Read Bafia EBIREEGH 7 Bible Online

EBIREEGH 7 - Bafia bible

EBIREEGH 7

¹Mɛlkisedɛg ànɛ̀n à ɓaghà rìfòm ɗi kilɔ̀ŋ ki lɛ Salɛm, nyi tì pìrɛɛtìrɛ̀ à Bɛ̀ll ànɛ à rì ǹteŋmɛn à cee, nnyɛɛ kɛngà kì tulɛɛ ri Abiraham, di roànɛ̀n a susug yi wɛ̀y wu à yakày mɛ̀fòm mɛdɛŋ miì à ki màŋ nyi.

²Rì nyi nnɛ Abiraham à faghà gàɓ ì kìntɛ̀ɗ ìnɛ ɓi ɓyom ɓii ɓìcèm. Ɗii ɗi lɛ Mɛlkisedɛg àncèm ɗi ka rèsii lɛ à rì rìfòm ɗi saaɗ, à ki ɓa ti lɛ rìfòm ɗi Salɛm yɛɛlɔɔ lɛ rìfòm ɗi fyòoog.

³À rì kɛ̀ɛ̀ seŋi, kɛ̀ɛ̀ jɛɛ, kɛ̀ɛ̀ rìfuuyì; ɓɛ ɓuŋi ɓi kiɓan ki riyalɛ̀n ɗii, nsoò ki riwù ɗii jàŋ idɛŋ, à pisɛɛ Man à Bɛ̀ll ànɛ à rì lɔŋ pìrɛɛtìrɛ̀ fìɗyàɓ fikɔ̀ɔ̀.

⁴Ɓì rì lɛ ɓì ghɛn lɛ, à ɓaghà coo gìn i mum, Abiraham à seŋi wìs ànsɛ̀ɛ̀ a faghà nyi gàɓ ì kìntɛ̀ɗ ìnɛ ɓi ɓyom ɓi à sukày wɛ̀y ri ɓyɔ.

⁵Ɓɛ̀pìrɛɛtìrɛ̀ ɓɛ ɓi boo ì Levi ɓɛɛ ri rì ìtèɗ wu lɛ ɓɛɛ tɔki ɓumɓɛ a Isirayɛl gàɓ ì kìntɛ̀ɗ ìnɛ ɓi ɓyom ɓìcèm lɔŋ yɛ̀ɛ ɓìdɔ̀gsɛna ɓyɛɛ̀ kpaakpàà. Yɛɛlɔɔ lɛ ɓɛ ti ɓɛ tɔkì gàɓ ì kìntɛ̀ɗ ìnɛn rì ɓɛ̀geni ɓaa, ɓɛ ɓɛ ki rì girig lɛ dòò yi Abiraham.

⁶Mɛlkisedɛg à ɓaghà ɓi ɓi boo ì mum ì Levi kìɓan kifog à tekà gàɓ ì kìntɛ̀ɗ ìnɛ ɓi ɓyom ɓi Abiraham à ɓaghà rì ɓyɔ, à ki màŋ roànɛ Bɛ̀ll à faghà mɛ̀kàg.

⁷Kɔlɛ mum bimiɗ à yii lɛ, rìɓa ɗi ŋwaànɛ ɓɛ maŋi ɗi wuɓsɛɛ ɓi ɗi ŋwaànɛ à màŋi nyi.

⁸Ɓumɓɛ ɓɛ ti ɓɛ tekì gàɓ ì kìntɛ̀ɗ fɛ, ɓɛ ri ɓumɓɛ ɓɛ ti ɓɛ wulàg; kìɓan kifog ɓi ɓɛg ànɛ yɛ̀ɛ Mɛlkisedɛg, nyii ri ŋwaànɛ kìntɛ̀ɗ, kaàtà à Bɛ̀ll à sììraagh kì kpaà lɛ à rì cem.

⁹Nni tì rì lɛ tì kpaa lɛ: Levi ànɛ dòò yii yi ti yi tekì gàɓ ì kìntɛ̀ɗ à faghà girig gàɓ ì kìntɛ̀ɗ ɓi cààmɛ̀n ki Abiraham à faghà gàɓ ì kìntɛ̀ɗ.

¹⁰Ɓisuulɛ nsoò Levi à ɓaghà di à ka yalɛn ɓi, tì rì lɛ tì kpaa lɛ à ɓaghà di à kakay ɓi bwaɓ yi seŋi ànsɛ̀ɛ̀ anɛ lɛ Abiraham, cààmɛ̀n ki Mɛlkisedɛg à kɛ̀ngà kì tulɛɛ ri nyi.

¹¹Kìsay ki pìrɛɛtìrɛ̀ ki ɓɔn ɓɛ Levi kɛɛ̀ki ɓìdɔ̀gsɛna ɓi ɓɛ faghà kìlɔ̀ŋ ki Isirayɛl ɓi sasàghìghà miì; i ɓɛ̀pìrɛɛtìrɛ̀ ɓɛ ɓi boo ì Levi ɓɛɛ ki kìsay ki kɛɛ rɔɔtɛn, kɛ̀ kɛɛ̀ ɓa ri kìɓan ki fenɛn, di ki ghɛɓsìghà tì ɓi com lɛ rìkuu ɗi pìrɛɛtìrɛ̀ ɗidɛŋ ɗyɛɛ ghɛnɛn ɗi ɗi ɓa ɓi nɗɛli wu Mɛlkisedɛg, ɗyɛ̀ kɛɛ̀ ɓa ti ɓi nɗɛli wu Arɔn.

¹²Ɓisuulɛ i kìsay ki pìrɛɛtìrɛ̀ ki ti kì cenɗɛn, ɓìdɔ̀gsɛna ɓi ghɛɛ̀sɛɛ girig lɛ ɓi koɓsɛ̀n.

¹³Nni roànɛ kìɓan kii ki ri kìkànɛn ɓi jàŋ inɛ ti kpaakpaa inɛ, à rì ŋwaànɛ ɓi rìpwìɗ ɗidɛŋ, ɗi mum à ka ɓaghà ɓi pìrɛɛtìrɛ̀ miì.

¹⁴Lɛ ɓɛ yii lɛ tɛntɛ̀ɛ̀n lɛ Kan wìs a rì ŋwaànɛ à yalɛɛ ɓi rìpwìɗ ɗi Zyuda ɗyɛɛ̀ɗi Moyis à ɓùgà ɓi ɓi kìsay ki pìrɛɛtìrɛ̀.

¹⁵Kìɓan kiǹ ki konaagh tì kì ghɛnɛɛ fɔlɔɔ, yɛ̀ɛ pirɛɛtìrɛ̀ adɛŋ ànɛ à rì ɓi kìpisɛn ki Mɛlkisedɛg à mɛ kpaŋ.

¹⁶À tekà ɓi ikɔ̀ɔ̀ wu Pìrɛɛtìrɛ̀ ɓi rìkpaa ɗì ɓidɔ̀gsɛna ɓi ɓum ɓɛɛ faa, à ɓɔkà lɔŋ rì ìtèɗ wu cɛɓ ki ki ri kɛ̀ɛ̀ sugtag.

¹⁷Kìɓan kiǹ kɛɛ̀ki kaàtà à Bɛ̀ll a kalag lɛ: Ù rì pìrɛɛtìrɛ̀ ɓi nɗɛli wu Mɛlkisedɛg fìɗyàɓ fikɔ̀ɔ̀.

¹⁸Fɔɔnnɛ ɓɛ mɛ pisi kidɔ̀gsɛna ki abɛ̀y lɛ ki ɓaghà kɛ̀ɛ̀ ìtèɗ, kɛ̀ kɛɛ̀ ki ghɛɓsi com.

¹⁹Lɛ ɓìdɔ̀gsɛna ɓi Moyis ɓi kighà ɓi lɛ com kidɛŋ kɛɛ kpaŋ ɓi nɗɛli wulɛ kìɓan ki fenɛn miì kɛ̀ kɛɛ̀ ɓa ti, kìɓan kifog dyàɓɛn inɛ ì cee ì mɛ ɗiŋì, yɛ̀ɛ ti ì kìlàg lɛ ti kɛǹ Bɛ̀ll jàŋbog.

²⁰Ki kɛɛ̀dì kì ɓaà lɛ Bɛ̀ll à kànɛ̀ngà bɛ̀ɗ ɓi kìɓan kiǹ,

²¹kɔlɛ, yɛ̀ɛ ɓumɓɛ ɓi boo ì Levi ɓɛ mɓɔkaagh ɓɛ̀pìrɛɛtìrɛ̀, Bɛ̀ll àa nkànaagh ɓi bɛ̀ɗ fɔlɔɔ; kìɓan kifog ɓi rìɓɔg ɗi Yeesus à ɓɔkà Pìrɛɛtìrɛ̀, Bɛ̀ll à kànɛ̀ngà bɛ̀ɗ, à kpaa nyi lɛ: Kan àa ǹkànɛɛ bɛ̀ɗ, àa ki lɔ̀gti ɓi jɛ̀ɛ̀: Ù rì ɓiì ɓaà Pìrɛɛtìrɛ̀ fìɗyàɓ fikɔ̀ɔ̀.

²²Jɛ̀ɛ̀ ìnɛn ì rèsii lɛ: Yeesus à rì roànɛ à kìi lɛ, Bɛ̀ll a ren bee ìnɛ ì rɔɔtɛɛ ì cee ìnɛ abɛ̀y rì ɓìsi.

²³Ki ki ɓa ti lɛ ɓumɓɛ ɓaà ɓɔɓɔ̀g ɓɛ̀pìrɛɛtìrɛ̀ ɓɛ teghɛɛ; rìwu ɗyɛɛ rekà ɓɔ rìkɛ̀nkɛ̀n ɗi rì kìsay asu, cààmɛ̀n kìcèm.

²⁴Wɔ̀lɛ ɓi ɓɛg ànɛ yɛ̀ɛ Yeesus, nyiì ghɛghɛɓ fiɗyàɓ fikɔ̀ɔ̀, fɔɔnnɛ à yin lɛ à ceesì kìsay kii ki pìrɛɛtìrɛ̀ rì ŋwaàdɛŋ.

²⁵Fɔlɔɔ nnɛ à rì rì ìtèɗ wulɛ à ghɛɓsì lɛ kɔɔ̀kɔɔ̀ ɓumɓɛ ɓɛ tyoŋdɛɛ Bɛ̀ll jàŋbog, di ɓɛ fyee a lɔ̀ŋkii ɓisuulɛ, à rì lɔŋ cem cààmɛ̀n kìcèm, à ki ɓɔ̀ɔɓɔŋ̀zàg Bɛ̀ll ɓisu wàà.

²⁶Rìkuu ɗi nlàmì-ɓɛ̀pìrɛɛtìrɛ̀ àgwey ɗi ɗi ghɛɛ̀sɛɛ rì ɓìsi ɗyɛɛ ri Yeesus, lɛ à rì ǹtɛnɛn, kɛ̀ɛ̀ tìfin, kɛ̀ɛ̀ rìnàn, ɓɛ ghasìghà nyi rì ɓɛ̀kìì-kìɓe, à ki teŋmɛɛ à cee ɗyoo.

²⁷Ɓɛ̀làmì ɓɛ̀pìrɛɛtìrɛ̀ ɓɛgwey ɓɛ ghɛɛ̀sɛ̀ngà kì fùnɛɛ ɓituwe ɓɛŋwos ɓɛ̀cèm ɓi rìlɛɛghràg ɗi Bɛ̀ll ɓisuu ɓiɓe ɓyaa ɓi ɓɔmiɗ, rì ɓisuu ɓiɓe ɓi ɓum ɓɛ kilɔ̀ŋ. Wɔ̀lɛ Yeesus à ghɛ̀ɛ̀sɛɛ ɓi ki kìkii yɛ̀ɛ ɓɔ, ɓisuulɛ nyii lɛɛghràkà Bɛ̀ll gɛ̀n bog ɓi gɛ̀n yicèm yɛ̀ɛ à faghà nyimiɗ ɓi sìg à kìtuwe ki mɛlɛɛ̀ghlɛɛgh.

²⁸Ɓumɓɛ ɓìdɔ̀gsɛna ɓi Moyis ɓi nfalàg ìkɔ̀ɔ̀ wu ǹlàmì-ɓɛ̀pìrɛɛtìrɛ̀ àgwey, ɓɛ ɓaghà lɔŋ ɓumɓɛ ɓɛ ri lɛ ɓɛ ki kìɓe; wɔ̀lɛ jɛ̀ɛ̀ ìnɛ ì rì ɓi bɛ̀ɗ inɛ Bɛ̀ll à kànɛ̀ngà ajɛ̀m ì ɓìdɔ̀gsɛna ɓi Moyis, ì ɓɔgsìghà Man à Bɛ̀ll ǹlàmì-ɓɛ̀pìrɛɛtìrɛ̀ àgwey ànɛ à ti ɓi nɗɛli wulɛ kɛ̀ɛ nààdi isuùcèm.