Read Bafia ÀPÒKÀLIƁSƐ̀ 1 Bible Online

ÀPÒKÀLIƁSƐ̀ 1 - Bafia bible

ÀPÒKÀLIƁSƐ̀ 1

¹Àpòkàliɓsɛ̀ à Yeesus Kiris, ànɛ Bɛ̀ll à faghà nyi lɛ a resi ɓɛ̀kìì-ɓìsay ɓii ɓiɓan ɓi ɓi ghɛɛ̀sɛɛ kì kìlɛɛ di maa cààmɛ̀n à ghaghii, ɓyɛɛ̀ɓi à kìghà lɛ ɓum ɓɛɛ yi, yɛ̀ɛ à romgày mum wiì à fìtom yɛ̀ɛ nkìì-kìsay wiì ànɛ lɛ Zyaŋ,

²Zyaŋ ànɛ̀n yɛɛ kalìghà ɓìɓan ɓìcèm ɓi à ghɛngà, fɔɔnnɛ à ghagsìghà jɛ̀ɛ̀ ì Bɛ̀ll rì ɓìɓan ɓi saaɗ ɓi Yeesus Kiris à rèsìghà nyi.

³Mààgh lɛ, rì roànɛ a ɓàɓày rì ɓɛ̀roɓɛ ɓɛɛ̀ wowog ɓiɓan ɓi Bɛ̀ll ɓi ɓɛ resii ɓi, ɓɛ ki nɔ̀ɔnɔɔ̀tì com ki ki ri kìkànɛn miì ɓisuulɛ cààmɛ̀n ki lɛ ɓyɛɛ kilɛn ki ti jàŋbog.

⁴Zyaŋ yɛɛ kani Ɓìseŋi ɓi Kiris ɓi kitaàɓɛ̀ɛ̀ ɓi ɓi ri a Azii. Ɓaana lɛ, rì geesɛ̀n, rì fyòoog lɛ rìfa ɗi roànɛ à rì, ànɛ à ɓaghà, ànɛ a ki yùyuiy, rì mɛ̀ghay mɛ kitaàɓɛ̀ɛ̀ mɛ mɛ rɛrɛlii ìkɔ̀ɔ̀ wii wu rilàmì asu,

⁵rì lɛ rìfa ɗi Yeesus Kiris ànɛ à rì wusìnɛ̀ɗ à ǹtyweeyi, ànɛ à rì Man à ǹtonto ànɛ à lokà kìghèmɓɛɛ yi a ɓìloŋ, à ki ɓa ti nkɔ̀mɛ̀n mɛ̀fòm mɛ ɓi ziinɛ. Roànɛ a keesag ɓisi, roànɛ à kwèɗkà ɓìsi ɓi ɓìɓe ɓis rì bwaɓ yii,

⁶nyi yɛɛ ki kìghà lɛ ti ɓa kìlɔ̀ŋ ki ɓumɓɛ ɓɛɛ̀ ɓɔɔɓɔgsì Bɛ̀ll à Seŋi wìì, Yeesus ànɛ̀n yɛɛ ghɛɛ̀sɛɛ lɛ rì rìkem ɗì rìlàmì fìɗyàɓ fikɔ̀ɔ̀. Ààmɛ̀n.

⁷Ghɛɛna à rìì ɓi ɓìkwìɗ, ɓum ɓɛ̀cèm ɓɛ ri nyi ɓiì ghɛɛ̀, nsoò ɓɛ̀roɓɛ ɓɛ tuɓkà nyi bèn. Fɔɔnnɛ mɛ̀kuu mɛ ɓum mɛ̀cèm mɛ ɓi ziinɛ mɛ ri seeghkɛɛ gɛ ɓisu wii. Ɛ̀ɛ̀ ki ɓaa gɛ fɔlɔɔ. Ààmɛ̀n.

⁸Kan Bɛ̀ll a kpaaghi lɛ: Mɛ̀ yɛɛ ri Alfà, rì Omegà, roànɛ à rì, ànɛ à ɓaghà, ànɛ a yùyuiy, roànɛ à rì rì ìtèɗ wucèm.

⁹Mɛ̀ zyaŋ ànɛ ǹɗì geni wìn, ǹɗì rì gàɓ lɛ rì ɓi mɛ̀tɔɓ, rì ɓi kìlɔ̀ŋ ki Bɛ̀ll rì ɓi rìsììrɛ̀n ɗi ɓi Yeesus, m̀ɓaghà ɓi kìrìŋ ki riɓày ki lɛ Patmos ɓisuu righagsì ɗi jɛ̀ɛ̀ ì Bɛ̀ll, ǹki tɛɛ̀zi saaɗ ànɛ ɓi kìɓan ki Yeesus.

¹⁰Ǹghay à sɛngà ɓi mɛ̀ ŋwosi Kan fɔɔnnɛ[1] ǹwokà coo jɛ̀ɛ̀ mɛ̀ ajɛ̀m lɔŋ yɛ̀ɛ gom ì ɗyam ɗi ɓɛɛ̀ rɔŋɗɔ̀ŋ,

¹¹jɛ̀ɛ̀ ì kpaakpààghà lɛ: Kàna com ki ù ghɛɛ ɓi bimiɗ à kaàtà, u rom̀ kaàtà ànɛ̀n a Ɓìseŋi ɓi kitaàɓɛ̀ɛ̀ ɓi a Efɛɛzɛ, rì a Simirinɛ, rì a Pɛrigam, rì a Tyatiir rì a Saridɛ, rì a Filadɛlfii, rì a Lawodise.

¹²Fɔɔnnɛ ǹlɔ̀ɔ̀ghrɛ̀ngà, ǹghɛn ŋwaànɛ à tòtòkà ànɛn rì mɛ̀. Yɛ̀ɛ ǹlɔ̀ɔ̀ghrɛ̀ngà nni ǹghɛngà ɓyom ɓi ɓɛɛ̀ rɛsag lamɓà miì taàɓɛ̀ɛ̀, ɓì kìyɛn ɗi gol.

¹³Wɔ̀lɛ ɓi nyìinyìm à ɓyom ɓìn, rìkuu ɗi com ɗi ɓaghà lɔŋ yɛ̀ɛ mum. À ɓaghà rì coo jɔmpàs, nyi tì ǹwaatɛn kànɗa à gol ɓi dwey.

¹⁴Ǹto wii rì tyòŋ tii, ɓi ɓaghà ɓìpuɓ yɛ̀ɛ nyùŋ yi jɔ̀ɔ̀ ìmpuɓ, nsoò lɛ yɛ̀ɛ kìkwìɗ ki ki nɔɔ ɓi dɛ̀ɓ. Mis mɛ ɓaghà yɛ̀ɛ ǹɗòò wu ɗuu,

¹⁵mɛ̀kòò mii lɔŋ yɛ̀ɛ rìkuu ɗi swiɗ ɗiɗɛŋ ɗi ɓɛ ɓaŋzii ɓi ɗuu ɗi ghɛ̀g-ghɛ̀g, jɛ̀ɛ̀ yìì i wɔ̀ɔ̀wɔ̀ɔ̀ yɛ̀ɛ coo boɓ ì rìɓày.

¹⁶À ɓanɓàngà tyɔɛy taàɓɛ̀ɛ̀ ɓi càg kii ki weèlem, fɔɔnnɛ gàfàg ìnɛ ì ɓaghà ǹghɛliyɛn ɓɛɓɛg ɓɛ̀cèm, ì kpaŋkpàŋgày nyi ɓi ŋwɔm, ìsu wii wu ɓa yɛ̀ɛ ŋwos a ɓalàg, cààmɛ̀n ki a lònlom ri ìtèɗ.

¹⁷Yɛ̀ɛ ǹghɛngà nyi, nni ǹkpìghà nyi a mɛ̀kòò yɛ̀ɛ kìloŋ. À saghìghà mɛ̀ càg kii ki weèlem ɓi nyoo, à kpaa lɛ: Kɔ̀ɔ risi!

¹⁸Mɛ̀ yɛɛ ri ŋwaà ǹtonto, mɛ̀ tì ŋwaà siitòn, roànɛ à rì cem. Ǹwughà, kìɓan kifog ǹɗì cem fiɗyàɓ fikɔ̀ɔ̀. Ǹwowotii tìɗìɓà ti riwù rì ti a tɛ̀ɛ̀.

¹⁹Nni kàna min com ki wàa ghɛɛ, com ki ki ri, rì ki ki ri ɓiì kìlɛɛ ajɛ̀m ìnɛn.

²⁰Ɓi ɓɛg ànɛ a ɓɛ̀azi ɓɛ a rìnyam ɓɛ ɓi tyɔɛy ti kitaàɓɛ̀ɛ̀ ti wàa ghɛɛ mɛ̀ rì tyɔ ɓi càg ki weèlem, rì ɓìrɛsì ɓi lamɓà ɓi gol taàɓɛ̀ɛ̀, tyɔɛy ti kitaàɓɛ̀ɛ̀ ti ri ɓum ɓɛ titom ɓɛ Ɓiseŋi ɓi kitaàɓɛ̀ɛ̀, ɓìrɛsì ɓi lamɓà ɓi kitaàɓɛ̀ɛ̀ ɓyɔɔ ri Ɓìseŋi ɓi kitaàɓɛ̀ɛ̀ ɓincèm.