Read Bafia 2 TIMOTE 4 Bible Online

2 TIMOTE 4 - Bafia bible

2 TIMOTE 4

¹M̀ɓɔ̀ŋzaagh wɔ̀ ɓi mis mɛ Bɛ̀ll rì ɓi mis mɛ Yeesus Kiris ànɛ à ghɛ̀ɛ̀sɛɛ kì yɔ̀mi lɛ rì ɓum ɓɛ cem rì ɓìloŋ, rì ɓi ɗii ɗi risugtìì ɗii, rì kìlɔ̀ŋ kii,

²lɛ u kakali jɛ̀ɛ̀ ì Bɛ̀ll, ù sììrɛ̀n miì ɓyààmɛ̀n ɓìcèm, lɛ rì ɓi syeesyee rì ɓi ɓeɓtɛn; kìya lɛ ɓum ɓɛɛ gherɛn, fwààdag ɓum, ù rerèɓ ɓɔ, ù yi rìnìɗ ɗi nɗem, ù ki rèeresàg ɓɔ.

³Lɛ cààmɛ̀n kidɛŋ ki ri ɓiì ɓaà ki ɓum ɓaa cenɛnti ɓi riwowòg ɗi syeesyee à dɔgtɛ̀n, ɓɛ ri nɔ̀ɔnɔɔ̀tì lɔŋ ɓiɓan ɓi mɛ̀rem maa mɛɛ̀ kɔ̀nkɔ̀n, ɓɛ taŋzàg ǹkun wu ɓɛrèsàg, ɓɛ ɓɛɛ kpaakpaa ɓɔ ɓìɓan ɓi ɓyɛɛ̀ rɔɔrɔɔ ɓɔ rìwowòg;

⁴ɓaa ramdi ɓi mɛreè lɛ ɓɛɛ wog saaɗ, ɓɛ ri mɔ ɓiì ramì lɛ ɓɛɛ wowog mɛ̀kànkàn.

⁵Wɔ̀lɛ ɓi ɓɛg ànɛ a lɔ̀ŋkɔɔ, ɓèŋa rìmum ɗyɔɔ lɛ kɔ̀ɔ ghaasi wɛ̀ɛmiɗ ǹkpàn a com kidɛŋ, sììri nɗem ɓi mɛ̀tɔɓ, kìya kìsay ki ǹkalì-ɓɔlɛ, roozi kìsay kɔɔ lɛ syeesyee.

⁶Ɓi san ànɛ a lɔ̀ŋkɛm̀, mɛ̀ nti lɛ com ki kifùna, cààmɛ̀n ki rìpɛ̀sɛ̀n ɗyɛm̀ kɛɛ̀ kɛ̀ɛ̀kɛɛyi.

⁷M̀mɛ ɗùù syeesyee à wɛ̀y, m̀mɛ lègsi kighɛŋii mɛ̀ree, ǹki ɓèŋ righerɛ̀n.

⁸Nni ɓigomìnɛ, tàm à rìkem ànɛ à rì tàm à saaɗ innɛ m̀ɓoŋɓoŋi, Kan ànɛ à rì ǹ-yɔ̀mì-ɓum ànɛ à rì lɛ saaɗ à rì mɛ̀ nyi ɓiì faà ŋwos anɛ̀n, nni àa mɛ̀ cɛ̀ncɛm nnɛ à rì ɓiì faà, kìɓan kifog à ɓiì faà ɓum ɓɛ̀cèm ɓɛ ɓɛ ɓoŋɓòŋgà rìsugtìì ɗii ri ǹkɔ̀nɛ̀n.

⁹Kaaya bee inɛ u fyaŋziì kìyùu a lɔ̀ŋkɛm̀,

¹⁰lɛ Demas àa nɗinii mɛ̀ à kɛ̀n a Tesalonika, lɛ ɓìɓan ɓi ɓi cɛɓ ki gɛɛ̀nɛ ɓyɛɛ̀ kɔ̀nkɔn nyi; Kiresaŋsɛ àa nkɛ̀ɛ a Galasi, Tit à kɛ̀n a Dalmasii.

¹¹Lukas cɛ̀ncii yɛɛ ri fɛ rì mɛ̀. Teray Marikus, ɓi yuiy ɓɛɛ̀ nyi, lɛ àrì mɛ̀ rì coo gɛɓsɛ̀n ɓi kìsay.

¹²Mɛ̀ɛ nɗomi Tisig a Efɛɛzɛ.

¹³I ù ti ɓiì yùu, ù yùy mɛ̀ rì rɛ̀ŋkweɗ wɛ̀m ànɛ ǹcàɗkày a Tirowas yɛ̀ɛ Karipus, rì ɓɛ̀kaàtà, à ɓiisɛ̀n gòò yi nyàm yi ɓɛ ti ɓɛ kàngì ɓɛ̀kaàtà miì.

¹⁴Alɛgsaŋdirɛ ànɛ à rì ǹsyaàgh-ìrɛm, àa nkìi mɛ̀ kìɓe lɛɛ̀gwey; Kan à lèɓi gɛ nyi lɔŋ yɛ̀ɛ rìkì ɗii ɗi ri.

¹⁵Ù konàg girig ɗì nyi ɓisuulɛ à ɗùùghà rì ɓìɓan ɓi tì kpaaghà rì ìtèɗ.

¹⁶Gɛ̀n i ǹtonto ìnɛ mɛ̀ɛ nɗì ɓi mɛ̀kpaà, mum àa nkɛ̀ɛ ɓi mɛ kìfoŋì nsoò bog, ɓɛ̀sɛ̀ɛ̀ ɓɛ̀cèm ɓɛ nɗinii mɛ̀, nni Bɛ̀ll à ghɛ̀ɛ̀sɛɛ ɓi ɓɔ kìnɔ̀ɔ̀tii ɓi rìkì ɗiǹ.

¹⁷Lɔŋ Kan yɛɛ ǹɗì mɛ̀ jàŋbog, à ki fa mɛ ìtèɗ, lɛ nghagsi jɛ̀ɛ̀ ì Bɛ̀ll lɛ kɔɔ̀kɔɔ̀, yɛ̀ɛ woòghrɛn ɓi mɛ̀ree mɛ ɓum ɓɛ̀cèm ɓɛ ɓɛ yin Ɓɛ̀yudɛ̀n fɔɔnnɛ ɓɛ nɗùnɛɛ mɛ̀ ɓi ŋwɔm wu kimonɗo.

¹⁸Kan à rì mɛ̀ ɓiì lɛgsii ɓiɓan ɓi ɓeɓtɛn ɓìcèm, à ki ghɛɓsi mɛ lɛ nɗiŋi ɓi kìlɔ̀ŋ kii ki ki ri aɗyòò. Nyi yɛɛ ghɛɛ̀sɛɛ rì rìkem fìɗyàɓ fikɔ̀ɔ̀. Ààmɛ̀n.

¹⁹Tògsi Piriska rì Akilas rì naa ì ɓum ì Onezifɔɔr.

²⁰Erast àa nɗɔ̀ɓi a Kɔrɛŋt, ǹki càɗ Tirofim a Milɛ di a roròɓ.

²¹Kaaya bee inɛ lɛ u yu di bùmà ì ka tumɛn ɓi. Eɓulus rì Pudaŋs rì Linus rì Kiloodya rì ɓɛ̀geni ɓis ɓɛ̀cèm ɓɛ togsaghiì wɔ̀.

²²Kan a ɓeŋ̀ ǹghay wɔɔ! Geesɛ̀n ì Bɛ̀ll yɛ̀ɛ ɓa rì mìni ɓɛsɛ̀ɛ̀ ɓɛ̀cèm. Ààmɛ̀n.