Read Bafia 1 ZYAŊ 1 Bible Online

1 ZYAŊ 1 - Bafia bible

1 ZYAŊ 1

¹Tì kàni mìni kìɓan ki jɛ̀ɛ̀ ì cɛɓ ìnɛ ì ɓaghà, a rìtumɛ̀n ɗi ɓyom ɓìcèm; tì wokà yɔ̀ di yɛɛ̀ tòtòg, tì ghɛn yɔ̀ ri mis, tì sìŋì yɔ̀, tì ki kòm yɔ̀ ri ɓyàg ɓis.

²Yɛ̀ɛ cɛɓ ki resɛ̀ngày, ɓìsii ghɛngà kɔ; fɔɔnnɛ ti kpaakpaa mini kìɓan ki miì, tì ki ghagsi mini ɓɔlɛ à cɛɓ ki fiɗyàɓ fikɔ̀ɔ̀ ki ki ɓaghà jàŋbog rì Seŋi, cɛɓ kìn kɛɛ̀ki ɓɛ resìghà ɓìsi, lɛ ti yi kɔ.

³Kìɓan ki tì kìghà lɛ, tì ghɛn tì ki wog kɛɛ̀ki ti ghaaghagsì girig mìni, lɛ di mìni girig, ɓi ɓa ɓɛ̀ràrɛn ri ɓìsi. Nni ɓìsii ri ɓɛ̀ràrɛn lɛ rì Seŋi, rì Yeesus Kiris à Man wiì.

⁴Tì kàni mìni ɓìɓan ɓi lɛ di kìnyàà kis kɛɛ roǹ lɛ pisa.

⁵Ɓɔlɛ ànɛ ɓìsii wokà rì nyi, innɛ ɓìsii ki ghagsii mìni; nnyɛɛ lɛ: Bɛ̀ll à rì kìtɛɛtɛn, birìm ì yin a lɔ̀ŋkii.

⁶I tì kpaa lɛ, tì rì ɓɛ̀ràrɛn ɗi nyi, tì ki kɛ̀ɛ̀kɛɛ ɓi birìm di tì pwàa, tyɛ̀ ki ki kì yɛ̀ɛ saaɗ a kpaakpàà.

⁷Kìɓan kifog i ti kɛ̀ɛ̀kɛɛ ɓi kìtɛɛtɛn fɛlɛ yɛ̀ɛ nyimiɗ a rì ɓi kìtɛɛtɛn, di tì rì ɓɛ̀ràrɛn ɓisi mɛ̀to mɛ̀cèm, fɔɔnnɛ bwaɓ yi Man wiì Yeesus yi soò ɓìɓe ɓis ɓìcèm.

⁸I tì kpaa lɛ, tì yin ɗi ɓìɓe, di tì pwààrɛɛ ɓìsiìɓɔmiɗ, saaɗ kɛ̀ɛ ki ɓa a lɔ̀ŋkis.

⁹Wɔ̀lɛ i tì gherɛɛ ɓìɓe ɓis ɓi mis mɛ Bɛ̀ll, tì rì lɛ tì ɓa rì ǹtyweeyi ri nyi lɛ, rìkì ɗii ɗi ri yɛ̀ɛ saaɗ a kɔ̀nkɔ̀n; à ɓiì cenɛɛ ɓisi ɓìɓe, à ki sòò mɛnànì mis mɛcèm.

¹⁰I tì ki kpaa lɛ tì kìghà ɓi kiɓe, di tì ghaasii nyi pwààpwaà, jɛ̀ɛ̀ yìì yɛ̀ kɛɛ̀ ki ɓa ɓisi ɓi mɛ̀rem.