Read Bafia EBIREEGH 3 Bible Online

EBIREEGH 3 - Bafia bible

EBIREEGH 3

¹Nni fɔlɔɔ nnɛ, mìni ɓɛ̀geni ɓɛ̀m ɓɛ ɓi rìgherɛ̀n ɓɛ ɓi rì rì gàɓ ɓi nɗeèghreŋi wu Bɛ̀ll, seeseena Yeesus ànɛ Bɛ̀ll à romgày lɛ a ɓa rìfòm ɗi ɓɛpìrɛɛtìrɛ̀ ɗi ɓi rìgherɛ̀n ɗi ɓìsiì làalam̀ɓɛ̀n.

²Yeesus à kìghà Bɛ̀ll ànɛ à faghà nyi kìsay kiǹ mɛ̀wog, lɔŋ yɛ̀ɛ Moyis à kighà, ɓi naà-Bɛ̀ll bimiɗ.

³Lɛ ɓɛ ghɛngà lɛ, à ghɛ̀ɛ̀sɛɛ kì terì rìkem ɗi ɗi cee ɗi Moyis, fɔɔnnɛ ŋwaànɛ à toŋi mɛɛ, à ti à kemgì à cee mɛɛ mɔmiɗ mɛ à toŋi.

⁴Mɛɛ mɛcèm mɛ ri rì ŋwaànɛ à toŋi mɔ, nni ǹtoŋì ɓyom ɓìcèm yɛɛ ri lɛ Bɛ̀ll.

⁵Ɓi ɓɛg ànɛ yɛ̀ɛ Moyis, à kìghà mɛ̀wog yɛ̀ɛ ki ghɛɛ̀sɛɛ, ɓi naà-Bɛ̀ll bimiɗ, à ɓaghà ǹkìì-kìsay anɛ à ghɛ̀ɛ̀sɛ̀ngà kì ghagsii ɓiɓan ɓi ɓi ghɛɛ̀sɛ̀ngà kì kalɛɛ.

⁶Wɔ̀lɛ Kiris à rì rì mɛ̀wog fɛlɛ yɛ̀ɛ Man ànɛ àrì beèbɛ̀y ɓi naa yìì; naa ìnɛ̀n yɛ̀ɛ ri lɛ ɓìsi, i tì ɓèŋi à kpaŋ a rìsugtɛ̀n lɛ rì kɔɔ̀kɔɔ̀ à ǹtyweeyi rì dyàɓɛn inɛ ti saasanɛ̀n.

⁷Kìɓan kiǹ kɛɛ̀ki, i ɓì woogh jɛ̀ɛ̀ yìì gɛɛ̀nɛ fɛlɛ yɛ̀ɛ Kìtɛntɛ̀ɛ̀n ki Nghay ki ti ki kalàg,

⁸kɛ̀ ɓi tèèsi mɛrem min fɛlɛ yɛ̀ɛ ɗi ɓì kìghà nyi ntoòtèɗ ŋwos anɛ ɓì fèèghrɛ̀ngà nyi ɓireɓ,

⁹jàŋ inɛ ɓɛ̀seŋi ɓin ɓɛ feèghrɛ̀ngà mɛ̀ lɛ ɓɛɛ ghɛǹ com ki ǹɗì lɛ ǹkì, nsoò yɛ̀ɛ ɓɛ ghɛngà ɓìɓan ɓìcèm ɓi ǹkìghà ɓi bèg mɛ̀tin mɛɓɛɛ̀.

¹⁰Fɔɔnnɛ ǹwokà bim ri gbàà ì ɓum ìnɛ̀n, ǹkpaa lɛ: mɛ̀rem maa mɛɛ̀ pwààpwaa ɓɔ cààmɛ̀n kìcèm, ɓɛ wokà ɓi ɓiɓan ɓi ǹtɔtɔ̀kà ɓɔ lɛ ɓɛɛ ki.

¹¹Fɔɔnnɛ ǹkànɛ̀ngà bɛ̀ɗ ɓi bim inɛ ǹwokà, ǹkpaa lɛ: Ɓaa ɗiŋi ɓi ɓi jàŋ inɛ m̀pègsɛ̀ngà lɛ ɓɛ ri fɔɔsɛn wɔɔ, nsoò ŋwos.

¹²Ɓɛ̀geni ɓɛ̀m, konaaghna lɛ, ŋwaàdɛŋ ànɛ ɓi mìni kɛ̀ɛ ɓa ri nɗem wu ɓeɓtɛn, wu wu ri kɛ̀ɛ̀ rìgherɛ̀n ɓi lèg ànɛ a ghasɛn ɗì Bɛ̀ll ànɛ à rì cem.

¹³Kìɓan kifog, reerèɓɓɛɛna ɓɛ̀ŋwos ɓɛ̀cèm à kpaŋ cààmɛ̀n kìcèm ki ɓɛ ri lɛ ɓɛ kalì lɛ gɛɛ̀nɛ, di fɔɔnnɛ kìbog ki ɓi mìni kɛ̀ kɛɛ̀ càrɛn lɛ nɗem wii wɛɛ teɗ ɓiɗùm di kìɓe kaa yègsi nyi.

¹⁴Lɛ tì rì ɓum ɓɛ ɓɛɛ̀ kɛ̀ɛ̀kɛɛ nɗaŋ ri Kiris, di tì sììrɛɛ lɛ, ti ɓeŋ̀ ǹtyweeyi wu tì ɓaghà rì wɔ a rìtumɛ̀n.

¹⁵Lɔŋ yɛ̀ɛ ki ri kìkaliyɛn lɛ: I ɓì woogh jɛ̀ɛ̀ yìì gɛɛ̀nɛ, kɛ̀ ɓi tèèsi mɛrem fɛlɛ yɛ̀ɛ ɗi ɓì kìghà nyi ǹtoòtèɗ.

¹⁶Ɓɛ̀ghɛn ɓɛɛ wokà kɔm jɛ̀ɛ̀ ì Bɛ̀ll ɓɛ ki kì nyi ntoòtèɗ? Lɔŋ ɓum ɓɛ̀cèm ɓɛ Moyis à kpaŋzighày a Egiɓtɛn.

¹⁷Ɓɛ̀roɓɛ be ɓɛɛ̀ɓɛ à wokà bim ri ɓɔ à kpaŋ bèg mɛ̀tin mɛɓɛɛ̀? À wokà bim ɗi ɓumɓɛ ɓɛ kighà kìɓe, ɓɔ yɛɛ wuwùghà di ɓɛɛ̀ kpìkpi wɔɔ ɓireɓ.

¹⁸Ɓɛ̀ghɛn ɓɛɛ̀ɓɛ à kànɛ̀ngà bɛ̀ɗ lɛ ɓaa ɗiŋi ɓi ɓi jàŋ inɛ à pègsɛ̀ngà lɛ ɓɛ ri fɔɔsɛn wɔɔ? Lɔŋ ɓumɓɛ ɓɛ kighà nyi ǹtoòtèɗ ɓɛɛ̀ɓɛ à kpaaghà.

¹⁹Ɓìsii ghɛɛ gì lɛ, ɓɛ ɓaghà ɓi lɛ ɓɛ ɗiŋì ɓi jàŋ i rìfɔɔsɛ̀n ìnɛ̀n ɓisuulɛ ɓɛ ɓaghà ɓi ri rìgherɛ̀n.