu ri wù tɛnɛn, rì ɓi nɗem wu wu ri lɛ sɛɛghisɛɛghi, rì ɓi rìgherɛ̀n ɗi kɛ̀ɛ̀ tìfyèèrɛnà.

⁶Ɓum ɓɛdɛŋ ɓɛ nagà bee inɛ̀n, ɓɛ nɔɔ̀tì bee i ǹkpaakpaayɛn ɓiɓan ɓi kɛ̀ɛ̀ ìsu.

⁷Ki kɔnkɔ̀n ɓɔ lɛ di ɓaa ɓaa ɓumɓɛ ɓɛ pɔɔ̀zii kì yiì ɓìdɔ̀gsɛna, kìɓan kifog ɓɛ̀ kɛɛ̀ yi nsoò com kɔm̀ ki ɓɛɛ̀ kpaakpàà, nsoò ki ɓɛɛ̀ sìisiìrɛ̀n ɗì rìkakàlì lɛ ki ri yɛ̀ɛ ɓɔɔ̀ kpaaghì.

⁸Tì yii lɛ syeesyee lɛ ɓìdɔ̀gsɛna ɓi rɔɔtɛɛ, di mum à kìi kìsay ri ɓyɔ yɛ̀ɛ kɛɛ̀ kɔ̀nkɔ̀n;

⁹tì ki yii lɛ ɓìdɔ̀gsɛna ɓi yin ɓifalɛn ɓisuu ŋwaà saaɗ, ɓi ri lɔŋ ɓisuu ɓumɓɛ ɓɛ ri rì rìgɛn, rì ɓɛ̀roɓɛ ɓɛ̀ kɛɛ̀ wooghrɛn, ɓɛ̀ɓènì rìgherɛ̀n, rì ɓɛ̀kìì-kìɓe, rì ɓumɓɛ ɓɛ ti ɓɛ̀ kɛɛ̀ risi nsoò Bɛ̀ll, nsoò ɓyom ɓi ɓi ri kìcèlì, rì ɓisuu ɓumɓɛ ɓɛ ti ɓɛ weeyì ɓɛ̀seŋi ɓaa, rì ɓɛ̀jɛɛ ɓaa, rì ɓisuu ɓɛwolì-ɓum,

¹⁰ɓɛ̀kìì-kìzyaa, ɓɛ̀baŋì ɓɛ ɓɛ ti ɓɛ kɔràg rì ɓɛ̀ro ɓɛ̀baŋì(n) ɓɛ̀kìì-dune ì ɓɛ̀kpàn, rì ɓɛ̀pwààpwaà, ɓɛ̀kànɛ̀n bɛ̀ɗ yi ɓɛpwàà, rì com kìcèm ki ki yin yɛ̀ɛ syeesyee à dɔgtɛ̀n ànɛ à rì ǹtɛnɛn a kpaakpàà.

¹¹Ɓìɓan ɓiǹ ɓyɛɛ̀ɓi Syeesyee à Ɓɔlɛ à ǹkeŋkèmì à Bɛ̀ll ànɛ à rì ǹtin wu ɓɛmààgh a rèrèsì. Syeesyee à Ɓɔlɛ ànɛ̀n nnɛ ɓɛ reɓsɛ̀ngà rì mɛ̀.

¹²Ǹtògsaagh Yeesus Kiris à Kan wìs, ànɛ à faghà mɛ̀ ìtèɗ ɓisuulɛ, à ghɛngà lɛ ǹɗì mum ànɛ ɓɛ ri lɛ ɓɛ tyweeyì, yɛ̀ɛ à ɓɔ̀ngà mɛ̀ lɛ nki nyi kìsay.

¹³Màànɛ ǹfeèfèngàkà nyi abɛ̀y, ǹ-yeèyèèsì ɓɛ̀gherɛ̀n, ǹkìkì rìbaŋì, mɛ̀ ànɛ̀n innɛ Bɛ̀ll à wokà nyìinyìg ɓisuulɛ ǹ-yighà ɓi com ki ǹkìkìghà, lɛ m̀ɓaghà kɛ̀ɛ̀ kìgherɛɛ.

¹⁴Fɔɔnnɛ geesɛ̀n ì Kan wìs ì rongà ì sòsòɓ, ɓi mɛ̀ bas ɗì rìgherɛ̀n rì ǹkɔ̀nɛ̀n ànɛ à rì ɓi Yeesus Kiris.

¹⁵Jɛ̀ɛ̀ ìnɛ ì rì kɔɔ̀kɔɔ̀ à jɛ̀ɛ̀ ànɛ ɓum ɓɛ̀cèm ɓɛ ghɛɛ̀sɛɛ lɔŋ kiterì rì ǹtyweeyi wucèm yɛ̀ɛ ri lɛ Yeesus Kiris à yùghà ɓi ziinɛ lɛ a ghɛɓsi ɓɛ̀kìì-kìɓe, nni ɓi ɓɛ̀kìì-kìɓe ɓɛǹ, mɛ̀ yɛɛ ri lɛ ɓog.

¹⁶Wɔ̀lɛ Bɛ̀ll à wokà mɛ̀ nyìinyìg lɛ di Yeesus Kiris a resi rìnìɗ ɗii ɗi nɗem ɓi mɛ̀ fɛlɛ yɛ̀ɛ ǹkìì-kìɓe à ǹtonto, fɔɔnnɛ kìɓan kiǹ ki ɓiì ɓaà kìrèmzɛnà ɓisuu ɓumɓɛ ɓɛ ri ɓiì gherɛɛ nyi lɛ ɓɛɛ teɗ cɛɓ ki fiɗyàɓ fikɔ̀ɔ̀.

¹⁷Roànɛ a maà làlàmì cààmɛ̀n kìcèm ànɛ à yin lɛ à wu, roànɛ ɓum ɓɛ yin lɛ ɓɛ ghɛn, nyi yɛɛ ri m̀bobog à Bɛ̀ll ànɛ à ghɛ̀ɛ̀sɛɛ lɛ rì ǹnyaasɛ̀n, rì rìkem fìɗyàɓ fikɔ̀ɔ̀. Ààmɛ̀n.

¹⁸Man wɛm̀ Timote, kìɓan ki mɛ̀ ǹsiŋ̀dɛɛ wɔ̀ ki rarɛɛ yì rì ɓìɓan ɓi Nghay à rèsìghà ɓi san wɔ̀ɔ̀; ɓi ɗi yɛ̀ɛ ɓìɓan ɓiǹ ɓyɛɛ̀ kpaakpàà, ki ghɛɛ̀sɛɛ lɛ u ɗùu syeesyee à wɛ̀y,

¹⁹ù ɓèŋ rìgherɛ̀n rì syeesyee à ǹɗem. Syeesyee à ǹɗem ànɛ̀n, ɓum ɓɛdɛŋ ɓɛ mɛ naŋ nyi, rìgherɛ̀n ɗyaa ɗi ɓɛǹ mɛ̀nig yɛ̀ɛ ɓumɓɛ rìɓày à teri.

²⁰Imenee rì Alɛgsaŋdirɛ ɓɛ ǹfaghà rì Satàn lɛ ɓɛɛ yilag rìɓèŋ ɗi myɔm maa lɛ ɓɛ̀ kɛɛ̀ tògti Bɛ̀ll kìɓe, ɓɛ ri ɓi bàlì ì ɓumɓɛ̀n.