Read Bafia ZYAG 3 Bible Online

ZYAG 3 - Bafia bible

ZYAG 3

¹Ɓɛ̀geni ɓɛ̀m, ki rɔɔtɛɛ ɓi lɛ kìgwey ki ɓi mìni kɛɛ kaàkaa lɛ kɛɛ ɓa ɓɛ̀rèsàg ɓisuulɛ, ɓìsi ɓɛ tì rì ɓɛ̀rèsàg, ɓɛ̀yɔ̀m ɓis ɓɛ tèèsɛɛ gɛ ɓɛ cee ɓɛ ɓum ɓɛmbog.

²Ɓìsiìcèm tì ti tì sɛ̀ràg ɓìɓan bee lɛɛ̀gwey; i mum à ka nɛskà ɓi jɛ̀ɛ̀ di a tòtòg, di mum ànɛ̀n miì à rì lɛ sɛɛghisɛɛghi, à ki yi riɓan ɗi nɗem lɛ a lami nyoo yìì.

³Tì ti tì fogì zòm i kìmbɛ̀rɛ̀ bɔŋ ɓi ŋwɔm lɛ yɛ̀ɛ ki com ki ti kɔ̀nkɔ̀n fɔɔnnɛ tì ri min lɛ tì kɛ̀ɛ̀sì yɔ̀ yɛ̀ɛ tì kɔ̀ni.

⁴Ghɛɛna girig tìtimà, nsoò yɛ̀ɛ ti teghaagh yɛ̀ɛ mɛ̀nɔ̀ɓɔ̀, ti ti ti ɓalàg lɛ, i coo bɛ̀ɓ kɛɛ̀ tyɔtyɔg tyɔ, lɔŋ maa giyà nnyɛɛ kɛ̀ɛkɛɛ̀sì tyɔ ɓi rìkɔ̀n ɗi ŋwaànɛ a pupus tyɔ.

⁵Com kìfog kɛɛ ri rì rìlemàg ɗi ɗi ri maa kìkàɓ ànɛ ɓi nyoo ì mum, kìɓan kifog ɗi ri lɛ ɗi sanɛ̀n lɛ ɗi ti ɗi kilàg ɓɛ̀gɛni-ɓiɓan; ɓì yii lɛ maa syeǹ à ɗuu à ti à ɗigsàg coo ìreɓ.

⁶Rìlemàg ɗi ri fɛlɛ yɛ̀ɛ ɗuu; ɗi ri kìlɔ̀ŋ ki kɛɛ̀ kɛ̀ɛ̀kɛɛ ɓi kìtɛ̀ŋtɛ̀ŋ; ɗi ri rì ìkɔ̀ɔ̀ ɓi nyìinyìm à ɓìkàɓ ɓis, nni ɗi ti ɗi yogsàg nyoo bimiɗ, ri ki ti ri ɗigsàg cɛɓ ki mum kìcèm yɛ̀ɛ ɗyɔmiɗ ɗyɛɛ̀ lɔŋlɔŋ ri ɗuu ɗi fiɗyàɓ fikɔ̀ɔ̀.

⁷Nyàm yi ɓi cog mɛkuu mɛ̀cèm, rì tììlì rì nyàm yi wɔwɔghɛn ri mùm, rì yi ghɛghɛɓɛn ɓi rìɓày à kìkòn, mum à rì lɛ à mɛ̀ɛ̀zì yɔ, ni à mɛ ki mɛ̀ɛ̀zi yɔ.

⁸Kìɓan kifog, mum à yin lɛ à nyìnɛ̀n càg ɓi dwey lɛ à rì lɛ à ɓèŋ rìlemàg ɗii, lɛ ɗi ri fìroɓ fi fi ri kɛ̀ɛ̀ boòboo, ɗi ki ɓa ɗi ronɛn ɗi ìrɔ̀g wu cuucuùsìyɛ̀n ɓum.

⁹Rìlemàg ɗyɔmiɗ ɗi tì ti tì kemzàg Kan ànɛ à rì Seŋi wìs ri ɗyɔ, ɗyɛɛ̀ɗi tì ti tì nyɔ̀màg ɓumɓɛ Bɛ̀ll à kìghà ɓi kìpisɛn kii ri ɗyɔ̀.

¹⁰Ŋwɔm wùfog wɔ yɛɛ ti wu magì ɓum, wu ki nyɔ̀mag ɓum. Ɓɛ̀geni ɓɛ̀m, ki ghɛɛ̀sɛɛ ɓi ki ɓaà fɔlɔɔ.

¹¹Nsim à mɛ̀nig à rì lɛ à kpaàkpàŋzì lɛ rì mɛ̀nig mɛ lòlolɛn rì mɛ yɛ̀yɛlɛn ɓi ɗyas dìfog?

¹²Ɓɛ̀geni ɓɛ̀m ǹɗyèm wu firònì wu ti wɛ̀ kɛɛ̀ wum mɛfùmɓa, ǹɗyèm wu nfùmɓa wɛ̀ kɛɛ̀ ki wum tirònì; ǹsim à mɛ̀nig mɛ mɛ ri rì kìkòn, à yin lɛ à kpaŋzì mɛ̀nig mɛ mɛ ri kɛ̀ɛ̀ kìkòn.

¹³Ghɛn anɛ ɓi mìni yɛɛ kii lɛ, à womzɛ̀n à ki ɓa ri fèg? A resi min ɗyomzɛ̀n ɗii ɓi syeesyee wìì a rìghɛghɛ̀ɓ, rì ɓi ɓìɓan ɓi a kìkì ɓi ɓa lɛ ɗì rìsɛɛ̀dɛ̀n ɗi ɓi zi, rì ɗyomzɛ̀n.

¹⁴Wɔ̀lɛ i ɓì rì rì m̀mììghrɛ̀n à m̀ɓeɓtɛn, rì nɗem wu yàaka, kɛ̀ ɓi saasanɛ̀n, nsoò lɛ ɓì kìkì ɓɛ̀pwàà ɓɛ ɓɛ wuɓsɛɛ ɓi saaɗ.

¹⁵Rìkuu ɗi ɗyomzɛ̀n ɗiǹ ɗi yin ɗyomzɛ̀n ɗi ɗi riì aɗyoo, ɗi ri lɔŋ ɗyomzɛ̀n ɗi ɓi ziinɛ, ɗi mum à mɛ̀mùù, ɗi ki ɓa ɗyomzɛ̀n ɗi ɗi riì yɛ̀ɛ Satàn.

¹⁶Ɓisuulɛ jàŋ bimiɗ ìnɛ m̀mììghrɛ̀n rì nɗem wu yàaka ɓi ri, kìɓùùsì rì ɓìɓeɓtàg ɓi ɓiɓan mɛkuu mɛ̀cèm ɓi ti ɓi ghɛnàg wɔɔ.

¹⁷Ɗyomzɛ̀n ɗi ɗi riì aɗyoo ɗi ka rì ɗì tɛnɛn, ajɛ̀m ìnɛn ɗi ɓa tì lɛ fyòoog, ɗyɛ̀ kɛɛ̀ ròoroòtɛ̀n, ɗi kaaghì lɛ ɓum ɓɛɛ ɓa ɓɛ̀ràrɛn, ɗyɔ ɗìronɛn ri nɗem wu nyìighnyìg, ɗi ki kìlag ɓiɓan ɓi syeesyee, ɗyɛ̀ kɛɛ̀ ɓa ri ǹlànag nsoò tìfyèèrɛnà.

¹⁸Ɓumɓɛ ɓɛɛ̀ kìki kisay ki lɛ fyòoog a ɓa jàŋ bimiɗ, ɓɛ ti ɓɛ miskì boo ì saaɗ ɓi fyòoog ɓi ɗùm.