Read Bafia EBIREEGH 2 Bible Online

EBIREEGH 2 - Bafia bible

EBIREEGH 2

¹Kìɓan kiǹ kɛɛ̀ki tì ghɛ̀ɛ̀sɛɛ kì ɓiisɛɛ ki ɓaà ɓɛ̀ sììrɛn ɓi ɓìɓan ɓi tì wokà di tì kɔ̀ni ɓi lɛ, ti ɗyaŋ.

²Ɓisuulɛ kìɓan ki ɓum ɓɛ titom ɓɛ kpaaghà ki kilɛ̀ngà; fɔɔnnɛ mum bimiɗ ànɛ à fogà ɓi nɗem rì kìɓan kiǹ nsoò lɛ, à ɓèn kìwoògh com ki ɓɛ kpaaghà, à tekà deɓ inɛ ì ghɛ̀ɛ̀sɛ̀ngà rì rìkì ɗii.

³Nni lannɛ tì rì ɓiì kìi lɛ tyɛ̀ ki teɗ deɓ di tì sɛɛtii coo gòri yɛ̀ɛ ìnɛ? Kan nyimiɗ a lokà kìkpaà kìɓan ki gòri ìnɛ̀n, fɔɔnnɛ ɓumɓɛ ɓɛ wokà di a kpaakpàà ɓɛ siìràkà ɓìsi kì rèsii saaɗ ànɛ miì.

⁴Bɛ̀ll à ki sìisiìràg rìkalì ɗyaa lɛ rì ɓìrèmzɛnà, rì ɓɛ̀koŋnyoo ɓɛ ɓiɓan rì dàm mɛ̀kuu mɛ̀kuu, rì mɛ̀fafàà mɛ Kitɛntɛ̀ɛ̀n ki Nghay mɛ a kàakàɓsì lɔŋ yɛ̀ɛ ki kɔni nyi.

⁵Ɓisuulɛ, àa ɓum ɓɛ titom ɓɛɛ̀ɓɛ Bɛ̀ll à faghà nyɔnyɔn à zi anɛ a yùyuiy lɛ ɓɛɛ lami; nyɔnyɔn à zi anɛ̀n nnɛ tì kpaakpàà.

⁶Kɔlɛ ŋwaàdɛŋ à kpaaghà jàŋ idɛŋ ɓi kaàtà à Bɛ̀ll lɛ: Mum innɛ cɛ, ɓi ɗi lɛ wɔ̀ Bɛ̀ll u yitag nyi? Nsoò man à mum, à rì cɛ lɛ u teki ntɔɓ ɓisu wìì?

⁷Ù sɛɛ̀dìghà rìɓa ɗii ɓi maa cààmɛ̀n, lɛ ɗyɛ̀ kɛɛ̀ kpaŋdi yɛ̀ɛ ɗi ɓum ɓɛ titom, ù waasì nyi lɛ, rì rìkem, rì nnyaasɛ̀n fɛlɛ yɛ̀ɛ tàm à mɛ̀fòm.

⁸Ù fogà nyi ɓyom ɓìcèm a mɛ̀kòò lɛ a lami ɓyɔ̀. Yɛ̀ɛ ɓɛɛ̀ kalag lɛ: À faghà nyi ìtèɗ wulɛ, a lami ɓyom ɓìcèm fɔlɔɔ a rèsii lɛ: À faghà mum ìtèɗ wulɛ a lami ɓyom ɓìcèm kɛ̀ɛ̀ ki ki lɔɔ̀sɛɛ. Nsoò fɔlɔɔ, ɓìsii ka ghɛn ɓi ɓigomìnɛ lɛ, ɓyom ɓìcèm ɓi ti ɓi rìlàmì ɗi mum.

⁹Kìɓan kifog, roànɛ ɓɛ sɛɛ̀dìghà rìɓa ɗii ɓi maa cààmɛ̀n lɛ ɗyɛ̀ kɛɛ̀ kpaŋdi yɛ̀ɛ ɗi ɓum ɓɛ titom yɛɛ ri Yeesus, nyi nnɛ ti seesee yɛ̀ɛ ɓɛ mɛ waasi rìkem, rì ǹnyaasɛ̀n ɓisuu riwù ɗi à wughà; lɛ à wughà ɓisuu ɓum ɓɛ̀cèm lɛ geesɛ̀n ì Bɛ̀ll.

¹⁰Ɓisuulɛ Bɛ̀ll ànɛ à kìghà ɓyom ɓìcèm, ànɛ à ki rì rì ɓyom ɓìcèm, nnyɛɛ̀ ki kìghà lɛ ɓɔn lɛɛ̀gwey ɓɛɛ teɗ gàɓ ɓi rìkem ɗii, ɓi bee ì rìkɛŋ, a ki lɛ Yeesus ànɛ à rì ǹto wu gòri yàà, a kpaŋ ɓi nɗɛli wu, kɛ̀ɛ ɓa ri kìɓan ki fenɛn a lɔ̀ŋkii.

¹¹Ɓisuulɛ rì ǹtɛɛ̀zì ɓum, rì ɓumɓɛ à tɛɛ̀zii ɓɛ fuu yì yɛ̀ɛ mum bog, ɓisu wìn miì nnɛ ki yeesii ɓi nyi lɛ a regi ɓɔ lɛ, ɓɛ̀geni ɓii,

¹²yɛ̀ɛ à kpaaghà lɛ: Ǹɗì ɓiì ghagsii ɓɛgeni ɓɛ̀m ɗii ɗyɔɔ, ǹkemzì wɔ̀ ɓi nyìinyìm à ǹtaŋzɛ̀n.

¹³Rì tì lɛ: Ǹɗì ɓiì faà ǹtyweeyi wɛm̀ ɗì nyi. Rì tì lɛ: Rì mɛ̀ rì ɓɔn ɓɛ Bɛ̀ll à faghà mɛ̀, ɓìsi ɓɛɛ̀ ɓɛ lɛ̀.

¹⁴Nni fɔlɔɔ nnɛ yɛ̀ɛ ɓɔn ɓɛ ri lɛ, rì nyoo ì mɛ̀mùù, rì bwaɓ, nyi girig à tekà nyoo ìnɛ̀n lɛ, di a ghaàsi Satàn ànɛ à rì rì ìtèɗ wu riwù com ki zɛy, ɓi rìwu ɗi à wughà

¹⁵à ki ghɛɓsi ɓum ɓɛ̀cèm ɓɛ ìris wu riwù wu fogà ɓi rìkpàn cɛɓ kaa kicèm.

¹⁶Ɓisuulɛ, àa ɓum ɓɛ titom ɓɛɛ̀ɓɛ à yùu ɓà kìghɛɓsii, lɔŋ dòò yi Abiraham.

¹⁷Kìɓan kiǹ kɛɛ̀ki à ghɛ̀ɛ̀sɛ̀ngà kì pisɛɛ ɓɛgeni bee yicèm lɛ, di a ɓa rìfòm ɗi ɓɛpìrɛɛtìrɛ̀ ɗi ɗi ri rì nɗem wu nyìighnyìg, ɗi kikì kìsay ki Bɛ̀ll lɔŋ yɛ̀ɛ ki ghɛɛ̀sɛɛ, lɛ ɗyɛɛ soò ɓìɓe ɓi ɓum ɓɛ kilɔ̀ŋ.

¹⁸Lɛ yɛ̀ɛ nyimiɗ a tulɛ̀ngà rì mɛ̀fèèghrɛn, à wog rìkɛŋ à rì lɛ à ghɛɓsì ɓumɓɛ ɓɛ ri ɓi mɛ̀fèèghrɛn.