Read Bafia 1 ZYAŊ 2 Bible Online

1 ZYAŊ 2 - Bafia bible

1 ZYAŊ 2

¹Ɓɔn ɓɛm, ǹkàni mìni kìɓan ki lɛ, di kɛ̀ ɓi kì kiɓe; wɔ̀lɛ i ki kpaŋi lɛ wààdɛŋ ù kìi kìɓe, tì rì rì ŋwaànɛ a kamɛn ɗì ɓìsi jàŋbog rì Tààta, nnyɛɛ ri Yeesus Kiris ànɛ à rì saaɗ à mum.

²Lɛ nyimiɗ a faghà cɛɓ kii ɓisuulɛ ɓìɓe ɓis ɓyɛɛ ɓa ɓìcenɛn, àa gì lɛ ɓinkis ɓyɔ rì ɓyɔ, lɔŋ ɓisuu ɓiɓe ɓi ɓum ɓɛ̀cèm girig.

³I ti ɓèŋɓeŋ ɓidɔ̀gsɛna ɓi Bɛ̀ll, fɔɔnnɛ tì rì lɛ tì yi lɛ, tì mɛ yi Bɛ̀ll.

⁴Ŋwaànɛ à kpaa lɛ, à mɛ yi Bɛ̀ll, kɛ̀ɛ ki ɓèŋ ɓidɔ̀gsɛna ɓii, à rì pwààpwaà, saaɗ kɛ̀ɛ ki ɓa a lɔ̀ŋkii.

⁵Wɔ̀lɛ i mum à ti à ɓègì jɛ̀ɛ̀ yìì, di ǹkɔ̀nɛ̀n à rì ǹɗonɛn ŋwaànɛ̀n ɓi nɗem kɔɔ̀kɔɔ̀ à rìron; bee innɛ tì rì lɛ tì yi lɛ tì rì ɓɛ̀ràrɛn ɗi Bɛ̀ll ì rì lɛ,

⁶ŋwaànɛ à kpaa lɛ, à rì ǹɗàrɛn ri Bɛ̀ll, à ghɛ̀ɛ̀sɛɛ kì ghɛɓì yɛ̀ɛ Yeesus nyimiɗ à ghɛɓkà.

⁷Ɓum ɓɛm ɓɛ nɗem, àa kìdɔ̀gsɛna ki nyɔn kɛɛ̀ki ǹkàni mìni, lɔŋ ki abɛ̀y ki ɓì tekà à tumɛ̀n a rìtumɛ̀n; kìdɔ̀gsɛna ki abɛ̀y kiǹ kɛɛ ri jɛ̀ɛ̀ yìì inɛ ɓì mɛ wog.

⁸Nsoò fɔlɔɔ kìdɔ̀gsɛna ki nyɔn kɛɛ̀ki ǹkàni mìni; kiŋcèm kɛɛ̀ki saaɗ ànɛ miì a ghɛɛghɛnɛ̀n ɓi Kiris rì ɓi mìni ɓisuulɛ birìm ì mɛ lèg, kɔɔ̀kɔɔ̀ à kìtɛɛtɛn à ti gì ɓiì lònlomi.

⁹Ŋwaànɛ à kpaa lɛ à rì ɓi kìtɛɛtɛn à ki ɓèèzɛn geni, à kaka ɓi birìm.

¹⁰Ŋwaànɛ à keesii geni yɛɛ ri ɓi kìtɛɛtɛn; kìɓan ki kɛ̀ɓtiyɛn nyi fìɓàg ki yin a lɔ̀ŋkii.

¹¹Kìɓan kifog, ŋwaànɛ à ɓèèzɛɛ geni à rì ɓi birìm; a kɛ̀ɛ̀kɛɛ ɓi birìm kɛ̀ɛ yi fe nnɛ a kɛ̀nkɛ̀n ɓisuulɛ birìm ì mɛ ɗiŋzi nyi tìɗyaŋ.

¹²Ɓɔn ɓɛm, ǹkàni mìni ɓisuulɛ ɓìɓe ɓin ɓi ti ɓì càrɛn ɓi ɗii ɗìì.

¹³Ɓɛ̀seŋi ɓɛ̀m, ǹkàni mìni ɓisuulɛ ɓì yii roànɛ à ɓaghà à tumɛ̀n a rìtumɛ̀n; ǹkàn mìni ɓɛ̀dɛlì, ɓisuulɛ ɓì mɛ yag ghèghey à mum. Ǹkàni mìni ɓɔɔɓɔɓti ɓisuulɛ ɓì mɛ yi roànɛ à rì Seŋi.

¹⁴Ǹkàni mìni ɓɛ̀seŋi, ɓisuulɛ ɓì yii roànɛ à ɓaghà à tumɛ̀n a rìtumɛ̀n; ǹkàn mìni ɓɛ̀dɛlì ɓisuulɛ ɓì tèèsɛɛ, jɛ̀ɛ̀ ì Bɛ̀ll ì ɓa mìni ɓi mɛ̀rem, rì tì lɛ ɓì mɛ yag ghèghey à mum.

¹⁵Kɛ̀ ɓi keesi ziinɛ, nsoò com kidɛŋ ki miì; i mum à keesii ziinɛ, di ǹkɔ̀nɛ̀n à Tààta à yin nyi ɓi nɗem;

¹⁶ɓisuulɛ, ɓìɓan ɓìcèm ɓi ɓi ri ɓi ziinɛ lɛ rì zày ì ɓìɓeɓtàg ɓi ɓiɓan, ɓi ɓi mɛ̀mùù, yàaka à mis, rì ǹcàŋà wu ìkum wu ti wu falàg mum, ɓi pɛsɛɛ yì ɓi yɛ̀ɛ Tààta, ɓyɛɛ̀ pɛ̀ɛpɛsàg yì ɓi ziinɛ.

¹⁷Nni ziinɛ yɛɛ̀ ghaghààgh, kìkɔ̀nɛɛ ki ɓiɓan ɓi miì ki ghaghààgh girig, wɔ̀lɛ ŋwaànɛ a kìki rikɔ̀n ɗi Bɛ̀ll à ɓiì kɔ̀rii fiɗyàɓ fikɔ̀ɔ̀.

¹⁸Ɓɔɔ ɓɔn ɓɛ̀m, siitòn a cààmɛ̀n yɛɛ ti lɛ! Fɛlɛ yɛ̀ɛ ɓì wokà lɛ ŋwaàdɛŋ ànɛ à rì ɓiì ɗùùɗuu ri Kiris à ɓiì yùu yi, ɓɛ̀ɗùù rì Kiris ɓɛ mɛ tèghɛn ɓigomìnɛ, kɛɛ resii ɓìsi lɛ siitòn a cààmɛ̀n yɛɛ ti lɛ.

¹⁹Ɓumɓɛ̀n ɓɛ kpagày ɓi ǹɗaŋ wis kìɓan kifog, ɓɛ ɓaghà ɓi ɓɛɓàlɛn ɓi bàlì yìs i ɓum, lɛ i ɓɛɛ ɓa ɓɛ̀ɓàlɛn ɓi bàlì yìs, di ɓɛ rɔɓkà rì ɓìsi; nni ɓɛ mɛ ghasɛn ɗi ɓìsi lɛ kɛɛ ghɛnɛn lɛ tɛntɛ̀ɛ̀n lɛ, ɓɔɔ̀cèm ɓɛ ɓaghà ɓi ɓi bàlì ì ɓum ɓis.

²⁰Ɓi ɓɛg ànɛ a lɔ̀ŋkin, ɓì mɛ teɗ Kitɛntɛ̀ɛ̀n ki Nghay ki Kiris à sààtìghà ɓi mìni, fɔlɔɔ nnɛ ɓì mɛ yi saaɗ ɓɛ̀sɛ̀ɛ̀ ɓɛ̀cèm.

²¹Ǹkàni mìni, ki yin lɛ ɓì ka yi ɓi saaɗ, ki ri lɔŋ lɛ ɓì mɛ yi nyi, rì tì lɛ pwàà à yin lɛ à ɓay ɓi saaɗ.

²²Ghɛn yɛɛ ri min pwààpwaà? Ŋwaànɛ à kpaa lɛ Yeesus à yin Kiris yɛɛ ri pwààpwaà; ŋwaànɛ̀n miì yɛɛ̀ ɗùùɗuu ri Kiris, à ki roòzɛn lɛ, rì Seŋi rì Man.

²³Lɛ mum ǹcèm ànɛ à roòzɛɛ Man à roòzɛɛ girig Seŋì; roànɛ à gherɛɛ Man, à rì girig rì Seŋi.

²⁴Ɓi ɓɛg wìn, ɓì ghɛ̀ɛ̀sɛɛ kì ɓèŋi kiɓan ki ɓì wokà kiǹ à tumɛ̀n a rìtumɛ̀n ki ɓa mìni ɓi mɛ̀rem, mìni girig ɓì rì ɓiì kɛ̀nkɛni asu, ɓì ɓa ɓɛ̀ràrɛn ri kìɓɛ̀ɛ̀ ki ɓum ki lɛ, rì Man, rì Seŋi.

²⁵Nni ǹkàg wu à faghà ɓìsi wɛɛ ri lɛ, cɛɓ ki fiɗyàɓ fikɔ̀ɔ̀.

²⁶Ǹkàni mìni fɔlɔɔ, ɓisuu ɓumɓɛ ɓɛɛ̀ kɔ̀ngi lɛ, ɓɛɛ yegsi mìni.

²⁷Ɓi ɓɛg wìn, Kiris à miskà Nghay wìì ɓi mìni; fɔɔnnɛ ɓì yiìdi ri zày ì rìrèsàg ɗi ŋwaàɗɛŋ ɓisuulɛ Nghay wìì a rèresi mini ɓìɓan ɓicèm; rìrèsì ɗii ɗi ri lɛ saaɗ, ɗi yin ɓɛpwàà, kìɓan kiǹ kɛɛ̀ki ɓì ghɛɛ̀sɛɛ kì woògh rìrèsì ɗi Nghay, ɓì ɓa ɓɛ̀ràrɛn ɗi Kiris.

²⁸Ɓigomìnɛ, mìni ɓɔn ɓɛm, ɓaana lɔŋ ɓɛràrɛn ɗi Kiris lɛ yɛ̀ɛ à rì ɓiì yùu, ti ɓa kɛ̀ɛ̀ ìris, tyɛ̀ ki wog ntoòrìɗ ɓi mis mii ŋwosi risugtìì ɗii.

²⁹I ɓì yii lɛ, à rì lɛ saaɗ, ɓì ghɛ̀ɛ̀sɛɛ girig kì yiì lɛ mum ǹcèm ànɛ a kìki ɓiɓan ɓi ɓi ri lɛ saaɗ, à rì man à Bɛ̀ll.