Read Bafia 1 PYƐƐRI 3 Bible Online

1 PYƐƐRI 3 - Bafia bible

1 PYƐƐRI 3

¹Nsoò mìni ɓɛ̀yiɓ, ɓaana girig rì mɛ̀wog, giɓ bimiɗ a wog yii wiì, di fɔɔnnɛ kɛɛ ɓa lɛ i ɓɛ̀baŋì ɓɛdɛŋ ɓɛ gherɛɛ ɓi jɛ̀ɛ̀ ì Bɛ̀ll, rìkuu ɗi cɛɓ ɗi ɓɛ̀yiɓ ɓaa ɓɛɛ̀ ghɛghɛɓ ri ɓɔ ɗyɛɛ ghɛɛ̀sɛɛ ɓɔ kìsyòŋi ɓi rìgherɛ̀n nsoò mum àa tòòghrɛɛ ɓi ri ɓɔ.

²Lɛ ɓɛ ri ɓiì ghɛɛ̀ yɛ̀ɛ cɛɓ kìn ki ri kìtɛnɛn, rì mɛ̀wog.

³Mɛ̀rɛ̀ŋ min mɛ̀ kɛɛ̀ ɓa mɛrɛ̀ŋ mɛ seeseèrɛ̀n ɓi dan; fɛlɛ yɛ̀ɛ tyòŋ ti ɓaghrɛn, tìcaka rì mɛkpèy mɛ ɓɛ kii rì gol, rì ǹwaà wu syeesyee,

⁴kìɓan kifog ǹɗɛ̀ŋ wu ɓì ghɛɛ̀sɛɛ kìɓaà rì wɔ wu ri wu wu ri wù nyamɛn ɓi nɗem, wɛɛ ri ǹɗɛ̀ŋ wu wu yin lɛ wu ɗyoŋ, lɛ wu ri ǹɗɛ̀ŋ wu nghay wu wu ri lɛ tɛ̀tɛ̀rɛ̀ɛ̀, wɔ tì lɛ fyòoog, rìkuu ɗìn ɗyɛɛ ri gìn i com ɓi mis mɛ Bɛ̀ll.

⁵Fɔlɔɔ nnɛ ɓɛ̀gherɛ̀n ɓɛ ɓɛ̀yiɓ ɓɛ abɛ̀y, ɓɛ dyàɓɛn yaà ì ɓaghà yɛ̀ɛ Bɛ̀ll ɓɛ nti ɓɛ rɛŋɗàg, lɛ ɓɛ nti ɓɛ wokì ɓɛ̀yii ɓaa;

⁶fɔlɔɔ nnɛ Sara àa nti à wokì Abiraham à ki regi nyi lɛ kan wìì. Sara ànɛn nnɛ ɓì ti dòò yii, di ɓi kìki kirɔɔ kɛ̀ ɓi càrɛn lɛ com kidɛŋ kɛɛ niŋzi mìni nyòò.

⁷Fɔlɔɔ nnɛ mìni ɓɛ̀baŋì, ɓì ghɛɛ̀sɛɛ girig lɛ mum bimiɗ a ghɛɓ rì giɓ wiì, à yi lɛ ɓɛ̀yiɓ ɓɛ ri ɓumɓɛ ɓɛ yin ɗi ìtèɗ yɛ̀ɛ ɓɛ̀baŋì; terina ɓɔ rì nyaasɛ̀n lɛ ɓɛ ghɛɛ̀sɛɛ girig kìterì mààgh à cɛɓ bas ɗì mìni, di fɔlɔɔ nnɛ com kidɛŋ kɛ̀ kɛɛ̀ gheŋɗɛn ɓi bɔ̀ŋzɛ̀n yìn.

⁸Ǹsiitɛɛ mìni kìkpaà lɛ, ɓaana ɓɛ̀fèg ɓɛ̀fog, ǹkɔ̀nɛ̀n bog, ɓaana ɓɛ̀ronɛn ɗi ǹkɔ̀nɛ̀n à rìgeni, ɓì ɓa rì nɗem wu nyìinyìg rì nɗem wu sɛɛ̀dɛn mìniìɓɔmiɗ ɓi zi.

⁹Kɛ̀ ɓi rɔ̀ŋ kiɓe ri kìɓe, nsoò lɛ ɓi pɛɛ̀zi fìsɛm ri fìsɛm, lɔŋ com ki ɓì ghɛɛ̀sɛɛ kìkiì ki ri lɛ ɓi maŋ̀maŋ ɓum, lɛ kìɓan ki Bɛ̀ll à reŋìghà mìni miì kɛɛ̀kìn, lɛ ɓi teɗ mɛ̀wus mɛ ɓɛmààgh.

¹⁰Ɓisuulɛ ŋwaànɛ a kɔ̀nkɔn lɛ a keesi cɛɓ, à ghɛn mɛ̀ru mɛ kinyàà, à ghɛ̀ɛ̀sɛɛ kìɓèŋi ŋwɔm wii lɛ kɛ̀ɛ kpaakpaa ɓiɓan ɓi ɓeɓtɛn kɛ̀ɛ kì ɓɛ̀pwàà;

¹¹à ghɛ̀ɛ̀sɛɛ kì lɔ̀ghii jɛ̀m rì kìɓe, kìrɔɔ kɛɛ̀ki à kìkì, à falɛ̀n ɓi rìkaakàà ɗi fyòoog.

¹²Ɓisuulɛ mis mɛ Kan mɛɛ̀ seesee ɓumɓɛ ɓɛ ri lɛ saaɗ, mɛ̀reè mii mɛramɛn rì bɔ̀ŋzɛ̀n yaa, kìɓan kifog, Kan à ti à paàzàg rì ɓumɓɛ ɓɛɛ̀ kìki kiɓe.

¹³Ghɛn yɛɛ ri min lɛ à tɔɓ mìni di ɓì falɛɛ ɓi rìkì ɗi kirɔɔ rì ìtèɗ?

¹⁴I ki kpaŋi gi kɔm̀ lɛ ɓi wog ǹtɔɓ ɓisuu saaɗ, di ɓì rì rì ɓɛ̀mààgh; kɛ̀ ɓi risi ɓum nsoò, kɛ̀ ɓi ki ɓùùsɛn;

¹⁵wɔ̀lɛ kemziinà Kiris ɓi mɛ̀rem min fɛlɛ yɛ̀ɛ Kan wìn. Ɓaana cààmɛ̀n kìcèm ɓɛ̀pègsɛn lɛ ɓi ɓag mum bimiɗ ànɛ à tɔɔgh mìni azi anɛ ɓi dyàɓɛn inɛ ɓì rì rì yɔ̀.

¹⁶Kìɓan kifog kìina fɔlɔɔ ri ǹɗem wu tɛ̀tɛ̀rɛ̀ɛ̀, rì bɔgsɛ̀n; ǹɗem win wu ɓa wù tɛnɛn ɓi lèg ànɛ lɛ jàŋ inɛ ɓɛɛ̀ tòtog mini kìɓe, ɓumɓɛ ɓɛɛ̀ feefengì syeesyee wìn a rìghɛɓ ɓi Kiris ɓi ɗùm ɓɛɛ wog ǹtoòrìɗ.

¹⁷Lɛ ki ri kìrɔɔ lɛ mum a wog ǹtɔɓ lɛ a kìki kirɔɔ, di fɔlɔɔ yɛɛ ri rìkɔ̀n ɗi Bɛ̀ll à cee lɛ a wog ǹtɔɓ lɛ a kìki kìɓe.

¹⁸Ɓisuulɛ Kiris girig à wughà gɛ̀n bog ɓi gɛnicèm ɓisuu ɓiɓe ɓi ɓum, nyi ànɛ à ɓaghà syeesyee à mum, à wu ɓisuu ɓiɓeɓtàg ɓi ɓum lɛ di a kɛǹ ɗì mìni yɛ̀ɛ Bɛ̀ll. Ɓɛ wolà nyi rìwu ɗi ɓi mɛ̀mùù à ghèmɓɛ̀n ɗì ìtèɗ wu Nghay.

¹⁹Rì Nghay ànɛ̀n innɛ à kɛ̀ngà kɔm̀ kì kakalii Syeesyee à Ɓɔlɛ a mɛ̀ghay mɛ mɛ ri ɓi naà-zày,

²⁰yɛɛ lɔɔ lɛ mɛ̀ghay mɛ ɓumɓɛ ɓɛ kighà Bɛ̀ll ɓɛ̀lɔg ɓi mɛ̀ru mɛ ajɛ̀m, cààmɛ̀n ki Bɛ̀ll à sììsììrìghà nɗem, à ɓoŋɓòŋ; ɓi mɛ̀ru mɛ Nowe à sosòɓkà kìkɔm; kìkɔm kìn kɛɛ kighà lɛ ɓɔɔ ɓum ɓɛ̀sɛ̀ɛ̀ taàraa ɓɛ ghɛɓkà lɛ mɛ̀nig.

²¹Mɛ̀nig mɛǹ mɛ ɓaghà kìfèèghrɛnà ki bàɓtis ìnɛ yɛɛ̀ ghɛɛghɛɓsì mìni ɓigomìnɛ, bàɓtis ìnɛ̀n ì yin ɓiì sòòsoo tifin ti ɓi nyoo, kìɓan kifog ì rì rìfalɛ̀n ɗi mum à falɛɛ yɛ̀ɛ Bɛ̀ll rì syeesyee à nɗem. A ghɛɛghɛɓsì mìni lɛ rìghèmɓɛ̀n ɗi Yeesus Kiris à ghèmɓɛ̀ngà,

²²à ɓɔg aɗyoo, à rì ɓi weèlem à Bɛ̀ll; wɔɔ a làlami lɛ rì ɓum ɓɛ titom, rì mɛ̀tèɗ mɛ ɓi ɗyoo mɛ̀cèm[1].