Read Bafia EBIREEGH 8 Bible Online

EBIREEGH 8 - Bafia bible

EBIREEGH 8

¹Ɓi ɓìɓan ɓi ti kpaakpàà, ki ki cee kɛɛ ri lɛ, tì rì rì ǹlàmì-ɓɛ̀pìrɛɛtìrɛ̀ àgwey ànɛ, à kɛ̀ngà kì kɔ̀rii ɓi weèlem à rìlàmì ɗi Bɛ̀ll, ɓi ɗyoo ɓi ɗùm,

²à rì ǹkìì-kìsay anɛ ɓi jàŋ inɛ ì rì kìcèlì, rì ɓi kɔɔ̀kɔɔ̀ à kìnuugh[2] ànɛ à yin lɛ mum yɛɛ togà, lɔŋ Kan yɛɛ togà.

³Ǹlàmì-ɓɛ̀pìrɛɛtìrɛ̀ àgwey bimiɗ à rì ŋwaànɛ à rì ǹɗɛsɛn lɛ, a resi Bɛ̀ll lɛ rì ɓyom ɓi ɓum ɓɛ faa, rì ɓìtuwe ɓi ɓum ɓɛ funɛɛ ɓi rìɓɔgsì ɗi Bɛ̀ll; fɔɔnnɛ ki ghɛɛ̀sɛɛ lɛ nyii ɓa girig rì com ki nyimiɗ yɛɛ faa ɓi rìɓɔgsì ɗi Bɛ̀ll.

⁴I Yeesus a ɓa ɓi ziinɛ, di à yin gi lɛ à ɓa pìrɛɛtìrɛ̀ ɓisuulɛ, ɓɛ̀pìrɛɛtìrɛ̀ ɓɛ ri wɔɔ ɓɛ ɓɛɛ̀ rèresi Bɛ̀ll ɓyom ɓi ɓum ɓɛ faa ɓi rìɓɔgsì, fɛlɛ yɛ̀ɛ ɓìdɔ̀gsɛna ɓi Ɓɛ̀yudɛ̀n ɓyɛɛ̀ kɔ̀nkɔ̀n.

⁵Kìsay ki ɓɛ̀pìrɛɛtìrɛ̀ ɓɛǹ ɓɛɛ̀ kìkì, ki ri kìfèèghrɛnà, rì cììziŋ ki ɓi ɓìɓan ɓi ɓi ri ɓi ɗyoo ɓi ɗùm, fɛlɛ yɛ̀ɛ Bɛ̀ll à kalìghà Moyis di à ti lɛ a toŋ kìlaa lɛ: Ù ghɛ̀ɛ̀sɛɛ kɔ kì toŋì ɓi kìfèèghrɛnà ki kilaa ki ǹɗèsìghà wɔ̀ ɓi dòn.

⁶Nni ɓi cààmɛ̀n ki, Yeesus à ti rì kìsay ki ki cee ki nkaa ɓisuulɛ, à rì roànɛ à kìghà lɛ Bɛ̀ll a ren syeesyee à bee ri ɓum; bee inɛ̀n yɛ̀ɛ sasaghii ɓi mɛ̀kàg mɛ mɛ rɔɔtɛɛ mɛ cee.

⁷I bee inɛ Bɛ̀ll à lokà kì renì rì ɓum yɛ̀ɛ ɓa kɛ̀ɛ̀ kìɓan ki ɓeɓtɛn ki ɓɛ ri lɛ ɓɛ kpaakpàà, di ki ghɛɓsìghà tì ɓi com lɛ, ɓɛɛ koɓsɛn yɔ̀ ri bee idɛŋ.

⁸Ɓisuulɛ Bɛ̀ll à rì rì ɓìɓan ɓi a fenfen a ɓum ɓii, fɛlɛ yɛ̀ɛ à kpaaghà jɛ̀ɛ̀ ìnɛ ì rì ǹkànɛn lɛ: Kan a kpaaghi lɛ: Mɛ̀ru mɛɛ̀ yùyuiy mɛɛ̀mɛ ǹɗì ɓiì renì nyɔɔnyɔn à bee lɛ rì ɓumɓɛ a Isirayɛl, rì ɓum ɓɛ a Zyuda.

⁹Yàa ɓa ti ɓi yɛ̀ɛ bee inɛ ǹɗengà rì ɓɛ̀seŋi ɓaa ɓɛ ɓɛsɛ̀ɛ̀mɛn, ŋwos anɛ m̀ɓangà ɓɔ ɓi càg lɛ nkpaŋziì ɓɔ ɓi kìlɔ̀ŋ ki Egiɓtɛn. Ɓɛ ɓegà ɓi bee inɛ ǹɗengà ìnɛn rì ɓɔ, fɔɔnnɛ mɛ̀ ǹghɛ̀righà ɓi girig nɗem aɗyoo rì ɓɔ, rìkpaa ɗi Kan ɗyɛɛ̀ɗìn.

¹⁰Nni bee inɛ ǹɗì ɓiì renì rì ɓumɓɛ a Isirayɛl yɛɛ̀nɛ: Kan lɛ: Ajɛ̀m ì mɛ̀ru mɛ̀n, ǹɗì ɓiì foŋì ɓìdɔ̀gsɛna ɓyɛm̀ ɓi mɛ̀yitì maa ǹkàn ɓɔ ɓyɔ ɓi mɛ̀rem, ǹɗì ɓiì ɓaà Bɛ̀ll wàà, ɓɔɔ ɓa ɓum ɓɛm.

¹¹Àdɛŋ àa ɓa ti ɓi lɛ à rèsì maaseŋi à kìlɔ̀ŋ, nsoò lɛ geni lɛ, a yi lɛ ǹɗì Kan; ɓisuulɛ, ɓɛ̀sɛ̀ɛ̀ ɓɛ̀cèm ɓɛ ri mɛ̀ ɓiì yiì, à tumɛ̀n ɓi ɓɔɔ ɓɔɓti à kpaŋ ɓi ɓɛ̀sɛ̀ɛ̀mɛn.

¹²Ǹɗi cenɛn ɓɔ mɛ̀nànì maa kɛ̀ɛ nki yiti ɓiɓe ɓyaa.

¹³Ɓi rìkpaa ɗi Bɛ̀ll à kpaa lɛ à rì ɓiì renì bee ì nyɔn rì ɓum, à ghaasì bee i ǹtonto bee inɛ abɛ̀y. Nni com kìcèm ki ki mɛ finɛ̀n ki ki rùn, kaa rɔ̀ɓ lɛsàg lɛ kɛɛ silì.