Read Bafia 2 PYƐƐRI 3 Bible Online

2 PYƐƐRI 3 - Bafia bible

2 PYƐƐRI 3

¹Mìni ɓum ɓɛm ɓɛ nɗem, kaàtà wɛ̀m à kìɓɛ̀ɛ̀ ànɛ ǹkàniì mìni yɛɛ ri lɛ; ɓi kìɓɛ̀ɛ̀rɛn ki ɓɛ̀kaàtà kiǹ, n-yiiyitì mìni ɓìɓan, lɛ nghem̀zi mìni mɛ̀rem yɛ̀ɛ ɓi ɓa rì syeesyee à fèg

²lɛ ɓi yiìyìtàg lɛ rì ɓìɓan ɓi ɓɛkpaŋzì-ɓìɓan ɓɛ ɓɛ ri ɓɛ̀tɛnɛn ɓɛ kpaaghà lɛ ɓi ɓiì kìlɛɛ, rì kìdɔ̀gsɛna ki Kan ànɛ à rì Ǹghɛɓsì-ɓum, kɛɛ̀ki ɓɛ̀kɛ̀nì-fìtom ɓin ɓɛ resìghà mìni.

³Ka looghna kì yiì lɛ, ɓi mɛ̀ru mɛ siitòn, ɓum ɓɛdɛŋ ɓɛ ɓiì pee yì, ɓɛ ghɛghɛ̀ɓ lɔŋ yɛ̀ɛ mɛ̀rem maa mɛɛ̀ kɔ̀nkɔ̀n, ɓɛ wɔwɛ̀y mìni

⁴ɓɛ ki kpaakpaa lɛ: Nni ǹkàg wu à kàkà lɛ à ɓiì sugtii yi wɛm̀be min? Lɛ à tumɛ̀n yɛ̀ɛ ɓɛ̀seŋi ɓis ɓɛ cuughà, ɓìɓan ɓìcèm ɓi ri lɔŋ zìŋ ɓi-kɔ̀ɔ̀ yɛ̀ɛ ɓyaà ɓa, à tumɛ̀n yɛ̀ɛ zi i kìlɛ̀ngà.

⁵Lɛ ɓɛ ti ɓɛ ɗimzàg ɓi rìfee lɛ, ɗyoo rì zi ɓi kilɛ̀ngà abɛ̀y di Bɛ̀ll à tòòghrɛɛ, zi i kpaŋ yì ɓi mɛ̀nig, yɔ̀ nkìyɛn ɗi mɛ̀nig.

⁶Nni mɛ̀nig mɛ coo don inɛ ì kìlɛ̀ngà mɛɛ ki yogsìghà tì lɛ rì ɗyoo rì zi ɓi ɓi ɓaghà ǹtonto.

⁷Kìɓan kifog, ɗyoo rì zi ɓi tì seesee ɓi gɛɛ̀nɛ, ɓi ri ɓyom ɓi jɛ̀ɛ̀ ì Bɛ̀ll yɔ̀miɗ inɛ̀n yɛ̀ɛ ɓèŋɓèŋ lɛ ɗuu ɗi ri ɓyɔ ɓiì yogsii ŋwos anɛ ɓɛ ri yɔ̀mi gɛ ɓɛ̀kìì-kìɓe, ɓɛ cuusì ɓɔ.

⁸Wɔ̀lɛ com ki ɓì ghɛ̀ɛ̀sɛɛ ɓi ki ɗimzɛɛ, mìni ɓum ɓɛm ɓɛ nɗem, ki ri lɛ: Ìru wùfog ɓi mis mɛ Kan wu ri yɛ̀ɛ bèg tɔɔsìm; bèg tɔɔsìm yi ɓa yɛ̀ɛ ìru wùfog.

⁹Kan à lɛ̀mzii ɓi lɛ a roòzi ǹkàg wu à faghà yɛ̀ɛ ɓum ɓɛdɛŋ ɓɛɛ̀ fèfèg, ki ri yɛɛ ri lɛ, a nìniɗ nɗem rì mìni, lɛ ki kɔni ɓi nyi lɛ mum a ɗyaŋ̀ nsoò bog, rìkɔ̀n ɗii ɗi ri lɛ ɓum ɓɛ̀cèm ɓɛɛ kpaŋ ɓi nɗɛli wulɛ ɓɛɛ lɔɔ̀ghrɛn mɛ̀rem.

¹⁰Ŋwos a Kan à ɓiì kpaŋì yɛ̀ɛ wiiwìì à ti à yùlàg. Ŋwos anɛ̀n, ɗyoo ɗi ri ɓiì silii ri coo gom, ɗuu ɗi digsì ɓyom ɓi ɓi ɗyoo, zi rì ɓìɓan ɓi miì ɓìcèm ɓi ɗig.

¹¹Nni yɛ̀ɛ ɓyom ɓìcèm ɓi ghɛɛ̀sɛɛ kì ɗyaŋì fɔlɔɔ, ki ghɛɛ̀sɛɛ lɛ cɛɓ kin, ɗì rìfalɛ̀n ɗin ɗi ɓi rìgherɛ̀n ɓyɛɛ ɓa ɓìtɛnɛn lɛ kɔɔ̀kɔɔ̀.

¹²Mìni ɓɛ ɓi ɓoŋɓòŋ, ɓì ki lolos lɛ di ŋwos a Bɛ̀ll àa kpaŋi, ŋwos anɛ̀n yɛɛ ri ŋwos anɛ ɗuu ɗi ri ɓiì yogsii ɗyoo, ɓyom ɓi ɓi ri ɓi ɗyoo ɓi ghaŋmɛ̀n rìtɔ̀n ɗi nɗòò wu ɗuu.

¹³Kìɓan kifog ɓìsii ɓoŋɓòŋ lɛ rì ɗyoo ɗi nyɔn rì zi i nyɔn ìnɛ saaɗ à ri ɓa miì, lɔŋ yɛ̀ɛ à kàkà.

¹⁴Kìɓan kiǹ kɛɛ̀ki, mìni ɓum ɓɛm ɓɛ nɗem, cààmɛ̀n ki ɓi ka ɓoŋɓoŋ ŋwos anɛ̀n, tèèsiina nyoo lɛ ɓi ɓa ɓɛ̀tɛnɛn, kɛ̀ɛ̀ bɛ̀lɛn ɓi mis mɛ Bɛ̀ll, ɓì ki ɓa lɛ fyòoog rì nyi.

¹⁵Terina rìnìɗ ɗi ǹɗem ɗi Kan wìs lɛ ɗi ri ɓi kìrɔɔ kin lɔŋ yɛ̀ɛ geni wìs a nɗem ànɛ lɛ Pol à kàngà girig mìni ɓi ɗyomzɛ̀n ɗi Bɛ̀ll à faghà nyi.

¹⁶Fɔɔnnɛ à ti à kìlàg ɓi ɓɛ̀kaàtà ɓii ɓɛ̀cèm ɓɛ à ɓùŋi ɓìɓan ɓin miì, ɓɛ̀kaàtà ɓɛǹ ɓɛ ri rì jɛ̀ɛ̀ yidɛŋ yi yi teri rìwog, yɛɛ̀ yi ɓum ɓɛdɛŋ ɓɛ ɓɛ yii ɓi com, ɓɛ̀ kɛɛ̀ ɓa ɓɛsììrɛn yɛ̀ɛ ki ghɛɛ̀sɛɛ, ɓɛ ti ɓɛ sɛràg kì woògh lɔŋ yɛ̀ɛ ɓɛɛ̀ kiki ri ɓɛ̀kaàtà ɓɛmbòg, kìɓan kiǹ ki ki ɓa ɓisuu riɗyaŋ ɗyàà.

¹⁷Mìni ɓum ɓɛm ɓɛ nɗem, ɓi ɓɛg wìn mìni yɛɛ mɛ log ki yiì ɓìɓan ɓiǹ lɔɔ abɛ̀y, nni kɔ̀riina rì ɗyomzɛ̀n, di kɛ̀ ɓi càrɛnti lɛ ɓɛ̀kìì-kìɓe ɓɛɛ ɗimzi mìni bee ri ɓìɓeɓtàg ɓyaa ɓi ɓiɓan ɓi ɓɛɛ̀ sɛ̀sɛ̀rì, fɔɔnnɛ kɛ̀ ɓi càɗ lɛ ɓɛɛ pwaŋ mìni ɓi ntyweeyi wu ɓì rɛrɛlii miì lɛ kpegkpeg,

¹⁸wɔ̀lɛ tɔɔtɔɔna ɓi geesɛ̀n, rì ɓi rìyi ɗi Yeesus Kiris ànɛ à rì Ǹghɛɓsì-ɓum, nyi yɛɛ ghɛɛ̀sɛɛ rì rìkem à tumɛ̀n gɛɛ̀nɛ à kpaŋ fìɗyàɓ fikɔ̀ɔ̀, Ààmɛ̀n.