Read Bafia TIT 3 Bible Online

TIT 3 - Bafia bible

TIT 3

¹Yiti ɓɔ lɛ ɓɛɛ ki ɓɛ̀làmì kìlɔ̀ŋ, rì ɓɛ̀gɔmìnà mɛ̀wog; ɓɛ ghɛɛ̀sɛɛ kì kìi com ki ɓɛ̀roɓɛ̀n ɓɛ tɔɔgh ɓɔ lɛ ɓɛɛ ki, ɓɛ ki fɛmɓɛn ɓi rìkì ɗi kiɓan kicèm ki ki ri lɛ syeesyee.

²Ɓɛ̀ kɛɛ̀ wɛ̀ɗ mum, ɓɛ ghɛɛ̀sɛɛ kì ɓaà ɓum ɓɛ fyòoog, ɓɛ ɓa rì syeesyee à nɗem, ɓɛ ghɛɓ lɔŋ lɛ fyòoog rì ɓum ɓɛ̀cèm.

³Ɓisuulɛ ɓìsi girig tì ɓaghà abɛ̀y kɛ̀ɛ̀ ɗyomzɛ̀n, ɓìsi rì ntoòtèɗ, ɓìsi ɓi rìɗim; tì ɓaghà ɓɛ̀kpàn ɓɛ ɓiɓan mɛkuu mɛ̀kuu, ɓi mɛ̀rem mɛɛ̀ kɔ̀ngì rì ɓi ɓyɛɛ̀ yɛ̀ɛ̀yi mɛmùù, tì ghɛghɛ̀ɓ ɓi rìgɛn rì ɓi m̀mììghrɛ̀n, tì ɓeɓèɓ ɓum, tì ki ɓèeɓeèzɛ̀n ɓìsi rì ɓìsi.

⁴Kìɓan kifog yɛ̀ɛ kìrɔɔ-nɗem à Bɛ̀ll ànɛ à rì ǹghɛɓsì wìs, rì ǹkɔ̀nɛ̀n ànɛ à rì rì nyi ɓisuu ɓum, ɓi resɛ̀ngà,

⁵nni à ghɛɓsìghà ɓìsi, àa ɓisuu ɓìɓan ɓi saaɗ, ɓi tì kìkìghà, lɔŋ à ghɛɓsìghà ɓìsi lɛ nɗem wu nyìinyìg wu à rì rì wɔ, rì ɗùùɗùù ɗi ɗi ti ɗi kilàg lɛ mum a ɓiìti kìyalɛɛ, rì rìkì ɗi Kìtɛntɛ̀ɛ̀n ki Nghay kɛɛ̀ kìlag lɛ mum a ghay nyɔɔnyɔn à mum.

⁶Bɛ̀ll à romgày Kìtɛntɛ̀ɛ̀n ki Nghay kìn ɓi ɓìsi lɛɛ̀gwey ɓi gòò ì Yeesus Kiris à ǹghɛɓsì wìs,

⁷lɛ di ti ɓa rì gàɓ ɓi dyàɓɛn i cɛɓ ki fiɗyàɓ fikɔ̀ɔ̀, yɛ̀ɛ geesɛ̀n yìì i mɛ kì lɛ ti ɓa lɛ saaɗ ɓi mis miì.

⁸Jɛ̀ɛ̀ ìnɛ ì rì kɔɔ̀kɔɔ̀ à jɛ̀ɛ̀, fɔɔnnɛ nkɔ̀ngi lɛ u siìrɛn ɓi rìkpaakpàà ɗi yɔ̀ di fɔɔnnɛ ɓumɓɛ ɓɛ gherɛ̀ngà Bɛ̀ll ɓɛɛ teèsi nyoo lɛɛ̀gwey, ɗì rìkìkì ɗi ɓiɓan ɓi syeesyee kìɓan kiǹ kɛɛ rɔɔtɛɛ ki ki ɓa ri gɛɓsɛ̀n ɓisuu ɓum.

⁹Kìɓan kifog, lɛgha nyoey yi kɛ̀ɛ̀-su ɗì rìɓààɓààsì ɗi boo, rì ɓɛsaaka, rì rìkààkàdàg ɓi kìɓan ki ɓidɔ̀gsɛna, ɓìɓan ɓiǹ ɓìcèm ɓi ghɛɓsii ɓi, ɓyɛ̀ kɛɛ̀ ki ɓa com.

¹⁰I ŋwaàdɛŋ à yùu rì kìɓùùsì ki lɛ gasɛ̀n yɛ̀ɛ kpi ɓi nyìinyìm à ɓɛ̀gherɛ̀n, rɔ̀gsɛn nyi gɛ̀n yiɓɛɛ̀, ajɛ̀m ìnɛn, foŋa nyi ɓi nwɔŋì.

¹¹Ù yii lɛ rìkuu ɗi mum ɗi fɔlɔɔ ɗi ri ɓi kìɓeɓtàg ki bee, ɗi kikì kìɓe, di ɗyɛɛ̀ faafàlɛ̀n ɗyɔmiɗ zɔɔ.

¹²Yɛ̀ɛ ǹɗi rom yi wɔ̀ Aritemas nsoò lɛ Tisig, ù fyaŋzìì mɛ̀ kìyùu ki tanɛɛ a Nikopolis lɛ wɔɔ nnɛ mɛ̀ɛ nkpaa lɛ ǹɗì ɓiì ghagsii bùmà.

¹³Pègsɛn ɓìɓan ɓi ɓi rìkɛ̀ɛ̀ ɗi Zenas ànɛ à rì coo ǹɗèsàg-ɓìdɔ̀gsɛna, rì Apolos ɓi lèg ànɛ lɛ com kidɛŋ kɛ̀ kɛɛ̀ kaarɛn ɓɔ.

¹⁴Ki ghɛɛ̀sɛɛ lɛ ɓumɓɛ ɓi nɗaŋ wis ɓɛɛ yilɛn rì rìkìkì ɗi ɓiɓan ɓi syeesyee lɛ kɔɔ̀kɔɔ̀, fɔɔnnɛ ɓɛ ri ɓiì kìkii ɓɛ̀gɛni-ɓiɓan ɓɛ ɓɛ ghɛɛ̀sɛɛ kì kìlɛɛ lɛ fyɛ̀ɗ yɛ̀ɛ ɓɛ̀ kɛɛ̀ rɔ̀ɓ kɛ̀ɛ̀ ɓìɗùn.

¹⁵Ɓum ɓɛ̀cèm ɓɛ ɓɛ ri fɛ rì mɛ̀ ɓɛ togsaagh yì wɔ̀. Wɔ̀ɔ̀ tògsi ɓum ɓɛ̀cèm ɓɛ ɓɛ ti ɓɛ keesàg ɓìsi ɓi rìgherɛ̀n. Geesɛ̀n ì Bɛ̀ll yɛ̀ɛ ɓa rì mìni ɓɛ̀sɛ̀ɛ̀ ɓɛ̀cèm.