Read Bafia EBIREEGH 9 Bible Online

EBIREEGH 9 - Bafia bible

EBIREEGH 9

¹Bee i ǹtonto ìnɛ lɛ rì Bɛ̀ll rì ɓum ì ɓaghà girig rì mɛ̀siŋdɛn mɛ mɛ seesee ɓìɓan ɓi riɓɔgsì, rì naà-Bɛ̀ll ìnɛ fɛ ɓi ziinɛ.

²Fɔɔnnɛ ɓɛ togà kìnuugh; ɓi kìden ki asu ki ɓɛ nɗegì lɛ jàŋ i kìcèlì; ɓyom ɓi ɓaghà wɔɔ lɛ: rì kìrɛsì ki lamɓà rì teɓèrè, rì bìrɛs yi ɓɛ fafaa ɓisuu riɓɔgsì ɗi Bɛ̀ll.

³Ajɛ̀m ì kìlàà ki kiɓɛ̀ɛ̀, nnɛ kìden ki ɓɛ nkalàg lɛ jàŋ inɛ ì pɔ̀ɔ̀zii kì ɓaà kìcèlì ì ɓaghà.

⁴Wɔɔ nnɛ jàŋ inɛ ɓɛ ntɔ̀ngì ɓyom ɓi nùnnumɛn i ɓaghà; jàŋ inɛ̀n ì ɓaghà gol rì gol; fìkɔrɔŋ fi riràrɛ̀n fi ɓaghà girig wɔɔ, fincèm fì pàmɛn ri gol; kìbɔkɔ̀ ki gol ki ɓaghà ɓi fìkɔrɔŋ fiǹ; ɓyom ɓi ɓaghà ɓi kìbɔkɔ̀, kiǹ lɛ: rì manà, rì kìgeŋ ki Arɔn ki ki sam̀gà, rì ɓìɓoŋ ɓi ɓi ɓaghà rì ɓìdɔ̀gsɛna ɓi ɓi bee inɛ lɛ, rì Bɛ̀ll rì ɓum.

⁵Ɓum ɓɛ titom ɓɛ lɛ ɓɛ̀syèrùɓɛŋ ɓɛ ɓɛ ɓaghà rì rìgwey ɓi nyoo ɓɛ rɛrɛ̀lìghà ɓi fìkɔrɔŋ fi riràrɛ̀n aɗyoo, kìfìì kaa ki gheg jàŋ inɛ ɓɛ nti ɓɛ weeyì ɓìtuwe ɓi risòghɛ̀n ɗi ɓiɓe. Nni àa cààmɛ̀n ki kpaakpaayɛn ɓiɓan ɓiǹ lɛ tintɔ̀ɔ̀ŋ kɛɛ ri lɛ̀.

⁶Yɛ̀ɛ ɓyom ɓìn ɓìcèm ɓi ɓaghà fɔlɔɔ ɓi woŋzakɛn, ɓɛ̀pìrɛɛtìrɛ̀ ɓɛɛ nti ɓɛ ɗiŋɗàg ɓɛ̀ŋwos ɓɛ̀cèm ɓi kìden ki asu lɛ ɓɛɛ ki kìsay kaa.

⁷Ɓi kìden ki kiɓɛ̀ɛ̀, lɔŋ ǹlàmì ɓɛ̀pìrɛɛtìrɛ̀ nyi cɛ̀ncii yɛɛ nti à ɗigàg wɔɔ, gɛ̀n bog ɓi bèg; à ki ghɛ̀ɛ̀sɛɛ wɔɔ ki ɗiŋii ri bwaɓ yi kituwe ki à faa Bɛ̀ll ɓisu wii wu nyimiɗ rì ɓisuu ɓiɓe ɓi kilɔ̀ŋ kìcèm.

⁸Kìtɛntɛ̀ɛ̀n ki Nghay ki kɔnkɔ̀ngà lɛ kɛɛ resi ɓi rìkì ɗiǹ lɛ, bee inɛ ɓi jàŋ inɛ ì pɔ̀ɔ̀zii kì ɓaà kìcèlì ì ɓaghà di ì ka yin kikpaŋ, cààmɛ̀n kìcèm ki yɛ̀ɛ kìnuugh ki abɛ̀y ki ɓaghà di ki kaka.

⁹Rìkì ɗiǹ ɗi ɓaghà kìfèèghrɛnà ki ɓi cààmɛ̀n ki tì rì ki miì, ki resii lɛ: Ɓyom ɓi mum à faa, rì ɓìtuwe ɓi à cuusii ɓi rìɓɔgsì ɗi Bɛ̀ll, ɓi yin ɗi ìtèɗ wulɛ ɓi konàg kì tɛɛ̀zii nɗem wu ŋwaànɛ a ɓɔɔɓɔgsì Bɛ̀ll ɓi bee inɛ̀n.

¹⁰Bee i rìɓɔgsì ìnɛ̀n ì ɓiisɛ̀ngà kì kòmi ɓiɓan ɓi ɓiɗilàg, rì ɓyom ɓi nɔnɔyɛn, rì ɓìsyɔ̀ɔ̀ ɓi zòghɛ̀n mɛ̀kuu mɛ̀kuu; ɓìdɔ̀gsɛna ɓi miì ɓi komkòmgà lɔŋ ɓyom ɓi zɛy, fɔɔnnɛ ɓi ghɛɛ̀sɛ̀ngà kì ɓaà rì ìtèɗ à kpaŋ ɓi cààmɛ̀n ki rilɔ̀gtàg ɗi ɓiɓan.

¹¹Wɔ̀lɛ Kiris à yùghà fɛlɛ yɛ̀ɛ ǹlàmì ɓɛ̀pìrɛɛtìrɛ̀ àgwey ànɛ ɓi ɓìɓan ɓi syeesyee ɓi ɓi ri ɓiì ɓaà; à syààghày kìnuugh ki ki kii lɛ, ki teghɛ̀n ki cee, ki ki rɔɔtɛn ki cee, kɛ̀ kɛɛ̀ ki ɓa kinuugh ki ɓum ɓɛɛ toŋi, yɛɛlɔɔ lɛ ki yin ɓi bàlì ì ɓyom ɓi ɓi kilɛ̀ngà ɓi ziinɛ.

¹²Fɔɔnnɛ à ɗiŋìghà gɛ̀n bog ɓi gɛ̀n yicèm, ɓi jàŋ inɛ ì pɔ̀ɔ̀zii kì ɓaà kìcèlì; à ɗiŋìghà ɓi wɔɔ ri bwaɓ yi ɓipiì, nsoò lɛ yi ɓɔn ɓɛ sanìnya, à ɗiŋìghà wɔɔ lɛ a ɓɔgsi Bɛ̀ll rì bwaɓ yii yi nyimiɗ, à ki fɔ̀n yi ɓìsi gòri ì fìɗyàɓ fikɔ̀ɔ̀.

¹³Lɛ i bwaɓ yi ɓɛ̀lem ɓɛ sanìnya rì yi ɓipiì, rì kìɓu ki jɛɛ à sanìnya ànɛ ɓɛ tɔni, ɓɛ ɗyɛɛ ɓumɓɛ ɓɛ ri rì ɓìsyeg, ɓi ti ɓi pisàg ɓɔ ɓìsyeg ɓi nyoo,

¹⁴bɔ̀ɓ yaŋ min ɗi bwaɓ yi Kiris ànɛ à falɛ̀ngà nyimiɗ ri Bɛ̀ll, kɛ̀ɛ̀ fìfin, ɓi Nghay ànɛ à ri fìɗyàɓ fikɔ̀ɔ̀. Bwaɓ yii yi ri ɓiì tɛɛ̀zii mɛrem mis ɓi ɓɛg ànɛ a ɓìɓan ɓi ɓi ri kɛ̀ɛ̀ gɛɓsɛ̀n, lɛ ti ki Bɛ̀ll ànɛ à rì cem kisay.

¹⁵Kìɓan kiǹ kɛɛ̀ki Kiris à rɛrɛlii ɓi nyìinyìm ànɛ ɓi bee i nyɔn ìnɛ lɛ, rì ɓum rì Bɛ̀ll, lɛ di ɓumɓɛ Bɛ̀ll à mɛ reŋi ɓɛɛ teɗ ɓìrɔɔ ɓi fiɗyàɓ fikɔ̀ɔ̀, ɓi à kàkà ɓumɓɛ abɛ̀y; ɓɛ ri ɓyɔ ɓiì terì lɛ rìwu ɗi mum bog ɗyɛɛ mɛ kwèɗ ɓum ɓi ɓìɓe ɓìcèm ɓi ɓɛ kighà di ɓɛ kaka ɓi fìɗyàɓ fi bee.

¹⁶Ɓisuulɛ jàŋ inɛ kaàtà ànɛ mum à reɓsàkà rìwu ɗii miì à rì, ki ghɛɛ̀sɛɛ lɛ ɓɛɛ yi lɛ mum nyimiɗ anɛ à reɓsàkà rìwu ànɛ̀n à mɛ wu.

¹⁷Lɛ kaàtà ànɛ mum à reɓsaagh rìwu ɗii miì à rì rì ìtèɗ di mum àncèm à mɛ wu, ɓisuulɛ cààmɛ̀n kìcèm ki mum àncèm à kaka cem, kaàtà ànɛn à yin ɗi ìtèɗ wudɛŋ.

¹⁸Kìɓan kiǹ kɛɛ̀ki nsoò bee i ǹtonto ìnɛ Bɛ̀ll à rengà rì ɓum, ì tumɛ̀ngà ɓi kɛ̀ɛ̀ bwaɓ yi yi kpaŋì;

¹⁹lɛ Moyis à kìghà lɛ, à mɛ làmɓɛn mɛsiŋdɛn mɛcèm mɛ mɛ ri ɓi kaàtà à ɓìdɔ̀gsɛna ɓi mis mɛ kilɔ̀ŋ kìcèm, à teɗ min bwaɓ yi ɓɔn ɓɛ ɓɛ̀sanìnya, rì yi ɓipiì, rì mɛ̀nig, à mìsì lɛ, rì ɓi kaàtà à ɓìdɔ̀gsɛna, rì ɓi ɓum ɓɛ̀cèm, rì kìvùree ki kite ki lɛ ìzoɓ, rì ɓi ǹfìŋga wu ɓàŋ lɛ pɔɔŋ.

²⁰À kpaa lɛ: Bwaɓ yi yi siìraagh bee inɛ Bɛ̀ll àa ǹsiŋ̀dɛɛ mìni lɛ, ɓi ɓeŋ yɛ̀ɛ ri lɛ.

²¹Fɔɔnnɛ Moyis à mìsìghà girig bwaɓ ɓi kìnuugh, rì ɓi ɓyom ɓìcèm ɓi ɓɛ nkìlàg kìsay miì ɓi rìɓɔgsì ɗi Bɛ̀ll.

²²Ɓi ɗi yɛ̀ɛ ɓìdɔ̀gsɛna ɓyɛɛ̀ kpaakpàà, ɓɛ ti ɓɛ soghàg ɓyom ɓìcèm rì bwaɓ, nsoò ɓìɓe, ɓi ti ɓi ɓalàg ɓìcenɛn di bwaɓ yi kpaŋi.

²³Ki ghɛɛ̀sɛ̀ngà min lɛ, ɓìfèèghrɛnà ɓi ɓɛkɔɔ̀kɔɔ̀ ɓɛ ɓyom ɓi ɓi ri aɗyoo ɓyɛɛ teɗ rìkuu ɗi zòghɛ̀n ɗiǹ, rì tì lɛ, nsoò ɓɛ̀kɔɔ̀kɔɔ̀ ɓɛ ɓyom ɓɛ aɗyoo ɓɛncèm ɓɛ ghɛɛ̀sɛ̀ngà kì terì zòghɛ̀n rì ɓìfùna ɓi ɓi cee ɓiǹ.

²⁴Ɓisuulɛ Kiris à ɗiŋìghà ɓi ɓi naà-Bɛ̀ll ìnɛ ɓum ɓɛɛ toŋi, ìnɛ ì rì lɛ ì ɓa kìfèèghrɛnà ki naà-Bɛ̀ll ì kɔɔ̀kɔɔ̀, à ɗiŋìghà lɔŋ ɓi ɗyoo ɗyɔmiɗ lɛ di a rɛli ɓi cààmɛ̀n ki, ɓi mis mɛ Bɛ̀ll ɓisu wis.

²⁵À ɗiŋìghà ɓi wɔɔ lɛ di a funɛn nyimiɗ gɛ̀n lɛ gɛ̀n fɛlɛ yɛ̀ɛ nlàmì ɓɛ̀pìrɛɛtìrɛ̀ àa nti à ɗigàg bèg bimiɗ rì bwaɓ yi nyàm.

²⁶I kɛɛ ɓa fɔlɔɔ, di ki ghɛɛ̀sɛ̀ngà min lɛ Kiris a wog rìkɛŋ gɛ̀n lɛ gɛ̀n à tumɛ̀n yɛ̀ɛ zi i kìlɛ̀ngà. Wɔ̀lɛ ɓi cààmɛ̀n ki, à yùghà gɛ̀n bog ɓi gɛ̀n yicèm, di mɛ̀ru mɛ siitòn mɛɛ̀ kɛ̀ɛ̀kɛɛ yi lɛ a legsi kìɓe di à fùnɛɛ nyimiɗ.

²⁷Nni yɛ̀ɛ ki ri kìsiŋdɛn lɛ mum à ghɛ̀ɛ̀sɛɛ kì wii gɛ̀n bog, ajɛ̀m ìnɛn innɛ Bɛ̀ll à yɔ̀mzì nyi,

²⁸fɔlɔɔ nnɛ Kiris ànɛ à falɛ̀ngà nyimiɗ gɛ̀n bog ɓi gɛ̀n yicèm lɛ a tɛg ɓìɓe ɓi ɓum lɛɛ̀gwey à rì ɓiì ɓììtii ti kìrèsɛɛ ɓi gɛ̀n i kìɓɛ̀ɛ̀ kɛ̀ɛ̀ kìɓe a ɓumɓɛ ɓɛɛ̀ ɓoŋɓoŋ nyi lɛ a kweɗ ɓɔ.