Read Bafia 1 PYƐƐRI 4 Bible Online

1 PYƐƐRI 4 - Bafia bible

1 PYƐƐRI 4

¹Nni yɛ̀ɛ Kiris à wokà rìkɛŋ ɗi ɓi mɛ̀mùù, mìniìrig ɓanɛɛ na rì rìyitì ɗiǹ ɓisuulɛ ŋwaànɛ à mɛ wog rikɛŋ ɗi ɓi mɛ̀mùù, à rì ŋwaànɛ à mɛ ghasɛn ɗi kìɓe

²lɛ di fɔɔnnɛ a ghɛɓ yɛ̀ɛ rìkɔ̀n ɗi Bɛ̀ll ɗi ri, ɓi gàɓ ì mɛ̀ru ìnɛ à ghɛ̀ɛ̀sɛɛ tì kìghagsii ɓi ziinɛ, kɛ̀ɛ ghɛɓ ti cɛɓ ki ǹɗem wii wɛɛ̀ kɔ̀nkɔn lɛ a ghɛɓ.

³Ɓisuulɛ ɓì roòzìghà rìkɔ̀n ɗi ɓumɓɛ ɓɛ gherɛɛ ɓi Bɛ̀ll yɛ̀ɛ ɓì ghɛghɛ̀ɓkà ɓi kìɓùùsì, ɓì kìkì ɓìɓan ɓi ǹɗem win wɛɛ̀ kɔ̀nkɔ̀n, ɓì nɔnɔ̀ mɛ̀rɔ̀g, ɓì ɗiɗì ɓìɗilàg rìɗi ɗi kiɓe, ɓì ŋwaŋŋwàŋ mɛ̀rɔ̀g, ɓì ki ɓɔɔɓɔgsì ɓìnùn ɓi ɓi ri kìɓan ki ki ɓeɓtɛɛ ki ciɓ.

⁴Nni ɓigomìnɛ ɓumɓɛ ɓɛ yin ɓɛgherɛ̀n ɓɛɛ̀ kuukuùghràg yɛ̀ɛ ɓì nɔ̀ɔ̀tii tì ɓi ɓɔ ɓi coo kiɓeɓtàg ki cɛɓ kìn, fɔɔnnɛ ɓɛɛ̀ wɔmwɔm mini.

⁵Kìɓan kifog ɓɛ ɓàagh gɛ kìɓan ki ɓɛɛ̀ kìki kiǹ ɓi mis mɛ roànɛ à ti jàŋbog lɛ a yɔm̀ lɛ rì ɓum ɓɛ cem rì ɓìloŋ.

⁶Kìɓan kiǹ kɛɛ̀ki Syeesyee à Ɓɔlɛ à kalɛ̀ngà girig a ɓìloŋ, a ɓɛ̀roɓɛ ɓɛ ɓaghà ɓɛ̀yɔ̀mɛn ɓi cɛɓ kaa ki mɛmùù lɔŋ yɛ̀ɛ ɓum ɓɛ̀cèm, lɛ di ɓɛɛ ɓa rì ìtèɗ wulɛ ɓɛɛ ghɛɓ yɛ̀ɛ Bɛ̀ll rì ìtèɗ wu Nghay.

⁷Rìsugtɛ̀n ɗi ɓyom ɓìcèm ɗi ti jàŋbog, fɔlɔɔ nnɛ ɓì ghɛ̀ɛ̀sɛɛ kì ɓaà rì ɗyomzɛ̀n, kɛ̀ ɓi falɛn ɓi ɓìnɔɔ̀nɔɔ̀, di ɓi kiki bɔ̀ŋzɛ̀n.

⁸Kìɓan ki asu ki ri lɛ: Ɓaana rì ǹkɔ̀nɛ̀n ànɛ kɛ̀ɛ lɔ̀gtɛn ɓi nyìinyìm wìn, lɛ ǹkɔ̀nɛ̀n à ti à lɔkì ǹkun wu ɓiɓe.

⁹Ɓaana rì ǹɗem wulɛ ɓi ghaɓki ɓɛ̀geni ɓin di ɓɛ yuu a lɔ̀ŋkin kɛ̀ɛ̀ tìrùrùmì.

¹⁰Yɛ̀ɛ mum ǹcèm ànɛ ɓi mìni à rì rì rìfa ɗi Bɛ̀ll à faghà nyi, kìina kìsay ri rìfa ɗi Bɛ̀ll à faghà mìni ɓi kìrɔɔ ki ɓum ɓɛmbog fɛlɛ yɛ̀ɛ ɓɛ̀syeesyee ɓɛ ɓum ɓɛ ɓɛɛ̀ kɛ̀ɛkɛɛ̀sì geesɛ̀n ì Bɛ̀ll ìnɛ ì ti ì ghɛnàg bee lɛ bee.

¹¹I mum à pinii ŋwɔm lɛ a kali ɓìɓan ɓi Bɛ̀ll, a ghagsi lɔŋ jɛ̀ɛ̀ ìnɛ ì rìì yɛ̀ɛ Bɛ̀ll, ŋwaànɛ a ghɛɛghɛɓsì kìsay, à ghɛ̀ɛ̀sɛɛ kɔ kì kìi ri ìtèɗ wu Bɛ̀ll à faa nyi, di fɔlɔɔ nnɛ Bɛ̀ll a teɗ rìkem ɓi ɓìɓan ɓìcèm lɛ Yeesus Kiris ànɛ à rì lɛ, rì rìkem, rì ìtèɗ, fiɗyàɓ fikɔ̀ɔ̀. Ààmɛ̀n.

¹²Mìni ɓum ɓɛm ɓɛ nɗem, rìɓa ɗi ɓì rì ɓi ɓɛ̀gɛn ɓɛ mɛfèèghrɛn ɓɛ ɓɛ ri yɛ̀ɛ ɗuu ɗi ghɛ̀g-ghɛ̀g, ɗyɛ̀ kɛɛ̀ sìɗ mini yɛ̀ɛ ɓɛɛ̀ kali lɛ kìkènekènè ki kiɓan kidɛŋ kɛɛ tanɛɛ mìni.

¹³Ɓì ghɛ̀ɛ̀sɛɛ lɔŋ lɛ ɓì nyààrɛ̀n lɛ ɓi teteɗ gàɓ ì mɛ̀tɔɓ mɛ Kiris, di fɔɔnnɛ ɓi ɓiì rongii girig rì kìnyàà yɛ̀ɛ rìkem ɗii ɗi ri ɓiì ghɛnɛɛ.

¹⁴I ɓɛɛ̀ sɛɛsɛmgì mìni lɛ ɗii ɗi Kiris, di ɓì rì ɓɛ̀mààghmaagh ɓisuulɛ Ǹghay à rìkem, Ǹghay à Bɛ̀ll à rì ɓi mìni.

¹⁵Wààdɛŋ kɔ̀ɔ ɓa lɛ ù wowòg mɛ̀tɔɓ lɛ ù woli mum, nsoò lɛ ù yii com, nsoò lɛ ù kìi coo kiɓeɓtàg ki kiɓan kidɛŋ, nsoò lɛ ù pùrii ŋwɔm ɓi kìɓan ki ɓum ɓɛdɛŋ;

¹⁶wɔ̀lɛ i ki ri lɛ ɓi wowog ntɔɓ ɓi ɗii ɗi lɛ kìristɛ̀n, kɛ̀ ɓi wog ntoòrìɗ, ɓì ghɛ̀ɛ̀sɛɛ lɔŋ ki kemzii Bɛ̀ll ɓisuu ɗii ɗìn.

¹⁷Ɓisuulɛ cààmɛ̀n ki ɓɛyɔ̀m ki kpaŋi, nni ɓɛ̀yɔ̀m ɓɛǹ ɓɛ tumɛɛ ɓi naa ì ɓum ɓɛ Bɛ̀ll. I ɓi ɓìsi nnɛ ɓɛ̀yɔ̀m ɓɛ tumɛɛ, rìsyɔn ɗi ɓumɓɛ ɓɛ ti ɓɛ ɓengì kì gherɛɛ Syeesyee à Ɓɔlɛ ɗi ri ɓa là?

¹⁸I rìghɛɓ ɗi ŋwaànɛ à rì lɛ saaɗ a ghɛɓ ɗi ka ti fɔlɔɔ ri ntɔɓ, ki ɓa min la ɓi san ànɛ yɛ̀ɛ kiɓeɓtàg ki mum rì ǹkìì-kìɓe?

¹⁹Fɔlɔɔ nnɛ ɓumɓɛ ɓɛɛ̀ wowog mɛtɔɓ lɛ Bɛ̀ll yɛɛ kɔni, ɓɛ ghɛɛ̀sɛɛ kì faà ɓyɛɓ ɓyaa ri ǹkìì-ɓyom ɓìcèm ànɛ à ti à roòzàg mɛ̀kàg mii, ɓi rìkì ɗi ɓɛɛ̀ kiki kirɔɔ.