Read Bafia EBIREEGH 10 Bible Online

EBIREEGH 10 - Bafia bible

EBIREEGH 10

¹Ɓìdɔ̀gsɛna ɓi konaagh ɓi ki ɓaà syeesyee à kìfèèghrɛnà à ɓɛ̀kɔɔ̀kɔɔ̀ ɓɛ ɓyom, ɓi ri lɔŋ cììghziŋ ki ɓi ɓìrɔɔ ɓi ɓyɛɛ̀ yùyuiy; ɓi yin ɗi ìtèɗ wulɛ ɓi konàg kì tɛɛ̀zii ɓumɓɛ ɓɛ ti ɓɛ kɛ̀ngì Bɛ̀ll jàŋbog ɓi bee inɛ̀n, ɓi ki yin lɛ ɓi tɛɛ̀zì ɓɔ rì rìkuu ɗi ɓifùnà ɗi fɔlɔɔ, ɗi ɗi ri lɔŋ bèg yìcèm rìkuu ɗìfog, kɛ̀ɛ̀ rìlɔ̀gtɛ̀n.

²I ɓyɛɛ ɓa rì ìtèɗ wu tɛɛ̀ziyɛn mum, di ɓɛ mɛ lèkà rìwewèy ɗi ɓituwe ɓi rìsòòsòghɛ̀n ɗi ɓum, ɓisuulɛ ɓumɓɛ ɓɛɛ̀ ɓɔɔɓɔgsì Bɛ̀ll ɓi rìkuu ɗi riɓɔgsì ɗiǹ ɓɛ ɓaghà lɛ ɓɛ teɗ zòghɛ̀n gɛ̀n bog ɓi gɛ̀n yicèm, ɓɛ̀ kɛɛ̀ ɓa ti ri fèg ànɛ lɛ ɓɛ ri rì ɓìɓe.

³Wɔ̀lɛ ɓi saaɗ à rìkpaa, ɓìtuwe ɓi ɓɛ ti ɓɛ weeyì ɓi zòghɛ̀n ì ɓum ɓi ti ɓi kilàg lɛ ɓum ɓɛɛ yiyiti ɓìɓe ɓyaa bèg yìcèm.

⁴Lɛ bwaɓ yi ɓɛ̀lem ɓɛ ɓɛ̀sanìnya rì yi ɓipiì yi yin lɛ yi pisì ɓìɓe ŋwos adɛŋ.

⁵Kìɓan kiǹ kɛɛ̀ki, yɛ̀ɛ Kiris à ɓaghà di à ti ɓiì yùu ɓi ziinɛ, à kpaaghà rì Bɛ̀ll lɛ: Ù kɔ̀ni ɓi kifùna, nsoò lɛ com ki mum à faa wɔ̀, kìɓan kifog, ù faghà mɛ̀ nyoo.

⁶Ù ti kɔ̀ɔ wog kirɔɔ rì ɓìtuwe ɓi ɓɛ tɔni lɛ ɓɛɛ ɓɔgsi wɔ̀ rì ɓyɔ, nsoò ɓi ɓɛ funɛɛ ɓisuu zòghɛ̀n ì ɓìɓe.

⁷Nni fɔɔnnɛ mɛ̀ɛ nkpaaghi lɛ: wɔ̀ Bɛ̀ll, mɛ̀ɛnɛ, ǹ-yùu lɛ nki rìkɔ̀n ɗyɔɔ, lɔŋ yɛ̀ɛ kìɓan kɛm̀ ki ri kìkànɛn ɓi kaàtà à ɓìdɔ̀gsɛna.

⁸À loogh kìkpaa lɛ wɔ̀ɔ̀ kɔ̀ni ɓi nsoò ɓìfùna, nsoò mɛ̀fafàà mɛ zɛy, nsoò ɓìtuwe ɓi ɓɛ tɔni lɛ ɓɛɛ ɓɔgsi wɔ̀ rì ɓyɔ, nsoò ɓi ɓɛ funɛɛ ɓisuu zòghɛ̀n ì ɓìɓe, ɓyom ɓìn ɓìcèm ɓi rɔɔ ɓi wɔ, kɔlɛ ɓìfùna ɓìn ɓyɛɛ̀ kìikilɛ̀n lɔŋ yɛ̀ɛ ɓìdɔ̀gsɛna ɓyɛɛ̀ kpaakpàà.

⁹À ki ɓɔ̀ɓti lɛ wɔ̀ Bɛ̀ll! Mɛ̀ɛnɛ, ǹ-yùu lɛ nki rìkɔ̀n ɗyɔɔ, fɔlɔɔ a rì lɛ, à pisii bee ì rìɓɔgsàg ɗi Bɛ̀ll ì ǹtonto, à rèsì bee ì nyɔn.

¹⁰Ɓisuulɛ Yeesus Kiris à roòzìghà rìkɔ̀n ɗi Bɛ̀ll, fɔɔnnɛ ɓìsii ti rì zòghɛ̀n ìnɛ ɓi ɓìɓe ɓis lɛ rìfa ɗi à faghà nyoo yìì gɛ̀n bog ɓi gɛ̀n yicèm.

¹¹Pìrɛɛtìrɛ̀ bimiɗ à ti à rɛlàg ɓɛ̀ŋwos ɓɛ̀cèm ɓi jàŋ yiì ì kìsay à kìkì mɛ̀kuu mɛ ɓifùna mɛ̀fog mɛ mɛ yin lɛ mɛ pisi ɓìɓe ŋwos adɛŋ.

¹²Wɔ̀lɛ Kiris à faghà kìfùna kifog ɓisuu ɓiɓe, à ki kɔ̀ri min ɓi weèlem à Bɛ̀ll fìɗyàɓ fikɔ̀ɔ̀.

¹³Fɔɔnnɛ a ɓoŋɓoŋ ɓigomìnɛ lɛ ɓɛ̀bènàbena ɓii ɓɛɛ ɓa kìɓoŋ ki a rɛsag mɛ̀kòò mii miì.

¹⁴Fɔlɔɔ nnɛ ɓi rìfa ɗìfog, à mɛ kì lɛ ɓɛ̀roɓɛ ɓɛ ri ɓɛ̀tɛɛ̀ziyɛn ɓɛɛ ɓa lɛ syeesyee ìsuùcèm kɛ̀ɛ̀ com ki ɓɛ ri lɛ ɓɛ fen a lɔ̀ŋkaa.

¹⁵Kìɓan kiǹ kɛɛ̀ki Kìtɛntɛ̀ɛ̀n ki Nghay kɛɛ̀ rèresi girig ɓìsi; lɛ à loogh kì kpaà lɛ,

¹⁶Kan lɛ: Bee inɛ ǹɗì ɓiì renì ɓi nyìinyìm ànɛ lɛ rì mɛ̀ rì ɓɔ, ajɛ̀m ì mɛ̀ru mɛ̀n ì rì ɓiì ɓaà fɛlɛ: Ǹɗì ɓiì foŋì ɓìdɔ̀gsɛna ɓyɛm̀ ɓi mɛ̀rem maa, ǹkàn ɓɔ ɓyɔ ɓi nto. À ɓɔ̀ɓ min lɛ:

¹⁷Fɔɔnnɛ màa yititi ɓi ɓiɓe ɓyaa, nsoò mɛ̀nànì maa.

¹⁸Ɓisuulɛ cààmɛ̀n kìcèm ki ɓìɓe ɓi ti ɓì cenɛn, ki ghɛɓsii tì ɓi com lɛ ɓɛɛ fa ɓìfùna ɓisuu risòghɛ̀n ɗi ɓiɓe ɓiǹ.

¹⁹Nni fɔɔnnɛ mìni ɓɔɔsoŋ̀, tì ti lɛ tì ɗiŋì ɓi jàŋ inɛ ì rì kìcèlì kɛ̀ɛ̀ ìris lɛ bwaɓ yi Yeesus.

²⁰À nɛmgà ɓìsi nyɔɔnyɔn à bee, bee inɛ ì rì rì cɛɓ ɓi kìlàà ki ki ɓaghà ɓi naà-Bɛ̀ll, yɛɛlɔɔ lɛ ɓi nyoo yìì i nyimìɗ.

²¹Tì rì rì ǹlàmì ɓɛ̀pìrɛɛtìrɛ̀ àgwey anɛ ɓɛ rɛsìghà ɓi naà-Bɛ̀ll.

²²Ti tyòŋdɛɛna min Bɛ̀ll jàŋbog rì ǹɗem wu wu ri lɛ sɛɛghi sɛɛghi, rì rìgherɛ̀n ɗi ɗi ri ɗìronɛn, ǹɗem wù tɛnɛn ɓi ɓɛg ànɛ a ɓìɓan ɓi ɓi ri lɛ ɓi fa wɔ̀ bɛ̀lɛn, nyoo ì ɓa ǹwùɓsiyɛn ɓi mɛ̀nig mɛ mɛ ri mɛ̀ tɛnɛn.

²³Ti ɓèŋina dyàɓɛn inɛ ti làalam̀ɓɛ̀n, tì sììrɛ̀n ɓisuulɛ Bɛ̀ll ànɛ à faghà ǹkàg roòzag mɛkàg mii.

²⁴Ti ɓèeghɓèŋɗɛɛna ɓìsi rì ɓìsi, tì feèfègsɛ̀n lɛ ti ɓa rì ǹkɔ̀nɛ̀n, tì ki kìki ɓiɓan ɓi syeesyee.

²⁵Tyɛ̀ ki lèg rikɛ̀ngì ɗi a mɛ̀taŋzɛn mis yɛ̀ɛ ɓum ɓɛdɛŋ ɓɛ ti ɓɛ kilàg, ti faàfàlɛ̀n lɔŋ ɓìsiìɓɔmiɗ itèɗ, à ɓiisɛ̀n yɛ̀ɛ ɓi seesee lɛ ŋwos a Kan a kɛ̀ɛ̀kɛɛ yi.

²⁶Ɓisuulɛ, i tì kɛ̀nkɛni asu tì kìkì kìɓe ɓi rìfee, di tì mɛ yi saaɗ, kìfùna kidɛŋ ki yiìdi ɓisuu zòghɛ̀n ì ɓìɓe.

²⁷Tì rì ɓiì rɔ̀ɓi lɔŋ lɛ ti ɓoŋɓoŋ lɛ rì ɓɛ̀yɔ̀m ɓɛ Bɛ̀ll, rì ɗuu ɗi ɗi ghɛɛ̀sɛɛ kì ɗigsii ɓumɓɛ ɓɛɛ̀ kìki Bɛ̀ll ǹtoòtèɗ ri coo iris ɓi nɗem.

²⁸Ɓɛ ti ɓɛ weeyì mum ǹcèm ànɛ à yogsii ɓìdɔ̀gsɛna ɓi Moyis, ɓɛ̀ kɛɛ̀ wog nyi nyìighnyìg di ɓum ɓɛɓɛɛ̀, nsoò lɛ ɓɛraa ɓɛ resii rìnàn ɗii.

²⁹Ɓì rì lɛ ɓì fèg lɛ rìkuu ɗi ntɔɓ aɗi ɗyɛɛ ghɛɛ̀sɛɛ rì ŋwaànɛ à kìi lɛ à sɛɛtì Man à Bɛ̀ll, à ghɛn bwaɓ yi riràrɛ̀n ɗi lɛ rì Bɛ̀ll rì ɓum, yi yi kii lɛ a ɓa ǹtɛnɛn, yɛ̀ɛ zɛy rì zɛy à com, à ki fen Nghay à geesɛ̀n.

³⁰Ɓisuulɛ ɓìsii yii roànɛ à kpaaghà lɛ: Mɛ̀ yɛɛ ghɛɛ̀sɛɛ kì rɔ̀ŋi mɛ̀ yɛɛ ghɛɛ̀sɛɛ kì lèɓi à kpaa tì lɛ: Kan à rì ɓiì yɔ̀mzii ɓum ɓii.

³¹Ki ri koŋnyoo lɛ Bɛ̀ll ànɛ à rì cem, a raɗ mum ɓi ɓyàg ɓii.

³²Yitiina lɔŋ cɛɓ ki ɓì ghɛɓkà ɓi mɛ̀ru mɛ ǹtonto mɛ ɓì tekà kìtɛɛtɛn ki Bɛ̀ll; ɓì wokà mɛ̀tɔɓ lɛɛ̀gwey ɓi mɛ̀ru mɛ̀n; wɔ̀lɛ ɓì ki càrɛ̀ngà ɓi ɓi zàà ìnɛn.

³³Ki mɓalàg lɛ ɗi ɗi yii, ɓɛ sɛɛ̀sɛ̀mgì mìni, nsoò lɛ ɓɛ yeeyeèsì mìni ɓi nyìinyìm à ɓum, ɗi ɗi yii, ɓì sug ɓi gàm ì ɓumɓɛ ɓɛ yeèyèèsìghà fɔlɔɔ.

³⁴Ɓì kàɓɓɛ̀ngà mɛ̀tɔɓ mɛ ɓimbùŋ, ɓì ki woki kirɔɔ cààmɛ̀n kìcèm ki ɓɛ nti ɓɛ ɓatàg mìni ɓyom, ɓisuulɛ ɓì yighà lɛ ɓì ɓaghà rì ɓyom ɓi ɓi cee ɓiǹ lɛ, ɓyɔɔ ri ɓi ɓi ri cààmɛ̀n kìcèm.

³⁵Fɔɔnnɛ kɛ̀ ɓi càɗ ntyweeyi win ɓisuulɛ wu ri rì ɓyoo mɛlèɓ.

³⁶Ki ghɛɛ̀sɛɛ lɛ ɓi ɓa rì kìsììrì, di fɔɔnnɛ ɓi roòzi rìkɔ̀n ɗi Bɛ̀ll, ɓì teɗ min com ki à kàkà mìni.

³⁷Lɛ cààmɛ̀n kaa rɔ̀ɓ kiden lɔŋ lɛsàg lɛ roànɛ à ghɛ̀ɛ̀sɛɛ kì yùu a kpaŋ, àa lɛ̀mzii ɓi.

³⁸Kìɓan kifog ŋwaànɛ à rì lɛ saaɗ ɓi mis mɛ̀m à rì ɓiì ghɛɓì lɛ rìgherɛ̀n, wɔ̀lɛ i à sugtii rì jɛ̀m, ǹɗem wɛ̀m wɛ̀ kɛɛ̀ wogti kirɔɔ rì nyi.

³⁹Ɓìsii yin ɓɛroɓɛ ɓɛ ti ɓɛ sugtàg rì jɛ̀m lɛ ɓɛɛ ɗyaŋ, ɓìsii ri ɓɛ̀roɓɛ ɓɛ gherɛɛ lɛ ɓɛɛ ghɛɓsi ɓyɛɓ[3] ɓyàà.