Read Bafia 1 ZYAŊ 4 Bible Online

1 ZYAŊ 4 - Bafia bible

1 ZYAŊ 4

¹Mìni ɓum ɓɛm ɓɛ nɗem, kɛ̀ ɓi siighrag ɓi mum ǹcèm ànɛ à kpaa lɛ, à rì rì Nghay à Bɛ̀ll; fèèghraaghna mɛ̀kuu mɛ ɓum mɛ̀n, lɛ ɓi yi ǹkòo ǹghay wu ɓɛ ri rì wɔ, wu ri wu Bɛ̀ll ɓisuulɛ ɓɛ̀pwààpwaà ɓɛ ɓɛkpaŋzì-ɓìɓan ɓɛ ti ɓi ziinɛ lɛɛ̀gwey.

²Bee inɛ ɓì rì lɛ ɓì rèmì Nghay wu wu riì yɛ̀ɛ Bɛ̀ll yɛɛ̀nɛ lɛ: Nghay wùcèm wu wɛɛ̀ kpaakpaa lɛ: Yeesus Kiris à yalɛ̀ngà mum wu riì yɛ̀ɛ Bɛ̀ll;

³nni ǹghay wùcèm wu wu gherɛɛ ɓi Yeesus fɔlɔɔ, wu yin yi yɛ̀ɛ Bɛ̀ll, wu ri wu roànɛ a ɗùùɗuu ri Kiris, ànɛ ɓì wokà lɛ à ɓiì yùu, à ki ti ɓi ziinɛ ɓi cààmɛ̀n ki.

⁴Mìni ɓɔn ɓɛm, ɓì rì ɓɔn ɓɛ Bɛ̀ll, ɓì mɛ yag ɓumɓɛ̀n ɓisuulɛ, Nghay wu wu ri ɓi mìni wu teèsɛɛ wu cee wu wu ri ɓi ziinɛ.

⁵Ɓɔɔ ri ɓumɓɛ ɓi ziinɛ, kìɓan kiǹ kɛ̀ɛ̀ki ɓìtòkì ɓyaa ɓi ri ɓìtòkì ɓi ɓi ziinɛ, fɔɔnnɛ ziinɛ yɛɛ̀ wowog ɓɔ.

⁶Ɓi ɓɛg wìs, ɓìsii ri ɓum ɓɛ Bɛ̀ll; ŋwaànɛ à yii Bɛ̀ll, à rì ɓiì woògh com ki ti kpaakpàà; wɔ̀lɛ ŋwaànɛ à yin mum à Bɛ̀ll àa wog ɓi com ki ti kpaakpàà, fɔlɔɔ nnɛ tì rì lɛ tì yi rìghasì ɗi lɛ rì Nghay wu wu ri ɓi saaɗ, rì wu wu ri ɓi rìnàn.

⁷Mìni ɓum ɓɛm ɓɛ nɗem, ti kɔ̀nɛɛna ɓi nyìinyìm wìs ɓisuulɛ ǹkɔ̀nɛ̀n à ti à ɓalàg yì yɛ̀ɛ Bɛ̀ll, nni mum ǹcèm ànɛ à rì rì ǹkɔ̀nɛ̀n à rì man à Bɛ̀ll, à ki yii Bɛ̀ll.

⁸Ŋwaànɛ à yin ɗi ǹkɔ̀nɛ̀n à yii ɓi Bɛ̀ll ɓisuulɛ, Bɛ̀ll à rì ǹkɔ̀nɛ̀n.

⁹Ǹkɔ̀nɛ̀n à Bɛ̀ll à ghɛnɛ̀ngà a lɔ̀ŋkis ɓi bee inɛ lɛ Bɛ̀ll à romgày m̀bobog wìì a Man ɓi ziinɛ lɛ, ti ɓa rì cɛɓ lɛ nyi.

¹⁰Ǹkɔ̀nɛ̀n ànɛn à yin lɛ ɓìsi yɛɛ keesìghà Bɛ̀ll, kìɓan kifog nnyɛɛ keesìghà ɓìsi, à rom yì Man wiì fɛlɛ yɛ̀ɛ kìtuwe ki kɛɛ ghɛɓsi ɓi zòghɛ̀n ì ɓìɓe ɓis.

¹¹Mìni ɓum ɓɛm ɓɛ nɗem, i Bɛ̀ll à keesìghà ɓìsi fɔlɔɔ, ɓìsii ghɛɛ̀sɛɛ girig kì ɓaà rì ǹkɔ̀nɛ̀n ɓi nyìinyìm wìs.

¹²Mum à ka ghɛngà ɓi Bɛ̀ll; i tì rì rì ǹkɔ̀nɛ̀n ɓi nyìinyìm wìs, di Bɛ̀ll à rì a lɔ̀ŋkis, ǹkɔ̀nɛ̀n wìì a ki ɓa ɓi ɓìsi syeesyee à rìɓa.

¹³Com ki tì ti tì yilàg miì lɛ, tì rì ɓɛ̀ràrɛn ɗi nyi, nyi ǹɗàrɛn ri ɓìsi ki ri lɛ; à faghà ɓìsi Ǹghay wìì,

¹⁴nni ɓìsii ghɛngà, tì ki làalamɓɛ̀n lɛ, Tààta à romgày Man, lɛ a ghɛɓsi ziinɛ.

¹⁵Ŋwaànɛ à gherɛɛ lɛ Yeesus à rì Man à Bɛ̀ll, di Bɛ̀ll à rì rì nyi, nyi ɓa girig ɓɛɛ̀ Bɛ̀ll.

¹⁶Ɓìsii yii ǹkɔ̀nɛ̀n ànɛ Bɛ̀ll à rì rì nyi ɓi ɓɛg wìs, tì ki gherɛɛ ǹkɔ̀nɛ̀n ànɛ̀n. Bɛ̀ll à rì ǹkɔ̀nɛ̀n, ŋwaànɛ a ghɛghɛɓ ɓi nkɔ̀nɛ̀n, à rì ɓɛɛ̀ Bɛ̀ll, Bɛ̀ll ɓɛɛ̀ nyi.

¹⁷I ǹkɔ̀nɛ̀n à rì a lɔ̀ŋkis syeesyee à rìɓa, fɔɔnnɛ tì rì ɓiì ɓaà kɛ̀ɛ̀ ìris ŋwosi ɓɛyɔ̀m, ɓisuulɛ cɛɓ kis ki fɛ ɓi ziinɛ ki pisɛɛ rì ki Yeesus Kiris.

¹⁸Ìris wu yin ɓi nkɔ̀nɛ̀n, syeesyee à ǹkɔ̀nɛ̀n à ti à lègsàg ìris, lɛ ìris wu resii yɛɛ lɔɔ lɛ, ǹkulɛ̀n à rì lɛ à ɓa, nni ŋwaànɛ à rì rì ìris, à yin ɗi ǹkɔ̀nɛ̀n syeesyee à rìɓa.

¹⁹Ɓi ɓɛg wìs, tì keesii Bɛ̀ll lɛ, nyimiɗ yɛɛ lokà ɓìsi kì keesii.

²⁰I mum à kpaa lɛ: Ǹkeesii Bɛ̀ll nni à ɓèèzɛɛ geni, di à rì pwààpwaà, ɓisuulɛ, i mum à keesii ɓi geni ànɛ a seesèè, lannɛ à rì lɛ à keesì Bɛ̀ll ànɛ à ghɛɛ ɓi?

²¹Kìdɔ̀gsɛna ki Kiris à faghà ɓìsi kɛɛ̀ki lɛ: Ŋwaànɛ à keesii Bɛ̀ll, a keèsì girig geni.