Read Bafia EBIREEGH 12 Bible Online

EBIREEGH 12 - Bafia bible

EBIREEGH 12

¹Nni fɔɔnnɛ ɓìsi girig, yɛ̀ɛ tì ti ɓɛ̀rìɓiyɛn ri ǹkun wu ɓɛwusìnɛ̀ɗ yɛ̀ɛ wu, tì ghɛ̀ɛ̀sɛɛ min ki càri com kìcèm ki ki ri ɓìsi ǹtɛ̀g, rì kìɓe ki ki ti kɛ̀ kɛɛ̀ tɔg ɓisi kìlaataagh, tì sììrɛ̀n ɓi mɛ̀ree mɛ ɓɛɛ̀ tɔtɔg ɓisi lɛ ti ghɛŋì.

²Tì seesèè lɔŋ Yeesus ànɛ rìgherɛ̀n ɗis ɗi sasaghii nto ɓi nyi, à tumɛ̀n a rìtumɛ̀n à kpaŋ a rìsugtɛ̀n. Yeesus ànɛ̀n yɛɛ cenɛ̀ngà rìwu ɗi ɓi Kɔrɔs, kɛ̀ɛ tɔg com rì ntoòrìɗ wu à wokà, lɛ à seesèèghà kìrɔɔ ki ki ɓoŋɓòŋgà nyi; ɓi gomìnɛ, à kɔ̀kɔrii ɓi weèlem à ìkɔ̀ɔ̀ wu rilàmì wu Bɛ̀ll.

³Terina kìrèmzɛnà ɓi roànɛ à cenɛ̀ngà lɛ ɓɛ̀kìì-kìɓe ɓɛɛ̀ ɗuù fɔlɔɔ ri nyi, di fɔɔnnɛ ɓi ɓa kɛ̀ ɓi càrɛn lɛ kìfɔlìmùm kɛɛ teɗ mìni mɛ̀rem.

⁴Ɓi wɛ̀y win wu rì kìɓe, ɓì ka ɗuù ɓi à kpaŋ ɓi jàŋ inɛ lɛ ɓi wu,

⁵ɓì mɛ ɗimzɛn jɛ̀ɛ̀ yi mɛfegsɛn yi Bɛ̀ll a kpaaghi mini fɛlɛ yɛ̀ɛ ɓɔn ɓii lɛ: Man wɛm̀ kɔ̀ɔ sɛɛti zàà ìnɛ Kan à ɓoogh wɔ̀, kìfɔlìmùm kɛ̀ kɛɛ̀ ɓan wɔ di à fwààdɛɛ wɔ̀.

⁶Ɓisuulɛ Kan à tì à falàg ŋwaànɛ à keesii ǹtɔɓ à ki ɓoki roànɛ à yii lɛ à rì nyi man.

⁷Cenɛɛna mɛ̀tɔɓ, Bɛ̀ll a kìki mini fɔlɔɔ lɛ ɓì rì ɓɔn ɓii. Man àbe nnɛ seŋi à ti kɛ̀ɛ ɓog?

⁸I à kuli ɓi mini yɛ̀ɛ à ti à kwiiyì ɓɔn ɓii ɓɛ̀cèm, di ɓì yin ɓɛkɔɔ̀kɔɔ̀ ɓii ɓɛ ɓɔn, ɓɛ à yali ɓi ɓɛ̀y.

⁹Yɛ̀ɛ ɓɛ̀seŋi ɓis ɓɛ ɓi mɛ̀mùù ɓɛ mɓokì ɓìsi tì ki kìki ɓɔ mɛ̀wog, tì ghɛ̀ɛ̀sɛɛ min lɛ tì pɔ̀ɔ̀zì kì woògh Seŋi ànɛ ɓi mɛ̀ghay, lɛ ti ɓa rì cɛɓ.

¹⁰Ɓɛ̀seŋi ɓis ɓɛ ɓɛ yaayii ɓìsi ɓɛ nti ɓɛ falàg ɓìsi ǹtɔɓ ɓi maa cààmɛ̀n lɔŋ yɛ̀ɛ ɓɛ nghɛngì lɛ ki ghɛɛ̀sɛɛ, wɔ̀lɛ Bɛ̀ll à ti à ɓokì ɓìsi ɓi kìrɔɔ kis lɛ di ti ɓa rì gàɓ ɓi rìɓa ɗii ɗi à rì ǹtɛnɛn.

¹¹Ki ri lɔŋ saaɗ lɛ ǹtɔɓ wucèm wu ti wu lokì kìghɛnɛɛ yɛ̀ɛ kìɓan ki kɛɛ wogsi mum bim, wɛ̀ kɛɛ̀ ɓa kiɓan ki kinyàà, kìɓan kifog, wu ti wu siitàg kì faà ɓìɗùn ɓi cɛɓ ki fyòoog, rì ki saaɗ.

¹²Kìɓan kiǹ kɛɛ̀ki ɓì ghɛ̀ɛ̀sɛɛ kì tèèsii ɓyàg ɓin ɓi ɓyaa nyɔŋì, rì mɛ̀ɗu min mɛ maa kpɔ̀gtì.

¹³Mɛ̀kòò min mɛɛ nɔɔ̀ti lɔŋ bee yi yi ri lɛ saaɗ di fɔɔnnɛ ìkòò wucèm wu wu ri rì kìlɛm wɛ̀ kɛɛ̀ nìmɓɛn, wɛɛ wɔǹ lɔŋ nwɔ̀nɛn.

¹⁴Kaana lɛ ɓi ghɛɓ lɛ fyòoog rì ɓum ɓɛ̀cèm, ɓì ki ɓa ri cɛɓ ki ki ri kìtɛnɛn; lɛ ŋwaànɛ cɛɓ kìn ki ri ɓiì kaarɛɛ a lɔ̀ŋkii, àa ghɛn ɓi Kan.

¹⁵Ɓì konàg lɛ ŋwaàdɛŋ kɛ̀ɛ ɓa lɛ à rèèghrɛ̀n geesɛ̀n ì Bɛ̀ll, nsoò lɛ gàŋ i ǹlòlolɛn yɛ̀ kɛɛ̀ ròò ǹɗuŋ, lɛ yɛ̀ɛ ɓuùsi jàŋ, ì ki yeesi ɓum lɛɛ̀gwey ri ìrɔ̀g wu yɔ̀.

¹⁶Ɓì konàg lɛ ŋwaàdɛŋ kɛ̀ɛ ɓa ri cɛɓ ki tɔɔtɔɓki, nsoò lɛ a ɓa rì zɛɛtɛn ɓi ɓyom ɓi ɓi ri kìcèlì fɛlɛ yɛ̀ɛ Eso ànɛ à kàɓkà ìkɔ̀ɔ̀ wii wu risɛ̀ɛ̀mɛn ɓisuu càà ki ɓiɗilàg.

¹⁷Ajɛ̀m ìnɛn, yɛ̀ɛ à mɛɛ̀ kaaghà lɛ seŋi a maŋ nyi, nni à nàɓkà nyi lɛ bee inɛ à ɓaghà lɛ à lɔ̀gtì tì kìɓan ki à kìghà ì ɓaghà ɓi. Nsoò yɛ̀ɛ à kaakààghà bee fɔlɔɔ di a rènɗèn.

¹⁸Lɛ àa dòn ìnɛ mum à rì lɛ à kòm yɛɛ̀nɛ ɓì tyòŋdɛ̀ngà jàŋbog rì yɔ̀, dòn ì Sinayi ìnɛ ì ɓaghà rì ɗuu, rì tìfììfìnà, rì birìm ì ɓìɓɓìɓ, rì bɛ̀ɓ

¹⁹rì gom ì ɗyam, rì gom ì jɛ̀ɛ̀; ɓumɓɛ ɓɛ wokà gom ìnɛ̀n, ɓɛ ɓeèdɛ̀ngà lɛ ɓɛɛ kɛǹ asu rì rìwowòg ɗi jɛ̀ɛ̀ ìnɛn.

²⁰Ɓisuulɛ ɓɛ ɓaghà ɓi lɛ ɓɛ cenɛ̀n ǹsiŋdɛn wulɛ: Nsoò nyàm yàa kòmi dòn ìnɛn, ɓɛ ghɛɛ̀sɛɛ yɔ̀ ki rogii gɔ̀g, ɓɛ wey yɔ̀.

²¹Kìɓan kiǹ ki koŋɗɛ̀ngà nyoo lɛɛ̀gwey ɓi rìseesèè ɓi lèg ànɛ lɛ Moyis à kpaghà lɛ ǹɗisii, ǹki nìŋdɛn lɛ kpàg kpàg kpàg.

²²Wɔ̀lɛ, ɓìi nkɛ̀ɛ jàŋbog rì dòn ì Siyon, jàŋbog rì bàn ì Bɛ̀ll ànɛ à rì cem, Yorisalɛm ànɛ aɗyoo, rì ɓum ɓɛ titom ɓìtuu ɓìtuu,

²³ɓìi nkɛ̀ɛ jàŋbog rì ǹtaŋzɛn wu ɓɔn ɓɛ Bɛ̀ll ɓɛ ǹtonto, ɓɛ mii maa mɛ ri mɛ̀ kànɛn ɓi ɗyoo ɓi ɗùm; ɓìi nkɛɛ̀ jàŋbog rì Bɛ̀ll ànɛ à rì ɓiì yɔ̀mi ɓum ɓɛ̀cèm; ɓìi nkɛ̀ɛ jàŋbog rì mɛ̀ghay mɛ mɛ ri lɛ saaɗ, mɛ mɛ ti lɛ syeesyee, kɛ̀ɛ̀ com ki ɓɛ ri lɛ ɓɛ fen ɓi mɔ.

²⁴Ɓìi nkɛɛ̀ jàŋbog rì Yeesus ànɛ à rì ɓi nyìinyìm à nyɔɔnyɔn à rìràrɛ̀n ànɛ lɛ rì Bɛ̀ll rì ɓum, ànɛ bwaɓ yii yi yi kpagà yɛɛ̀ tòtòg yi cee yi Aɓɛl.

²⁵Ɓì konàg lɛ kɛ̀ ɓi ɓèn kiwoògh jɛ̀ɛ̀ ì roànɛ a tòtòg, ɓisuulɛ i ɓɛ̀roɓɛ ɓɛ ɓengà kì woògh jɛ̀ɛ̀ ì roànɛ à rɔ̀ɔ̀rɔ̀gsɛ̀ngà ɓumɓɛ ɓi ziinɛ, ɓɛ rɔmɛ̀ngà ɓi deɓ, gɛ̀n yaŋ ri ɓìsi, cààmɛ̀n ki tì lɔ̀ghii ɓyàs rì roànɛ a rɔɔrɔgsɛ̀n yì ɓìsi ɓi ɗyoo ɓi ɗùm.

²⁶Nyi ànɛ jɛ̀ɛ̀ yìì i nyɛ̀ŋzìghà zi ɓi mɛ̀ru mɛ̀n, nnyɛɛ mɛ fa nkàg ɓi gomìnɛ lɛ: Àa lɔŋ zi yɔ̀ ri yɔ̀ yɛɛ̀nɛ ǹɗì ɓiì nyɛ̀ŋzii, m̀ɓiì nyɛ̀ŋzii ti girig gɛ̀n bogtɛ̀n lɛ rì ɗyoo miì.

²⁷Jɛ̀ɛ̀ ìnɛ lɛ: Gɛ̀n bogtɛ̀n inɛ̀n ì rèsii lɛ: ɓyom ɓi Bɛ̀ll à kìghà ɓi ɓiì nyɛ̀ŋɗɛɛ, ɓi silàg, fɔɔnnɛ ɓyom ɓi ɓi yin lɛ ɓi kpig ɓyɛɛ ri rɔ̀ɓ.

²⁸Nni ti faana min Bɛ̀ll ɓìtògsɛ̀n yɛ̀ɛ tì teri kìlɔ̀ŋ ki ki yin lɛ ki kpig, tì ɓɔgsì nyi rìɓɔgsì ɗi ɗi ri lɛ ɗi rɔɔ nyi, rì mɛ̀wog, rì ìris.

²⁹Ɓisuulɛ Bɛ̀ll wìs a rì girig yɛ̀ɛ ɗuu ɗi ɗyɛɛ̀ ɗiighɗigsì lɛ lɛɛ̀ lɛɛ̀.