Read Bafia ZYAG 4 Bible Online

ZYAG 4 - Bafia bible

ZYAG 4

¹Ɓìɓan ɓi lɛ rì ɓìtùrì rì ɓɛsaaka ɓi ɓaa yì la ɓi nyìinyìm wìn? kaa yin lɛ ɓìɓeɓtàg ɓi ɓiɓan ɓi mìni ɓi mɛ̀rem ɓyɛɛ̀ ɗùuɗuùsì wɛ̀y wiǹ ɓi nyoo yin.

²Ɓì ti ɓì ɓalàg rì zày ìnɛ lɛ di ɓyàa ɓaa rì ɓyom, kɛ̀ ɓi ki ɓa ri ɓyɔ; ɓì rì ɓɛ̀wolì ɓum; ɓì ki ɓa ti ɓumɓɛ ɓɛɛ̀ kɔ̀nkɔn lɛ ɓi ɓa rì ɓyom, wɔ̀lɛ bee inɛ ɓi ɓa rì ɓyɔ yɛ̀ kɛɛ̀ ɓa; ɓì woòwòmɓɛ̀n, ɓì ɗùùɗùù, kɛ̀ ɓi ki ɓa ri com, ɓisuulɛ ɓì ti kɛ̀ ɓi lɔn.

³Ɓì ti ɓì lɔǹgì, ɓɛ̀ kɛɛ̀ fa mini ɓisuulɛ ɓì ti kɛ̀ ɓi yi rilɔ̀n; ɓyom ɓi ɓì ti ɓì lɔngì, ɓì ti ɓì lɔngì ɓyɔ lɛ ɓi yogsag ɓi rìkìkì ɗi ɓiɓan ɓi ɓeɓtɛn ɓi ɓi ti ɓi rɔɔghì mìni.

⁴Mìni ɓɛ̀kìì-tìsɔ̀mɔ̀g ɓɛ! Ɓì yii ɓi lɛ i mum à rì rìghan ɗi ziinɛ di à rì bènàbena a Bɛ̀ll? Nni ŋwaànɛ à rì ɓiì kɔ̀ni lɛ a ɓa rìghan ɗi ziinɛ à rì ɓiì ɓaà bènàbena a Bɛ̀ll.

⁵Àa zɛy innɛ ki ri kìkànɛn lɛ: Bɛ̀ll à ti à keesàg Nghay wu à fogà ɓi ɓìsi à kpaŋ lɛ a ki yɔ̀ɔ̀tì ɓisuu Nghay wìn.

⁶Wɔ̀lɛ Bɛ̀ll à ti à kìlàg ɓìsi geesɛ̀n ìnɛ ì cee, lɛ ki ri kìkànɛn lɛ: Bɛ̀ll à ti kɛ̀ɛ rɛ̀gti ri ɓɛ̀daŋàdaŋa, lɔŋ ɓɛ̀roɓɛ ɓɛ sɛɛ̀dii ɓɔmiɗ ɓi zi ɓɛɛ̀ɓɛ a rèsag geesɛ̀n yìì.

⁷Nni càrɛɛnà min mìniìɓɔmiɗ lɛ Bɛ̀ll a lami mìni, ɓì ki cakɛn ɗi mìniìɓɔmiɗ lɛ Satàn kɛ̀ɛ làmi mini, fɔɔnnɛ à rì mìni ɓiì ghɛŋii fìràɓ.

⁸Tyɛ̀ɛ̀tɛɛna Bɛ̀ll jàŋbog fɔɔnnɛ nyi girig à rì mìni ɓiì yùu jàŋbog, sòona ɓyàg ɓin ɓyɛɛ tɛn, mìni ɓɛ̀kìì-kìɓe, ɓì ki kpɔg mɛrem min, mìni ɓum ɓɛ tyoo tiɓɛɛ̀.

⁹Yiina lɛ ɓì rì nyìighnyìg, ɓi waàtɛn ɓìlɛ̀ɓì, ɓì ki rèn; mɛ̀keèghkeegh min mɛ tyɔɛ̀y mɛɛ ghas̀ ɓìɓààsì ɓi mɛkɛɛ̀gh, kìnyàà kin ki ghay ǹɗemi-kɛŋɛn.

¹⁰Sɛɛ̀diinà mìniìɓɔmiɗ ɓi mis mɛ Kan fɔɔnnɛ à rì mìni ɓiì pɛ̀sii aɗyòò.

¹¹Ɓɔɔsoŋ̀, kɛ̀ ɓi ɓùuɓuŋ̀ɗɛ̀n a mɓeɓɛn. Ŋwaànɛ à ɓùŋi geni a mɓeɓɛn nsoò lɛ à yɔ̀mi geni, a yi lɛ ɓìdɔ̀gsɛna ɓyɛɛ̀ɓi à tòogh kìɓe, à ki yɔ̀m ɓyɔ. Nni i wɔ̀ɔ̀ ti ɓiì yɔ̀myɔmi ɓidɔ̀gsɛna, di ù yiìdi mɓèŋì-ɓìdɔ̀gsɛna, ù ti ǹ-yɔ̀mì-ɓìdɔ̀gsɛna.

¹²Bɛ̀ll cɛ̀ncii yɛɛ ti à fogì ɓìdɔ̀gsɛna, à ki yɔ̀mgi ɓum, nyi cɛ̀ncii yɛɛ ri lɛ à ghɛɓsì mum nsoò lɛ a wey nyi; nni wɔ̀ mum, wɛ̀ɛ nnɛ ghɛn anɛ u ren kìɓan ki mum?

¹³Ɓigomìnɛ mìni ɓɛ ɓì ti ɓì kpaaghì lɛ, gɛɛ̀nɛ nsoò lɛ rìduri, tì rì ɓiì kɛ̀ɛ ɓi bàn ìnɛ fɛlɛ̀, tì ghagsì bimiɗ à bèg wɔɔ di ti kìki dùne, tì fɔ̀ngì mɔ̀ɔ̀ni, wooghna.

¹⁴Mìni ɓɛ ɓì yii ɓi lannɛ cɛɓ kin ki ri ɓiì ɓaà rìduri, yiina lɛ ɓì rì cuùcuu ki ki ti ki ghɛnàg ɓi maa cààmɛ̀n, ajɛ̀m ìnɛn, ki ɗimì.

¹⁵Ɓyàa ghɛ̀ɛ̀sɛɛ kɔm̀ kìkpaaghii lɛ, i ki kɔni Kan tì rì lɛ tì ghɛɓ, tì kì kìɓan ki fɛlɛ̀.

¹⁶Kìɓan kifog mìniì kaakalɛ̀n ɓigomìnɛ ɓi ɓɔɔ ɓidaŋà ɓɛ mìni ɓi mɛ̀rem; rìkuu ɗi kalɛn ɗi fɔlɔɔ ɗi rɔɔtɛɛ ɓì.

¹⁷I mum à yii kìɓan ki syeesyee ki à rì lɛ à kì nni à rɔ̀ɓi kɛ̀ɛ kì kɔ di à kìi kìɓe.