Read Bafia ÀPÒKÀLIƁSƐ̀ 11 Bible Online

ÀPÒKÀLIƁSƐ̀ 11 - Bafia bible

ÀPÒKÀLIƁSƐ̀ 11

¹Nni ɓɛ faghà min mɛ kìsyòŋ ki ki ɓaghà yɛ̀ɛ kìgeŋ, ɓɛ kpaa mɛ̀ lɛ: Kɛ̀na u feg lɛ rì naà-Bɛ̀ll, rì com ki ɓɛ ti ɓɛ tɔngì ɓìtuwe miì, ù ɓày ɓumɓɛ ɓɛɛ̀ ɓɔɔɓɔgsì Bɛ̀ll wɔɔ ɓi naa ìnɛ̀n.

²Wɔ̀lɛ ɓi ɓɛg ànɛ a nlɛmɓog wu ɓi dan, càra wɔ, kɔ̀ɔ fèg ɓisuulɛ ɓɛ faghà wɔ rì ɓìlɔ̀ŋ ɓi zɛy; ɓìlɔ̀ŋ ɓiǹ ɓyɛɛ ri ɓɛɛ̀dag bàn ì ǹtɛnɛn ɓɛ̀ŋwii mɛ̀tin mɛɓɛɛ̀ rì ɓɛɓɛɛ̀.

³Fɔɔnnɛ ǹfaa gɛ ɓɛ̀wusìnɛ̀ɗ ɓɛm ɓɛ kiɓɛ̀ɛ̀ ìtèɗ wulɛ ɓɛɛ kpaŋzi ɓìɓan ɓi Bɛ̀ll mɛ̀ru tɔɔsìm ɓɛ̀hɔnɗɛ̀ɗ ɓɛɓɛɛ̀ rì mɛ̀ru mɛ̀tin mɛraa.

⁴Ɓɛ̀wusìnɛ̀ɗ ɓɛ kiɓɛ̀ɛ̀ ɓɛǹ ɓɔ yɛɛ ri mɛ̀ɗyèm mɛ olìvìyee mɛ kiɓɛ̀ɛ̀ rì ɓìrɛsì ɓi lamɓà ɓi kiɓɛ̀ɛ̀ ɓi ɓi rɛrɛlii ɓi mis mɛ Kan à ziinɛ.

⁵Nni i mum à kɔ̀ni lɛ a ki ɓɔ kìɓe, ɗuu ɗi kpaŋ yì ɓɔ ɓi myɔm, ɗi ɗigsì ɓɛ̀bènàbena ɓaa. Rìkuu ɗi riwù ɗìn ɗyɛɛ̀ɗi mum ǹcèm ànɛ à kɔ̀ni lɛ a ki ɓɔ kìɓe a rì ɓiì wiì.

⁶Ɓɛ ri rì ìtèɗ wulɛ ɓɛɛ sim ɗyoo lɛ bwey yɛ̀ kɛɛ̀ nɔ, ɓi mɛ̀ru mɛ̀cèm mɛ ɓɛɛ̀ kpaakpaŋzì ɓìɓan ɓi Bɛ̀ll; ɓɛ ki ɓa ri ìtèɗ wulɛ ɓɛɛ ghaàsi mɛ̀nig bwaɓ, ɓɛ ki ɓa ri ìtèɗ wulɛ ɓɛɛ rom yì rìkuu ɗi ntɔɓ ɗìcèm ɗi ɓɛ kɔni ɓi ziinɛ.

⁷Yɛ̀ɛ ɓɛ ɓaa gɛ di ɓaa lègsi ki rèsii ɓiɓan ɓi ɓɛ yùu gɛ kì rèsii, fɔɔnnɛ nyàm ìnɛ ì kpaŋiì gɛ ɓi rìɓee ɗi rim ì faa gɛ ɓɔ rìbaŋì, ì cee ɓɔ ɓi-tèɗ, ì ki cuusi ɓɔ.

⁸Nni ɓìloŋ ɓyaa ɓi cɛnɛɛ gɛ ɓi nlɛmɓog wu coo bàn ìgwey inɛ ɓɛɛ̀ regi ɓi mɛ̀ghèy lɛ Sɔdɔm nsoò lɛ Egiɓtɛn ɓi jàŋ yɔ̀miɗ inɛ ɓɛ kpangà Kan wàà ɓi kɔrɔs.

⁹Ɓumɓɛ ɓi mɛ̀kuu mɛ̀cèm, rì mɛ̀pwìɗ mɛ̀cèm, rì ɓìtòkì ɓìcèm, rì ɓìlɔ̀ŋ ɓìcèm ɓɛ ri seesee gɛ ɓìloŋ ɓyaa à kpaŋ mɛ̀ru mɛraa rì kìden, ɓɛ̀ kɛɛ̀ gherɛn lɛ ɓɛɛ ɓom̀ ɓyɔ ɓi zɔ̀ŋ.

¹⁰Ɓumɓɛ ɓi ziinɛ ɓɛ ri nyààrɛɛ gɛ rì rìwu ɗyaa, ɓɛ wog kìrɔɔ; ɓɛ roòròmɓɛ̀n ɓyom ɓisuulɛ ɓɛ̀kpaŋzì-ɓìɓan ɓɛ kiɓɛ̀ɛ̀ ɓɛǹ ɓɛ tɔɓkà ɓumɓɛ ɓi ziinɛ yɛ̀ɛ mɛ̀nɔ̀ɓɔ̀.

¹¹Ajɛ̀m ì mɛ̀ru mɛ kiraa rì kìden mɛ̀n, ǹghay àdɛŋ ànɛ à rì nghay à cɛɓ à pɛ̀sɛ̀ngày yɛ̀ɛ Bɛ̀ll, à ɗiŋì ɓi ɓɔ, ɓɛ ki pɛ̀sɛn aɗyoo, ɓɛ rɛlì mɛ̀rɛy, fɔɔnnɛ coo iris wu ɓangà ɓumɓɛ ɓɛ seesèèghà ɓɔ.

¹²Nni ɓɛ wokà di coo jɛ̀ɛ̀ ì rìi aɗyoo, ì kpaa ɓɔ lɛ: Ɓɔɔghnay fɛ. Fɔɔnnɛ ɓɛ ɓɔkà aɗyoo ɓi ɓìkwìɗ ɓi mis mɛ ɓɛ̀bènàbena ɓaa.

¹³Ɓi cààmɛ̀n kɔm̀ kiǹ, zi i nyɛ̀ŋɗɛ̀ngà rì ìtèɗ; kìlànà ki bàn kìfog ki ɓi ɓìlànà ɓi kintɛ̀ɗ ɓi ɓi bàn ìnɛn ki waàrɛ̀n, ɓum ɓɛ̀tɔɔsìm taàɓɛ̀ɛ̀ ɓɛ cuu, ɓi rìnyɛ̀ŋɗɛ̀n ɗi zi i nyɛ̀ŋɗɛ̀ngà ɗiǹ, ɓɛ̀ro ɓɛmbog ɓɛ risì, ɓɛ fa Bɛ̀ll ànɛ aɗyoo rìkem.

¹⁴Ǹtɔɓ wu kiɓɛ̀ɛ̀ wu mɛ ghaàgh, nni ǹtɔɓ wu kiraa wɔ yɛɛ nɔ̀ɔnɔɔ̀tìì lɔŋ ɓigomìnɛ.

¹⁵Nni ŋwaà-fìtom a kìtaàɓɛ̀ɛ̀ a rɔgà ɗyam; fɔɔnnɛ ɓyoo jɛ̀ɛ̀ ɓi ɓaghày ɓi ɗyoo ɓi ɗùm, ɓi kpaakpàà lɛ: Kìlàmì ki zi ki cee ɓi ɓyàg ɓi Kan wìs, rì Mèsii wìì. À ɓiì làmii fiɗyàɓ fikɔ̀ɔ̀.

¹⁶Ɓɛ̀sɛ̀ɛ̀mɛn ɓɛ ritin ɗì ɓɛnin ɓɛ ɓɛ kɔkɔ̀rìghà Bɛ̀ll asu ɓi mɛ̀kɔ̀ɔ̀ maa mɛ rilàmì, ɓɛ kpilàkà, ɓɛ ɓakì mɛ̀su maa ɓi zi, ɓɛ ɓɔgsì Bɛ̀ll.

¹⁷Di ɓɛɛ̀ kpaakpaa lɛ: Tì faa wɔ̀ ɓìtògsɛ̀n Kan Bɛ̀ll à ìtèɗ wucèm, ànɛ à rì, ànɛ à ki ɓaghà, wɔ̀ɔ nɗèsii coo itèɗ wɔɔ, ù rèsì kìlàmì kɔɔ.

¹⁸Ɓìlɔ̀ŋ ɓi wokà bim, kìɓan kifog, cààmɛ̀n ki lɛ bim yɔɔ̀ yɛ̀ɛ ghɛnɛn ki yuù, rì ki lɛ u yɔm̀ ɓìloŋ; rì cààmɛ̀n ki lɛ u leɓ ɓɛ̀kìì-ɓìsay ɓɔɔ ɓɛ lɛ ɓɛ̀kpaŋzì-ɓìɓan, rì ɓɛ̀gherɛ̀n rì ɓumɓɛ ɓɛ ti ɓɛ nigì ɗii ɗyɔɔ, lɛ rì ɓɔɓti rì ɓɛ̀sɛ̀ɛ̀mɛn; cààmɛ̀n ki lɛ u cuùsi ɓumɓɛ ɓɛɛ̀ yooyogsì ziinɛ ki kpaŋi.

¹⁹Nni naà-Bɛ̀ll ìnɛ ì rì ɓi ɗyoo ɓi ɗùm ì ŋwàrɛ̀ngà, fìkɔrɔŋ fii fi riràrɛ̀n fi seèsèèrɛ̀n yì ɓi naa yìì ɓi ɗùm. Fɔɔnnɛ ŋwàaŋwàɗ à tumɛ̀ngà rìŋwàŋwàɗ, ɓyoo gom ɓi jɛ̀ɛ̀ ɓi ghaghààgh, baàbàn ì ɓoɓòg, zi i nyɛ̀ɛ̀nyɛ̀ŋɗɛ̀n, bol ì gɔ̀g ì sùùsùùrɛ̀n.