Read Bafia EBIREEGH 1 Bible Online

EBIREEGH 1 - Bafia bible

EBIREEGH 1

¹Ɓi mɛ̀ru mɛ ajɛ̀m, Bɛ̀ll à tòòghrɛ̀ngà rì ɓɛ̀seŋi ɓis gɛ̀n lɛɛ̀gwey, bee lɛ bee ɓi ŋwɔm wu ɓɛkpaŋzì-ɓìɓan,

²nni ɓi mɛ̀ru mɛ siitòn mɛ, àa ntòòghrɛɛ rì ɓìsi ɓi ŋwɔm wu Man wiì, man ànɛ̀n innɛ à rɛsìghà lɛ a teɗ ɓìɓan ɓicèm; rì nyi nnɛ Bɛ̀ll à kìghà lɛ rì ɗyoo rì zi.

³Man ànɛ̀n à rì cììghziŋ ki rikem ɗi Bɛ̀ll, à ɓa tì syeesyee à kìfèèghrɛnà ki ɓi rìɓa ɗi yɛ̀ɛ Bɛ̀ll à rì, à lènlemi ɓyom ɓìcèm rì jɛ̀ɛ̀ yìì inɛ ì rì rì ìtèɗ. Yɛ̀ɛ à lègsìghà zòghɛ̀n ìnɛ ɓi ɓìɓe ɓi ɓum, fɔɔnnɛ à kɔ̀rìghà ɓi ɗyoo ɓiɗùm, ɓi weèlem à Bɛ̀ll ànɛ à làŋi mɛ̀tèɗ mɛcèm.

⁴Man à Bɛ̀ll à mɛ cee ɓum ɓɛ titom lèg ànɛ lɛ, Bɛ̀ll à mɛ fa nyi ɗii ɗi ɗi laŋi ɗi nkaa.

⁵Ɓisuulɛ Bɛ̀ll à ka kpaaghà ɓi ŋwaà fìtom adɛŋ lɛ: Ù rì Man wɛm̀, à tumɛ̀n gɛɛ̀nɛ, ǹti soŋì, nsoò lɛ: Mɛ̀ ǹɗì nyi ɓiì ɓaà Seŋi, nyii ɓa mɛ̀ Man.

⁶Wɔ̀lɛ, Bɛ̀ll à ɓaghà à ti ɓiì romìì Man à ǹtonto wiì ɓi ziinɛ, à kpaa lɛ: Ɓum ɓɛ titom ɓɛ Bɛ̀ll ɓɛ̀cèm ɓɛ ghɛɛ̀sɛɛ nyi kì ɓɔgsii.

⁷Ɓi ɓɛg ànɛ a ɓum ɓɛ titom, à kpaaghà lɛ: Bɛ̀ll a kìlag lɛ: À ghaasì ɓum ɓii ɓɛ titom bɛ̀ɓ, à ki ghaasi ɓɛ̀kìì-ɓìsay ɓii nɗoò wu ɗuu.

⁸Wɔ̀lɛ ɓi ɓɛg ànɛ yɛ̀ɛ Man, à kpaa lɛ: wɔ̀ Bɛ̀ll ìkɔ̀ɔ̀ wɔɔ wu rilàmì wu ri fiɗyàɓ fikɔ̀ɔ̀, kìgeŋ kɔɔ ki rilàmì, ki ri kìgeŋ ki rilàmì ɗi saaɗ.

⁹Ù keesìghà saaɗ, ù ɓèèzɛ̀n kìɓe kìɓan kiǹ kɛɛ̀ki wɔ̀ Bɛ̀ll, Bɛ̀ll wɔ̀ɔ̀ a mɛ ɓɔ̀n wɔ, à siŋì wɔ̀ mɔ̀ɔ mɛ nnyaasɛ̀n à càɗ ɓɛ̀roŋkàŋ.

¹⁰À kpaatìghà lɛ: Kan, wɔ̀ yɛɛ kighà zi a rìtumɛ̀n, nsoò ɗyoo ɗi ri girig kìsay ki ɓyàg ɓyɔɔ ɓyɛɛ kiì.

¹¹Ɓyom ɓìn ɓìcèm ɓi ri ɓiì ɗyaŋì kìɓan kifog wɔ̀ɔ̀ rɔ̀ɓ; ɓìcèm ɓi ri ɓiì rùni yɛ̀ɛ kìlàà;

¹²ù tag ɓyɔ yɛ̀ɛ ɓɛɛ̀ taki rɛ̀ŋkweɗ, ɓɛ koɓsɛ̀n ɓyɔ yɛ̀ɛ ɓìlàà, kìɓan kifog, wɔ̀ɔ̀ kɔ̀kɔrii lɔŋ zìŋ ɓi-kɔ̀ɔ̀, cɛɓ kɔɔ kɛ̀ kɛɛ̀ ɓa ri ǹɗèè.

¹³Bɛ̀ll à ka kpaaghà ɓi ŋwaà fìtom adɛŋ lɛ: Kɔ̀ri mɛ̀ fɛ ɓi weèlem à kpaŋ yɛ̀ɛ ǹɗì ɓiì ghaasii ɓɛ̀bènàbena ɓɔɔ kiɓoŋ ki u rɛsag mɛ̀kòò miì.

¹⁴Ɓum ɓɛ titom ɓɛ̀cèm ɓɛ yin nya mɛ̀ghay mɛ mɛɛ̀ kìki Bɛ̀ll kìsay? Mɛ ki ɓa lɛ, nyi yɛɛ romi mɔ lɛ mɛɛ kɛǹ kì ghɛɓsii ɓum ɓɛ̀cèm ɓɛ ɓɛ ghɛɛ̀sɛɛ kì terì gàɓ ɓi gòri ì Bɛ̀ll?