Read Bafia 1 ZYAŊ 5 Bible Online

1 ZYAŊ 5 - Bafia bible

1 ZYAŊ 5

¹Mum bimiɗ ànɛ à gherɛɛ lɛ Yeesus à rì Kiris, à rì ŋwaànɛ à gherɛɛ Bɛ̀ll; nni ŋwaànɛ à keesii seŋi, à ti à keesàg girig ɓɔn ɓɛ seŋi ànɛ̀n à yali.

²Tì ti tì yilàg lɛ, tì keesii ɓɔn ɓɛ Bɛ̀ll cààmɛ̀n ki tì keesii Bɛ̀ll, tì kìkì com ki ɓìdɔ̀gsɛna ɓii ɓyɛɛ̀ kpaakpàà.

³Rìkeesì ɗi Bɛ̀ll ɗi ri lɛ, ti ɓeŋ̀ ɓìdɔ̀gsɛna ɓii; nni ɓìdɔ̀gsɛna ɓii ɓi ki tèri ɓi riɓèŋ.

⁴Ɓisuulɛ, mum ǹcèm ànɛ à rì man à Bɛ̀ll, à ti à yakì ziinɛ. Rìyag ɗi tì ti tì yakì ziinɛ ɗi ri ɓi rìgherɛ̀n ɗis.

⁵Ghɛn yɛɛ ri lɛ à yag ziinɛ, i ki yin lɛ ŋwaànɛ à gherɛɛ lɛ, Yeesus Kiris à rì Man à Bɛ̀ll.

⁶Yeesus Kiris ànɛ̀n yɛɛ yughà lɛ, rì mɛ̀nig, rì bwaɓ; à yùghà ɓi ri mɛ̀nig mɔ rì mɔ, à yùghà lɔŋ lɛ rì mɛ̀nig rì bwaɓ; nni Kìtɛntɛ̀ɛ̀n ki Nghay kɛɛ̀ rèresi saaɗ ànɛ ɓi kìɓan kiǹ, lɛ Kìtɛntɛ̀ɛ̀n ki Nghay ki ri saaɗ.

⁷Ɓisuulɛ ɓɛ̀wusìnɛ̀ɗ ɓɛ ɓɛɛ̀ rèresi kiɓan kiǹ, ɓɛ ri ɓɛraa,

⁸lɛ rì Kìtɛntɛ̀ɛ̀n ki Nghay, rì mɛ̀nig, rì bwaɓ, nni ɓɛ̀sɛ̀ɛ̀ ɓɛ̀cèm ɓɛ ri jɛ̀ɛ̀ bog.

⁹I tì ti tì gheràg com ki ɓumɓɛ ɓɛ ri ɓɛ̀wusìnɛ̀ɗ ɓɛ kpaa, rìɓa ɗi Bɛ̀ll à rì wusìnɛ̀ɗ ɗi cee. Rìɓa ɗii ɗi wusìnɛ̀ɗ ɗyɛɛ ri lɛ: À rèsìghà saaɗ ànɛ ɓi kìɓan ki Man wiì.

¹⁰Ŋwaànɛ à gherɛɛ Man à Bɛ̀ll à rì ɗì rìrèsì ɗiǹ ɓi nyimiɗ, wɔ̀lɛ ŋwaànɛ à gherɛɛ ɓi Bɛ̀ll, à teri Bɛ̀ll yɛ̀ɛ pwààpwaà ɓisuulɛ, à gherɛɛ ɓi saaɗ ànɛ Bɛ̀ll à rèsìghà ɓi kìɓan ki Man wiì.

¹¹Nni rìrèsì ɗi saaɗ ànɛ ɓi kìɓan kiǹ ɗyɛɛ ri lɛ: Bɛ̀ll à faghà ɓìsi cɛɓ ki fiɗyàɓ fikɔ̀ɔ̀, cɛɓ kìn ki ki ɓa ɓi Man wiì.

¹²Mum ǹcèm ànɛ à rì rì Man, à rì rì cɛɓ kiǹ, ŋwaànɛ à yin ɗi Man à Bɛ̀ll, à yin ɗi cɛɓ kìn.

¹³Ǹkàniì mìni kìɓan kiǹ lɛ ɓi yi lɛ: Ɓì rì rì cɛɓ ki fiɗyàɓ fikɔ̀ɔ̀, mìni ɓɛ ɓì gherɛɛ ɗii ɗi Man à Bɛ̀ll.

¹⁴Tì konaagh kì yiì lɛ: Com kìcèm ki tì rì lɛ tì tɔg nyi, ki ɓa lɔŋ yɛ̀ɛ rìkɔ̀n ɗii ɗi ri, à rì ɓiì woògh; kìɓan kiǹ kɛɛ̀ fafa ɓisi ìtèɗ ɓi nɗem rì nyi.

¹⁵I tì ki yii lɛ, a wowog ɓisi, nsoò cɛ kɛɛ̀ki tyàa lɔni nyi, tì yi lɛ, tì rì rì com kìn miì.

¹⁶Nni i ŋwaà ghɛɛ di geni a kìki kiɓe ki ki yin lɛ ki ki lɛ a ɗyaŋ̀, à ghɛ̀ɛ̀sɛɛ kì ɓɔ̀ŋzaagh fɔɔnnɛ Bɛ̀ll à rì ɓiì faà geni ànɛ̀n cɛɓ. Kìɓan ki ki seesee ɓɛ̀roɓɛ ɓìɓe ɓyaa ɓi yin lɛ ɓi ki lɛ ɓɛɛ ɗyaŋ̀; wɔ̀lɛ kìɓe kidɛŋ ki ri wɔɔ, ki ki ri lɛ ki ki lɛ mum a ɗyaŋ̀, nni àa kɛɛ̀ki nkpaghi mini lɛ ɓi ɓɔŋzi Bɛ̀ll miì.

¹⁷Kìɓan kicèm ki mum à nàni ki ri kìɓe, wɔ̀lɛ ɓìɓe ɓidɛŋ ɓi ri wɔɔ, ɓi ɓi yin lɛ ɓi ki lɛ mum a ɗyaŋ̀.

¹⁸Tì yii lɛ mum ǹcèm ànɛ à rì Man à Bɛ̀ll, à ti kɛ̀ɛ kì ti kiɓe kìɓan kifog roànɛ à fuughày yɛ̀ɛ Bɛ̀ll, Bɛ̀ll a ɓèŋɓeŋ nyi, fɔɔnnɛ ghèghey à mum à yin lɛ à kɔ̀m nyi.

¹⁹Tì yii lɛ tì rì ɓum ɓɛ Bɛ̀ll, rì tì lɛ ziinɛ bimiɗ ì rì ɓi rìlàmì ɗi ghèghey à mum.

²⁰Tì yii girig lɛ, Man à Bɛ̀ll à yùghà, à ki fa ɓisi ɗyomzɛ̀n ɗi lɛ, ti yi kɔɔ̀kɔɔ̀ à Bɛ̀ll, nni tì rì ɓɛ̀ràrɛn ɗi kɔɔ̀kɔɔ̀ à Bɛ̀ll ànɛn ɓi Yeesus Kiris à Man wiì. Nyi yɛɛ ri kɔɔ̀kɔɔ̀ à Bɛ̀ll, nyi tì cɛɓ ki fiɗyàɓ fikɔ̀ɔ̀.

²¹Mìni ɓɔn ɓɛm ɓì konàg rì ɓìnùn.