Read Bafia ZYAG 1 Bible Online

ZYAG 1 - Bafia bible

ZYAG 1

¹Mɛ̀ Zyag, ànɛ ǹɗì Ǹkìì-kìsay a Bɛ̀ll rì à Kan Yeesus Kiris, ǹkàni mɛ̀pwìɗ mɛ Isirayɛl, ǹtɛ̀ɗ ɗì mɛɓɛɛ̀ mɛ mɛ saàtɛ̀ngà zi bimiɗ. Ǹtògsii yàà!

²Mìni ɓɛ̀geni ɓɛ̀m, terina mɛ̀kuu mɛ mɛtɔɓ mɛ̀cèm mɛ ɓì rì lɛ ɓì tulɛ̀n rì mɔ lɛ mɛ ri kìɓan ki kinyàà ki kɔɔ̀kɔɔ̀,

³ɓì ki yi lɛ, cààmɛ̀n kìcèm ki rìgherɛ̀n ɗin ɗi tulɛɛ rì mɛ̀fèèghrɛn, ki ri ɓiì kìi lɛ ɓi ɓa rì kìnìri ki nɗem;

⁴kìɓan kifog, ki ghɛɛ̀sɛɛ lɛ rìnìɗ ɗin ɗi nɗem ɗyɛɛ ki ɓìɓan ɓi ɓi rɔɔtɛɛ lɛ kɔɔ̀kɔɔ̀, di fɔlɔɔ nnɛ ɓi ɓa ɓumɓɛ ɓɛ kii lɛ, ɓɔ kɛ̀ɛ̀ bɛ̀lɛn nsoò bog, ɓɛ ki ɓa ɓɛronɛn ɗi ɓìɓan ɓìcèm, com ki ki kaarɛ̀n ɓɔ, kɛ̀ kɛɛ̀ ɓa.

⁵I ŋwaàdɛŋ ànɛ ɓi mìni à kaarɛɛ ɗyomzɛ̀n, a tɔg ɗyɔ rì Bɛ̀ll ànɛ à ti à falàg ɓum ɓɛ̀cèm ɗyomzɛ̀n zɛy rì zɛy, rì syeesyee à nɗem, fɔɔnnɛ àrì nyi ɗyɔ ɓiì faà;

⁶kìɓan kifog, à ghɛ̀ɛ̀sɛɛ ɗyɔ kìlɔnì rì ǹtyweeyi kɛ̀ɛ ɓa ri nyoey; ɓisuulɛ ŋwaànɛ à rì rì nyoey à pisɛɛ ɓìkus ɓi riɓày ɓi bɛ̀ɓ yɛɛ̀ nyɛ̀ɛnyɛŋ̀zì di yɛɛ̀ ɓɔɔɓɔgsì aɗyoo.

⁷Rìkuu ɗi mum ɗìn ɗyɛ̀ kɛɛ̀ fèg ɓi nɗem lɛ ɗi ri ɓiì terì com kidɛŋ yɛ̀ɛ Kan.

⁸Ŋwaànɛ fɔlɔɔ a rì kɛ̀ɛ̀ bimiɗ à nɗɛli anɛ à sììrɛɛ miì ɓi ɓìɓan ɓii ɓìcèm.

⁹Maaseŋi wìn a rìgherɛ̀n ànɛ à rì soghàsogha, a nyaàrɛn ɗì rìpɛ̀sì ɗi Bɛ̀ll à pɛ̀sii nyi aɗyòò.

¹⁰Wɔ̀lɛ guŋgum nyii ghɛɛ̀sɛɛ kì nyààrɛɛ ri rìsɛɛ̀dì ɗi Bɛ̀ll à sɛɛ̀dii nyi, ɓisuulɛ à rì ɓiì ghaghii yɛ̀ɛ kìsàmà ki caaɓi.

¹¹Ŋwos a pɛ̀sɛ̀n yì rì rìtɔ̀n ɗii ɗi syàn, à kì lɛ caaɓi kɛɛ womdag, kìsàmà ki caaɓi kiǹ ki kpi, kìrɔɔ ki kɔ ɓɛ̀ kɛɛ̀ ghɛɛ̀di. Fɔlɔɔ nnɛ guŋgum a rì ɓiì wom̀daagh ɓi ɓìɓan ɓìcèm ɓi a kìkì.

¹²Mààgh rì ŋwaànɛ à ti à nìɗkì nɗem di à tulɛɛ rì mɛ̀fèèghrɛn; ɓisuulɛ i à mɛ ghɛn mɛfèèghrɛn fɔlɔɔ, à rì ɓiì terì tàm à cɛɓ ànɛ Kan à kàkà ɓumɓɛ ɓɛ ti ɓɛ keesàg nyi.

¹³Mum kɛ̀ɛ kì lɛ i à rì ɓi mɛ̀fèèghrɛn, a kpaa lɛ Bɛ̀ll yɛɛ̀ fèeghfeèghrɛ̀n mɛ̀. Ɓisuulɛ Bɛ̀ll à yin lɛ kìɓe ki fèèghrɛ̀n nyi, nyimiɗ kɛ̀ɛ ki fèèghrɛn mum.

¹⁴Kìɓan kifog mum bimiɗ à ti à ɓalàg rì mɛ̀fèèghrɛn lɛ ɓìɓeɓtàg ɓi ɓiɓan ɓi ɓyɛɛ̀ kɔ̀nkɔn nyi ɓyɛɛ ti ɓi syogì nyi, ɓi ki teki nyi nɗem.

¹⁵Ɓìɓeɓtàg ɓi ɓɛfèg ɓi mum ɓi nɗem, ɓi ti lɛ i ɓi teri ɗyem, ɓi yay kìɓe; kìɓe ki ɓalàg lɛ i kaa tèɗ, ki yay rìwu.

¹⁶Mìni ɓɔɔseŋi ɓɛ̀m ɓɛ nɗem, kɛ̀ ɓi pwààrɛn:

¹⁷Com ki syeesyee kìcèm ki ɓɛ ri lɛ ɓɛ fa ɓìsi, rì rìɓòò ɗìcèm ɗi ɗi rɔɔtɛɛ lɛ kɔɔ̀kɔɔ̀, ɓi ti ɓi ɓalàg yì aɗyoo, yɛ̀ɛ Seŋi ànɛ à rì rì kìtɛɛtɛn, ànɛ à ti kɛ̀ɛ cenɗɛn, nsoò kìfìì ki lɛ à rì lɛ à lɔ̀gtɛ̀n, ki yin a lɔ̀ŋkii.

¹⁸À faghà ɓìsi cɛɓ ɓi rìkɔ̀n ɗii, rì jɛ̀ɛ̀ yìì i saaɗ lɛ ti ɓa fɛlɛ yɛ̀ɛ ɓìɗùn ɓi ǹtonto ɓi ɓyom ɓi à kìghà.

¹⁹Mìni ɓɛ̀geni ɓɛ̀m ɓɛ nɗem, ɓì ghɛ̀ɛ̀sɛɛ kì yiì fɔlɔɔ. Fɔlɔɔ nnɛ mum bimiɗ à ghɛ̀ɛ̀sɛɛ kì ɓaà lɛ fyɛ̀ɗ lɛ a wog, kɛ̀ɛ fyaŋzi ki tòòghrɛɛ, kɛ̀ɛ ki fyaŋzag ki woògh bim,

²⁰ɓisuulɛ ŋwaànɛ bim yɛɛ̀ kìkì, à ti kɛ̀ɛ roòzi rikì ɗi ɓiɓan ɓi ɓi ri lɛ saaɗ ɓi mis mɛ Bɛ̀ll.

²¹Kìɓan kiǹ kɛɛ̀ki ɓì ghɛ̀ɛ̀sɛɛ kì càri ɓiɓan ɓi tifin, rì kìɓe mɛkuu mɛ̀cèm, ɓì teɗ jɛ̀ɛ̀ ìnɛ ì ɓɛ̀lɛ̀ngà ɓi mìni, ìnɛ ì ki rì lɛ ì ghɛɓsì ɓyɛɓ ɓin, rì ǹɗem wu tɛ̀tɛ̀rɛ̀ɛ̀.

²²Kìina ɓìɓan ɓi jɛ̀ɛ̀ ì Bɛ̀ll yɛɛ̀ kpaakpàà, kɛ̀ ɓi rɔ̀ɓ lɔŋ lɛ rìwowòg ɗi jɛ̀ɛ̀ ìnɛ̀n ɗyɔ rì ɗyɔ, ɓì pwààpwààrɛ̀n mìniìɓɔmiɗ ri ɓɛ̀fèg ɓɛ ɓɛ ri ɓìtɛ̀ŋtɛ̀ŋ.

²³Ɓisuulɛ ŋwaànɛ a wowog jɛ̀ɛ̀ ìnɛn, kɛ̀ɛ kì ɓiɓan ɓi yɛɛ̀ kpaakpàà, à rì fɛlɛ yɛ̀ɛ ŋwaànɛ à ti à kìlàg lɛ, i à ghɛɛ ìsu wii ɓi ŋwii yɛ̀ɛ wu ri,

²⁴ajɛ̀m ìnɛn à pɛ̀sɛ̀n à ghaagh, à ghàs kì ɗimzɛɛ lannɛ à rì.

²⁵Kìɓan kifog, i mum à sìŋii ɓìdɔ̀gsɛna ɓi ɓi rɔɔtɛɛ lɛ kɔɔ̀kɔɔ̀, ɓi ɓyɛɛ̀ foŋfoŋ mum ɓi-kɔ̀ɔ̀ wu rikan, à ki sììrɛn, àa ɓi rìwowòg ɗi lɛ i à woogh, à ɗimzɛ̀n, lɔŋ ɓi rìkìkì ɗi ɓiɓan ɓi miì rì ìtèɗ, ŋwaànɛ̀n yɛɛ ri ɓiì woògh kìrɔɔ ɓi rìkì ɗii ɗiǹ.

²⁶I mum a fèfeg lɛ à rì mum à rìgherɛ̀n kɛ̀ɛ ki ɓèŋ rìlemàg ɗii, kìɓan kifog à yèèghyègsì ǹɗem wii, rìgherɛ̀n ɗi ŋwaànɛ̀n ɗi ghɛɓsii ɓi com.

²⁷Rìgherɛ̀n ɗi ɗi ri ɗìtɛnɛn, ɗi ki ɓa kɛ̀ɛ̀ tìfin ɓi mis mɛ Bɛ̀ll à Seŋi wìs ɗyɛɛ̀ tɔtɔg lɛ mum a kɛngi kì ghɛɛ̀ lɛ rì ɓɔɔ̀zii rì mɛ̀kpɔɓ cààmɛ̀n ki ɓɛ ri rì ǹɗemi-kɛŋɛn, à ki ɓèŋɗɛn lɛ kɛ̀ɛ kì ɓìɓan ɓi tifin ɓi ɓi ziinɛ.