Read Bafia 1 PYƐƐRI 5 Bible Online

1 PYƐƐRI 5 - Bafia bible

1 PYƐƐRI 5

¹Ǹtɔɔgh min ɓɛsɛ̀ɛ̀mɛn ɓɛ Kiseŋi ɓɛ ɓɛ ri ɓi nyìinyìm wìn, mɛ̀ ànɛ ǹɗì girig Ǹsɛ̀ɛ̀mɛn a Kìseŋi yɛ̀ɛ ɓɔ, ǹki ɓa ti wusìnɛ̀ɗ ànɛ ɓi mɛ̀tɔɓ mɛ Kiris, mɛ ti rì gàɓ ɓi rìkem ɗi ɗi ghɛɛ̀sɛɛ kì rèsɛɛ,

²lɛ mɛniina kìtuu ki jɔ̀ɔ̀ ki Bɛ̀ll ki ɓɛ reɓsɛ̀ngà rì mìni; kɛ̀ kɛɛ̀ ɓa yɛ̀ɛ ǹkàŋɗɛ̀n, mɛniina yɔ rì syeesyee à rìkɔ̀n yɛ̀ɛ kɛɛ̀ kɔ̀ngi Bɛ̀ll, kɛ̀ ɓi kì kisay kiǹ rì ǹɗem wulɛ ɓi fɔǹ mɔ̀ɔ̀ni, kììna lɔŋ kɔ rì syeesyee à nɗem.

³Kɛ̀ ɓi tuturi ɓumɓɛ ɓɛ faghà mìni lɛ ɓi ɓeŋ̀, kìɓan kifog ɓaana kìfèèghrɛnà ki jɔ̀ɔ̀ yi Bɛ̀ll yi ri lɛ yi nɔɔ̀tì;

⁴fɔlɔɔ nnɛ yɛ̀ɛ ǹkɔ̀mɛ̀n ɓɛ̀ɓèŋì-jɔ̀ɔ̀ à ɓiì kpaŋì, ɓì ɓiì terì tàm à rìkem ànɛ à yin lɛ à ɗyoŋ.

⁵Mìni ɓìɓwɛɗ ɓi ɓum, ɓì ghɛ̀ɛ̀sɛɛ girig lɛ ɓi ki ɓɛ̀sɛ̀ɛ̀mɛn mɛwog. Nni mìni ɓɛ̀sɛ̀ɛ̀ ɓɛ̀cèm, ɓi cɛɓ ki ɓi ghɛghɛɓ mini rì mìni, sɛɛ̀dɛɛna mìniìɓɔmiɗ ɓi zi, ɓisuulɛ Bɛ̀ll à ti kɛ̀ɛ ɓa nkɔɔ rì ɓɛ̀daŋàdaŋa, lɔŋ ɓɛ̀roɓɛ ɓɛ sɛɛ̀dɛɛ ɓɔmiɗ ɓi zi ɓɛɛ̀ɓɛ a rèsag geesɛ̀n yìì.

⁶Nni sɛɛ̀dɛɛna min mìniìɓɔmiɗ ɓi zi ɓi mis mɛ Bɛ̀ll ànɛ à rì rì ìtèɗ ucem lɛ nyi yɛɛ pɛsi mìni aɗyoo ɓi cààmɛ̀n ki à siŋdɛ̀ngà.

⁷Sɛɛ̀dɛɛna ɓìɓan ɓìcèm ɓi ɓyɛɛ̀ ɗiɗi mini mɛ̀rem a lɔ̀ŋkii ɓisuulɛ nyimiɗ a ɓeŋ̀ɓeŋ mini.

⁸Ɓaana cem, ɓì konàg ɓisuulɛ bènàbena wiǹ ànɛ lɛ Satàn a ŋwɔŋ-ŋwɔŋ yɛ̀ɛ kìmonɗo ki kɛɛ̀ kaakaa com ki kɛɛ sokɛn.

⁹Ɓaana ɓɛ̀sììrɛn ɓi rìgherɛ̀n, kɛ̀ ɓi càrɛn lɛ a ɓigti mìni, ɓì ki yi lɛ ɓɛ̀geni ɓin ɓɛ rìgherɛ̀n ɓɛɛ̀ tuutulɛ̀n rì mɛ̀kuu mɛ mɛtɔɓ mɛ̀n ɓi ziinɛ.

¹⁰Fɔɔnnɛ ki ɓiì ɓaà lɛ i ɓyàa wog rikɛŋ ɓi maa cààmɛ̀n, Bɛ̀ll ànɛ à rì rì geesɛ̀n bimiɗ, ànɛ à reŋìghà mìni lɛ ɓi teɗ gàɓ ɓi rìkem ɗii ɗi fiɗyàɓ fikɔ̀ɔ̀ ɓi Kiris ɓi ɗùm, à rì mìni ɓiì konagh ki rɛsii lɛ syeesyee nyimiɗ, à sììràg mìni, à fa mìni ìtèɗ, à kì lɛ ɓi ɓa ɓumɓɛ com ki yin lɛ ki ɓigtì.

¹¹Bɛ̀ll ànɛn yɛɛ ri rì ìtèɗ fiɗyàɓ fikɔ̀ɔ̀ Ààmɛ̀n.

¹²Ǹkàniì mìni ɓɔɔ jɛ̀ɛ̀ ɓɛ rì Silvɛŋ[2] ànɛ à rì geni wìs a ǹtyweeyi lɛ nfa mìni deɓ, ǹki tɛɛ̀zi mini kì rèsii lɛ fɔlɔɔ nnɛ kɔɔ̀kɔɔ̀ à geesɛ̀n ì Bɛ̀ll, ànɛ ɓì rì miì ɓɛ̀sììrɛn lɛ tiŋtiŋ, à rì.

¹³Kìseŋi ki ɓumɓɛ ɓɛ ri ɓɛ̀ɓɔ̀nɛn ki a Baɓilon ki togsaagh yì mìni, Marikus à man wɛm̀ à tògsì girig mìni.

¹⁴Tògsɛɛna mìni rì mìni, di ɓi lɔ̀ɔlɔrɛ̀n ɓi nkɔ̀nɛ̀n à rìgeni. Fyòoog a ɓa rì mìni ɓɛ̀sɛ̀ɛ̀ ɓɛ̀cèm ɓɛ ɓì rì ɓi Kiris ɓi ɗùm.