Read Bafia ÀPÒKÀLIƁSƐ̀ 10 Bible Online

ÀPÒKÀLIƁSƐ̀ 10 - Bafia bible

ÀPÒKÀLIƁSƐ̀ 10

¹Nni ǹghɛngà kìtèetèɗ ki ŋwaà-fìtom kidɛŋ di kɛɛ̀ sɛnsɛn yi aɗyoo, kì waatɛn kikwìɗ, ǹsyèɗ wu ɓaghà nyi wu gheniyɛn ɓi nto, ìsu wu lonlòm yɛ̀ɛ ŋwos, mɛ̀kòò mii mɛ ɓa yɛ̀ɛ mɛ̀kwìy mɛ ɗùù.

²À ɓaghà rì maa kaàtà ǹŋwàrɛn ɓi càg; à kìghà lɛ, à rɛsì ìkòò wii wu weèlem ɓi rìɓày à kìkòn, wu kimɛŋ ɓi zi ì zɛy,

³nni à nyàmgà jɛ̀ɛ̀ aɗyoo lɔŋ yɛ̀ɛ kìmonɗo kɛɛ̀ nyàmgì, lɔŋ yɛ̀ɛ à nyàmgà fɔlɔɔ, baàbàn yi kitaàɓɛ̀ɛ̀ yi ɓog, gom ì ghaàgh.

⁴Yɛ̀ɛ baàbàn yi kitaàɓɛ̀ɛ̀ yi ɓokà fɔlɔɔ, m̀mɛɛ̀ kìghà lɛ nkaǹ, nni ǹwokà jɛ̀ɛ̀ ìdɛŋ di ì rìì aɗyoo lɛ: Nyama kìɓan ki baàbàn yi kitaàɓɛ̀ɛ̀ yi kpaa kìn, kɔ̀ɔ kàn kɔ.

⁵Nni ŋwaà-fìtom ànɛ à ɓaghà ǹɗɛrɛliyɛn lɛ ìkòò wu ɓi rìɓày, wumbog a cɛɗ, à pɛ̀sìghà weèlem wìì aɗyoo;

⁶fɔɔnnɛ à kànɛ̀ngà bɛ̀ɗ ɓi ɗii ɗi roànɛ a ghɛghɛɓ fiɗyàɓ fikɔ̀ɔ̀, ànɛ à kìghà ɗyoo rì ɓyom ɓìcèm ɓi ɓi ri miì, à kì lɛ rì zi rì ɓyom ɓi ɓi ri miì, à kì lɛ rì rìɓày à kìkòn, rì ɓyom ɓi ɓi ri miì; à kànɛ̀ngà bɛ̀ɗ lɛ cààmɛ̀n ki lɛ ɓum ɓɛɛ ɓuŋɛn kaa ɓa ti ɓi,

⁷kìɓan kifog ɓi mɛ̀ru mɛ jɛ̀ɛ̀ ì ŋwaà-fìtom a kìtaàɓɛ̀ɛ̀ ì rì ɓiì wooghrɛɛ, di à ti lɛ à tumɛ̀n ɗìrɔŋ ɗi ɗyam, innɛ fèg à Bɛ̀ll ànɛ a ɓalag nyamɛn à ɓiì ronì lɔŋ yɛ̀ɛ à wogsìghà Syeesyee à Ɓɔlɛ ànɛ ɓi fèg ànɛn rì ɓɛ̀kpaŋzì-ɓìɓan ɓɛ ɓɛ ri ɓɛ̀kìì-ɓìsay ɓii.

⁸Nni jɛ̀ɛ̀ ìnɛ ǹwokà di ì rìì aɗyoo ì tòòghrɛ̀ngà tì rì mɛ̀ fɛlɛ̀: Kɛ̀na, u teɗ maa kaàtà ànɛ à rì ǹŋwàrɛn ɓi càg ki ŋwaà-fìtom anɛ à rì ǹɗɛrɛliyɛn lɛ rì ɓi rìɓày à kìkòn rì a cɛɗ.

⁹Fɔɔnnɛ ǹkɛ̀ngà yɛ̀ɛ ŋwaà-fìtom anɛ̀n ǹkpaa nyi lɛ a fa mɛ̀ maa kaàtà àncèm; nni à kpaaghà mɛ̀ lɛ: Tera nyi, u miǹ, à rì wɔ̀ ɓiì lòloli ɓi mɛ̀ɗyɔɔ, kìɓan kifog à yɛ̀yɛ̀y wɔ̀ ɓi ŋwɔm yɛ̀ɛ mɔ̀ɔ mɛ ilòò.

¹⁰Nni ǹtekà maa kaàtà ànɛ̀n ɓi càg ki ŋwaà-fìtom m̀mìn nyi; à ɓaghà mɛ̀ ɓi ŋwɔm yɛ̀ɛ mɔ̀ɔ mɛ ilòò, nni yɛ̀ɛ m̀mìngà nyi, mɛ̀ɗyɔɔ mɛ̀m mɛ tumɛ̀n rìlòlòèy.

¹¹Fɔɔnnɛ ɓɛ kpaaghà mɛ̀ lɛ: Ki ghɛɛ̀sɛɛ lɛ u kpaŋzi tì ɓìɓan ɓi Bɛ̀ll ɓi ɓi seesee mɛ̀kuu mɛ ɓum lɛɛ̀gwey, rì ɓìlɔ̀ŋ lɛɛ̀gwey, rì mɛ̀fòm lɛɛ̀gwey.