Read Bafia ZYAG 2 Bible Online

ZYAG 2 - Bafia bible

ZYAG 2

¹Ɓɛ̀geni ɓɛ̀m, kɛ̀ ɓi ɗiŋzi nlànag ɓi rìgherɛ̀n ɗi ɓì gherɛɛ Kan wìs Yeesus Kiris ànɛ à rì ǹkeŋkèmì.

²I ɓum ɓɛ ɗiŋii yì a ntaŋzɛn win ɓɛsɛ̀ɛ̀ ɓɛɓɛɛ̀ lɛ roànɛ rì bɔŋ i gol ɓi càg rì syeesyee à kìlàà à ǹlònlomɛn, roàmbog rì kìtùg ki kilàà,

³i ɓì ɓisɛɛ kì kuuraagh roànɛ à waatɛɛ kìlàà ki syeesyee, ɓì kpaa nyi lɛ kɔ̀ri fɛ ɓi-kɔ̀ɔ̀ wu syeesyee wu, ɓì kalì soghàsogha lɛ, wɔ̀ɔ̀ rɛli fɛnii; nsoò lɛ kɔ̀ri ɓi com ki ǹti ǹsaaghràg mɛ̀kòò miì azi,

⁴fɔlɔɔ a rèsii ɓi nya lɛ ɓì foŋi ǹlànag ɓi nyìinyìm wìn rì tì lɛ ɓì rì ɓɛ̀yɔ̀mì-ɓìɓan ɓɛ ɓɛ ri rì ɓìɓeɓtàg ɓi mɛyitì?

⁵Mìni ɓɛ̀geni ɓɛ̀m ɓɛ nɗem wooghna! Bɛ̀ll à ɓɔ̀ngà ɓɛ̀soghàsogha ɓɛ ɓi ziinɛ lɛ ɓɛɛ ɓa ɓɛ̀guŋgum ɓi rìgherɛ̀n ɓɛ ki ɓa ri gàɓ ɓi kìlɔ̀ŋ kii ki à kàkà ɓumɓɛ ɓɛ ti ɓɛ keesàg nyi.

⁶Nni i mìnii mɛ sɛɛti soghàsogha! Àa ɓɛ̀guŋgum ɓɛɛ ti ɓɛ yeesàg mìni, ɓɛ kɛnkɛ̀n ɗì mìni ɓi naa yi ɓɛyɔ̀m?

⁷Àa ɓɔ yɛɛ ti ɓɛ fengàg syeesyee à ɗii ànɛ ɓì tɛ̀tɛɛgh?

⁸Nyoey yi yin miì, i ɓì roòzii kìdɔ̀gsɛna ki rifòm fɛlɛ yɛ̀ɛ ki ri kìkànɛn lɛ: Ù ghɛ̀ɛ̀sɛɛ kì keesii romum ànɛ wɔ̀ jàŋbog yɛ̀ɛ wɛ̀ɛmiɗ, di ɓì konaagh.

⁹Kìɓan kifog i ɓì ɗiŋii ɓi kìsyɔ̀ɔ̀ ki lɛ ɓi lalani ɓum, di ɓì kìi kìɓe; ɓì ghɛ̀ɛ̀sɛɛ kì yiì lɛ ɓì yogsii ɓìdɔ̀gsɛna.

¹⁰Ɓisuulɛ mum ǹcèm ànɛ à ɓèŋi ɓìdɔ̀gsɛna ɓìcèm, kìɓan kifog à yogsì lɔŋ kidɔ̀gsɛna kifog a yi lɛ à ti rì zɛ̀ɗ ɓi san ànɛ a ɓìdɔ̀gsɛna ɓìcèm.

¹¹Roànɛ à kpaaghà lɛ: Kɔ̀ɔ kì fisɔ̀mɔ̀g, à kpaaghà girig lɛ kɔ̀ɔ wey mum, fɔɔnnɛ wàa soo kìi ɓi fisɔ̀mɔ̀g, i ù woli mum di ù ti ǹ-yogsì ɓìdɔ̀gsɛna.

¹²Tòtooghna, ɓì kìkì ɓìɓan fɛlɛ yɛ̀ɛ ɓumɓɛ ki ghɛɛ̀sɛɛ lɛ ɓɛ yɔm̀ ri ɓìdɔ̀gsɛna ɓi ɓyɛɛ foŋfoŋ ɓisi ɓi-kɔ̀ɔ̀ wu rikan,

¹³ɓisuulɛ ɓɛ̀yɔ̀m ɓɛǹ ɓɛ ri ɓiì ɓaà kɛ̀ɛ̀ nyìighnyìg ɓisuu ɓɛroɓɛ ɓɛ ɓaghà kɛ̀ɛ̀ ǹɗem wu nyìighnyìg. Nɗem wu nyìighnyìg wu ti wu kilàg lɛ mum a yagsag ɓɛ̀yɔ̀m.

¹⁴Ɓɛ̀geni ɓɛ̀m, ki ghɛɓsii cɛ lɛ mum a kpaàkpaa rì ŋwɔm lɛ à rì rì rìgherɛ̀n di à yin ɗi mɛ̀kìkìì mɛ syeesyee? Rìkuu ɗi righerɛ̀n ɗiǹ ɗi ri nya lɛ ɗi ghɛɓsì nyi?

¹⁵I geni wìn a baŋì àdɛŋ nsoò lɛ à giɓ, ɓɛ ri nyoo zɛy, ɓɔ kɛ̀ɛ̀ com ki ɗiyɛn ɓɛŋwos ɓɛcèm;

¹⁶nnɛ kìbog ki ɓi mìni ki kalii ɓɔ lɛ: Kɛ̀ɛna lɛ fyòoog, ɓi ɓaɓɓɛn a ɗuu ɓi wurag, kɛ̀ɛ fa ɓɔ com ki ki ri ɓɔ rì gɛɓsɛ̀n ɓi san ànɛ a mɛ̀mùù, fɔlɔɔ a ghɛɓsii cɛ?

¹⁷Fɔlɔɔ nnɛ rìgherɛ̀n ɗi ri gìrig; i ɗi ri kɛ̀ɛ̀ mɛ̀kìkìì di ɗi ri kìloŋ ɓi ɗyɔmiɗ.

¹⁸Kìɓan kifog ŋwaàdɛŋ à rì lɛ à kpaa lɛ: Wɔ̀ɔ̀ rì rì rìgherɛ̀n, mɛ̀ rì mɛ̀kìkìì; rèsi mɛ̀ rìgherɛ̀n ɗyɔɔ ɗi ɗi ri kɛ̀ɛ̀ mɛ̀kìkìì, mɛ̀ɛ nɗesi wɔ̀ ɗiŋkɛ̀m ɓi mɛ̀kìkìì mɛm̀.

¹⁹Ù ti ù gheràg lɛ Bɛ̀ll à rì lɔŋ bog, fɔlɔɔ a rì lɛ syeesyee; ɓìɓeɓtàg ɓi mɛghay ɓi ti ɓi gheràg girig fɔlɔɔ, ɓi ki ririsi.

²⁰Wɔ̀ mum à kɛ̀ɛ̀ ɗyomzɛ̀n, ù kɔ̀ni ɓi lɛ u yi lɛ rìgherɛ̀n ɗi ɗi ri kɛ̀ɛ̀ mɛ̀kìkìì ɗi ghɛɓsii ɓi com?

²¹Abiraham à seŋi wìs a ghɛnɛ̀ngà lɛ saaɗ ɓi mis mɛ Bɛ̀ll ɓi mɛ̀kìkìì lɛ à fùnɛ̀ngà Isag à man wiì ɓi rìkùna ɗi ɓɛɛ̀ tɔ̀ngi ɓyom ɓi ɓɛɛ ɓɔgsi Bɛ̀ll rì ɓyɔ miì.

²²Ù ghɛɛ foo lɛ rìgherɛ̀n rì mɛ̀kìkìì ɓi kɛɛ̀kɛ̀ɛ̀ghà ǹɗaŋ, fɔɔnnɛ mɛ̀kìkìì mɛ roòzìghà rìgherɛ̀n ɗii lɛ kɔɔ̀kɔɔ̀.

²³Jàŋ inɛ̀n yɛ̀ɛnɛ jɛ̀ɛ̀ ìnɛ ì rì ǹkànɛn lɛ: Abiraham à gherɛ̀ngà Bɛ̀ll, nni kìɓan kiǹ kɛɛ kighà lɛ a ghɛnɛn lɛ à rì lɛ saaɗ ɓi mis mɛ Bɛ̀ll, yɛ̀ɛ ron, nni fɔɔnnɛ ɓɛ reŋìghà nyi lɛ rìghan ɗi Bɛ̀ll.

²⁴Ɓì ghɛɛ min lɛ mum à ti à ghɛnàg lɛ saaɗ ɓi mis mɛ Bɛ̀ll lɛ mɛ̀kìkìì mii, àa lɛ rìgherɛ̀n ɗyɔ rì ɗyɔ.

²⁵Rahaɓ ànɛ à ɓaghà giɓ a rìɓàmɓà nyi girig à ghɛnɛ̀ngà lɛ saaɗ ɓi mis mɛ Bɛ̀ll lɛ mɛ̀kìkìì mii, ɓisuulɛ à ghàɓkà ɓum ɓɛ mɛwoorag lɛ syeesyee, à ki fyeesi ɓɔ ɓi bee ìdɛŋ lɛ ɓɛɛ sug.

²⁶Fɛlɛ yɛ̀ɛ nyoo ìnɛ ì rì kɛ̀ɛ̀ ǹghay ì rì kìloŋ, fɔlɔɔ nnɛ rìgherɛ̀n ɗi ɗi yin ɗi mɛ̀kìkìì ɗi ri girig kìloŋ.