Read Bafia EBIREEGH 11 Bible Online

EBIREEGH 11 - Bafia bible

EBIREEGH 11

¹Rìgherɛ̀n ɗi ri rìyi ɗi mum à yii saaɗ ànɛ ɓi ɓìɓan ɓi à tyweeyii, ɗi ɓa tì com ki kɛɛ̀ rèresi mum ɓɛ̀saaɗ ɓɛ ɓi ɓìɓan ɓi à ghɛɛ ɓì.

²Ɓumɓɛ abɛ̀y ɓɛ tekà mɛ̀sɛɛ̀ghsɛɛgh lɛ rìgherɛ̀n ɗyaa.

³Lɛ rìgherɛ̀n nnɛ tì ti tì yilàg lɛ Bɛ̀ll à kìghà zi ri jɛ̀ɛ̀ yìì, ɓi lèg ànɛ lɛ ɓyom ɓìcèm ɓi ti seesee ɓi kilɛ̀ngà rì com ki ŋwaà ghɛɛ ɓì.

⁴Lɛ rìgherɛ̀n nnɛ Aɓɛl à ɓɔgsìghà Bɛ̀ll rì ɓìfùna ɓi ɓi cee ɓi Kaɛŋ; lɛ rìgherɛ̀n ɗii, Bɛ̀ll à kpaaghà Aɓɛl lɛ à rì ŋwaà saaɗ, Bɛ̀ll nyimiɗ a sɛkà rìfa ɗii, ɗyɛɛ kii lɛ a ɓaɓa à tòtòg, nsoò yɛ̀ɛ à mɛ wu.

⁵Lɛ rìgherɛ̀n nnɛ Enɔg à ɓɔkà yɛ̀ɛ Bɛ̀ll cem, kɛ̀ɛ yi com ki lɛ rìwu; ŋwaàdɛŋ à ghɛɛ̀dìghà ɓi nyi ɓisuulɛ Bɛ̀ll à ɓɔkà rì nyi aɗyoo; di ɓɛ ka ɓɔg ɓi ri nyi aɗyoo, Enɔg à kìghà lɛ Bɛ̀ll a wog kìrɔɔ rì nyi.

⁶Wɔ̀lɛ i mum àrì kɛ̀ɛ̀ rìgherɛ̀n, à yin lɛ à rɔɔ Bɛ̀ll; ŋwaànɛ à tyɛ̀ɛ̀tɛɛ Bɛ̀ll jàŋbog, à ghɛ̀ɛ̀sɛɛ kì gherɛɛ lɛ Bɛ̀ll à rì wɔɔ, à ki gherɛn ti lɛ Bɛ̀ll à ti à lèɓkì ɓumɓɛ ɓɛ ti ɓɛ kaaghì nyi.

⁷Lɛ rìgherɛ̀n nnɛ Nowe à kìghà lɛ, yɛ̀ɛ Bɛ̀ll à lokà nyi kì kpaa kìɓan ki ɓɛ ɓaghà di ɓɛ ka ghɛn ɓi, nni à risìghà, à wog rìkpaa ɗi Bɛ̀ll, à toŋ kìkɔm lɛ a ghɛɓsi naa yìì i ɓum; fɔlɔɔ nnɛ rìgherɛ̀n ɗi kighà Nowe lɛ a fa ziinɛ bɛ̀lɛn, à fɔ̀n rìɓa ɗi mum à rì lɛ à ɓa lɛ saaɗ ɓi mis mɛ Bɛ̀ll, lɛ rìgherɛ̀n.

⁸Lɛ rìgherɛ̀n innɛ Abiraham à kìghà Bɛ̀ll mɛ̀wog yɛ̀ɛ à reŋìghà nyi, à pɛ̀sɛ̀n ɓi kìlɔ̀ŋ kii lɛ à kɛ̀ɛ ɓi jàŋ inɛ Bɛ̀ll à rì nyi ɓiì faà. À kɛ̀ngà fɔlɔɔ kɛ̀ɛ yi jàŋ inɛ à kɛ̀ɛ.

⁹Lɛ rìgherɛ̀n, nnɛ à ghɛghɛ̀ɓkà fɛlɛ yɛ̀ɛ ǹkèn ɓi ziinɛ Bɛ̀ll à siŋdɛ̀ngà lɛ à rì nyi ɓiì faà. Àa nkɔ̀ràg ɓi ɓìlaa, lɔŋ yɛ̀ɛ ɓɛ̀-Isag ɓɛɛ̀ Yakɔɓ ɓɛ Bɛ̀ll à faghà girig ǹkàg wɔm wiǹ.

¹⁰Ɓisuulɛ Abiraham à ɓoŋɓòŋgà bàn ìnɛ Bɛ̀ll yɛɛ fekà yɛ̀ɛ ì rì lɛ ì toŋɗɛ̀n, nyimiɗ yɛɛ ki toŋ, yɔ̀ lɛ kpegkpeg.

¹¹Lɛ rìgherɛ̀n innɛ, nsoò Sara à ɓaghà di à mɛ sɛ̀ɛ̀mɛ̀n, à ɓaghà rì ìtèɗ wulɛ a kiti boo ì mum, ɓisuulɛ à tyweeyàkà lɛ Bɛ̀ll à rì ɓiì roòzii nkàg wii.

¹²Kìɓan kiǹ kɛɛ̀ki kìbog ki mum ki ki ɓaghà di kaa tɔ̀gti kiǹ, ki kighà boo ìnɛ ì tèghɛɛ fɛlɛ yɛ̀ɛ tyɔɛy ti aɗyoo, nsoò lɛ yɛ̀ɛ sɛɛ̀sɛɛ anɛ ɓi bèn ì rìɓày à kìkòn ànɛ ɓɛ yin lɛ ɓɛ ɓay.

¹³Lɔŋ ɓi rìgherɛ̀n innɛ ɓumɓɛ̀n ɓɛ̀cèm ɓɛ cuughà di ɓɛ ka teɗ ɓi ɓyom ɓi Bɛ̀ll à kàkà ɓɔ; kìɓan kifog ɓɛ ghɛngày ɓyɔ, ɓɛ ki nyààrɛn ri ɓyɔ di ɓi kakay fìràɓ, ɓɛ ki kpaa lɛ ɓɔɔ ri ɓɛ̀kèn ɓɛ ɓɛ ri ɓi rìghaàgh fɛ ɓi ziinɛ.

¹⁴Ɓɛ̀roɓɛ ɓɛɛ̀ tòtog ɓɛǹ fɔlɔɔ, ɓɛɛ̀ rèresi lɛ tɛntɛ̀ɛ̀n lɛ: Ɓɛɛ̀ kaakaa kilɔ̀ŋ kidɛŋ.

¹⁵I kɛɛ ɓa lɛ kìlɔ̀ŋ ki ɓɛ pɛsɛ̀ngày wɔɔ kɛɛ ɗiɗìghà ɓɔ ɓi nɗem, di ɓɛ ɓaghà lɛ ɓɛ ɓa rì cààmɛ̀n ki lɛ ɓɛɛ sugti wɔɔ.

¹⁶Ɓi saaɗ à rìkpaa, kìlɔ̀ŋ ki ki cee kiǹ kɛɛ̀ki ɓɛ kɔnkɔ̀ngà, yɛɛlɔɔ lɛ, kìlɔ̀ŋ ki aɗyoo; kìɓan kiǹ kɛɛ̀ki Bɛ̀ll à yin lɛ à wog ǹtoòrìɗ lɛ ɓɛɛ reŋi nyi lɛ Bɛ̀ll wàà, ɓisuulɛ à pègsɛ̀ngà ɓɔ bimiɗ à bàn.

¹⁷Lɛ rìgherɛ̀n innɛ Abiraham à fùnɛ̀ngà Isag di Bɛ̀ll à fèèghrɛɛ nyi; m̀bobog wìì a man nnɛ à fùnɛ̀ngà lɔɔ, kɔlɛ rì nyi nnɛ Bɛ̀ll à faghà ǹkàg.

¹⁸À kpaa nyi lɛ: Ɓi Isag nnɛ ù ɓaagɛ rì boo ì mum ìnɛ ɓɛ ɓɛsàg rì wɔ̀.

¹⁹Abiraham à ɓaghà rì fèg ànɛ lɛ Bɛ̀ll à rì rì ìtèɗ wulɛ, nsoò mum àa wii, à ghèmzì nyi, fɔɔnnɛ ɓɛ pɛɛ̀zìghà nyi man wiì; rìkuu ɗi kifèèghrɛnà ki righèmɓɛ̀n ɗi ɓiloŋ, kɛɛ ri lɔɔ.

²⁰Lɛ rìgherɛ̀n innɛ Isag à màgà lɛ rì Yakɔɓ, rì Eso ɓisuu ɓiɓan ɓi ɓi mɛ̀ru mɛ beèbɛ̀y.

²¹Lɛ rìgherɛ̀n innɛ Yakɔɓ à màgà ɓɔn ɓɛ Yoosɛɓ ɓɛ̀cèm lɛ bog bòg bog, di à ti ɓiì wiì, à tuŋì ɓi nto wu kigeŋ ki àa mɓèmdàg miì, à ɓɔgsì Bɛ̀ll.

²²Lɛ rìgherɛ̀n innɛ Yoosɛɓ à ɓùgà kìɓan ki rìpɛ̀sɛ̀n ɗi ɓɔn ɓɛ Isirayɛl a Egiɓtɛn, di à ti jàŋbog rì rìwu, à ki reɓsɛn com ki ɓɛ ghɛɛ̀sɛ̀ngà kì kìi ri ɓìwoɓ ɓii.

²³Lɛ rìgherɛ̀n innɛ ɓɛ̀yalì ɓɛ Moyis ɓɛ nyamgà nyi ɓi naa ɓɛ̀ŋwii ɓɛraa ajɛ̀m ì rìyalɛ̀n ɗii, ɓisuulɛ ɓɛ ghɛngà lɛ man ànɛ̀n à rɔɔtɛ̀ngà, fɔɔnnɛ ɓɛ risìghà ɓi kidɔ̀gsɛna ki rifòm ɗi faghà.

²⁴Lɛ rìgherɛ̀n innɛ Moyis à ɓèngà lɛ ɓɛɛ regi nyi lɛ man à gɔ̀n ì Farawɔŋ di à ti ǹsɛ̀ɛ̀mɛn,

²⁵à ɓiìsɛ̀n kìkɔ̀ni lɛ ɓɛɛ kiki nyi mɛ̀tɔɓ ǹɗaŋ ɗi ɓumɓɛ ɓi kìlɔ̀ŋ ki Bɛ̀ll à rɔ̀tɛ̀ngà, à cee lɛ a wog kìrɔɔ ɓi kìɓe ɓiɗùm maa cààmɛ̀n.

²⁶À ghɛn lɛ ǹtoòrìɗ wu Kiris à ghɛ̀ɛ̀sɛɛ kì woògh wu cee coo ikum wu Egiɓtɛn kɛ̀ɛ̀ vèg ɓisuulɛ mis mii mɛ ɓaghà lɔŋ ri mɛ̀lèɓ mɛ mɛ ɓoŋɓòŋgà nyi asu.

²⁷Lɛ rìgherɛ̀n innɛ à pɛ̀sɛ̀ngày a Egiɓtɛn, kɛ̀ɛ risi bim inɛ rìfòm ɗi ɓaghà lɛ ɗi wog, à sììrɛ̀ngà lɔŋ ɓi nɗɛli wii yɛ̀ɛ ɓɛɛ̀ kali lɛ, a seesee Bɛ̀ll ànɛ ɓaà ghɛn ɓi.

²⁸Lɛ rìgherɛ̀n innɛ à kìghà Paskà, à tɔg lɛ ɓɛɛ misi bwaɓ ɓi mɛ̀suunaa di fɔɔnnɛ ŋwaà-fìtom anɛ à ghɛ̀ɛ̀sɛ̀ngà kì cuusii ɓɔn ɓɛ ǹtonto, a rɔɓ kɛ̀ɛ cuusi ɓɛroɓɛ a Isirayɛl.

²⁹Lɛ rìgherɛ̀n innɛ ɓɔn ɓɛ Isirayɛl ɓɛ syaàghà rìɓày à m̀ɓàŋ lɔŋ yɛ̀ɛ zi i zɛy; yɛ̀ɛ ɓumɓɛ a Egiɓtɛn ɓɛ mɛɛ̀ fèèghrɛ̀ngà girig, mɛ̀nig mɛ ghaàgh rì ɓɔ.

³⁰Lɛ rìgherɛ̀n innɛ gari ì Zyeriko ì kpìlàkà di ɓɔn ɓɛ Isirayɛl ɓaa cèŋzɛn yɔ̀ mɛru taàɓɛ̀ɛ̀.

³¹Lɛ rìgherɛ̀n innɛ Rahaɓ ànɛ à ɓaghà giɓ a rìɓàmɓà à wughà ɓi nɗaŋ ri ɓumɓɛ ɓɛ kighà Bɛ̀ll ɓɛ̀lɔg ɓisuulɛ à ghàɓkà ɓumɓɛ ɓɛ kɛngà mɛ̀wooghrag, rì syeesyee à ǹɗem.

³²Nkpaati ɓà cɛ? Cààmɛ̀n ki ri lɛ ki kaarɛ̀n mɛ̀ di ǹkpaa lɛ, nkali ɓìɓan ɓi ɓɛ-Zyedeyɔŋ, ɓɛ̀-Ɓarag, ɓɛ̀-Samsɔn, ɓɛ̀-Yɛfte, ɓɛ̀-Davit, ɓɛ̀-Samuɛl rì ɓɛ̀kpaŋzì-ɓìɓan.

³³Ɓɛ kighà lɛ ɓɛ yagsàg ɓìlɔ̀ŋ ɓi mɛ̀y, ɓɛ kikì ɓìɓan ɓi ɓi ri lɛ saaɗ, ɓɛ ki ghɛn yɛ̀ɛ mɛ̀kàg mɛ ɓɛ ɓaghà rì mɔ mɛ rongà, ɓɛ simdì ɓìmonɗo myɔm, lɛ rìgherɛ̀n;

³⁴ɓɛ ɓuɓsì ìtèɗ wu ɗuu, ɓɛ ki lɛg lɛ, ɓɛ̀ kɛɛ̀ wey ɓɔ rì gàfàg, ɓɛ wɔngì tìroɓ ti ɓɛ ɓaghà rì tyɔ, ɓɛ ɓa rì kìghɛɛsii a wɛ̀y, ɓɛ ki sansan mɛraŋ mɛ wɛ̀y mɛ ɓi ɓìlɔ̀ŋ ɓidɛŋ.

³⁵Lɛ rìgherɛ̀n innɛ ɓɛ̀yiɓ ɓɛdɛŋ ɓɛ ghɛɛdìghà tì yɛ̀ɛ ɓum ɓaa ɓɛdɛŋ ɓɛ ɓɛ ɓaghà di ɓaa wu ɓɛ ghem̀ɓɛ̀ngà tì, ɓɛ ɓa tì rì ɓɔ. Ɓum ɓɛdɛŋ ɓɛ tulɛ̀ngà rì ɓìtèetèɗ ɓi mɛtɔɓ, ɓɛ̀ kɛɛ̀ ki gherɛn lɛ ɓɛɛ pisi ɓɔ ɓi mɛ̀tɔɓ mɛ̀n, lɛ di fɔɔnnɛ ɓɛɛ syɔɔ̀dɛn rì rìghèmɓɛ̀n ɗi ɓiloŋ ɗi ɗi rɔɔtɛɛ ɗi cee.

³⁶Ɓɛ fengàkà tì ɓɛ̀ro ɓɛdɛŋ, ɓɛ bog ɓɔ kìtòn rì gbaǹ, ɓɛ kagì ɓɔ bɛǹ, ɓɛ ki pìki ɓɔ ɓi naà-zày.

³⁷Ɓɛ rogàkà ɓɔ gɔ̀g lɛ ɓɛɛ wey ɓɔ ɓɛ rengì ɓɛ̀ro ɓɛdɛŋ ɓìden ɓiɓɛɛ̀ rì ɓìghàg ɓɛ wewèy ɓɛm̀bog rì gàfàg, ɓɛ rerènìghà jàŋ, ɓɛ waatàg lɛ rì gòò yi jɔ̀ɔ̀, rì yi bwiy, ɓɔ kɛ̀ɛ̀ com, ɓɛ yeèyèèsì ɓɔ, ɓɛ ki tɔtɔɓ ɓɔ,

³⁸ɓɔ ɓɛ ɓɛ ɓaghà mɛ̀kuu mɛ ɓum mɛ ziinɛ ì ghɛ̀ɛ̀sɛ̀ngà gì ɓi lɛ ì ɓa rì mɔ, ɓɔ yɛɛ deŋdèŋgà lɛ rì ɓi mɛ̀reɓ, rì ɓi dòn aɗyoo, ɓɛ ghɛghɛ̀ɓ lɛ rì ɓi bagsɛn yi dòn rì ɓi ɓìbùgsɛnà.

³⁹Nni ɓumɓɛ̀n ɓɛ̀cèm ɓɛ Bɛ̀ll à sɛkà rìgherɛ̀n ɗyaa ɓɛ tekà ɓi com ki Bɛ̀ll à kàkà ɓɔ

⁴⁰ɓisuulɛ ɓɛ peèghpègsɛ̀ngà bimid à com àdɛŋ ànɛ à cee ɓisu wis, lɛ ɓɛ̀ kɛɛ̀ kpaŋ ɓi nɗɛli wulɛ kìɓan ki fenɛn kɛ̀ kɛɛ̀ ɓa ti a lɔ̀ŋkaa, di ɓìsii ka yiǹ.