Read Bafia 1 PYƐƐRI 2 Bible Online

1 PYƐƐRI 2 - Bafia bible

1 PYƐƐRI 2

¹Càrina min kiɓeɓtàg ki nɗem bee yicèm, rì ɓɛ̀pwàà, rì mɛ̀ghèy, rì m̀mììghrɛ̀n, rì mɛ̀wɔ̀wɔrì,

²ɓaana fɛlɛ yɛ̀ɛ ɓɔn ɓɛ ɓwɛɗ, ɓì keesì milig mɛ ɓi nghay mɛ mɛ ri lɛ syeesyee mɛɛ ri jɛ̀ɛ̀ ì Bɛ̀ll di fɔɔnnɛ ɓi tɔɔ̀, ɓì ki ghɛn cɛɓ,

³i ɓì mɛ ɓoɓti ki ghɛɛ̀ lɛ Kan à rɔɔtɛɛ, lɔŋ yɛ̀ɛ ki ri kì kànɛn.

⁴Kɛ̀ɛna jàŋbog rì nyi, nyi ànɛ à rì gɔ̀g ì cem inɛ ɓum ɓɛ ɓengà, kìɓan kifog ì ɓa gɔ̀g ìnɛ Bɛ̀ll à ɓɔ̀ngà, yɛ̀ɛ ki rì gìn i com ɓi mis mii,

⁵fɔɔnnɛ mìni girig, fɛlɛ yɛ̀ɛ gɔ̀g yi yi ri cencem, ɓì rì ɓɛ̀toŋɛn lɛ ɓi ɓa mɛɛ mɛ ɓi Nghay, ɓì ɓa ǹɗaŋ wu ɓɛpìrɛɛtìrɛ̀ ɓɛ ɓɛ ri ɓɛ̀tɛnɛn ɓɛ ɓɛɛ̀ fùufunɛ̀n Bɛ̀ll ɓyom ɓi ɓi Nghay ɓi ɓi ri rɔɔ nyi, lɛ Yeesus Kiris.

⁶Lɛ ki ri kìkaliyɛn ɓi kaàtà lɛ: Ghɛɛna, ǹnɔ̀ŋzii gɔ̀g ìnɛ ɓi ǹtɔn à mɛɛ a Siyon, ì rì m̀ɓɔ̀nɛn, ì ki ɓa gìn i com, fɔɔnnɛ ŋwaànɛ à rì yɔ̀ ɓiì gherɛɛ, àa wog ɓi ǹtoòrìɗ.

⁷Ǹnyaasɛ̀n à rì min ɓisu win wu mini ɓɛ ɓì gherɛɛ; wɔ̀lɛ ɓi ɓɛg ànɛ a ɓɛ̀roɓɛ ɓɛ gherɛɛ ɓi, gɔ̀g ìnɛ ɓɛ̀toŋì-kìtoŋ ɓɛ makà yɛ̀ɛ ghalà ǹlem à gɔ̀g ànɛ ɓi ntɔn à mɛɛ, ì ki ɓa gɔ̀g ì fìɓàg, riɓan ɗi ɓum ɓɛɛ̀ kpìkpi miì.

⁸Ɓɛ ti ɓɛ kpilàg miì lɛ ɓɛ ɓengà kì woògh jɛ̀ɛ̀ ì Bɛ̀ll, fɔlɔɔ nnɛ ki ghɛɛ̀sɛ̀ngà kì ɓaà ɓisu waa.

⁹Wɔ̀lɛ ɓi ɓɛg wìn, mìnii ri boo ì mum ìnɛ ì rì m̀ɓɔ̀nɛn, ǹɗaŋ wu ɓɛpìrɛɛtìrɛ̀ ɓɛ rifòm, kìlɔ̀ŋ ki ki ri ki Bɛ̀ll, ki ɓumɓɛ Bɛ̀ll à tekà ɓisu wiì lɛ ɓɛɛ laàlàmɓɛ̀n ɓɛ̀gɛn ɓɛ mɛkìkìì ɓɛ roànɛ à reŋìghày mìni lɛ ɓi pɛsɛn yì ɓi birìm, ɓi yu ɓi kìtɛɛtɛn kii ki ki ri kìɓan ki kuughrakɛn;

¹⁰mìni ɓɛ ɓì ɓaghà ɓi kìlɔ̀ŋ kii abɛ̀y, mìni yɛɛ ti kìlɔ̀ŋ ki Bɛ̀ll ɓigomìnɛ, mìni ɓɛ Bɛ̀ll àa nti kɛ̀ɛ rèsi ǹɗem wu nyìighnyìg a lɔ̀ŋkin abɛ̀y, ɓigomìnɛ, à mɛ wog mini nyìinyìg.

¹¹Mìni ɓɛ̀geni ɓɛ̀m ɓɛ nɗem, ǹtɔɔgh mìni ɓi rìɓa ɗi lɛ ɓì rì ɓɛ̀kèn ɓɛ ɓɛ ri ɓi rìghaàgh ɓi ziinɛ lɛ ɓi celi ɓìɓan ɓi ɓi ti ɓi yɛɛ̀yì mɛ̀mùù, ɓìɓan ɓiǹ ɓyɛɛ ri ɓi wɛ̀y ri ǹghay wu mum.

¹²Ɓaana rì ɓìsyeesyee ɓi ɓisyɔ̀ɔ̀ ɓi nyìinyìm à ɓumɓɛ ɓɛ yin ɓɛgherɛ̀n, di fɔlɔɔ nnɛ kɛɛ ɓalag lɛ, jàŋ inɛ ɓɛ mɛɛ̀ ɓùŋ mini a mɓeɓɛn, yɛ̀ɛ ɓɛɛ̀ kali lɛ ɓi kìki ɓiɓeɓtàg ɓi ɓiɓan, i ɓɛ ghɛɛ mɛ̀kìkìì min mɛ syeesyee, ɓɛ kemzì Bɛ̀ll ŋwos anɛ à ɓiì yùu.

¹³Rèsiina mɛ̀wog ɓi ɓɛg ànɛ a kìlàmì kìcèm ki ɓum ɓɛ foŋi ɓisuu Kan, nsoò rìfòm ɗyɛ yaa rì, ɓì kì ɗyɔ mɛ̀wog lɛ ɗi ri ǹlàmi àgwey,

¹⁴nsoò ɓɛ̀gɔmìnà ɓɛ yaa rì ɓì wog ɓɔ lɛ ɓɛ ri ɓumɓɛ rìfòm ɗi romi lɛ ɓɛɛ pɔnɔ̀sag ɓumɓɛ ɓɛɛ̀ kìki kiɓe, ɓɛ ki sɛki ɓɛroɓɛ ɓɛɛ̀ kìki kirɔɔ.

¹⁵Ɓisuulɛ rìkɔ̀n ɗi Bɛ̀ll ɗi ri lɛ, ɓi sim ɓumɓɛ ɓɛ ri ɓìdùŋdùŋ ɓɛ̀ kɛɛ̀ yi com myɔm rì kìrɔɔ ki ɓi kìkì.

¹⁶Ghɛɓina yɛ̀ɛ ɓumɓɛ ɓɛ ri ɓɛ̀kan, wɔ̀lɛ kɛ̀ ɓi kì lɛ rìkan ɗin ɗyɛɛ ghay kìlàà ki kɛɛ̀ lɔlɔg nɗem win wu rigɛn; ghɛɓina lɔŋ yɛ̀ɛ ɓɛ̀kìì-ɓìsay ɓɛ Bɛ̀ll ɓɛ ghɛɛ̀sɛɛ kì ghɛɓì ɓi rìkan.

¹⁷Nyaasiina mum bimiɗ, ɓì keesì ɓɛ̀geni ɓin ɓɛ righerɛn, ɓì risì Bɛ̀ll, ɓì nyaasì rìfòm.

¹⁸Mìni ɓɛ̀kìì-ɓìsay, kìina ɓɛ̀masà ɓin mɛwog rì bɔgsɛ̀n bimiɗ; kɛ̀ ɓi wog lɔŋ lɛ ɓɛ̀roɓɛ ɓɛ rɔɔtɛɛ ǹɗem ɓɛ̀ kɛɛ̀ nyɛn, ɓì ghɛ̀ɛ̀sɛɛ girig kì woògh ɓɛ̀roɓɛ ɓɛ ɓeɓtaagh mɛ̀rem,

¹⁹ɓisuulɛ ki ri mààgh di mum à cenɛɛ mɛ̀tɔɓ mɛ ɓɛɛ̀ kìki nyi ɓi mɛ̀ɓèe lɛ a ki Bɛ̀ll mɛ̀wog.

²⁰Lɛ rìkem ɗidɛŋ ɗi yin ɓisuu ŋwaànɛ à ti à cenàg mɛ̀ɓìì mɛ ɓi kìɓe ki nyi yɛɛ kiì. Wɔ̀lɛ i ɓì cenɛɛ rìkɛŋ di ɓi kìi kirɔɔ, fɔlɔɔ a rì mààgh ɓi mis mɛ Bɛ̀ll.

²¹Lɛ rìɓa ɗìn ɗyɛɛ̀ɗi Bɛ̀ll à reŋìghà mìni miì ɓisuulɛ Kiris girig à wokà rìkɛŋ ɓisu win, à ki càɗ mini kìrèmzɛnà ki lɛ ɓi nɔɔ̀ti ɓìɓɔ̀ɓ ɓii.

²²Nyi ànɛ à kìghà ɓi kiɓe, kɛ̀ɛ ki kpaa kiɓan ki pwàà nsoò ŋwos bog;

²³nyi ànɛ à ɓaghà lɛ, ɓɛ soo sɛmi nyi, kɛ̀ɛ pɛ̀ɛ̀zi mum kìsɛmì, àa soo wowòg rìkɛŋ kɛɛ̀ tam mum, kìɓan kifog, à fa ɓìɓan ɓìcèm rì Bɛ̀ll ànɛ à ti à yɔ̀mgì ɓum lɛ saaɗ;

²⁴nyi ànɛ à tɛ̀kà ɓìɓe ɓis ɓi nyoo yìì ɓi kìte aɗyoo lɛ di kɛɛ ɓa lɛ, i tì mɛ wu ɓi san ànɛ a ɓìɓe ɓis, tì ghɛɓ cɛɓ ki ɓumɓɛ ɓɛ ri lɛ saaɗ. Mɛ̀ɓìì mii mɛɛ kighà lɛ ti wɔǹ.

²⁵Ɓisuulɛ ɓì ɓaghà fɛlɛ yɛ̀ɛ jɔ̀ɔ̀ yi yɛɛ dèŋdèŋ kɛ̀ɛ̀ m̀ɓèŋì, wɔ̀lɛ ɓigomìnɛ, ɓì mɛ sugti yɛ̀ɛ mɓèŋì-jɔ̀ɔ̀ ànɛ a ɓèŋɓeŋ mɛghay min.