Read Bafia 2 TIMOTE 3 Bible Online

2 TIMOTE 3 - Bafia bible

2 TIMOTE 3

¹Yiya lɛ, ɓi mɛ̀ru mɛ siitòn, ɓyààmɛ̀n ɓi ɓeɓtɛn ɓi ri ɓiì ɓaà.

²Ɓisuulɛ ɓum ɓɛ ri ɓa ɓɛ̀wemwèm, ɓɛ̀keesì-mɔ̀ɔ̀ni, ɓɛ ɓa ɓɛ̀daŋàdaŋa, ɓɛ ɓa ɓɛ̀kìì-kalɛn, ɓɛ feèfèngì Bɛ̀ll, ɓɛ kikì ɓɛ̀yalì ɓaa ntoòtèɗ, ɓɛ̀ kɛɛ̀ foŋ kirɔɔ ki ɓum ɓɛ kii ɓɔ, ɓɛ̀ kɛɛ̀ risi ɓyom ɓi ɓi ri kìcèlì.

³Ɓɛ ɓa mɛ̀rem mɛ̀tèrɛn, ɓɛ ɓa kɛ̀ɛ̀ nyìighnyìg, ɓɛ kikì ɓɛ̀ɓɔlɛ, mɛ̀rem maa mɛ̀ kɛɛ̀ ɓanɛn, ɓɛ ɓa ɓɛ̀wolì-ɓum, ɓɛ ki ɓèeɓeèzɛ̀n ɓumɓɛ ɓɛɛ̀ kìki kirɔɔ,

⁴ɓɛ ɓa ɓɛ̀tɔ̀kɔ̀tɔkɔ, ɓɔ mɛ̀rem lɛ bùɓbùɓ, ɓɔ rì kalɛn ɓi nɗem, ɓɛ keesì rìyɛ̀y ɗi cɛɓ ki mɛmùù à cee Bɛ̀ll;

⁵ɓɛ ri rɔ̀ɓ ɓɛgherɛ̀n ɓi rìseesèè ɗi ɓidan, kìɓan kifog ɓɛ roòzɛ̀n com ki ki ri ìtèɗ wu righerɛ̀n. Ràɓsɛn mɛ̀kuu mɛ ɓum mɛ fɔlɔɔ.

⁶Ɓum ɓɛdɛŋ ɓɛ ɓi nɗaŋ waa ɓɛ ti ɓɛ ɗiŋɗàg ɓi ɓɛ̀naa, ɓɛ ɓangìì ɓɔɔ ɓɛ̀yiɓ ɓɛdɛŋ ɓɛ ɓɛ tɛtɛɛgh ǹkun wu ɓiɓe, ɓɛ ki ɓa ɓɛ̀yiɓ ɓɛ ɓìɓan ɓi ɓi mɛ̀mùù mɛ̀kuu mɛ̀kuu ɓyɛɛ̀ yeeyeèsì, ɓi ɗiɗì mɛ̀rem ɗì rìkɔ̀n;

⁷ɓɛ̀yiɓ ɓɛǹ ɓɛ ri lɔŋ cààmɛ̀n kìcèm ɓi cilag, kìɓan kifog ɓɛ̀ kɛɛ̀ ɓa ri ìtèɗ wulɛ ɓɛ kpaŋ ɓi nɗɛli wu ɓɛɛ yi saaɗ.

⁸Fɛlɛ yɛ̀ɛ Zyanɛs rì Zyamɓirɛs ɓɛ ramgà wɛ̀y ri Moyis, fɔlɔɔ nnɛ ɓumɓɛ̀n ɓɛɛ̀ ɗùùɗuu girig rì saaɗ, ɓɛ ri ɓumɓɛ nghay waa wu ti wù ɗimɛn bee, rìgherɛ̀n ɗyaa ɗi yiǹ lɛ ɗi ɓanɛ̀n di mɛ̀fèèghrɛn mɛ tanɛɛ ɓɔ.

⁹Wɔ̀lɛ ɓaa kɛ̀ɛ̀di ɓi beèbɛ̀y lɛ kìyèg kaa ki rikì ki ri ɓiì ghɛnɛɛ ɓi mis mɛ ɓum ɓɛ̀cèm fɛlɛ yɛ̀ɛ ki Zyanɛs rì Zyamɓirɛs ki ghɛnɛ̀ngà.

¹⁰Ɓi ɓɛg wɔ̀ɔ̀, ù ghɛngà rìrèsì ɗyɛm̀ lɛ syeesyee, rì rìghɛghɛ̀ɓ ɗyɛm̀, rì ɓɛ̀fèg ɓɛm, ɗì rìgherɛ̀n ɗyɛm̀, ɗì rìnìɗ ɗyɛm̀ ɗi nɗem, rì ǹkɔ̀nɛ̀n wɛ̀m, rì kìsììrì kɛm̀,

¹¹ù yii lɛ rì ǹ-yeesɛ̀n ànɛ ntuutulɛ̀n rì nyi, rì mɛ̀tɔɓ mɛ ǹwowoogh; rìkuu ɗi ntɔɓ aɗi ɗyɛɛ̀ɗi ǹɗɔ̀ɓi lɛ ǹghɛɛ ɓi a Aŋtyos rì Ikonyɔm rì a Listirɛ? Rìkuu ɗi ǹ-yeesɛ̀n aɗi ɗyɛɛ̀ɗi ǹɗɔ̀ɓi lɛ ǹtulɛɛ ɓi ri ɗyɔ, ǹki sìisiìrì nɗem? Wɔ̀lɛ Kan à ghɛɓsìghà mɛ̀ ɓi mɛ̀tɔɓ mɛ̀n mɛ̀cèm.

¹²Ki ri gì lɛ, ɓum ɓɛ̀cèm ɓɛ ɓɛɛ̀ kɔ̀nkɔn lɛ ɓɛɛ̀ ghɛɓ cɛɓ ki lɛ ɓɛ falɛ̀n rì Bɛ̀ll ɓi Yeesus Kiris lɛ kɔɔ̀kɔɔ̀, ɓɛ ri ɓiì tulɛɛ ri ǹ-yeesɛ̀n, à ɓum.

¹³Kìɓan kifog ɓìɓeɓtàg ɓi ɓum rì ɓɛ̀pwààpwaà ɓɛ ri ɓiì kɛ̀nkɛni lɔŋ beèbɛ̀y ɗì rìkìkì ɗi kiɓe, ɓɛ naànààzì ɓum bee lɛ ɓɔmiɗ ɓɔɔ ka rì ɓɛ̀ɗimɛn bee.

¹⁴Wɔ̀ɔ̀ sììrɛn lɛ tiŋtiŋ ɓi kìɓan ki ù yilàkà, kɛɛ̀ki ǹtyweeyi wɔɔ wu ri miì; ù yii ŋwaànɛ ù yilàkà kìɓan kiǹ a lɔ̀ŋkii.

¹⁵À tumɛ̀n ɓi rìŋwɔɓti ɗyɔɔ, ù yii ɓìɓan ɓi ɓi kaàtà à Bɛ̀ll, ɓi ri lɛ ɓi fa wɔ̀ ɗyomzɛ̀n ɗi u ɓa rì cɛɓ, lɛ rìgherɛ̀n ɗi ù gherɛɛ Yeesus Kiris.

¹⁶Ɓìɓan ɓìcèm ɓi ɓi ri ɓìkànɛn, ɓi kanɛ̀ngà rì ìtèɗ wu Nghay à Bɛ̀ll, ɓi ki rì rì gɛɓsɛ̀n, lɛ ɓyɛɛ resag ɓum saaɗ, ɓi ki lɛ ɓɛɛ gherɛn, ɓi rɛsàg ɓìɓan ɓi zɛ̀ɗ, ɓi ki tɔɔsi ɓum ɓi cɛɓ ki saaɗ,

¹⁷lɛ mum à Bɛ̀ll a ɓa m̀pègsɛn lɛ kɔɔ̀kɔɔ̀, à ki ɓa ri bee inɛ lɛ a ki ɓìɓan ɓi syeesyee.