Read Bafia EBIREEGH 6 Bible Online

EBIREEGH 6 - Bafia bible

EBIREEGH 6

¹Kìɓan kiǹ kɛɛ̀ki ti càrina rìrèsì ɗi a rìtumɛ̀n ɗi ɓi kìɓan ki Kiris, ti ɓeg̀mɛn ɓi ɓìɓan ɓi ɓi konaagh kì rɔɔtɛɛ, tyɛ̀ ki sugti tiì rìjɛ̀m ɓi ɓìɓan ɓi a rìyàghɛ̀n ɓi ɓi ri lɛ: Mum à ghɛ̀ɛ̀sɛɛ kì càri ɓiɓan ɓi kɛ̀ɛ̀ ìsu,

²à gherɛ̀n Bɛ̀ll, rì mɛ̀rèsàg mɛ mɛ koŋ̀komi bàɓtis mɛ̀kuu mɛ̀kuu, ɗì rìsaàgh ɗi mum ɓyàg ɓi nyoo lɛ ɓɛɛ maŋ̀ nyi, rì rìghèmɓɛ̀n ɗi ɓiloŋ, rì ɓɛ̀yɔ̀m ɓɛ Bɛ̀ll à ri yɔ̀m ɓum gɛ̀n bog ɓi gɛ̀n yicèm.

³Kìɓan ki tì rì ɓiì kìi di Bɛ̀ll à gherɛɛ kɛɛ̀kìn.

⁴Ɓi kìɓan ki ki seesee ɓumɓɛ ɓɛ ghɛngà kìtɛɛtɛn ki Bɛ̀ll cààmɛ̀n kidɛŋ, ɓɛ ɓoɓtì rìfa ɗi Bɛ̀ll, ɓɛ ki teɗti gàɓ ɓi Kìtɛntɛ̀ɛ̀n ki Nghay,

⁵ɓɛ ɓoɓtì rìyɛ̀y ɗi jɛ̀ɛ̀ ì Bɛ̀ll ɓɛ ki ghɛn mɛtèɗ mɛ ɓi cɛɓ ki ki riì

⁶ɓɛ ki sugti ki kpìi ɓi kìɓeɓtàg ki cɛɓ, bee inɛ ŋwaà rì lɛ à kì lɛ ɓɛɛ lɔɔ̀ghrɛn tì nɗem ì yiìdi ɓisuulɛ, ɓɔɔ̀ ɓìiɓiìtì kì kpanì Man à Bɛ̀ll ɓi Kɔrɔs aɗyoo, ɓɛ ki sòosoòtì nyi ɓi mis mɛ ɓum.

⁷Lɛ cààmɛ̀n kìcèm ki zi yɛ̀ɛ nɔnɔ mɛnig di bwey yɛ̀ɛ nɔnɔ miì lɛ fyɛ̀ɗ fyɛ̀ɗ, zi inɛ̀n ì ki fafa ɓyaɓi ɓi ɓi ri rì gɛɓsɛ̀n ɓisuu ɓumɓɛ jàŋ inɛ̀n ì salɛ̀ngà ɓisu waa, zi inɛ̀n ì ti ì tekì ɓɛ̀mààgh yɛ̀ɛ Bɛ̀ll.

⁸Wɔ̀lɛ i zi inɛ̀n yɛɛ̀ fafa lɛ rì ɓìɓeɓtàg ɓi ɓyaaɓi, rì keŋ, di ì yin syeesyee à zi, ì ki ɓa jàŋbog lɛ yɛ̀ɛ teɗ ǹcɛ̀m, ki ki syɔn lɛ ɓɛɛ tɔǹ yɔ̀.

⁹Mìni ɓum ɓɛm ɓɛ nɗem, nsoò yɛ̀ɛ ti kpaakpaa lɔɔ, tì konaagh kì yiì lɛ ɓì rɛrɛlii ɓi syeesyee à bee, ànɛ à rì bee ì cɛɓ.

¹⁰Lɛ Bɛ̀ll à rì Bɛ̀ll à saaɗ, fɔɔnnɛ à yin lɛ à ɗimzɛ̀n kìsay kin, nsoò ǹkɔ̀nɛ̀n ànɛ ɓì rèsìghà nyi ɓi ɓìɓan ɓi ɓì ghɛɓsìghà ɓɛ̀gherɛ̀n, rì ɓi ɓì kaka ɓì ghɛɛ̀ghɛ̀ɓsì ɓɔ.

¹¹Ti kɔ̀nkɔn lɛ mum ǹcèm ànɛ ɓi mìni a ɓa rì rìkuu ɗi rifalɛ̀n ɗiǹ à kpaŋ a rìsugtɛ̀n, fɔɔnnɛ ɓìɓan ɓi ɓi ɓoŋɓòŋ ɓi ri ɓiì kìlɛɛ lɛ syeesyee,

¹²ɓi lèg ànɛ lɛ kɛ̀ ɓi rɛ̀gsi nyoo, ɓi nɔɔ̀ti lɔŋ ikòò wu ɓɛroɓɛ ɓɛ gherɛɛ, ɓɛ ki ɓa ri kìsììrì; ɓɛɛ ti ɓɛ tekì ɓìɓan ɓi Bɛ̀ll à kàkà lɛ rìkì ɗyaa ɗiǹ.

¹³Yɛ̀ɛ Bɛ̀ll à faghà Abiraham ǹkàg, à kànɛ̀ngà bɛ̀ɗ ri myimìɗ, lɛ à ɓaghà ɓi lɛ à kànɛ̀n bɛ̀ɗ ri ŋwaàdɛŋ ànɛ à cee nyi.

¹⁴Nni à kpaaghà lɛ: Ǹkànɛɛ bɛ̀ɗ lɛ: Ǹɗì wɔ̀ ɓiì màŋi, ǹtègsì boo yɔ̀ɔ̀ i mum.

¹⁵Abiraham à sììrɛ̀ngà ɓi rìɓoŋ ɗi nkàg wiǹ, nni à ki tekà com ki Bɛ̀ll à kàkà nyi.

¹⁶Ɓum ɓɛ ti ɓɛ kanàg bɛ̀ɗ ri mii mɛ ɓɛroɓɛ ɓɛ ceetii ɓɔ; rìkànɛ̀n ɗi bɛ̀ɗ ɗyɛɛti ɗi rengì nywey ɓi nyìinyìm wàà, cààmɛ̀n ki ɓɛɛ̀ nyoonyolɛ̀n.

¹⁷Yɛ̀ɛ Bɛ̀ll à kɔ̀ngà lɛ a konag kì rèsii ɓumɓɛ à faghà mɛ̀kàg lɛ nyaa lɔ̀gtiigɛ ɓi rikalì ɗii, fɔɔnnɛ à kànɛ̀ngà bɛ̀ɗ.

¹⁸Ɓìɓan ɓi ri min ɓiɓɛɛ̀ ɓi ɓi yin lɛ ɓi lɔgtɛ̀n, ɓyɛɛ̀ɓi Bɛ̀ll à yin ɗi ìtèɗ wu lɛ à foŋ pwàà miì. Fɔlɔɔ nnɛ ɓìsiɓɛ tì mɛ tanɛn ǹnyamzɛn a lɔ̀ŋkii, ɓi mɛ fati ɓisi itèɗ lɛɛ̀gwey, lɛ ti siìri kì ɓanì dyàɓɛn inɛ ìrì ɓìsi ǹfayɛn.

¹⁹Dyàɓɛn inɛ̀n ìrì ɓìsi yɛ̀ɛ com ki ki lenlemi cɛɓ kis, ki ɓa kì bɛ̀lɛn lɛ kpeg-kpeg, kɔ yɛɛ ɗiŋii ki syaà kìlàà ki ɓi naà-Bɛ̀ll, ki kpaŋzɛ̀n ɓi jàŋ i kìcèlì ìnɛ wɔɔ ɓiɗùm,

²⁰jàŋ inɛ Yeesus à ɗiŋìghà ɓisu wis, fɛlɛ yɛ̀ɛ ŋwaànɛ à rì ɓìsi ǹsyòŋɛn bee, lɛ ɓɛ rɛsìghà nyi ǹlàmì ɓɛ̀pìrɛɛtìrɛ̀ àgwey isuùcèm ɓi nɗɛli wu Mɛlkisedɛg.