Read Bafia ÀPÒKÀLIƁSƐ̀ 13 Bible Online

ÀPÒKÀLIƁSƐ̀ 13 - Bafia bible

ÀPÒKÀLIƁSƐ̀ 13

¹Fɔɔnnɛ ǹghɛngà di nyàm ìdɛŋ yɛɛ̀ kpaŋkpaŋ yi ɓi rìɓày à kìkòn; ì ɓaghà mɛ̀tɔŋ ǹtɛ̀ɗ, rì mɛ̀to taàɓɛ̀ɛ̀, mɛ̀tɔŋ mɛ yɔ̀ mɛǹ mɛ ɓalàkà rì ɓɛ̀tàm ɓɛ rikem, mii mɛ tifena ɓisuu Bɛ̀ll mɛ ɓalàkà mɛ̀ kàngakɛn ɓi mɛ̀to mɛ nyàm ìnɛn.

²Nyàm ìnɛ ǹghɛngà ìnɛn ì pisɛ̀ngà ǹgɔn, mɛ̀kòò mɛ yɔ̀ mɛ ɓa yɛ̀ɛ mɛ̀kòò mɛ kpaò, ŋwɔm wu yɔ̀ wu ɓa yɛ̀ɛ ŋwɔm wu kimonɗo. Kìnààgɔ̀n ki tekà lɛ, rì ìtèɗ wu ki ɓaghà rì wɔ, rì ìkɔ̀ɔ̀ wu rilàmì, rì coo itèɗ wu rilàmì, ki fa nyàm ìnɛn.

³Nni ǹghɛngà kibog ki ɓi mɛ̀to mɛ nyàm ìnɛn rì coo beŋ i nfin, kìɓan kifog ɓɛ wɔɔ̀zìghà coo beŋ inɛ̀n. Zi bimiɗ ì kuùkùùghràg nyàm ìnɛn, ì ki nɔ̀ɔ̀ti yɔ̀.

⁴Fɔɔnnɛ ɓum ɓɛ̀cèm ɓɛ kɛngà kìɓaàgh mɛ̀ɗu ɓi mis mɛ kinààgɔ̀n ɓɛ ɓɔgsì kɔ, ɓisuulɛ ki faghà ìtèɗ wu rilàmì rì nyàm ìnɛn; nni ɓɛ ɓakà girig nyàm ìnɛn mɛ̀ɗu asu di ɓɛɛ̀ kpaakpaa lɛ: Ghɛn yɛɛ ri lɛ à ɓa yɛ̀ɛ yɔ̀? Ghɛn yɛɛ ki rì lɛ à ɗùù rì yɔ̀?

⁵Nni ɓɛ faghà nyàm ìtèɗ wulɛ yɛ̀ɛ kpaàkpaa ɓìɓan ɓi mɛ̀càŋà, ì feèfèngì Bɛ̀ll. Ɓɛ ki fa ti yɔ̀ ìtèɗ wulɛ, yɛ̀ɛ lami ɓɛ̀ŋwii mɛ̀tin mɛɓɛɛ̀ rì ɓɛ̀ŋwii ɓɛɓɛɛ̀.

⁶Nni ì pinìghà ŋwɔm lɛ yɛ̀ɛ fengi Bɛ̀ll, rì ɗii ɗi Bɛ̀ll, rì kìnuugh ki Bɛ̀ll, rì ɓum ɓɛ̀cèm ɓɛ ɓɛ ri ɓi ɗyoo ɓiɗùm.

⁷Ɓɛ ki fa nyàm ìnɛn ìtèɗ wulɛ yɛ̀ɛ ɗuùzi ɓɔ wɛ̀y, ì yag ɓɔ. Ɓɛ fa yɔ̀ ìtèɗ wu yɛ̀ɛ lami ɓumɓɛ ɓi mɛ̀pwìɗ mɛ̀cèm, rì mɛ̀kuu mɛ̀cèm, rì ɓìtòkì ɓìcèm rì ɓìlɔ̀ŋ ɓìcèm.

⁸Ɓum ɓɛ̀cèm ɓɛ ɓi ziinɛ, ɓɛ mii maa mɛ ka ɓaghà ɓi mɛ kànɛn ɓi kaàtà à cɛɓ à Man à jɔ̀ɔ̀ ànɛ ɓɛ wolà, à tumɛ̀n a rìyàghɛ̀n ɗi zi, ɓɛ ɓaagh gɛ mɛ̀ɗu ɓi zi ɓɛ ɓɔgsì nyàm ìnɛn.

⁹I ŋwaà rì rì mɛ̀reè à wog.

¹⁰I mum à yalɛ̀ngà lɛ à kɛ̀ɛ gɛ rìkpàn, à rì ɓiì kɛ̀ɛ, i ŋwaà woli mum rì gafàg, ɓɛ woli gɛ nyi rì gàfàg. Cààmɛ̀n ki ɓɛ̀gherɛ̀n ɓɛ ghɛɛ̀sɛɛ kì sììrɛɛ, ɓɛ ki ɓa ri ǹtyweeyi kɛɛ̀ki.

¹¹Nni ǹghɛngà nyàm ìdɛŋ di yɛɛ̀ kpaŋkpaŋ yi ɓi zi, Nyàm ìnɛn ì ɓaghà mɛ̀tɔŋ mɛɓɛɛ̀rɛn yɛ̀ɛ mɛ̀tɔŋ mɛ man à jɔ̀ɔ̀, ì ki tòtog yɛ̀ɛ kìnààgɔ̀n.

¹²Ì kìkìghà kìsay ri ìtèɗ wu rilàmì wu nyàm ì ǹtonto, ɓi mis mɛ nyàm ìncèm ìnɛn. Ì ki kàŋkaŋ zi, ri ɓumɓɛ miì lɛ ɓɛɛ ɓɔgsi nyàm ì ǹtonto ìnɛ ì ɓaghà rì coo beŋ i ǹfin ìnɛ ɓɛ ɓooghà ì wɔ̀n.

¹³Ì kìkì ɓɛ̀koŋnyoo ɓɛ ɓiɓan, à kpaŋ lɛ yɛ̀ɛ kɔsag yì ɗuu ɓi ɗyoo, ɗyɛɛ sɛǹ yì ɓi ziinɛ, ɓum ɓɛ̀cèm ɓɛ seesèè.

¹⁴Ì yègsì ɓumɓɛ ɓi ziinɛ rì dàm yi ɓɛ faghà yɔ̀ itèɗ wulɛ yɛ̀ɛ kiki ɓi mis mɛ nyàm ì ǹtonto di yɛɛ̀ kpaakpaa ɓumɓɛ ɓi ziinɛ lɛ ɓɛɛ ki kìfèèghrɛnà ki nyàm ìnɛ ɓɛ kpɛɛ̀ghà rì gàfàg ì ki ghɛɓ.

¹⁵Ɓɛ faghà nyàm ìmbog ìnɛ̀n ìtèɗ wulɛ yɛ̀ɛ ki lɛ kìfèèghrɛnà ki nyàm ì ǹtonto kɛɛ nyɛɛ̀nyɛ̀ŋɗɛ̀n lɛ di kɛɛ toòghrɛn ki ki lɛ, ɓɛɛ cuusi ɓum ɓɛ̀cèm ɓɛ ɓɛ ɓeni kìɓɔgsii kifèèghrɛnà ki ncèm kiǹ.

¹⁶Nyàm ì kìɓɛ̀ɛ̀ inɛ̀n ì kàŋkàŋgà lɛ rì ɓɔɓti rì ɓɛ̀sɛ̀ɛ̀mɛn rì ɓɛ̀guŋgum rì ɓɛ̀soghàsogha, rì ɓumɓɛ ɓɛ yin ɓɛkpàn rì ɓɛ̀roɓɛ ɓɛ ri ɓɛ̀kpàn, lɛ ɓɛ̀sɛ̀ɛ̀ ɓɛ̀cèm ɓɛɛ ɓalag rì kìrèmzɛnà ɓi càg ki weèlem, rì ɓisù,

¹⁷rì tì lɛ mum kɛ̀ɛ ɓa ri bee inɛ lɛ a lag com nsoò lɛ a kaɓ, di à yin ɗi kìrèmzɛnà kiǹ, kɛɛ ri ɗii ɗi nyàm ìnɛn, nsoò lɛ bàlì ì ɗii ɗi nyàm ìnɛn.

¹⁸Cààmɛ̀n ki lɛ mum a womzɛn kɛɛ̀ki, ŋwaànɛ à wom̀zɛɛ, a kaà lɛ à tanɛ̀n bàlì ì nyàm ìnɛn, ɓisuulɛ bàlì ìnɛn ì rì bàlì ì ɗii ɗi mum. Bàlì yìì inɛ̀n ì rì ɓɛ̀hɔnɗɛ̀ɗ taàfog rì mɛ̀tin mɛraa rì taàfog.