Read Bafia TIMOTE 6 Bible Online

TIMOTE 6 - Bafia bible

TIMOTE 6

¹Ɓum ɓɛ̀cèm ɓɛ ɓɛ ri ɓɛ̀kpàn ɓɛ ghɛɛ̀sɛɛ kì ghɛɛ̀ ɓɛ̀masà ɓaa lɛ ɓɛ ri ɓumɓɛ ɓɛ ghɛɛ̀sɛɛ rì bɔgsɛ̀n bimiɗ, di fɔɔnnɛ ɓum ɓɛ̀ kɛɛ̀ sòòti lɛ rì ɗii ɗi Bɛ̀ll, rì dɔgtɛ̀n yìs.

²Fɔɔnnɛ ɓɛ̀kpàn ɓɛ ɓɛ̀masà ɓaa ɓɛ ri ɓɛ̀gherɛ̀n, ɓɛ ghɛɛ̀sɛɛ ɓi ki sɛɛtii ɓɛ̀masà ɓaa rì ǹkpaà lɛ ɓɛ ri ɓɛ̀geni ɓaa ɓɛ righerɛ̀n; kìɓan kifog ɓɛ ghɛɛ̀sɛɛ ɓɔ kì kìkii ɓisay à cee fɔlɔɔ ɓisuulɛ ɓɛ ri ɓɛ̀gherɛ̀n, rì tì lɛ ɓɛ̀geni ɓaa ɓɛ nɗem ɓɛɛ̀ɓɛ ɓɛɛ̀ kìki kisay fɔlɔɔ lɛ syeesyee.

³Ɓìɓan ɓi ù ghɛ̀ɛ̀sɛɛ kì rèsaagh di u siisiŋdàg ɓyɛɛ̀ ɓìn lɔɔ. I mum a rèresi dɔgtɛ̀n ìdɛŋ, kɛ̀ɛ nɔ̀ɔ̀ti ɓi syeesyee à rìkpaa à Kan wìs Yeesus Kiris, rì yɛ̀ɛ rìrèsì ɗi dɔgtɛ̀n ìnɛ ì ghɛ̀ɛ̀sɛɛ ɗì rìfalɛ̀n ɗi ɓi rìgherɛ̀n, ɓyɛɛ̀ kpaakpàà,

⁴di ɓìdaŋà ɓi roni ŋwaànɛ̀n miì ɓi nɗem, kɛ̀ɛ ki yi com, à rì ŋwaànɛ a roròɓ firoɓ fi lɛ a nyoònyòlɛ̀n di a saasaàkɛ̀n ɓi kìɓan ki mii; jàŋ inɛ̀n yɛ̀ɛnɛ ɓìɓan ɓidɛŋ ɓi ti ɓi fuughàg yì fɛlɛ yɛ̀ɛ m̀mììghrɛ̀n, ɓɛ̀paàzì, mɛ̀wɔ̀wɔrì, kìnɗèmɓàg ki ɓiɓan ɓi ɓeɓtɛn,

⁵rì nyoey yi yɛ̀ kɛɛ̀ ren ɓi nyìinyìm à ɓumɓɛ mɛ̀yitì maa mɛ ti ɓigɛŋ, ɓɛ̀ kɛɛ̀ yi saaɗ, ɓɛ ki fèki lɛ rìfalɛ̀n ɗi ɓi rìgherɛ̀n ɗi ri kìɓan ki mum à rì lɛ à fɔ̀nfɔ̀n miì.

⁶Ki ri lɔŋ saaɗ lɛ rìfalɛ̀n ɗi ɓi rìgherɛ̀n ɗi ri bee i rìfɔ̀n, di mum à nyààrɛɛ rì gàɓ ì com ìnɛ à rì rì yɔ̀.

⁷Ɓisuulɛ tì yùghày ɓi ri com ɓi ziinɛ, fɔlɔɔ nnɛ tyàa sug ɓi girig rì com.

⁸I tì rì lɛ rì ɓìɗilàg rì com ki waatɛn lèg ànɛn à ghɛ̀sɛ̀n ɗì ɓìsi.

⁹Kìɓan kifog ɓɛ̀roɓɛ ɓɛɛ̀ kɔ̀nkɔn lɛ di ɓaa kumi, ɓɛ ti ɓɛ kpilàg ɓi mɛ̀fèèghrɛn rì ɓi fìram fi lɛ ɓɛɛ ɓa rì zày ì ɓìɓan ɓi ɓiyèg rì ɓi ɓeɓtɛn ɓi ɓi ti ɓi pikì mum ɓi rìɗyaŋ rì ɓi rìwu.

¹⁰Ɓisuulɛ kìsee ki mɔ̀ɔ̀ni ki ri ǹɗyèm wu ɓiɓan ɓi ɓeɓtɛn ɓìcèm, nni ɓum ɓɛdɛŋ ɓɛ ɓɛ falɛ̀ngà ɓi kìsee ki mɔ̀ɔ̀ni kìn, ɓɛ ghasɛ̀ngà rì rìgherɛ̀n, ɓɛ ki syòŋ yi ɓɔmiɗ mɛtɔɓ ɓi nyoo lɛɛ̀gwey.

¹¹Ɓi ɓɛg wɔ̀ɔ̀, wàànɛ ù rì mum à Bɛ̀ll, lɛgha ɓìɓan ɓiǹ, ɓìcèm; u kaà lɛ rì saaɗ, rì rìfalɛ̀n ɗi ɓi rìgherɛ̀n, rì rìgherɛ̀n yɛ̀ɛ Bɛ̀ll, rì ǹkɔ̀nɛ̀n, ɗì rìnìɗ ɗi nɗem, ɗì rìɓa ɗi lɛ tɛ̀tɛ̀rɛ̀ɛ̀.

¹²Ɗùùya syeesyee à wɛ̀y a rìgherɛ̀n, ù ɓan cɛɓ ki fiɗyàɓ fikɔ̀ɔ̀ ki Bɛ̀ll à reŋìghà wɔ̀ lɛ u teɗ, cɛɓ kìn kɛɛ̀ki ù tòòghrɛ̀ngà ɓìsyeesyee ɓi ɓitòkì miì, ɓi mis mɛ ɓum lɛɛ̀gwey yɛ̀ɛ ù rèsìghà rìgherɛ̀n ɗyɔɔ.

¹³Ǹtɔɔgh wɔ̀ ɓi mis mɛ Bɛ̀ll ànɛ à ti à falàg ɓyom ɓìcèm cɛɓ, rì ɓi mis mɛ Yeesus Kiris, ànɛ à konàkà kì rèsii righerɛ̀n ɗii ɓi mis mɛ Pilat lɛ,

¹⁴u ɓeŋ̀ kìdɔ̀gsɛna, kɛ̀ɛ̀ tìfin, kɛ̀ɛ̀ bɛ̀lɛn à kpaŋ a rìsugtìì ɗi Kan wìs Yeesus Kiris,

¹⁵kìɓan kiǹ ki ri ɓa ɓi cààmɛ̀n ànɛ ɓɛ fekà lɛ kɛɛ ɓa, ɓi rìkì ɗi roànɛ à rì ǹtin wu ɓɛmààgh, à ki ɓa mbobog à ǹlàmì, nyi yɛɛ ri rìfòm ɗi ɗi lamii mɛ̀fòm mɛcèm, nyi Kan ànɛ a ɓɛ̀kan,

¹⁶nyi cɛ̀ncii yɛɛ yin lɛ à wu, à kɔ̀kɔrii ɓi kìtɛɛtɛn ki mum à yin lɛ à kpaŋ wɔɔ, mum à ka ghɛngà ɓi nyi, nnyɛɛ ghɛɛ̀sɛɛ rì ǹnyaasɛ̀n, rì ìtèɗ fiɗyàɓ fikɔ̀ɔ̀. Ààmɛ̀n.

¹⁷Tɔgha ɓɛ̀guŋgum ɓɛ ɓi mɛ̀ru mɛ lɛ, ɓɛ̀ kɛɛ̀ ɓa ri kalɛn, ɓɛ̀ kɛɛ̀ ki foŋ dyàɓɛn yaà ɓi ìkum wu wu ri kɛ̀ɛ̀ ǹtyweeyi, ɓɛɛ foŋ lɔŋ dyàɓɛn yaà yɛɛ̀ Bɛ̀ll ànɛ à ti à falàg ɓìsi ɓyom ɓìcèm lɛɛ̀gwey lɛ ti wog kìrɔɔ rì ɓyɔ.

¹⁸Kali ɓɔ lɛ, ɓɛɛ kiki kìrɔɔ, ɓɛɛ kum̀ ɓi ɓìsyeesyee ɓi mɛkìkìì, ɓɛ ɓa rì rìɓòò, ɓɛ fafà ɓum ɓyom,

¹⁹fɔlɔɔ nnɛ ɓɛ ri ɓiì taŋzɛɛ ikum wu wu rɔɔtɛɛ wu ki kpegmɛn ɓisuu cɛɓ ki kɛɛ̀ yùyuiy, fɔɔnnɛ ɓɛ ri ɓiì terì kɔɔ̀kɔɔ̀ à cɛɓ.

²⁰Timote, konag kì ɓèŋi com ki ɓɛ tɛfɛ̀ngà rì wɔ̀, ù lèg kɛɛgh à kɛ̀ɛ̀-su ànɛ kɛ̀ɛ wuɓsɛn ɓiɓan ɓi righerɛ̀n, rì nyoey yi riyi ɗi ɓiɓan ɗi ɗi ri ɓi zɛ̀ɗ.

²¹Ɓum ɓɛdɛŋ ɓɛ ghasɛ̀ngà rì rìgherɛ̀n lɛ ɓɛ nɔɔ̀tìghà bee inɛ̀n. Geesɛ̀n ì Bɛ̀ll yɛ̀ɛ ɓa rì mìni.