Read Bafia EBIREEGH 5 Bible Online

EBIREEGH 5 - Bafia bible

EBIREEGH 5

¹Lɛ ǹlàmì-ɓɛ̀pìrɛɛtìrɛ̀ ǹcèm ànɛ ɓɛ teri ɓi nyìinyìm à ɓum, à rì ǹrɛsɛn ɓisuu ɓum, lɛ a ki kìsay ki Bɛ̀ll, à fafà nyi ɓyom, à ki fùufunɛ̀n ɓìtuwe ɓisuu ɓiɓe ɓi ɓum.

²À rì lɛ à ɓa rì rìcenɛ̀n ɓisuu ɓumɓɛ ɓɛ ti ɓɛ nanàg lɛ kɛ̀ɛ̀ rìyi, lɛ nyimiɗ a rì mum ànɛ à rì lɛ à nànɛ̀n ɓa kɛ̀ɛ̀ ìtèɗ.

³Rìɓa ɗi à rì ɗiǹ ɗì ìkɔ̀g, ɗyɛɛ̀ɗi à ghɛ̀ɛ̀sɛɛ kì lɛghii Bɛ̀ll lɛ, rì ɓi ɓìɓe ɓii ɓi nyimiɗ, rì ɓi ɓum ɓɛ kilɔ̀ŋ.

⁴Mum à yin lɛ à falɛ̀n m̀ɓɔg wìn nyimiɗ, di Bɛ̀ll à reŋii ɓi nyi fɛlɛ yɛ̀ɛ à reŋìghà Arɔn.

⁵Nsoò Kiris à falɛ̀ngà ɓi nyimiɗ rìgwey ɗi lɛ, a ɓa ǹlàmì-ɓɛ̀pìrɛɛtìrɛ̀. Kìɓan kifog à tekà ɗyɔ rì roànɛ à kpaaghà nyi lɛ: Ù rì Man wɛm̀, à tumɛ̀n gɛɛ̀nɛ ǹti wɔ̀ seŋi.

⁶Fɛlɛ yɛ̀ɛ à kpaatìghà jàŋ idɛŋ lɛ: Ù rì pìrɛɛtìrɛ̀, rìɓa ɗi isuùcèm, ɓi nɗɛli wu Mɛlkisedɛg.

⁷Yɛ̀ɛ Yeesus à ghɛghɛ̀ɓkà ɓi ziinɛ, à ɓɔ̀ɔ̀ɓɔ̀ŋzàkà Bɛ̀ll, à yɛ̀ɛ̀ghyɛ̀gsì nyi ɓyàg, rì ɓyoo ɓikiŋ, rì misì ɓi mɛ̀tam, lɛ Bɛ̀ll yɛɛ ɓaghà lɛ à ghɛɓsì nyi ɓi rìwu; nni Bɛ̀ll à wokà bɔ̀ŋzɛ̀n yii lɛ mɛ̀wog mɛ à ɓaghà rì mɔ.

⁸Nsoò yɛ̀ɛ à ɓaghà Man à Bɛ̀ll, à yilàkà com ki lɛ mɛ̀wog, ɓi mɛ̀tɔɓ mɛ̀cèm mɛ à wokà;

⁹fɔɔnnɛ à ɓaghà lɛ à mɛ teŋzi nyi ɓi nɗɛli wu kɛ̀ɛ ɓa ti ri kìɓan ki ɓɛ fen a lɔ̀ŋkii, nni à ghalà ǹfaà ɓum ɓɛ̀cèm ɓɛ ɓɛ woogh nyi, gòri ì fiɗyàɓ fikɔ̀ɔ̀,

¹⁰lɛ Bɛ̀ll à làmìghà lɛ, ànɛ̀n à rì ǹlàmì-ɓɛ̀pìrɛɛtìrɛ̀ ɓi nɗɛli wu Mɛlkisedɛg.

¹¹Tì tèghɛɛ ɓìɓan ɓi kpaayɛn ɓi kìɓan kiǹ wɔ̀lɛ rìrèsì ɗi ti resi mìni ɓyɔ lɛ tɛntɛ̀ɛ̀n lɛ ɓi konag kìwoògh ɗi yeesɛɛ ɓisuulɛ ɓì ti kɛ̀ ɓi wog ti kiɓan lɛ fyɛ̀ɗ.

¹²Lɛ mìniɓɛ ɓì ghɛ̀ɛ̀sɛ̀ngà kìɓaà ɓɛ̀rèsàg ɓɛ ɓìɓan ɓi fiɗyàɓ, ɓì kaka rì zày ìnɛ lɛ ɓɛɛ resag mìni mɛ̀to mɛ ɓiɓan mɛ beèbɛ̀y mɛ ɓi jɛ̀ɛ̀ ì Bɛ̀ll. Ɗi ɓyàa rì lɛ ɓì ɗi ɓìɗilàg ɓi tèɗ, ɓì kaka rì zày ìnɛ lɛ ɓi nyɔŋnyɔŋ mɛlì.

¹³Kɔlɛ mum ǹcèm ànɛ à kaka ɓi mɛlì, à ka yi ɓi righasì lɛ, rì saaɗ, rì pwàà ɓisuulɛ à kaka man.

¹⁴Wɔ̀lɛ, ɓìɗilàg ɓi tèɗ ɓi ri ɓisuu ɓumɓɛ ɓɛ mɛ sììrɛn ɓum, ɓɛɛ̀ɓɛ ɗyomzɛ̀n ɗi mɛ mɛ̀ɛ̀tɛn ɗi rìghasì ɗi lɛ, rì kìɓe rì kìrɔɔ.