Read Bafia 2 PYƐƐRI 1 Bible Online

2 PYƐƐRI 1 - Bafia bible

2 PYƐƐRI 1

¹Mɛ̀ Simɔn Pyɛɛri ànɛ ǹɗì ǹkìì-kìsay, ǹki ɓa ti nkɛ̀nì-fìtom a Yeesus Kiris, ǹkàni ɓumɓɛ Bɛ̀ll à faghà rìkuu ɗi ntyweeyi ɗifog rì ɗinkis, ɓisu saaɗ à Yeesus Kiris à Bɛ̀ll wìs rì ǹghɛɓsì wìs.

²Geesɛ̀n rì fyòoog ɓyɛɛ teghɛn a lɔ̀ŋkin lɛɛ̀gwey lɛ rìyi ɗi ɓì yii lɛ rì Bɛ̀ll rì Yeesus Kiris à Kan wìs.

³Ìtèɗ wu Kan wu wu riì yɛ̀ɛ Bɛ̀ll wu faghà ɓìsi com kìcèm ki ki ri lɛ ki ghɛɓsì ɓìsi lɛ ti ghɛɓ cɛɓ ki lɛ ti falɛn rì Bɛ̀ll ɓi rìkì ɗi à kìghà lɛ ti yi roànɛ à reŋìghà ɓìsi lɛ ti kaɓɓɛn rìkem ɗii, rì syeesyee wìì a kìsyɔ̀ɔ̀.

⁴Fɔlɔɔ nnɛ à faghà ɓìsi ɓyoo ɓisyeesyee rì gìn yi mɛkàg lɛ, i ɓì teri ɓyom ɓi à kàkà, ɓì ɓa rì ìtèɗ wulɛ ɓi ghɛŋi ɓìɓeɓtàg ɓi ɓiɓan ɓi ɓyɛɛ̀ yooyogsì ɓum ɓyɛɛ ri ɓìcakɛn ɗi ziinɛ, ɓi yu kì terì gàɓ ɓi rìɓa ɗii ɗi à rì Bɛ̀ll.

⁵Ɓisu wìn miì nnɛ ɓì ghɛɛ̀sɛɛ kì foŋì ìtèɗ win wucèm lɛ, ɓi ɓɔɓtɛn syeesyee à kìsyɔ̀ɔ̀ ɓi rìgherɛ̀n ɗin, ɓì ɓɔ̀ɓtɛ̀n rìyi ɓi syeesyee à kìsyɔ̀ɔ̀,

⁶ɓi rìyi ɗìn aɗyoo, ɓì ɓɔ̀ɓtɛ̀n tì rìnìɗ ɗi nɗem; ɓi rìnìɗ ɗi nɗem ɗìn, ɓì sagtɛ̀ntì kìsììrì; ɓi kìsììrì kiǹ, ɓì foŋdì rìfalɛ̀n ɗi ɓi rìgherɛ̀n;

⁷ɓi rìfalɛ̀n ɗi ɓi rìgherɛ̀n, ɓì ɓɔ̀ɓtɛ̀ntì kìrɔɔrɛɛ ki ɓi rìgeni; ɓi kìrɔɔrɛɛ ki ɓi rìgeni kìn, ɓì foŋ̀dì ǹkɔ̀nɛ̀n.

⁸Ɓisuulɛ i ɓì rì rì ɓìɓan ɓiǹ, nni ɓi ghɛnɛɛ a lɔ̀ŋkin lɛɛ̀gwey, ɓì yin lɛ ɓì rɔ̀ɓ lɛ ɓì kìi ɓi lɛ ɓi ɓa ɓumɓɛ ɓɛɛ̀ sasày ɓɛ ki wumwum ɓiɗùn, ɓi rìyi ɗi ɓì yii Kan wìs Yeesus Kiris.

⁹Kìɓan kifog, ŋwaànɛ à tàŋi ɓìɓan ɓiǹ à rì ɗyaŋɗyàŋ ànɛ a mɔmɔɓ m̀mɔmɔɓɛn, à ɗimzɛ̀n lɛ ɓìɓe ɓii ɓi abɛ̀y ɓi ti ɓì sòòyɛn.

¹⁰Kìɓan kiǹ kɛɛ̀ki mìni ɓɛ̀geni ɓɛ̀m, ɓì ghɛ̀ɛ̀sɛɛ kì tèèsii nyoo lɛ ɓi siìrag ǹɗeèghreŋi win ɗi rìɓɔ̀n ɗi Bɛ̀ll à ɓɔ̀ngà mìni; i ɓì kìi fɔlɔɔ, ɓyàa kpì ɓi ɓi kìɓe.

¹¹Fɔlɔɔ anɛ̀n nnɛ rìɗiŋì ɗin ɗi ɓi kìlɔ̀ŋ ki fiɗyàɓ fikɔ̀ɔ̀, ki Kan wìs rì ǹghɛɓsì wìs Yeesus Kiris, ɗi ri ɓiì ɓaà kɛ̀ɛ̀ maa ntɔɓ nsoò lɛsàg.

¹²Kìɓan kiǹ kɛɛ̀ki ǹɗì lɔŋ mini ɓiì yiiyitàg ɓìɓan ɓiǹ cààmɛ̀n kìcèm kaa soo rì lɛ ɓì mɛ yi ɓyɔ, ɓì ki ɓa ɓɛsììrɛn lɛ syeesyee ɓi saaɗ ànɛ ɓì tekà.

¹³Mɛ̀ɛ ǹghɛɛ lɛ ki ri lɛ syeesyee lɛ cààmɛ̀n kìcèm ki ǹkaka ɓi ziinɛ, nki lɛ ǹɗem win wɛ̀ kɛɛ̀ wu ɓi rìyitì ɗi ǹɗì mìni ɓiì yiiyitàg ɓìɓan ɓiǹ,

¹⁴ɓisuulɛ ǹ-yii lɔŋ yɛ̀ɛ Kan wɛ̀m Yeesus Kiris àa nɗèsii mɛ̀ lɛ rìpɛ̀sɛ̀n ɗyɛm̀ ɗi ɓi ziinɛ ɗi ti jàŋbog.

¹⁵Kìɓan kifog ǹɗì ɓiì kaà bee inɛ lɛ ajɛ̀m ì rìpɛ̀sɛ̀n ɗyɛm̀, ɓi rɔɓ kìyitaagh ɓiɓan ɓiǹ ɓi ɓyààmɛ̀n ɓi ɓi ghɛɛ̀sɛɛ.

¹⁶Lɛ yɛ̀ɛ tì rèsìghà mìni kìɓan ki lɛ Kan wìs Yeesus Kiris à rì ɓiì sugtii yi, à ɓay rì ìtèɗ, tì ɓaàdɛ̀ngà ɓi ɓi mɛ̀kànkàn mɛ ɓum ɓɛ konaagh kì syaàgh, tì rèsìghà lɔŋ mini kìɓan kiǹ ɓisuulɛ ɓìsiìɓɔmiɗ tì ghɛngà rìgwey ɗii fɛlɛ rì mis mìs.

¹⁷Ɓisuulɛ à tekà lɛ rì ǹnyaasɛ̀n rì rìkem yɛ̀ɛ Bɛ̀ll à Seŋi wìs ɓi cààmɛ̀n ki jɛ̀ɛ̀ ìnɛ ì ɓaghày ɓi jàŋ inɛ rìkem ɗi Bɛ̀ll ɗi ɗi cee ɗi ri, lɛ: Roànɛ à rì man wɛm̀ à nɗem ànɛ à ti à rɔɔghì mɛ̀.

¹⁸Tì wokày jɛ̀ɛ̀ ìnɛn di ì tòòghrɛɛ yì ɓi ɗyoo yɛ̀ɛ tì ɓaghà rì nyi ɓi dòn ìnɛ ì rì ǹtɛnɛn aɗyòò.

¹⁹Fɔlɔɔ nnɛ tì ɓiisɛɛ tì kìgherɛɛ rikpaa ɗi ɓɛ̀kpaŋzì-ɓìɓan lɛ ɗi ri saaɗ; saaɗ ànɛ̀n innɛ ɓi kookonàg yɛ̀ɛ ɓi ranɗam mɛreè lɛ ɓi wog lɛ à rì fɛlɛ yɛ̀ɛ lamɓà ànɛ a ròòroo ɓi jàŋ inɛ ì rì birìm, à kpaŋ yɛ̀ɛ duri i ɓiì tanì, fyɛy fi duriɓuɓ fi kpeŋzì mɛ̀rem min.

²⁰Kìɓan ki asu ki ɓì ghɛ̀ɛ̀sɛɛ kì yiì ki ri lɛ, kɛ̀ɛ̀ kìɓan kidɛŋ ki ɓɛ̀kpaŋzì-ɓìɓan ɓɛ resìghà ki ki ri kìkànɛn, ki mum à rì lɛ à wog azi anɛ miì yɛ̀ɛ nyii kɔni lɛ a wog,

²¹ɓisuulɛ ɓum ɓɛ ti kɛ̀ ɓɛɛ̀ kpaŋzi-ɓiɓan ɓi Bɛ̀ll ɓi rìkɔ̀n ɗyaa ɗi ɓɔmiɗ, kìɓan kifog ɓum ɓɛ toòghrɛ̀ngà ɓi ɗii ɗi Bɛ̀ll lɛ Kìtɛntɛ̀ɛ̀n ki Nghay ki tinìghà ɓɔ lɛ ɓɛɛ toòghrɛn.