Read Bafia EBIREEGH 4 Bible Online

EBIREEGH 4 - Bafia bible

EBIREEGH 4

¹Nni cààmɛ̀n kìcèm ki yɛ̀ɛ ǹkàg wulɛ ɓum ɓɛɛ ɗiŋi ɓi rìfɔɔsɛ̀n ɗii wu kaka, tì ghɛ̀ɛ̀sɛɛ kì konaagh lɛ, ŋwaàdɛŋ ànɛ ɓi mìni kɛ̀ɛ ɓa ri fèg ànɛ lɛ nyii kpaŋi di cààmɛ̀n kaa ceè.

²Ɓisuulɛ Syeesyee à Ɓɔlɛ à mɛ kalɛn a lɔ̀ŋkis lɔŋ yɛ̀ɛ à kalɛ̀ngà a lɔ̀ŋkaa. Wɔ̀lɛ jɛ̀ɛ̀ ìnɛ ɓɛ wokà, ì ghɛɓsìghà ɓi com, ɓisuulɛ ɓɛ wokà yɔ̀, ɓɛ̀ kɛɛ̀ teɗ yɔ̀ ri rìgherɛ̀n.

³Ɓi ɓɛg ànɛ a ɓìsiɓɛ tì gherɛɛ, tì rì ɓiì ɗiŋii ɓi rìfɔɔsɛ̀n ɗi Bɛ̀ll à kpaaghà lɛ: Mɛ̀ɛ ǹkànɛɛ bɛ̀ɗ ɓi bim inɛ mɛ̀ɛ nwoogh, ǹkpaa lɛ: Ɓaa ɗiŋi ɓi ɓi jàŋ inɛ m̀pègsɛ̀ngà lɛ ɓɛ ri fɔɔsɛn wɔɔ. À kpaaghà fɔlɔɔ nsoò yɛ̀ɛ ki ri lɛ kìsay kii ki ɓaghà di ki mɛ lèg, à tumɛ̀n ɓi cààmɛ̀n ki à kìghà lɛ rì ɗyoo, rì zi.

⁴Lɛ ki ri kìkaliyɛn jàŋ idɛŋ ɓi kìɓan ki ŋwos a kìtaàɓɛ̀ɛ̀ lɛ: Bɛ̀ll à fɔɔsɛ̀ngà kìsay kii kìcèm ɓi ŋwos a kìtaàɓɛ̀ɛ̀,

⁵à kpaa tì fɛ lɛ: Ɓaa ɗiŋi ɓi ɓi jàŋ inɛ m̀pègsɛ̀ngà lɛ ɓɛ ri fɔɔsɛn wɔɔ.

⁶Nni yɛ̀ɛ ki ri kìsiŋdɛn lɛ, ɓum ɓɛdɛŋ ɓɛ ri ɓiì ɗiŋii ɓi rìfɔɔsɛ̀n ɗiǹ ki ki ɓa ti lɛ, ɓumɓɛ ɓɛ lokà kì terì Syeesyee à Ɓɔlɛ ànɛ̀n, ɓɛ rɔɓkà ɓɛ̀ kɛɛ̀ ɗiŋi wɔɔ lɛ ɓɛ ɓaghà kɛ̀ɛ̀ rìgherɛ̀n,

⁷fɔɔnnɛ Bɛ̀ll à mɛ rɛsi ti bimiɗ à ŋwos adɛŋ lɛ: Gɛɛ̀nɛ, yɛ̀ɛ à kpaaghà ɓi ŋwɔm wu Davit di cààmɛ̀n kaa ghaàgh lɛɛ̀gwey ɓi jàŋ inɛ tyàa mɛ wog lɛ: Gɛɛ̀nɛ, i ɓì woogh jɛ̀ɛ̀ yìì. Kɛ̀ ɓi tèèsi mɛrem.

⁸Ɓisuulɛ, i Yooswa a fa ɓɔ rìfɔɔsɛ̀n, di Bɛ̀ll à ɓaghà ɓi lɛ, à kàgtì ɓum ŋwos adɛŋ, ajɛ̀m ìnɛn.

⁹Fɔlɔɔ nnɛ rìfɔɔsɛ̀n ɗi Bɛ̀ll à fɔɔsɛ̀ngà ɓi Saɓàt ɗi ri wɔɔ ɓisuu ɓum ɓɛ Bɛ̀ll.

¹⁰Ɓisuulɛ, ŋwaànɛ à ɗiŋii ɓi rìfɔɔsɛ̀n ɗi Bɛ̀ll, à mɛ fɔɔsɛn ɓisay ɓii fɛlɛ yɛ̀ɛ nyii fɔɔsɛ̀ngà girig ɓi nkìì.

¹¹Ti tèèsiina nyoo lɛ ti ɗiŋi ɓi rìfɔɔsɛ̀n ɗiǹ, di fɔɔnnɛ ŋwaàdɛŋ kɛ̀ɛ ɓa lɛ à kpì, di à nɔ̀ɔ̀tii rìkuu ɗi ntoòtèɗ ɗi ɓumɓɛ ɓɛ ɓaghà ɓireɓ ɓɛ resìghà.

¹²Lɛ jɛ̀ɛ̀ ì Bɛ̀ll ì rì cencem, ì ki ɓa ri ìtèɗ, ì poo ì cee gàfàg ìnɛ ì rì ǹghɛliyɛn ɓɛɓɛg ɓɛ̀cèm. Yɛ̀ɛ ɗiɗiŋi mum ɓi nɗem à kpaŋ ɓi jàŋ inɛ cɛɓ ki mum[1] rì nghay wii ɓi rarɛɛ; ì ɗiŋì ì kpaŋ ɓi rìràrɛ̀n ɗi gòga rì ɓɛ̀ɓɔ̀ŋ ɓɛ ɓiwoɓ. Yɛ̀ɛ rèresi nkòo rìkɔ̀n ɗi mum rì mɛ̀yitì mɛ mɛ ri nyi ɓi nɗem, ɓi ri lɛ syeesyee.

¹³Ɓi ɓyom ɓi Bɛ̀ll à kìghà, com kidɛŋ ki yin nyi kìnyamɛn, ɓyom ɓìcèm ɓi ri ɓìghaniyɛn lɛ kpeènye-kpèènyèè ɓi mis mɛ roànɛ à ghɛ̀ɛ̀sɛɛ ɓìsi kì tɔɔ̀gh kìsay ki tì kìghà.

¹⁴Yɛ̀ɛ tì rì min ri nkɔ̀mɛ̀n-ɓɛ̀pìrɛɛtìrɛ̀ àgwey lɛ Yeesus ànɛ à rì Man à Bɛ̀ll ànɛ à ɓɔkà aɗyoo yɛ̀ɛ Bɛ̀ll, tì ghɛ̀ɛ̀sɛɛ kì sììrɛɛ lɛ syeesyee ɓi ɓìɓan ɓi tì gherɛɛ ɓyɛɛ̀ɓi tì ti tì kakàlì ɓum.

¹⁵Ɓisuulɛ ǹlàmì ɓɛ̀pìrɛɛtìrɛ̀ wìs àgwey a yin rikuu ɗi ɗi ri lɛ, ɗi taŋ̀ ǹɗem wu nyìighnyìg ɓi rìɓa ɗi tì rì kɛ̀ɛ̀ ìtèɗ, lɛ à tulɛ̀ngà rì mɛ̀fèèghrɛn mɛkuu mɛ̀cèm lɔŋ yɛ̀ɛ ɓìsi, kìɓan kifog, à kìghà ɓi kiɓe.

¹⁶Ti tyoŋdɛn min jàŋbog rì ìkɔ̀ɔ̀ wu rilàmì wu Bɛ̀ll, jàŋ inɛ geesɛ̀n ì rì, tì ɓa rì ǹtyweeyi, di fɔɔnnɛ ɓɛɛ wog ɓìsi nyìighnyìg, tì ki ghɛn geesɛ̀n ìnɛ ì rì ɓìsi ɓiì ghɛɓsii ɓi cààmɛ̀n ki ki ghɛɛ̀sɛɛ.