Read Bafia 2 TIMOTE 2 Bible Online

2 TIMOTE 2 - Bafia bible

2 TIMOTE 2

¹Nni wɔ̀ man wɛm̀, foŋa ìtèɗ ɓì geesɛ̀n ìnɛ ì rì ɓi Yeesus Kiris ɓi ɗùm.

²Kìɓan ki ù wokà mɛ̀ di nkakàlì ɓi mis mɛ ɓɛwusìnɛ̀ɗ lɛɛ̀gwey, ghagsi kɔ rì ɓum ɓɛ ntyweeyi ɓɛ ɓɛ ri rì ìtèɗ wulɛ ɓɛ resàg girig ɓɛ̀ro ɓɛdɛŋ.

³Wogha mɛ̀tɔɓ nɗaŋ ri mɛ̀ lɔŋ yɛ̀ɛ syeesyee à sujàà à Yeesus Kiris.

⁴Sujàà ànɛ àrì ɓi kìsay à kaakàà lɛ a puɓsi ǹkɔ̀mɛ̀n wìì nɗem, ɓìɓan ɓi ɓi cɛɓ ki zɛy ɓi ti ɓyɛ̀ kɛɛ̀ ɓùùsi nyi ǹto.

⁵Fɔɔnnɛ ǹghɛŋì-mɛ̀ree ànɛ à kpaŋi beèbɛ̀y ɓi ǹlog à mɛ̀ree, à yin lɛ à teɗ tàm à rìkem di à nɔ̀ɔ̀tii ɓi mɛsiŋdɛn mɛ ɓi nlog.

⁶Ǹsalì-dɛm anɛ a teetekì ǹtɔɓ, à ghɛ̀ɛ̀sɛɛ kì ɓaà ŋwaà beèbɛ̀y ànɛ a teɗ ɓìɗùn.

⁷Wogha com ki nkpaakpàà, ɓisuulɛ Kan à rì wɔ̀ ɓiì faà ɗyomzɛ̀n ɓi ɓìɓan ɓìcèm.

⁸Yiti Yeesus Kiris ànɛ à ghèmɓɛ̀ngày a ɓìloŋ, di à yalɛɛ yì ɓi boo ì mum ì Davit lɔŋ yɛ̀ɛ Syeesyee à Ɓɔlɛ ànɛ mɛ̀ɛ ǹghaaghagsì a kpaakpàà;

⁹Syeesyee à Ɓɔlɛ ànɛ̀n nnɛ nwowog mɛtɔɓ miì à kpaŋ ɓi lèg ànɛ lɛ ɓɛɛ kaŋ̀ mɛ̀ bɛn lɔŋ yɛ̀ɛ ǹwolì-ɓum, kìɓan kifog jɛ̀ɛ̀ ì Bɛ̀ll yɔ̀ɔ̀ yin nkàŋɛn bɛn.

¹⁰Kìɓan kiǹ kɛɛ̀ki nceecenɛ̀n mɛ̀tɔɓ mɛ̀cèm ɓisuu ɓumɓɛ ɓɛ ri ɓɛ̀ɓɔ̀nɛn lɛ di ɓɔ girig ɓɛɛ ɓa rì cɛɓ ki ki ri ɓi Yeesus Kiris bas rì rìkem ɗi fiɗyàɓ fikɔ̀ɔ̀.

¹¹Jɛ̀ɛ̀ ìnɛ ì rì saaɗ: I tì wughà nɗaŋ ɗi nyi, tì rì girig ɓiì ghɛɓì nɗaŋ ɗi nyi.

¹²I tì sììrɛɛ tyɛ̀ ki càrɛn lɛ mɛ̀tɔɓ, tì rì ɓiì làmii girig nɗaŋ ɗi nyi; I tì roòzɛɛ nyi, nyii roòzɛɛ gɛ girig ɓìsi.

¹³I ɓìsii ti tyɛ̀ ki roòzi mɛkàg mis, nyii ri lɔŋ roànɛ a roozag mɛkàg mii cààmɛ̀n kìcèm ɓisuulɛ nyii yin lɛ à roòzɛ̀n rìɓa ɗii ɗi nyimiɗ.

¹⁴Ɓìɓan ɓiǹ ɓyɛɛ̀ɓi ù ghɛ̀ɛ̀sɛɛ kì ɓìiɓiìtàg ɓum, ù ki siisiŋdɛ̀n ɓɔ ɓi mis mɛ Bɛ̀ll, lɛ ɓɛɛ lɛg ɓɛsaaka rì rìnyoònyòlɛ̀n ɓi kìɓan ki mii, lɛ ɓi ghɛɓsii ɓi com, di nya lɛ ɓyɛɛ ɗyaŋzi ɓumɓɛ ɓɛɛ̀ wowog ɓɛsaaka ɓɛǹ.

¹⁵Tèèsi nyoo lɛ u ghɛnɛn ɓi mis mɛ Bɛ̀ll fɛlɛ yɛ̀ɛ ŋwaànɛ à mɛ rèsi ɓum lɛ à rì mum, yɛ̀ɛ ǹkìì-kìsay anɛ à yin lɛ à wog ǹtoòrìɗ ri kìsay kii, ànɛ a rèresi jɛ̀ɛ̀ ì saaɗ yɛ̀ɛ kɛɛ̀ kɔ̀nkɔ̀n.

¹⁶Càra ɓìtòkì ɓi zɛy ɓi ɓi yin ɓiì kpaakpaa ɓiɓan ɓi righerɛ̀n ɓisuulɛ ɓumɓɛ ɓɛɛ̀ tòtog rikuu ɗi ɓitòkì ɗiǹ ɓɛ ri ɓiì ràaraɓsɛ̀n tì rì rìgherɛ̀n à cee fɔlɔɔ.

¹⁷Jɛ̀ɛ̀ yàà i rì yɛ̀ɛ kìɓɛɛ ki ki ti ki cɛkì mum ìkòò, ki kpaŋ ɓi kìwoɓ. Imenee rì Filɛt ɓɛ ri ɓi bàlì ì ɓumɓɛ̀n;

¹⁸ɓɛ pasɛ̀ngà, ɓɛ caɗ saaɗ, ɓɛ yoòyògsì rìgherɛ̀n ɗi ɓum ɓɛdɛŋ di ɓɛɛ̀ kpaakpaa lɛ, rìghèmɓɛ̀n ɗi ɓiloŋ ɗi mɛ kpaŋ.

¹⁹Nsoò fɔlɔɔ kìgɔ̀ŋgɔ̀m ki mɛɛ ki Bɛ̀ll à yàghɛ̀ngà kìtoŋ miì ki kaka lɛ kpeg-kpeg. Jɛ̀ɛ̀ ì rì miì ǹkànɛn yɛ̀ɛ sìtam̀ lɛ: Kan à yii ɓɛ̀roɓɛ ɓɛ ri ɓɛŋkìì; fɔɔnnɛ mum ǹcèm ànɛ a rereŋi ɗii ɗi Kan, à ghɛ̀ɛ̀sɛɛ lɛ à sɔ̀ŋì ìkòò wii ɓi kìɓe.

²⁰Àa ɓɛ̀ɓɛŋi ɓɛ gol rì ɓɛ ɓɛ ri ɓɛ̀kìyɛn ri swiɗ à mɔ̀ɔ̀ni ɓɛɛ ti ɓɛ ɓalàg ɓi mɛɛ mɛ mɛ teghɛɛ ɓɔ rì ɓɔ, ɓɛ̀ɓɛŋi ɓɛ soɓɛn ri kìte rì ɓɛ yèŋɛn ri fyòò ɓɛ rilàg girig wɔɔ. Ɓɛ kìyɛn ri gol, rì ɓɛ swiɗ à mɔ̀ɔ̀ni ɓɛ ri ɓisuu ɓiɓan ɓi bànà, ɓɛmbog ɓisuu titom ti zɛy.

²¹Nni i mum à ɓèŋɗɛɛ nyimiɗ ntɛnɛn à rì ɓiì ɓaà ɓɛŋi anɛ ɓɛ ri lɛ ɓɛ teɗ ŋwosi kiɓan ki bànà; ɓɛŋi a ǹtɛnɛn ànɛ à rì rì gɛɓsɛ̀n ɓisuu ŋwaànɛ à rì rì nyi, à ki ɓa ɓɛŋi anɛ à ghɛ̀ɛ̀sɛɛ ɓisuu rikì ɗi ɓyom ɓi syeesyee.

²²Lɛgha ɓìɓeɓtàg ɓi ɓìɓan ɓi ɓi ti ɓi rɔɔghì ɓɛ̀dɛlì; kaaya saaɗ, rì rìgherɛ̀n, rì ǹkɔ̀nɛ̀n, rì fyòoog ànɛ rì ɓumɓɛ ɓɛ ti ɓɛ regì ɗii ɗi Kan rì nɗem wu tɛnɛn.

²³Ɓèna nyoey yi zɛy rì zɛy yi yi ri kɛ̀ɛ̀-su, ù ki yi lɛ, yi ti yi syogìì ɓɛsaaka.

²⁴Ǹkìì-kìsay a Kan à ghɛ̀ɛ̀sɛɛ ɓi ki ɓaà mum à ɓɛ̀saaka; à ghɛ̀ɛ̀sɛɛ lɔŋ lɛ a ghɛɓ rì ɓum ɓɛ̀cèm ɓi nkɔ̀nɛ̀n, à ɓa ŋwaànɛ à rì lɛ à rèsàg ɓum ɓìɓan, à ki yi rinìɗ ɗi nɗem.

²⁵À rèrèsì ɓɛ̀bènàbena ɓii zɛ̀ɗ yaa ri nɗem wu tɛ̀tɛ̀rɛ̀ɛ̀, rì ntyweeyi lɛ Bɛ̀ll à rì lɛ à fa ɓɔ mààgh ànɛ lɛ ɓɛɛ lɔɔ̀ghrɛn mɛ̀rem, ɓɛɛ kpaŋ̀ ɓi nɗɛli wu ɓɛɛ yi saaɗ,

²⁶fɔɔnnɛ ɓɛɛ sugtiì ɓi ɓɔmiɗ, ɓɛ ki sɔtɛn yi ɓi fìram fi Satàn a wɔɔsìghà ɓɔ miì lɛ ɓɛɛ kiki lɔŋ rìkɔ̀n ɗii.